Joe 3 | XteSC | STEP | Allah Yahwehdi pepu. “Ne tenepsi tumi konum damai kupre pangeda, Yehuda yala nesala cap, Yerusalem mutu neitamai kunge nesala yuma cap, bulupra deipnedi, sun nong cap, sun kunkameng mutu yuma capda, telep kupra deipkamne. Ne Allah Yahwehdi pepsena cadi, tek sisi nong kupkamre.

Joel 3

Allahdi Israel yala gum nesala, yuk mutu ban-ban yuma tep, upu bokeipredi wenepkamra tep, pepu upu

1 Allah Yahwehdi pepu. “Ne tenepsi tumi konum damai kupre pangeda, Yehuda yala nesala cap, Yerusalem mutu neitamai kunge nesala yuma cap, bulupra deipnedi, sun nong cap, sun kunkameng mutu yuma capda, telep kupra deipkamne. Ne Allah Yahwehdi pepsena cadi, tek sisi nong kupkamre. 2 Ukupkamne taruda, mutu ban-ban yuma, sun yuk mutu dakunge nesala yuma cap, amutu nesala sun jen talena neng yuma cap, bulupra deipnedi, sun yuma doupra, ila wenemnai doupra dubenkamne. Ada, ila banai er sida Yosafat ^{▼▼Yosafat – Ibrani upu deiki di, Yosafat perami upu deiyoda ake. Ada, ‘Allah Yahwehdi, nesala yuma tep upu bokra wenepkamre,’ tenen, Yosafat perami.} mutu dubenkamne. Ukupnedi, sun anesala yuma upu bokra deipnedi wenepkamne. Ada tali tep gume. Sundi ne nyapu sisa, Israel nesala tep, tulum tenepra mali kudiramya kunumna tep, upu bokeipnedi wenepkamne.

Tonda amutu nesaladi, ne nyapu Israel nesala popbisipidi, ateng koupra yuk karen mutu dubenamya tep, wenepkamne. Utopu, ne mawa mutu tu yuma yana dalupra, dopra bokrapidi, yuk nesala kareramya tep wenepkamne. Yuk karen mutu nesaladi, ne nyapu Israel yala nesala enepra donongamipa, yuk-yuk mutu dabena kuramya tep, anesala ila di wenepkamne.

3 Tonda, sun amali kun keca talepra kurami neng dipapu, ne nyapu sisa, Israel yala nesala sun tep bisbisa kapidi, ateng koupra sun wenemna ati bena deiamidi, ‘Ware kupkamep do?’ tenen, peten kemna keca, er sida undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} pel dopnedi, ‘Awenemna ati kunung neng kan-kanda, ware ngebo doropkaman do?’ tenen, kurpeteramidi, anesala dopra, ikin pel dimamipa, tali pelpu dorami. Ukuramidi, kaber neng dopropidi, ‘Tali-tali nyangne nerapu dopropkun’ tenen, anerapu kunumna tep, anerapu sun deiyo neng tep karepi. Ange utopu, Israel yala kaber nerapu dopropidi, yuk neng tep karepipa, co bo dopropnedi, sundi aco bo deiki di, yu me kunupra jerami. Ukupra pio mali weik kuramya tep, amutu nesala yumada, ila di wenepkamne. Allahdi pepu.

4 Allahdi aupu ton pepu. Uo, sun Tirus mutu kurumu neng cap, Sidon mutu neitamai kurumu neng capdi ne tep nengeda, ‘Erda mambul ngebo guma,’ tenenerumudi mali kudinerum do? Uo sun Sidon mutu kurumu neng cap, Tirus mutu kurum neng cap, Filistin tara kurum nesala yuma capda, nedi ware mali keca karepsisipa, sundi ne tep mali kudinmanerum do? Sun kange di, ‘Allahdi kupseu ngeda, nundi ton kwang dakamepe,’ tenenerumudi, ne mawa nesala tep mali kudirum do? Utenenerumnya tep nengeda, nedi sun damai ikin keca menmena deipkamsen ngeda, adipapu doropkurume. Nedi sun tep kwang dakamsene.

5 Ukupkamsenada, tali tep gume. Sun dipapu ne si eremna ati pumbon neitamai deiamnei gat keca, kunumna weik telep keca, er si emas cap, perak cap, ne mawa keca, pio mambul keca yumada, sundi upula dodoramnerume. Dodoramrumdi, sun pe mutu tamupra dubena, sun isok si eremna tep talepra, si eremamrum ati neitamai doupra derirbaramrume.

6 Tonda, Yehuda mutu kurami nesala cap, Yerusalem mutu neitamai kurami nesala capda, upula dalupra dopropnedi bisbisa kapra, sun pe mutu tapra, pio karen mutu dubenamrume. Ne mawa nesala konum doupra berum ngeda, sun Yunani nesala kori dubena co bo kunupra dororamrume. 7 Ukuramrum dinino, ukutaruda, tek sisi sundi, ‘Kunupkamep’ tenen, ne nyapu doupra bena kunuamrum mutu neitamai doprapnedi, amutu di tapra, sun pe Yehuda mutupu tamupra duyankamne. Ukupne dingeda, sundi anesala tep, ila di mali kudiramruma cadi, tamupra kwang dakamsene. Sundi mali kuramrum ngeda, ka di tamupra, sun pe giso deikipu deipkamsene.

8 “Ada tali tep men pepsene. Ne mawa nesala tamupra duyane dingeda, kwang dangna tep nengeda, nedi sun yuk karen mutu nesala, sun sal nyapu cap, sun ner nyapu cap yuma, doprapnedi, Yehuda yala nesala koripu dubenepa, anesaladi sun nyapu yuma kunupkamenge. Ukupra kunupmengedi, ka tamupra Israel nesaladi, sun nyapu dopropmengedi, yuk ila karen mutu, Syeba mutu kunung neng koripu dubena kunupkamenge.

Syeba mutu nesaladi, sun Tirus mutu nyapu cap, Sidon mutu nyapu cap, Filistin mutu nyapu cap yuma, kunupmengedi, pio kange mun mambul pel dimkamenge. Ada mesum tep men pepsene. Neda, Allah Yahwehdi pepmasena tep, angeda tek sisi nong kupkamre.” Allahdi pepu.

Allahdi, yuk mutu nesala yala-yala yuma tep, upu bokeipredi, wenepkamra tep, pepu upu

9 Allahdi pepu. “Apeipne upuda, nesala ban-ban yuma kunungai bena lap perbenkurume. Ukupmumpa, nesala yuma gekepmengedi, sun jen talen neng yuma ketenepra derinkamnunge. Tonda, mar podana tep kael neng cap, jen talen neng sun deiyo neng cap, bena pepmumpa, gekepmengedi ketenepra kunkununge. Ne tenepsi mutupu benkununga tep pepne. 10 Aupu gekepmenge dingeda, wa palipra pena tep ketemnung kecapu, ka di tamupra nimi pona tep keca, takke lupra keteneipkununge. Ange utopu, wa pena tep ketenepra pel donge kecapu, sekrapmengedi, nimi lukra pona tep keca, parang ya takke lupra keteneipkununge. Ukupmum taruda, pio puto boun kuramre ngebo peda, ‘Neda, ila puto jen talen nengdi kuramengtopu kunkamne’ tenen, ketenem dinkamenge.” Allahdi pepu.

11 “Sun amutu-amutu yuma, konum kupmum dingeda, nesala ban-ban yuma dana-dana kurumu nesalada, menmena ila mutu banai, er sida Yosafat mutu banai, ortara bupra wengberume. Ada, ‘Sun orbeso,’ pepra deipmumpa, sun abupra wekameng neng yumada yakankamenge. Yangedi, sun yuma bupra wekmengopda, anesala ban-ban yuma tep, ne Allah Yahwehdi, upu bokeipnedi, wenepkamsene. Atep, ne Allahdi, ne jen talen neng cap, ne jen talen malaikat cap yuma duyankamne.

12 Atep, sun ban-ban yuma kurumu nesaladi, ‘Nunda upu sirya Bondin mutu benkamep ja’ tenen, ketenepra dinkamrume. Ada mutu si Yosafat mutu banai dipapu, ne Allah Yahwehdi ne nyapu sisa, Israel neng, ne mawa nesala cap, sun damai kunung nesala yala-yala yuma tep, upu sirya bokeipkamne. 13 Sun dana-dana tara kunge nesala yumada, pio ila mali kunung nesala kununga tep, sun wenemna taru konum dam kuprepa, ukupmantoda, gandum wa pepra kouamenga wisiamrepa, kipkunge taruda, yu weik parang ya er si sabit di sekra kiramengtopu kupkamne. Tonda, anggur tapu du wa pepra kouamenga wisiprepa, dakrapmengedi, me purunai bena deipra yanipmengepa, mokon weik deipredi, diniksaka embaramretopu, anesalada weika di wenepkamne.” Allah Yahwehdi pepu.

14 Yoeldi pepu. Allah Yahwehdi, ‘Gawal dakamre taruda, ukupra wengbenkameng,’ tenepudi, ketenepra deipu mutu wengbenkameng nesalada, nimi denge pio weik men nukmanto beribu-ribu neng bena kunkamenge. Amutu neitamai bulupra wengbenkunge taruda, tali taru gume. Ada, Allah Yahweh erdi tuai nesala yuma, sun mali kunge keca kunumna tep, wenepkamre tumi konum damai kupyopda, adipapu yankamre. 15 Ataruda, keteng cap, ware capda kunukamre. Tonda kwirye yumada, dirine gum kupkamre.

16 Ataruda, Allah Yahweh er kunkamrai, Sion mutu deiki yana tengyaredi, ila upu di peprepa, nesala yuma gekenkamenge. Ada, Yerusalem mutu neitamai di ila upu peprepa, tuai nesala yuma gekenkamenge. Er upu pepkamrada, kulman poramre utopu, peprepa gekepkamenge. Ataruda, Allah er upu ila di pepre pangeda, im deiki kure keca cap, tuai mutu ban-ban yuma cap, lokamre. Dinino, Allah Yahweh er nyapu sisa Isarel nesala, sunda men tapkamre. Erdi sun tep pio melipra kalengkamra cadi, sunda kware men kunkamre. Sunda, er damaipu telep kupra pio akunkamenge.

Yehuda mutu cap, Yerusalem mutu cap, pio telep kupra deiprepa, teleppu kunkamra tep, pepu upu

17 Allahdi pepu. “Uo, sun Israel nesalao, sundi ataruda, ne kunkamne keca yuma katuai kuprepa epkamruma cadi, sundi betapra kael kepkamrume. Ada, ne sun nai bo Allah Yahweh kunune. Neda Sion mutu deikipu kunune. Ukununa tep amutuda, nedi wepra deiamsa cadi, amutu neitamaida, ne dirine pio weika di kunkamre.

Tonda, Yerusalem mutu neitamai peda, ne mawa mutupu kurura cadi, nedi telep kupra deipnepa, mali kun keca tenpunge peda, amutu neitamaida, mali kun keca tenpu peda, pio ton men kunkamre. Dumsisi kecapu kunkamre. Atep nengeda, amutu neitamaida, yuk nesala yala-yala yuma, nedi wepra men deiamsi nesalada, nimi bo neng utopu nesala cadi, amutu neitamai ton pio men wekamenge.

18 Sion mutu cap, Yerusalem mutu cap, pio telep kupra deipne taruda, amutu deiki yumada, anggur tapu du wa pepmengepa weik kunkamre. Ataruda, anggur tapu du dakra purupmengepa, anggur me mokon weika di gwepra jenkamenge. Tonda, sundi talepra peinkameng gam kun keca yala-yala yuma di, amutu neitamai telep mutmutapu parepa, sapi bisam cap, kambing bisam cap jepmengepa, sun nyapu moum teyung weik deiprepa, karenkamenge.

Tonda, Yehuda yala mutu neitamai embaramre me yumada, pio men cepropkamre. Yo me telep kupra pio embankamre. Tonda, tenpu me ton, Allah Yahweh er si eremna ati damai di, me bunga bukra embankamre. Aembankamre meda, mutu si Akasia ban mutu di embankamre. Ame embaredi, amutu tu yuma telep kurepa, kounkameng keca yala-yala yuma peda, telep kupra bongorepa, ila kange derinkamenge.

19 Dinino, ange yuma ukupkamre taruda, Mesir mutu yumada, mutu katawaipu kuptapredi, tu yuma peda gelal sepkamre. Tonda, Edom mutu yuma peda utopu, tu gelal sepropredi, mutu katuaipu kuptaprepa, pio malipu kunkamre. Amutu butene neitamaida, nesala ton pio men kunkamenge. Ada mesum tep gume. Sun amutu nesaladi, Yehuda yala nesala yuma tep, yana poryakaramipa, sun yapi tali sangamnga kunumna tep wenepkamsene. Ada mali kun keca ton men kuramipapu, Mesir mutu neng cap, Edom mutu neng capdi, Israel nesala yuma poramya tep, wenepra popkamne.

20 Dinino, Yehuda mutu kunung nesalada pio tep, Yehuda tara neitamai tupa akunkamenge. Tonda, Yerusalem mutu neitamaida, ne mawa nesala cadi, pio tupa akunkamenge. 21 Yehuda mutu neitamai kurami nesala cap, Yerusalem mutu kurami nesala yuma cap, poramipa sun yapi sangamunge kunumna tep, ne Allah Yahwehdi, ‘Sun aporami nesala tep kwang daknedi, popkamne,’ tenepsi ngeda men tapkamne. Sun mali kurami nesala yumada, wenepra popkamne. Ne Allah Yahwehda, Sion mutu neitamaipu bouna di dimpepra kunkamne,” Allahdi peipupa, nabi Yoeldi seku.