Joh 13 | XteSC | STEP | Ataruda, sun Yahudi yala nesaladi, Kaplemne Kalemna tep, ambutumi kalepkamai tumi kupu. Ataruda, Yesusdi, ‘Tuai mutu tapnedi, ne nai bo Allah damai benkamne’ tenen, konum kael keamu. Yesusda, tuai mutu kuramu taru neitamai yumada, er wepra deiamu neng, sun 12 neng tep, bicau tenepra melimamu dinin, er tuai mutu kuramu taru gawal dakmanto kupka cadi, ataruda, ‘Ne nyapudi, nun nai Yesus pio ila di bicaue teneseredi, dipru kareserure, tenepmengedi, kael kepkameng’ tenen, erdi alukunda kupu keca deiki di peterepu. Akecada, ake.

John 13

Yesusdi, er wepra deiamu neng, 12 neng sun yan tep, me kupu taru tep, pepu upu

1 Ataruda, sun Yahudi yala nesaladi, Kaplemne Kalemna tep, ambutumi kalepkamai tumi kupu. Ataruda, Yesusdi, ‘Tuai mutu tapnedi, ne nai bo Allah damai benkamne’ tenen, konum kael keamu. Yesusda, tuai mutu kuramu taru neitamai yumada, er wepra deiamu neng, sun 12 neng tep, bicau tenepra melimamu dinin, er tuai mutu kuramu taru gawal dakmanto kupka cadi, ataruda, ‘Ne nyapudi, nun nai Yesus pio ila di bicaue teneseredi, dipru kareserure, tenepmengedi, kael kepkameng’ tenen, erdi alukunda kupu keca deiki di peterepu. Akecada, ake.

2 Ataruda, Kain Jen Ngebodi, ‘Angebo mali kupkamre’ tenen, Simon er mi Yudas Iskariot tep, er dipru konum tamopupa, Yudasdi, ‘Yesus popkamang’ tenen, tonda, ‘Nimi upu kai perbenkune’ tenen, konum ketenepu. Alukunda sun jepkoi keca bokra karenmai. 3 Yesuspuda, konum kael keamu. Ada, ‘Allah er kuryai di yasitopu, kange di tamupra er damai welerbenkamne. Ne nai bodi, akeca-keca yuma ne amutara konum deipmanerpa, ne puto deiki di akeca-keca yuma bisbisa kaptene,’ konum teneamu.

4 Yesusdi ange yuma konum kael keamudi, kwar gum, tali kange doupra kunmaua cadi, sun yuk nengdi jen gapra keteneipmaiya di, bokra deipembanmai taruda, Yesusda tekrou. Tekrapudi, er jen keca acapu tapra, er deiki tara kenengmau opkal kwiriptapudi, kilin opkal handuk dopra, er deiyo tara koupdongopu. 5 Koupdongopudi, me gwepra loyang pumbon dikdongopudi, gonga kepra, er nyapu sun yan yuma me kupra banmau. Sun yan me kupra banmau dingeda, er deiyo tara koupdongopmau handuk di, sun yan deiki me kilipbanmaue.

6 Sun yan me kupra kilipbanmauanen, Simon Peterus bukmauai yanmau. Yanmaupa, Peterusdi, “Naio, kanda ne deiyo ngebodi, ne yan me kupkunerem do?” pepra asipetepupa, 7 Yesusdi tamupra, “Kao, ukutaruda, ne kunmasen keca tep, ‘Deiyo neitamainge ake’ tenen, men tenepmarem dinino, amenda tarupuda, moupra kael kepkamreme,” pepu. 8 Yesusdi upepupa, Peterusdi tamupra, “Gume, Naie. Kanda mambul weik ngebo cadi, ne yanda pio men me kupkamnereme,” pepu. Upepupa, Yesusdi, “Me men kupkenyopda, ne tara ngebo men kunkamreme. Tali ngebopu kunkamreme,” pepu.

9 Upepupa, Simon Peterusdi tamupra pepu. “Uo, ange tep nengeda, ne yanpu gume. Ne buru cap, ne giso cap yuma, me kupneo,” pepu. 10 Upepu dinin, Yesusdi tamupra pepu. “Gume, me konum gekmenge nesalada, sun nong yumada, teleppu kurur dinin, sun yan puda me kuramenge. Ne nyapu sunda, dereng nge gum, teleppu kurum dinino, ton ngeboda kapula,” pepu.

11 Yesusdi, “Sun yuma konum telep kurum dinin, tenpu ngeboda kapula,” pepkada, mesum tep men pepu. Deiyoda, ‘Yudasdi nimi upu kai perbenkunere,’ konum tenepka tep, aupu domopudi, pepu. 12 Yesusdi, er nyapu sun yan me kupra banmauanen, konum sengpepudi, er deiki tara kwiriptapmau opkal, kange di ton cap kenekudi, arup bukmauaipu tamupra bungbeu. Bukudi, upepu.

Nedi sun yan me kupmasenada, nong neitamainge moupra tenepmarum do, gum do? 13 Ange deiyoda lap pepkusene. Ada, sundi ne tep, “Nun peteremna deiyo ngebo, nun Ila Nimi Deiyo Ngebo,” pepra penerumada, ange tek sisi kununa cadi, ito penerume. 14 Ukutaruda, nedi, sun deiyo ngebo, tonda, sun peteremna deiyo ngebodi, sun yan konum me kupmasentopu, sun yumadi, sun kayapu neng yuma pe tep, yan me kudankamrume.

Ada, sun yumadi, sun kayapu yuma tep, ‘Aneng yumada, ila mambul dinin, neda sun amutara utopu ngebo, sun pel melimna ngebo utopu kunune’ tenen, makudanapu kunkamrume. 15 Nedi sun kael kemna tep, ukupmanto ngebo kupnedi, konum peterepmasena tep, nedi sun tep dipru boun kupra, amutara ngebo utopu kupmanudi pel dopmasentopu, sun kunkamrum taru yuma neitamai di, sundi yuk neng tep utopu kudankamrume.

16 Ne tek sisi pepsene. Pel deiyo nengdi, “Pel dopso,” pepmengepa, sun amutara pel donge nengda, yambul mambulpu kunung dinin, er pel deiyo ngebo sun deiki tara kure ngeboda, ila mambul kurure. Ange utopu, deiyo ngebodi, “Ne upu dopra lap perberume,” pere ngeboda, ila mambul kurur dinin, er upu dopra lap perbenkure ngeboda, yambul mambul pua. 17 Ne Yesusda, ila mambul ngebo kunun dinin, arup kupmasentopu, ‘Sunda ne amnyo tara kurum nesaladi utopu kunkamrum’ tenen, pepsene. Ukuda, akeca yuma konum gekenmaruma cadi, tek sisi apepsenetopu kumumyopda, Allahdi melipra telep kupra derinkamsere. Yesusdi pepu.

Yesus kapul men popi taru dinin, Yesusdi, “Nimi upu kai perberepa, popkamnenge,” pepra lap pepu upu

18 Alukundapu Yesusdi er nyapu tep, aupu ton pepu. Nedi wepra deiamsisi neng yuma, konum kael keamsesa cadi, sun yuma tep men pepsene. Dinino, Mazmur neitamai seki upu, nong kupkamara tep, aupu pepkusene. Mazmur neitamai seki upuda, ake.
‘Ne cap kikiman kupra jen jenmap dinin, angebodi ne tep, “Bisbisa kapra popkameng” tenen, yanipkunera tep, konum ketenepmanere.’ (Mazmur 41:9)

19 Aupu konum pepmasena deiyoda, pepkusene. Ada, akeca kapul men kupre taru konum lap pepsenyopda, amenda taru aupu utopu konum kupmengopda, adeiki di moupra tenepkamnerume. Ada, neda pumun taru pe, doryankamre taru pe, Pio Gam Kure Ngeboda, ne akunune. Ne konuma, yuk ngebo gume. ‘Ange tenepkamnerum’ tenen, konum pepsene.

20 Tonda, ‘Ne upu dopra peterembenkameng’ tenen, dopra derinun nesala tep, “Telepe,” pepra, dipru kareprepa, nong yang-yang pesenge nesala yumada, ukunga deiki di, tek sisada ne tep kunenunge. Ange utopu, ne tep dipru karerepa, teka tenenung nesalada, adeiki di tek sisada, ne dopra deipneu ngebo, Allah cap tep, dipru karenunge. Yesusdi pepu.

21 Yesusdi aupu pepu dingeda, mambul kange doupudi, upepu. “Ne tek sisi pepsene. Sun kan-kan neitamai dinin, tenpu ngebodi, ‘Nun nai Yesusda, mali nengdi popkamenge’ tenen, nimi upu kai perbenkure,” pepu. 22 Upepupa, Yesus er nyapu gekepidi, ‘Uo, ware ngebo tep pepmaser do?’ tenen, epdanmaidi, kange wang-wang pepu.

23 Ukunmaipa, Yesus tep dipru pio kareamu ngebodi, Yesus damai bukmau. 24 Ukupra Yesus cap kikiman bukmaua cadi, Simon Peterusdi angebo tep upepu. “Kandi Yesus tep asipeteprume. ‘Erdi tenepmar ngebo si pepsetua’ tenen, pepkene,” pepu.

25 Upepupa, Yesus damai bukmau ngebodi, Yesus baripmaudi upepu. “Naio, ware ngebodi, ‘Er popkamenge’ tenen, nimi upu kai perbenkuker do?” pepra asipetepu. 26 Asipetepupa, Yesusdi upepu. “Nedi ajen keca roti dopra yangadin mau pumbon burupra dongopnedi, karepkun ngeboda, er akonuma,” pepu. Upepudi, Yesus adipapu aroti kwaneng dopra, yangadin mau pumbon dongopra, Simon er mi Yudas Iskariot tep karepu.

27 Karepupa, Yudasdi dopropu pangeda, adipapu Kain Jen Ngebodi, Yudas er dipru talepu. Ukupupa, Yesusdi Yudas tep upepu. “Kandi kupkumem kecada, menmena bena kuprume,” pepu. 28 Yesusdi upepu dinin, er nyapu awekmai neng yuma kan-kan di tenpu ngebo peda, Yesusdi pepu upu tep, moupra men tenepi. 29 Ton nengda, ‘E, Yudasda nun co bo talere ngebo kurura cadi, Yesusdi, “Kalemna keca kunumbenkur” tenen, pepu do?’ tenenmai. Ton neng dingeda, ‘Tali kankan kunge nesala co bo makupra karerbenkur’ tenen, pepu do? Sun walwalpu kunmai.

30 Yudasdi Yesus karepu roti dopropu dingeda, menmena akati tapra, bura benmau. Benmau taruda, lukunda konum kupupa ipu.

Kapul men kupu taru dinin, Yesusdi Peterus tep, “Kandi, ‘Angeboda ne walwale,’ pepkamanerume,” pepu upu

31 Uda, Yudas bura konum bendopupa, Yesusdi er nyapu tep aupu pepu. “Ukutaruda, neda Nimi Mi Sisa Utopu Ngebo pel dopkamana deiki di, amenda taru nesala yumadi, ne tep gispal dopra, ne si ila di ereipkamnenge. Tonda, ne pel dopkamana deiki di, Allah er si ila di ereipkamenge. 32 Ne kupkamana deiki di, Allah er si ila di ereipmengedi, gispal donkamenga cadi, Allahdi ne tep pio telep kupra deipnerepa, ne si peda ila di ereipkamenge. Allahdi ayuma ukupkamarada, adipapu menmena kupkamare.” Yesusdi pepu.

33 Upepudi, aupu ton pepu. “Ne nyapu, ne cap, sun cap, ue metekanunpu kikiman kunmapyanen, ne yuk bendopkamane. Benyopda, sundi epetepkamnerum dinin, men epkamnerume. Nedi Yahudi yala deiyo neng tep upepsitopu, sun peda pepsene. Ada, ne benkamne mutuda, sun cap men yatume. 34 Ukutaruda, ‘Ukunkamrum,’ tenen, ukupu upu ton pepra deipkusene. Aupuda ake. Sun yumadi bicau tenedamumdi, makudanapu pio kunkamrume. Nedi sun tep, bicau tenepra melimamsisitopu, sun peda utopu, bicau tenepra makudanapu kunkamrume.

35 Ukupra pepmasentopu, bicau tenepra makudanapu pio kupmumyopda, ukupmumya deiki, nesala yuma epmengedi, ‘E, anengda tek sisi Yesus er nyapu kunung adano’ tenen, kael kemkamsenge.” Yesusdi pepu. 36 Upepupa, Simon Peterusdi asipetepu. “Naio, kanda dan mutu benkamarem do?” pepra asipetepupa, Yesusdi, “Gume, ne benkamne mutuda, ukutaru men yatum dinino, amenda tarupuda sundi amutu domyankamnerume,” pepu.

37 Upepupa, Peterusdi, “Naio, ware keca deiyo tep, adipapu men domyaketene do? Kan makuna tep nengeda, ‘Ne popnetenga peda, telepe pua,’ tenenune,” pepu. 38 Upepu pangeda, Yesusdi Peterus tep pepu. “Gume, kao. Kandi ne tep, ‘Kan makuna tep nengeda, dapopnetenge,’ pepmanerem ngeda, tek do, telel do? Ne kaele, jem ayamdi kapul men gapupmare taruda, kandi ne tep, ‘Angeboda, ne walwale,’ pepra, peptapkamanereme,” Yesusdi pepu.