Joh 14 | XteSC | STEP | Yesusdi er wepra deiamu nyapu tep upepu. “Sundi mambul kange doupra dipru pu men jenkamsere. Allah tep, ‘Erdi melimkamser’ tenen, teka tenepra sun kange dipru er deiki derinkamrume. Tonda ange utopu, ne tep, ‘Erdi melimkamser’ tenen, teka tenepra, sun kange dipru ne deiki derinkamnerume.

John 14

Yesusdi er nyapu, sun dipru kwa dimna tep, pepu upu

1 Yesusdi er wepra deiamu nyapu tep upepu. “Sundi mambul kange doupra dipru pu men jenkamsere. Allah tep, ‘Erdi melimkamser’ tenen, teka tenepra sun kange dipru er deiki derinkamrume. Tonda ange utopu, ne tep, ‘Erdi melimkamser’ tenen, teka tenepra, sun kange dipru ne deiki derinkamnerume. 2 Ne nai kure ati pumda, ati yuk-yuk wilipra ati weika di keteneiamu. Ati weik men kamtu teptoda, konum peamsetene. Neda, ne nai ati benedi, sun ati tep keteneipkamsene.

3 Sun ati ketenepra benkamna cadi, tek sisi kange di ton cap doryankamsene. Ada, ‘Ne cap, ne nyapu cap, tenpaipu kikiman pio kunkamep’ tenen, doryasenedi, ne kunkamnai dubenkamsene. 4 Ne benkaman mutu bana tep, ‘Bisida ake’ tenen, konum kael keamrume.” Yesusdi pepu.

Yesusdi, “Allah er damai bana tep bisida, nepu kunune,” pepu upu

5 Yesusdi, “Abisida, sun kaele,” pepupa, Tomasdi tamupra pepu. “Naio, kan benkamrem mutuda, nun walwal cadi, ware kuprap, ‘Bisi ake’ tenen, kael keptepe do? Nun walwale,” pepu. 6 Tomasdi upepupa, Yesusdi tamupra pepu. “Dumsisi Bisida, nepu kunune. Tonda, Tek Sisi Upu Pena ngebo kunune. Tonda, Gam Kuna Deiyo Ngeboda, ne tenpu kunune. Ware nesala do yuma, ne nai bo er damai bana tep, ne deiki dipu benkamenge. Yuk bisi ton pio men kurure. 7 Tek sisi ne tep moupra kael keamtum teptoda, ne Nai bo peda konum moupra kael keamtume. Dinino, ukutaru aupu pepsene. Ataru di dipra, doryankamre taru yumada, ne nai bo Allah konum kael keamrume, konum ne dineruma tep pepsene,” Yesusdi pepu.

8 Upepupa, Pilipusdi pepu. “Uo, Naie, kan nai bo Allah benbenepsetumpa, eptepe teptoda, ‘Angeda konuma,’ teneptepe,” pepu. 9 Upepupa, Yesusdi pepu.

“Pilipuso, sun cap, ne cap, tumi denge weik kikiman konum kuramepu dinin, kanda moupra kapul men kael keamnemum do? Ware ngebo do yuma, ne diramneu ngebodi, ne nai bo Allah tep konum diramu. Nun buteneda tonpua tep, kandi, ‘Kan nai bo Allah benbenepsetume,’ pepmaneremada, warya tep do?

10 Ne cap, ne Nai cap dipru dukdongopra kunume. Nun tonpua kunumada, teka men tenepmaserum do? Ne pesene upu yumada, ne kange tenena dipu men pesenune. Ange gum dinin, ne nai bo Allah, ne dipru neitamai kunerya deiki di, er pel donerure. 11 Atep, nedi, ‘Ne cap, ne nai bo Allah cap, dipru dukdongopra kunume. Nunda tonpua kunume,’ pepmasen upuda, sun adipapu teka tenepnerume. Ne upupu teka men teneptumtoda, nedi nimi men kupmanto keca, ila mambul pel doramsipa, diramruma deiki di, teka tenepnerume.”

12 “Tek sisi pepsene. Ware nesala do yuma, ne tep teka tenenenung nesaladi, ne pel doramsitopu pel donkamenge. Tonda, nedi ne nai bo Allah, er kundam benkamana cadi, ne tep teka tenenenung nesaladi donkameng pelda, ila mambul weik pel donkamenge. Nedi ataru doramsi ngeda, yambul mambulpu kurure.

13 Ne Nai damai benepa, sundi ne si deiki di, ne tep moropnerumyopda, sundi mororamnerumtopu, angepu karenkamsene. Ada adeiki di, ‘Ne nai Allah tep, gispal dopra er si eremkamrum’ tenen, Allah er Mi Sisa nedi, sun moronerumtopu karepsenyopda, sundi Allah er si pio eremkamruma tep, pepsene. 14 Atep, ware keca do yuma, ne si deiki moropnerumyopda, gekepnedi, angepu melipra karenkamsene.” Yesusdi pepu.

Yesusdi, “Allah er Lek Sambala karenkamsere,” pepra, pedina tep, pepu upu

15 Yesusdi aupu ton dukdongopra pepu. “Sundi ne tep, tek sisi teka tenepra dipru kareprumyopda, ne pesene upu yuma gekepmumdi, aupupu talepra kunkamrume. 16 Ukuprumyopda, nedi ne nai bo Allah tep moropnepa, erdi sun dipru kwa dimna tep, yuk Melimna Ngebo ton karepkamsere. Karepserepa, aMelimna Ngebo cap, sun cap, pio kikimanpu kunkamrume.

17 Angebo, Allah er Lek Sambaladi, tek sisi upupu peteremkamsere. Teka tenena gum, tali tuai kunge nesaladi, Allah er Sambalada, teka tenepra men doproptenge. Sun atali nesaladi, er tep men dingedi, er tep moupra men kael kemnunga tep, men doproptenge. Dinino, sundi teka tenenerum nesala, ne nyapu sun tep nengeda, Allah er Lek Sambalada, sun cap kikiman kurume. Amenda taru, sun dipruai wekra kunkamsere. Ange tep nengeda, sundi er konum kael kepra kurume.”

18 “Sunda ne nyapu kuruma cadi, nedi sun tapnepa, tali lyan nyapu utopu men kunkamrume. Amenda taru, nedi sun damai yankamsene. ^{▼▼yankamsene – Yesusdi aupu pepu ngeda, ada, ‘Allah er Lek Sambala karepserya deiki di, nun dipruai kikiman kunkamepe, tenenkameng’ tenen, pepu.} 19 Ue taru metekanun ton konum kupyopda, teka tenena gum, tali tuai nesaladi men epkamnenge. Dinino, sunpuda epkamnerume. Ne pio gam kuna ngebo kununa tep, sun peda gam kunkamrume. 20 Uda, ne cap, ne nai bo Allah cap, dipru dukdongopra tonpua kunume. Tonda, sun cap ne cap, dipru dukdongopra kunupe. Sunda ne neitamai kurume. Neda sun dipru neitamai kunune. Ange yumada, ne nai teneamu taru, sirya taru konum kupyopda, sundi ange yuma moupra kael kepkamrume.” Yesusdi pepu.

21 Upepudi aupu ton dukdongopra pepu. “Ware nesala do yuma, ne upu dopra gekepmengedi, aupupu talepra pio dombanung nesalada, tek sisi ne tep teka tenepra dipru karenunge. Ne tep dipru karerur ngeboda, ne nai bo Allahdi angebo tep, bicau tenepra, kange deipredi, makunapu kunkamre. Utopu, ne pedi angebo tep bicau tenepra, kange deipnedi, makunkamne. Tonda, ‘Ato ngebodi ne kune keca kael kepkamre’ tenen, katuai kupra deipnepa, kael kepkamre.” Yesusdi pepu.

22 Yesusdi upepupa, Yudas Iskariot gum dinin, yuk ngebo er si tep, Yudas perami ngebodi pepu. “Dinino, naie kandi nun tep, ‘Ne kune keca katuai kupra deipnepa, kael kepkamrume,’ pepmaserem dinin, ware keca deiyo tep sun tali dakunge nesala tep, kandi kan pe tep, katuai men keipdankamrem do?” pepra asipetepu. 23 Asipetepupa, Yesusdi pepu.

“Ne tep teka tenepmengedi, dipru karepnengopda, anesala tek sisi ne upu gekepnengedi, apu talepra dombankamenge. Ne upu pio talepra dumsisipu kunge taru neitamai yumada, ne nai bo Allahdi sun tep, bicau tenepra makunkamre. Ukupredi, ne nai Allah cap, ne cap, anesala sun kundam yanemedi, anesala cap dipru dukdongopra kikiman kunkamepe.

24 Dinino, ware nesala do yuma, ne tep teka tenena gum di, dipru men karenere nesalada, ne upu talepra men dombenkamenge. Tali gekertamnapu kunkamenge. Nedi pesene upu yumada, ne kange dipu men pesenune. Ne pesene upuda, ne dopra deipneudi, tuai mutu dokotepneu ngebo Allah, er upupu pesenune. Aupu yumada, er upu kurura cadi, erdi peneretopu pesenune.” Yesusdi pepu.

25 Upepudi aupu ton pepu. “Apepmasen upu yumada, ne cap, sun cap, kikiman tupa kunmap taru neitamai di pepmasene. 26 Dinino, Allah er Lek Sambala, sun dipru kwa dimna tep, Melimna Ngeboda, Allahdi, ne si deiki di er Lek Sambala dopra deipkamsere. Kareserepa, Allah er Lek Sambaladi akeca-keca yuma tep, peteremkamsere. Tonda, ne peamsisi upu yuma, ‘Kange di ton cap tenenkameng’ tenen, Allah er Lek Sambaladi ton cap penkamsere.” Yesusdi pepu.

27 Upepudi, aupu ton pepu. “Ikin kange douna gum di, kange deipra yuk neng cap kikiman telep kuna tep, deiyo keca karesenune. Sun teka tenena gum, tali tuai nesaladi, yuk neng tep, mawa di karenungtopu, men karesenune. Mali kange douna gum di, telep kange doupra, telep kuna deiyo keca karesenunada, nengepu karesenune. Ange tep nengeda, sundi, ‘Uo,’ tenen, ikin kange douna cap, kware dangna cap, mambul kange doupra dipru bulungsangna kuna cap, ange yuma men kunkamrume. Kwar-kwar gum dipapu, kange deipra teleppu kunkamrume.” Yesusdi pepu. 28 Upepu dingeda, aupu ton pepu.

“Arup taruda, nedi, ‘Ne benkamne dinin, tamupra doryankamsene,’ pepra pepmanu upuda, sun konum gekepmanerume. Neda, mambul ngebo kunun dinin, ne nai bo Allahda, ila mambul ngebo kurura cadi, sun kange dipru ne deiki deipra, ne tep dipru karepnetumtoda, ne nai damai benkamna tep nengeda, ‘Ada telepe’ tenen, kange deipkurume. 29 Ne nai damai kapul men bene taru, ‘Ne benkamne,’ pepra konum lap pepmasene. Atep, amenda taruda tek sisi sun tapra yukai bendopnyopda, sundi, ‘E, erdi lap pepra deiamseutopu konum kupmare’ tenen, teka tenepkamrume. 30 Tuai mutu talepra, isok deiyo ngebo Seramkida yankamara tep, ataruda upu weikanun ton, men pepkusene. Ayankamar mali deiyo ngeboda, ne tep men bisbisa kapnetudi, ne tep men talepnetue.

31 Dinino, tuai nesala ban-ban yumadi, ‘E, Yesusda, er nai bo Allah tep tek sisi dipru karepra, er nai bodi peretopu, angepu gekepra kurure, kael kepkamneng’ tenen, ne bounpu kunepa, mali deiyo ngebodi er pel doprepa, mali nengdi ikin keca weik, ne deiki deipkamanenge. Ukuda akonuma, ukuda amutu tapra bendopmeko.” Yesusdi er nyapu tep pepu.