Joel 2

Allah Yahweh er tenepu tumi damai kuprepa, kupkamrenge tep, moupra kael kepkurume pepu upu

1Allahdi, ‘Ne mawa mutu’ tenen, Sion mutu wepra, er si Sion mutu deiki deipka cadi, erda amutupu kurure. Atep, yana tekrumudi bung-bung pena er si terompet, lelim peprumupa, amutu nesala yumadi, ‘Uo, mambul tumi tep peten penmange,’ tenepkamenge. Utenepmengedi, uo, sun Yehuda yala nesala yumada, akupkamre keca epmumdi, kwar kupserepa, yo moropsepkamsere. Ada mesum tep gume. Allah Yahwehdi, nun mali kunup keca kunumna tep, ‘Wenepkamne,’ teneramu tumi konum damai kupmara tep, ‘Uo, ikin keca nun damai kupmara’ tenen, kange mun kange doupra kunkamrume.

2Atumida dua ila di kunukmeteng pepra, ipdongopkamre. Dirine ton pio men kupkamre. Tonda yuk karen mutu jen talen nengda, sul po denge pio weik kuramretopu, mar podanai bangedi, amutu yuma singipdongonkamenge. Ukupmanto ngeda, dua sekdoua embaredi, mutu deiki paleramretopu kupkamenge. Angeda, pumun taru peda, ange utopu kupupa, nimidi men kael kepinge kupkamre. Akupkamre ngeda, yuk dortaru peda, kange di ton cap tamupra pio men kupkamre. Allah er tenepu tarupu kupkamre.

3Tonda, uku bu yaredi, akeca-keca yuma jepra gawal dangamretopu, sun ajen talen neng yangedi, akeca yuma uku dongonkamenge. Yana popmengedi, konum yukai banmange taruda, uku bu jeredi, akeca-keca yumada, ukudi jepra gawal dangrure. Ada, pumun taru amutu neitamai kuramu keca yumada, Allahdi Eden ban mutuda, akeca-keca yuma ketekepra deiamupa, pio telep kuramnga utopu kwamu mutu dinin, sun yu jen talen nengdi yana popsengopda, sul podi yumadi jepra gawal dakamenge.

Ukupmengopda, amutu paramre mutmuta keca yuma gum kupredi, katuai mutu utopu kuramretopu, kupkamsenge. Tonda, amutu kapu keca yumada, gawal ton pio men tapkamenge. Tonda, sun ajen talen nengdi, amutu yana warengkameng taruda, tenpu ngebo peda, ton men tapkamenge, yuma popnapu kupkamenge.

4Amutu poryankamseng jen talen neng, sun kamoda, kuda bisam mar podanai bankunga tep, kuda bisam bali deiki bukmengepa sepdara barepa, yan lelim ila di peramretopu kupmengedi, lelim pepkamenge. 5Sun ajen talen nengda, mutu dupai di belepra tengyana, embandangedi depra sangdongodankamenge. Ukupmenge taru, sun yan lelim pepkamengada, ukupmantoda nimidi kuda bisam bali deiki bungna tep, ketenepra domenge keca deiki bukra bangepa, lelim weika di pepbaramretopu kupkamenge. Tonda, kalkal peramre keca uku bu jeredi, bupu weik teng-teng peramretopu kupkamenge. Tonda, aneng sun banada, jen neng mar podanai benkungedi, nepra ketenepmengedi baramengtopu kupkamenge.

6Ajen talen neng yangedi nimi tep, bena warekra popkameng taruda, nesala yuma epmengedi, ‘Uo,’ tenen, kware weik kuprepa, yo moropsepkamre. Ukupredi nesala yuma mali kange doupmengedi, sun urasin yumada, pu jen neng bol utopu doupkamenge. 7Sun mar podana deiyo nengdi, mar podarbenkunge taru, sepdara baramengtopu kupkamenge. Tonda, ‘Ila lyom gel beilya wipdongomenga pumbon kuramenge neng tep, poptepe’ tenen, pio pe deipra, aila lyom gel beilya welerameng neng utopu kupkamenge. Sun aneng benkameng bisida, dumsisipu nepra ketenepmengedi benkamenge. Ton men domoptopkamenge. Kwiri bisipu tenpu benkamenge.

8Tonda, aneng sun bisi banmange taruda, ‘Menmena badoso,’ men pepdankamenge. Sun banmange dumsisipu benkamenge. Ukupmangadi sun tep, ‘Potepe’ tenen, kalekra dinungaida, bena yawarapra daepkamenge. ‘Poryanmaseng neng tep popkupe’ tenen, jen cap, mar cap, parang ya cap, yuk takke keca yuma, keteneiptenga peda, ajen talen neng yangedi, yanipdongopra popbisipkamenge. Atep, nundi anengda men bisbisa kaptepe.

9Sun jen talen nengdi, nesala ila ati arum dopra kuramenge mutu bena warekameng taruda, ukupra bena warekmengedi, ila lyom gel beilya wiamenga deiki, sepdara embendankamenge. Ukupmengedi, sun adipapu nimi sun ati neitamai yuma welepkamenge. Ange ukupmantoda, upula don nengdi, sun ati jendela bon bisi welepra wekmengedi, yuk nesala sun deiamenge keca upula doramengtopu kupkamenge.

10Ukupra, ‘Porbenkup’ tenen, gonga kepmengedi bankameng taruda, mutu yuma cap, im cap yumada, moropsepredi ila di lokamre. Ukupredi ware cap, kuru cap, keteng cap yumada kunukamre. Ataru kuru dirine peda, pio ton men kupkamre. 11Ataru Allah Yahweh er upuda, kulman poredi peramretopu upu pepredi, er nyapu mar porbankunge neng tep, ‘Ukupkurume,’ pepra upu karepkamre. Nimi porbenkameng nengda, denge pio weik men nukmanto kupkamenga cadi, sun anengda, Allah erdi peipretopu kupra mar porbenkamenge. Tek sisi pepne.

Allah Yahwehdi, ‘Yehuda tara nesala mali kuraminge kunumna tep wenepkamne,’ tenepu tumi, konum damai kupre pangeda, tenpu ngebo peda dimpepra men kuptenge. Ada, ila kange mun tumi kupkamra tep, pepsene. Nabi Yoeldi pepu.

“Israel nesaladi, ‘Nunda mali kunupe,’ tenepmengedi, ‘Nun nai Allah lyepropseo,’ pepra moropnengopda, gekepsetene,” pepu upu

12Allah Yahwehdi, “Yehuda tara kunge nesala tep, ila di wenepkamne,” pepu dinino, aupu pepu taru di, upepu. “Sun mali kurumu keca yuma tapmumdi, sun dipru kange yuma ne deiki deipnemumdi, ‘Uo nunda mali kuramepu nesala’ tenen, jen jena gum, si tepra kumumdi, ne tep ngolokra engenemumdi, moropnerumu pangeda, gekepsenedi lyepropkamsene,” pepu. Upepudi aupu ton pepu. 13“Sundi, ‘Uo, nun mali kupenge kunumna tep, nun nai Allahdi wenepkamser do?’ tenen, sun deiki opkal kwiritamamrum ngeda, tapkurume. Tali bol deikinge gum dinin, sun dipru neitamai mali tenemumnge yuma tapmumdi, mambul kange doupra engepmumdi, tamupra sun nai bo Allah Yahweh, ne damaipu yankurume.

Ada, ‘Allah erdi nun mali kupmepenge tep, adipapu wenepra men popkamser’ tenen, yankurume. Ada mesum tep men pepsene. Neda, nimi mali kunge keca yuma tep, adipapu menmena wenepnedi, men ponune. Tek sisi sun mali kunge keca kunumna tep, adipapu wenepra poptapsetene dinin, ‘Sundi tamupra ne damai yankameng do, gum do?’ tenen, dinapu kusenune. Neda nimi tep dipru karenerepa, bicau tenen, bouna di sun tep disenedi, kalekra tupa-tupa melimsenune. Ukusenuna cadi, sun mali kurumu keca tapmumnyopda, ‘Nedi wenepra popkamsene,’ tenepsi ngeda, ka di tamupra tenepnedi, sun tep men wenepkamsene. ‘Ukupra anesala tep wenepkamne,’ tenepsisi ngeda, tapkamne.” Allahdi pepu. Upepupa, Yoeldi pepu.

14Nun nai Allahdi, bicau teneserur ngeda, ware ngebo ton kael keptu do? Gum dinin, Allah er pedipapu tenepredi, ‘Anesala wenepra popkamne,’ tenepu ngeda, tapnedi, ‘Angeda men kupkune’ tenen, bicau tenepseredi, kaukepkamser do? Ukupredi, Allah er dipapu, sun damai kuredi, er dipapu tamupra telep kupra derinkamser do? Nun walwal dinin, ‘Ukupkamser do?’ tenena tep nengeda, sun yumadi Allah er gispal dona tep, karen keca anggur me cap, gandum cap doupra, kareryakankurume.

15Allah er kururai, Sion mutu deiki di bung-bung pena, er si terompet, ila lelim pepkamrume. Peprumu pangeda, amutu nesala yuma gekepmengedi, utenepkamenge. ‘E, peten kemna tep, terompet penmanga cadi, atumida, ila mambul tumi kupmara tep, alelim penmanga’ tenen, jen jena gum deiki di, si tepra talipu kupedi, ‘Allah moronkamepa tep, pepmenga’ tenen, sun yuma bupra yankamenge.

16Isarel nesala sun yuma tep pepmumpa, bupra yankununge. Ukupmengedi, Allah er sipu eremumdi, telep kupra kunkurume. Ukunkamrum taruda, sun wisi-wisi neng yuma cap, nyapu cap, melo nyapu cap upupmumpa, bupra yankamenge. Tonda, ‘Nimi kapul buru dipkamap’ tenen, kwerya keca keipmangepa, ati kunmange nerapu cap, nimi cap yuma, adipapu bupra yankununge. Anesala bupra yankameng taruda, sun kunge mutu cap, sun kunge ati cap yuma tapra, Allah tep mororyankamenge.

17Tonda imam-imam neng, Allah Yahweh er si eremna ati talepra, pel donung neng tep upepkurume.

Sun yumadi, Allah er upu pen ati bo neitamai cap, bura tara atolong lamdinai cap, wekmumdi Allah er tepapu engepra moronkurume. Ada, “Uo, nun nai bo Allah, nun kan mawa nesala potamna gume. Nun tep bicau tenepsememdi, melipra lyemdonkamsereme,” pepra moronkamrume. Tonda, sundi sun nai Allah Yahweh tep, upepra moronkamrume. “Nunda kan nyapu sisa kunupe. Kandi nun yuma popsemem pangeda, yuk mutu nesala yuma epmengedi, ‘Sun nai bo Allahda, dan mutu kurur do? Warya tep anesala men melimrur do?’ pepra autusengedi, mali pepra nyek-nyek penkamsenge,” pepra, ne Allah tep moronkamrume. ‘Yuk mutu nesala yumadi, upepra mali pepsenung’ tenen, Allah moronkamrume. “Allahdi peipseu,” pepra, Yoeldi lap peipu.

Allahdi tamupra er nyapu sisa Israel nesala kurami mutu tu tep, telep kupra deipu upu

18Yoeldi peiputopu, Israel nesala upepra moropi pangeda, Allah Yahwehdi tamupra Israel nesala, sun kurami mutu tu tep, ‘Gume, yuk mutu nesaladi, ne mawa mutu tep mali pepnung’ tenen, amutu yumada, telep kupra deipu dingeda, sun tep, ‘Ne nyapu sisa’ tenen, tamupra pio bicau tenepu. 19Allahdi er nyapu sisa Israel nesala tep, tamupra pepu upuda ake. “Ukutaruda, sun yuma tep, nedi anggur me cap, yagung du cap, gandum cap, tonda minyak zaitun co du mokon cap yuma, sun jena tep karepsene. Ukupsenada, sun yuma jemumpa bounkamsere. Tonda nedi sun tep wenepra tapsenepa, yuk mutu nesaladi sun tep, nalepra men autunkamsenge.

20Sun wenemna tep go karepnepa, utara mutu di sun damai poryankameng jen talen neng yumada, amenda taru nedi enepra donokamne. Ukupra ton tarada, enepronepa tu gelal sepudi, mali kupu mutupu dokotepnepa, karenai bena kunkamenge. Tonda menmena mepra yakankameng gungda, nedi pepnepa keteng yakan tara ila laut mokon deipka numnumaida, pio men kukimrurai benkamenge.

Tonda, amenda tekameng gungda, nedi pepnepa keteng dangban tara ila laut mokon deipka neitamai donokamne. Ukupnepa, ila laut mokon di, ajen talen nesala yuma jepropre pangeda, sun nong lyuredi, tong weik ila di penkamre. Ada sun jen talen nengdi, ne mawa nesala tep, ‘Popkamepe’ tenenung nesala tep, ikin keca sun nong deiki deipkamne. Tek sisi ne sun nai bo Allah Yahwehdi, Israel nesala tep, ila mambul pel dosenune.” Allahdi pepu.

21“Ange tep nengeda, sun kwar kuna pio meme. Sun wa peserurai yumada, sun kange dipru telep deiki dipu kunkamrume. Ukunkamrum taru yumada, ‘Uo, Allah Yahwehdi ila mambul pel dopsetue,’ teneramumdi, kange deipra kunkamrume. 22Tonda, amutu neitamai tali gam kurur keca yumadi, ‘Uo,’ tenen, pio kwar dangna gume. Ada, ukutaru sun jena tep mutmuta batu parur mutu yumada, kolupropu dinin, kange di tamupra embekpu kupra deipkusene. Tonda, du mourur ara co yuma cap, anggur tapu du cap, tamupra telep kupra deipsenepa, du weik mounkamre. Ukupsenya deiki di, sun du yuma pio weika di moupbankamre.

23Ange utopu, sun Sion mutu kurumu nesala yuma, ila di kange deipra pingpinga di kunkamrume. Ada, sun mali kun keca yuma gum kupra deipnepa, telep kupra kurumnya deiki di, ne Allah disenedi, sun nong deikipu kange deipra telep kudisenune. Tonda, nedi li keca karepmasentopu, douman keca karepmasenyane, ton taruda mo cemna karesenune. Ange utopu, ton taruda mo karepmasenetopu, dou li ton karesenune. Ada pumun taru nedi melipra kareramsisitopu, tupa-tupa pio kunkamsene.

24Ange tep nengeda, sun gandum wa perumaida, weika di yamupra karenkamsene. Ukupsenepa, sun gandum du wena tep, sapi bisamdi taikmengepa du telepnge dopra derirumaida, gandum cap pio weika di dinikamsere. Tonda, anggur co du cap, zaitun co du capda, dakra me purupmengepa, dinipredi minyak mokon weik kunkamre.”

25“Ada ne Allahdi sun wenemna tep, sul po karepsipa, ware kupra keteng tamun deiki di, sun wa pepra kouramrum keca yala-yala yuma, jepra gawal dakamseipa, gum kuamseu ngeda, ange yuma tamupra yo punupkamsene. Ada tali tep gume. Angeda, nedi sun wenemna tep karepsisi. Ukupmantoda, sul po denge weik dokotepsisa cadi, sun jen talen neng ila gung di yana nimi poramengtopu, sun damai sul po yanamidi, sun wa pepra kouramrum keca yuma, yana jepra gawal dangami.”

26“Dinino, ne damai tamupra yamumnyopda, sun jenda men putankamsere. Jen keca yala-yala yuma jerumupa, bounkamsere. Ukupserepa, teleppu kunkamrume. Ange yuma konum kupne pangeda, ne sun nai bo Allah Yahweh tep, ne si pio eremkamnerume. Ada ne sun nai Allah sun nai bo kunedi, sun damaida nimi men kupmanto keca yuma, mambul pel dosenuna tep, ne si eremkamnerume. Pio telep kupra deipsenepa, ne nyapu sun tep, yuk mutu nesaladi ton, nalepra men autunkamsenge.

27Atep, nedi melimsenepa, sun Israel nesala yumadi, ‘Uo, tek sisi Allah Yahwehda, nun kan-kan neitamai kurure,’ tenen, kael kemkamrume. Tonda, ‘Tek sisi nun nai bo Allah Yahweh, er tenpu kurure. Yuk Allah, er utopu ngebo ton pio men kurure. Allahda er tenpua,’ tenen, kael kemkamnerume. Ne Allah Yahweh kununa tep, ne nyapu sisa sun tep, yuk mutu nengdi, ali kun keca, sun nong deiki men deipkamsenge. Tonda, ne nyapu sun tep, yuk mutu nesaladi ton nalepra men autunkamsenge. Teleppu kunkamrume.” Allahdi pepu.

Allah er tumi kuprepa, Sambala karenkamrenge tep pepu upu

28Allahdi Israel nesala tep pepu. “Ne tenepsi taru konum damai kupre pangeda, nedi sun tuai nesala nong deiki, ne sambala karenkamsene. Ukupkamne taru sundi derinkamrum sal nyapu cap, ner nyapu cap yumada, ne upu peipnepa, gekepmengedi, sundi lap penkamenge. Tonda, sun wisi-wisi neng kunkamenga neitamai di, tenpu-tenpu neng ton ken mapmenga deiki di, ne karenkamne keca katuai keipnepa, epmengedi aupu ton lap penkamenge. Tonda, kaber neng cap, kaber nerapu cap, sun deiki di dortaru kunkamre keca, sun damai karepnepa, sundi kael kepmengedi lap penkamenge.

29Ataruda, ne sambala doproipnedi, ne tenepnetopu, ne pel don neng cap, ne pel don nerapu cap tep, Sambala sun deiki karenkamne. Yuk neng tomopra ateng koupmengedi, ikin pel dimengepa, kunumna dorona gum dipapu, yuk neng tep tali pel donge neng pe, nerapu pe, ne Sambala karenkamne.” Allahdi pepu.

30“Ukupne taruda, nedi nimi men kupmanto pel, ila mambul keca karepnepa, sun yumadi, ‘Uo, nun nai Allah Yahwehdi tenepu taru konum kupsere’ tenen, kael kepkamrume. Ada, im deiki cap, tuai mutu cap yumada, akeca karepkamne. Akarepkamne keca er sida ake. Ila yapi mokon cap, ila uku bu cap, tonda ila ketda dua bum bungamra utopunge cap karepnepa, ange yuma kuprepa epkamrume.

31Ukupre taruda, keteng kunukamre. Tonda wareda, yapi bi utopu kupkamre. Ange yuma kupkamre ngeda, ada Allah Yahweh er tenepu tumi kapul men kupmare taru dinin, damai kupre taru kupkamre. Ataruda, pio ila mambul taru cadi, ila kwar dakamrume.” Allahdi pepu.

32Dinino, ataru neitamaida, ware ngebo do yuma, Allah Yahweh er tepapu si eremredi, ‘Naio, ne melipra lyepneo,’ pepra mororur ngeboda, Allahdi anesala yuma lyepropkamre. Ada mesum tep men pepsene. Deiyoda, menop taru di, Allah Yahweh er pedi peiputopu, Sion mutu cap, Yerusalem mutu neitamai capda, ton nesala lyepropkamre. Gam tupa kunkameng nesalada, Allah Yahweh er pedi wepra deiamu nesala tep, upuprepa, gekepkameng nesalapu gam kunkamenge. Yuk nesala yumada, Allahdi poptaprepa, yuma depra gawal dakamenge. Allahdi peipupa, nabi Yoeldi seku.