Joh 10 | XteSC | STEP | Yesusdi aupu pepu. “Tek sisi pepsene. Ware ngebo do yuma, domba bisam beilya buplan bisi gum dinin, inipredi, yukai di domba beilya pumbon wengre ngeboda, upula dorona ngebo kurure. Mali nengdi yuk neng keca dalupra dororamengtopu kurure.

John 10

Yesus domon upu deiki di, Domba Peina Deiyo Ngebo cap, domba cap tep, pepu upu

1 Yesusdi aupu pepu. “Tek sisi pepsene. Ware ngebo do yuma, domba bisam beilya buplan bisi gum dinin, inipredi, yukai di domba beilya pumbon wengre ngeboda, upula dorona ngebo kurure. Mali nengdi yuk neng keca dalupra dororamengtopu kurure. 2 Dinino, inimna gum, domba beilya buplan bisipu katuai wengre ngeboda, ada domba peina deiyo ngebo kurure.

3 Angebodi, ‘Domba beilya pumbon wekun’ tenen, yarepa, er domba kalengna tep melimna ngebodi, beilya buplan pangdirure. Pakeiprepa, angebo wekreyopda, domba deiyo ngebodi er upu perepa, er domba bisam yuma er upu konum kael keamya tep, kange deipra gekenunge. Domba deiyo ngebodi, er domba yuma tep, sun si yuk-yuk pepredi ngaipyopda, gekenunge. Er mepra beryopda, sun amenda dombangedi, bura banunge.

4 Er domba bisam yumadi, er ngairur upu konum kael keamya tep, er talere domba yuma doupredi, mepra beryopda, sun amenda dombanunge. Ukununga deiyoda, er upu konum kael keamiya tep, er mepra barepa dombanunge. 5 Er tep kange deipra dombanung dinin, yuk tali nengdi, er domba bisam tep ngaiptenga peda, tek sisi men yakankamenge. Deiyoda, sun men kael keami neng, yuk tali nengdi ngaimenge upuda, sun gekepra men kael keamya cadi, mepra betenga peda, adomba men domyankamenge. Kware tep, sepdaro bura bendopkamenge,” Yesusdi pepu.

6 Yesusdi adomon upu pepupa, sun awekmaidi, gekemai nesaladi, ‘Deiyo ake’ tenen, moupra men kael kepi. 7 Betapra men kael kepya tep nengeda, Yesusdi kange di ton cap aupu nong neitamai ngeda katuai di lap pepu.

“Tek sisi pepsene. Neda, domba beilya buplan bisida, ne kunune. 8 Ne kapul men yasi taru, ‘Nun adano,’ pepra yai neng yumada, upula dorona nesala utopu kurami. Upula neng kurami dinin, ne tek sisi dombada, aneng perami upuda men gekerami.

9 Tonda, neda domba beilya buplan bisi utopu kunune. Ware nesala do yuma, ne deiki dipapu, ne bisipu wengbange nesala yumada, Allahdi lyepkamre. Lyepredi anesala tep kalekra melimreyopda, teleppu kunkamenge. Domba bisam bura embangedi, jen telepai epra jepmengedi, kange di ton cap beilya pumbon yakaramengtopu, ne nyapu sisada, daembangedi teleppu kunkamenge.

10 Upula don nesaladi, upula dona cap, potamna cap, domba bisam yuma popra gawal dangna cap tep, yakanung dinin, neda adeiyo tep men yasi. Ne domba yuma gam pio kupmengedi, sun kun keca yuma cap, sun kunkamenge nge yuma cap, ‘Pio teleppu kunkameng’ tenen, yasi.” Yesusdi pepu. 11 Upepudi aupu ton pepu.

Ne Yesusda, domba bisam peina deiyo ngebo utopu, pio telep ngebo kunune. Telep peina deiyo ngebodi, er gam kuna tep, ‘Ne mawa,’ men tenepredi, er domba tep er dipru cap, er gam kun keca cap karerure. ‘Ne domba kaleknyopda, ikin men kurure. Popnenunge’ tenen, men tenerure. ‘Popnenga peda telepe pua,’ tenerure.

12 Domba peina tep, ‘Pel dopkameng’ tenen, co bo karepmengepa, tali pel melimna nengda, domba peina deiyo ngebo kurya utopu men kununge. Sun tali pel melimna nengdi, domba tek sisi men talenunga cadi, yu kamdi, ‘Domba poptapra jepkun’ tenen, yakare taruda, atali melimna neng epmengedi, domba yuma tapra, sepra banunge. Sepra bendopmengopda, yu kamdi adomba bisam bulupmengai poryakarepa, domba yumadi kware tep, yuk-yuk bupra saka sepra banunge.

13 Domba bisam peina tep, tali melimna ngebodi, adomba tep tek sisi bicau men tenerure. Dipru men karerure. Erda, ‘Gume, co bo karepnenga deiki di, tali pelpu donkamne,’ tenere ngebo cadi, ‘Adombada dapoptenge, dakwapye’ tenen, domba tapredi, sepra barure. 14 Sun tali pel dopra kunge nengda ukunung dinino, neda pio telep Domba Peina Deiyo Ngebo kunune. Ne talenun nesala yumada, konum kael keamsisi. Sunda ne domba utopu kununge. Ange utopu, ne talenun nesala, ne domba utopu nesala yumadi, ne tep konum kael keamnei.

15 Ange yuma utopu, ne nai bo Allahdi kael keamneu. Tonda, nedi ne nai bo Allah tep, konum kael keamsi. Nedi, ne domba bisam tep nengeda, ne dipru cap, ne gam kuna cap karenune. Atep, ‘Popnenung’ tenena gum dipapu, ne domba tep, pio kalekra melimnune. 16 Adomba beilya pumbon ne domba bisam akunung dinino, ne talenun domba weik ton, yukai ton kununge. Abeilya pumbon men kununge. Adomba bisam peda, ne adipapu dopra duyakankamne. Adomba peda, ne upu pepra ngaipnyopda, ne upu gekepnengedi, ne damai yakankamenge. Sun ton konum yangopda, domba bisam tenpu gungpu wisipmengedi, kikiman kunkamenge. Neda, sun peina deiyo ngebo tenpu pio kunkamne.

17 Ne nai bo Allahdi kange derinerurdi, dipru karenerura deiyoda pepkusene. Ada, nedi ne gam kuna tep, ‘Ne mawa,’ tenena gum dipapu, ne domba utopu nesala lyemna tep, ne pe nong karepnepa, popkamneng dinin, amendada kange di ton cap gam bukamne. Ukununa cadi, ne nai Allahdi kange derinerure. 18 Ne gam kununada, nimidi dalupra men dopropnetenge. Dinino, ne kange dipu, ne pe nong karepnepa, popkamnenge. Ne gam kunada, nesala lyemna tep, karepkamnenge cap, kange di ton cap ne gam kuna dopropkamna capda, nedipu kunkamne. Adeiyo keca talepra kunune. Ne nai bo Allahdi, adeiyo keca karepneupa, dopropsi. Ne dena cap, ne gam kuna cap deiyo putoda, nepu talenune. Nimidi ne gam kuna dalupra men dopropnetenge. Yesusdi pepu.

19 Upepu pangeda, sun Yahudi deiyo neng gekepidi, aupu pepka deiki di, sun kange yuk-yuk tenepmai. Tenpu kange tenepra, amsepu men tenenmai. 20 Kange yuk-yuk tenenmaidi, ton nengdi, “Angeboda, isok konum taleamupa, mutana ngebopu kurura cadi, warya tep er tali peptapmaser upu gekepkup do? Er upuda nong men kupkamre,” pepi. 21 Upepi dinin, ton neng dingeda, “Gume, nun kayapu, erdi penmaser upuda, isokdi aupu utopu upu men peptue. Isok er puto deiki di asuru puamu ngebo kweteiptupa, telep kupra eptu do? Gume. Angeboda isok taleamu ngebo gume,” pepi.

Yahudi yala deiyo nengdi, Yesus tep, teka men tenepi upu

22 Amenda taruda, sun Yahudi yala nengdi, ila kalemna taru ton ketenepi. Akalemna deiyoda, ‘Allah er si eremna ati telep keipkamser’ tenen, Yerusalem mutu doami ati tep, keteng tamun yuma kalemami. Ada bul li neitamai kalemami. 23 Akalemna taru neitamai, Yahudi yala nengdi, Allah er si eremna ati dinin, pumun taru kuramu Raja Salomodi kauai bungna tep domu ati, er sida serambi, Yesusdi akeca ati arum amngai bisi banmau. 24 Banmaupa, sun Yahudi yala deiyo neng bulupra yanmaidi, Yesus kikiman banmai taru di pepi. “Kandi katuai men lap pepsemempa, nunda tupa tenimtonapu kunupe. Ware kuprap taru ton cap inimna utopu kunkamserum do? Allahdi, ‘Nimi lyepkamre’ tenen, wepra deiamu ngebo, Kristusda ^{▼▼Kristus – Ibrani upuda Mesias penunge. Yunani upu deiki di Kristus penunge dinin, deiyoda tenpu.} kanda akurem do, gum do? Kanda, Nimi Lyemna Ngebo, Kristus, tek sisi kumemnyopda, katuai dipu pepsetume,” pepi.

25 Upepipa, Yesusdi tamupra aneng tep pepu.

“Ne konum pepsisi dinin, sunda tek men tenepnerume. Ne nai bo, er si deiki di, nimi men kupmanto pel donunada, akeca deiki di konum katuai kupsere. 26 Ne kununada, konum katuai kupmaser dinino, sunda, ne domba utopu, ne nyapu men kuruma tep, teka men tenepnerume. 27 Ne domba utopu nesala ne nyapuda, ne upu gekepra domyakanenunge. Nedi ne domba tep kael keamsi. Sundi ne tep domyakanenunge.

28 Nedi ne nyapu tep, gam pio kuna deiyo keca karepnepa, pio gam kunkamenge. Sun pio men depkamenge, men gum kupkamenge. Ware neng do yuma, ne nyapu ne buru pumbon talenepa, yuk nengdi dalupra men dopropnetenge. 29 Ne nai bo Allahdi ne tep anesala kareamneu. Allah erda, akeca-keca deiki tara kuredi, ila puto ngebo kurura cadi, ne nyapu er buru pumbon talerepa, nimidi dalupra men doproptenge. 30 Ne cap, ne nai bo Allah cap nun tenpua.” Yesusdi pepu.

31 Yesusdi upepupa, sun Yahudi deiyo neng gekepidi, yu weik kupupa, ‘Gel di poptapkupe,’ tenepidi gel dopra ketenepmaipane, Yesusdi sun tep pepu. 32 “Ne nai bo meliamneua deiki di, nimi men kupmanto keca weika di pel domsipa, dinerume. Nimi men kupmanto pel, ila mambul pel doramsinge neitamai di, ware mali pel dopsa tep, sundi, ‘Popkupe’ tenen, gel dopra ketenepra dinmanerum do?” pepu.

33 Upepupnen, sundi, “Gume, kandi nimi men kupmanto keca pel doamumnge tep, gel di men popkukepe. Ange gum dinin, kandi, ‘Ne nai boda Allah kurure, nunda tenpua,’ pepmarema deiki di, pio mali kunmareme. Kanda, tali tuai ngebo kurum dinin, aupu pepmauma deiki di, ‘Neda Allah utopu kunune,’ pepra, adeiki di Allah er si yanipmareme. Ange deiyo tep, ‘Popkupe,’ tenepkepe,” pepi. Upepipa, Yesusdi tamupra pepu.

34 Sun ton tenipetepso. Sundi, ‘Aupuda mambule’ tenen, talerum upu neitamai, buku Mazmur sekami ngeda, apepkusen upu akapmar do, gum do? Abuku neitamaida, Allahdi er upu dopropi neng, nimi deiyo neng tep, aupu pepu.
‘Sunda Allah er nyapu ^{▼▼Allah nyapu – Ton Allah upu buku neitamaida, ‘Sunda allah utopu kurume,’ pepra seki. Ton buku neitamaida, ‘Allah er nyapu kurume,’ pepra seki.} kurume.’ (Mazmur 82:6)

35 Nun kaele, Allah er upuda, men gum kupkamre. Allahdi perur upu yumada, nong tek sisi kupkamre. Allah upu tek sisi akapmara neitamaida, Allahdi er upu karepupa, dopropi neng, tuai mutu nimi deiyo neng tep, “Sunda, Allah er nyapu kurume,” pepu. 36 Aneng tep, “Ne nyapu,” pepka cadi, Allahdi, ‘Ne dipru ngebo’ tenen, kange deipudi, wepra deiamu ngebo, tuai mutu dokotepneu ngebo tep nengeda, “Allah er Mi Sisa,” men pepdatene do? Atep nedi, “Allah er Mi Sisa kunune,” pepmanua deiki di, sundi, “Allah er si yanipmareme,” pepmanerumada, ware keca deiyo tep do? 37 Ne nai bo Allahdi pel dore keca men kuptene teptoda, ne tep, teka men tenepkamnerume. Dinino, Allah er pel doptene teptoda, ne tep teka tenepkamnerume. Yesusdi pepu.

38 Upepudi aupu ton pepu. “Dinino, ne nai bo Allahdi, pel dore kecapu pel dopnyopda, adeiki di adipapu teka tenepnerume. Sundi ne tep nengeda, ‘Tali ngebopu,’ tenepnetum dinin, nimi men kupmanto keca, ila mambul pel donunada, epmumdi, adeiki di teka tenepnerume. Apel donuna deiki di teka tenepnetumopda, amenda kael kepkamrume. Ada, ne nai bo Allah cap, ne cap dipru dukdongopra amsepu kunume. Er cap, ne capda nun tonpua. Ange kael keprumdi, moupra tenenkamrume.” Yesusdi pepu.

39 Upepupa, sun Yahudi yala deiyo nengdi, adipapu yu kupupa, ‘Yesus popkupa tep, tomopkupe’ tenen, piripterepi dinin, Yesus loktapra beupa, men tomopmanto kupi. 40 Ayuma ukupu pangeda, Yesusdi kange di ton cap, amutu tapra, Yordan me goupra, ortara mutu neitamai beu. Yesus beu mutuda, ada men di Yohanesdi teka tenepi nesala dopra, me dongoramu mutu beu.

41 Amutu neitamaipu Yesus dakuramupane, nesala gung weik, er damai yakaramipa, kikiman kurami. Ataruda, anesaladi Yesus tep upepi. “Gume, Yohanesdi nimi men kupmanto keca, ila mambul pel men doramu dinino, erdi angebo Yesus tep, lap peramseu upu yumada, tek sisipu peramseue,” pepi. 42 Yesus amutu neitamai kuramu taruda, nesala weika di, er tep teka tenepidi gung weik kupbarami.