Joh 15 | XteSC | STEP | Yesusdi er nyapu tep, aupu yuma pepu. Neda anggur tapu deiyo utopu kunune. Ne nai boda, anggur tapu koun wa tu talena deiyo ngebo kurura cadi, atapu kwangamrenge, ya tuna deiyo ngebo kurure.

John 15

“Yesus cap, nun cap, dipru dukdongopra men kupmepyopda, nun yuk dipapu er pel telep kupra men doptepe,” pepu upu

1 Yesusdi er nyapu tep, aupu yuma pepu.

Neda anggur tapu deiyo utopu kunune. Ne nai boda, anggur tapu koun wa tu talena deiyo ngebo kurura cadi, atapu kwangamrenge, ya tuna deiyo ngebo kurure. 2 Ne tep teka tenepra, ne cap dipru dukdongopra kunge nesalada, anggur tapu teru utopu kununge. Ne nai bodi, anggur tapu teru du men mouramre ngeda, sekra tamrure. Dinino, atapu teru di du telep kupra mouramre ngeda, ‘Tapu du pio telep kupra, weika di moupkamre’ tenen, yuk mali tapu koupdongopunge cap, tali teru cap, sektapredi betamdirure.

3 Sun ne nyapuda, ne upu peramsisipa, gekeramruma tep nengeda, konum telep kupra dumsisipu kupra deipsisa tep, telep kurume. 4 Sunda dipru dukdongopra ne cap kikimanpu kumumdi, nepu talepra kunkamrume. Ukumumyopda, ne dingeda, sun dipru neitamaipu tupa kunkamsene. Tali anggur tapu teru yumada, anggur deiyo cap dukdongopra tupa kuramre taruda, du mourur dinin, teru er yuk kuptuopda, ateruda du men mouptue. Ange utopu, sun cap dipru dukdongopra nepu talepra, ne cap kikiman men kumumnyopda, sun pedipapu du men moupmanto kunkamrume.

5 Ne Yesusda, anggur tapu deiyo utopu kunune. Sun ne nyapuda, anggur tapu kwakredi, teru belengamrenge utopu kurume. Ware nesala do yuma, ne cap dipru dukdongopra nepu talepra kungepa, nedi sun dipru neitamai tupa kunyopda, anesalada du weik moupkamenge. Dinino, ne cap dipru dukdongopra kuna gum dinin, sun yukpu kupmumyopda, sun dipapu pel telepnge tenpu peda men dotume. Sun dipapu kupetepkamrum kecada, nong men kupkamre. 6 Ware nesala do yuma, ne cap dipru dukdongopra, nepu talepra men kunge nesalada, sunda anggur tapu ^{▼▼Anggur tapuda, yambulanun co utopu kurur dinin, tonda tapu utopu kurure. Ukure ada, atapu ya tupmangopda, adeiki di gapu weik pakredi, teru weik kwakredi, dana-dana barure. Dana-dana beryopda, du weik mourure. Ya tuna gum dingeda, talipu baramreanen, du tenpu-tenpupu mourure.} teru sektapmengepa, gelal sepredi, koluramrenge utopu kununge. Konum koluamre teruda, nimidi dopra uku donokmengepa, ukudi jerorure.

7 Dinino, sundi ne tamna gum di, ne cap dipru dukdongopra, nepu teka tenepra, ne upu gekemumdi, aupu sun kange dipru neitamai tupa kupyopda, ware keca do yuma, sun putaseretopu moropnemumyopda, gekepsenedi akecapu karenkamsene. 8 Anggur tapu du telep kupra mouramretopu, ne nyapu sunda, du pio weik mounkamsere. Telep kupra kumumnya deiki di, yuk nesala yumadi, ‘Gume anengda, Yesus er nyapu kununge’ tenen, kael kemkamenge. Nesala weik konum kael kepmengopda, ukumumya deiki di, ne nai bo Allah tep, ‘Allahda pio telepe,’ pepra, er si ereipmengedi, er tep gispal donkamenge.

9 Ne nai bo Allahdi ne tep dipru kareneretopu, nedi sun ne nyapu tep, dipru karesenune. Ukutaruda, nedi sun tep bicau tenepra melimsenuna neitamaipu, tupa kunkamrume. 10 Nedi sun tep, “Ange ukunkamrume, angeda men kunkamrume,” pepra pesene upu yuma gekepmumdi, aupu talepra dombamumyopda, adeiki nedi sun tep, bicau tenepra melimnapu kunkamsene. Ange utopu, ne nai bo Allahdi, “Ukunkamrume, ukunkamrume,” pepra peneretopu, aupupu gekepra dombanepa, ne naidi tupa dipru karenerure.

11 Aupu yuma lape pepmasena deiyoda, ‘Sunda, pio telep kange doupra pingpinga dipu kunkamenge. Tenpu keca teppu ikin kange men dounkamenge’ tenen, aupu yuma konum lap pepsene. Pingpinga di kuna deiyo keca karerur deiyo ngeboda, ne kununa tep, ne pepmasentopu kupmumyopda, kange deipra kunkamrume. 12 Nedi sun tep, “Ange kunkamrume, angeda men kunkamrume,” pepra deipsen upu ila deiyo ngeda, ake. Ada, nedi sun tep bicau tenepra melimnapu kuramsisitopu, sun peda, adipapu bicau tenepra makudanapu kunkamrume.

13 Nedi sun tep bicau tenepra makusene kecada ila mambule. Ada, nedi ne kayapu neng sun tep, sun yo pununa tep depkamsene. Yuk nesala yumadi, yuk neng tep bicau tenepmengedi, melimnung keca yumada, yambul mambule. Sundi sun kayapu neng yo pununa tep, men denunge. Dinin, nedi sun yo pununa tep depkamanada, ila mambule.

14 Nedi sun tep, “Ange kunkamrume, angeda men kunkamrume,” pepra pesene upu, tek sisi gekepra kumumyopda, nedi, “Sunda ne kayapu neng sisa,” penkamsene. Nedi pesene upu men gekepmumdi, tapnerumyopda, ‘Sunda ne kayapu neng,’ pepra kange men derinkamsene. 15 Uda, tali pel melimna nesalada, sun deiyo nengdi tenenge keca cap, kunge keca yuma cap, men kael kemnunge. Atep ukutaru di dipra, doryankamser taru neitamaida, nedi sun tep, “Ne amutara pel melimna nesalapu kununge,” men penkamsene. Ne nai bo Allahdi peamneupa, kael keamsi keca yumada, nedi sun tep konum katuai peteremamsisa tep, ukutaruda, nedi sun tep, “Anesala ne kayapu sisa kununge,” pepra konum pepsene.

16 Sundi ne tep men wepra deiamnerume. Ange gum dinin, nedi sun tep, ‘Anesalada melimsenepa, pio telep kupra kunga deiki di, du moupkamre ngeda, pio kunkamre’ tenen, wepra deiamsisi. Atep sundi apepsenetopu konum kupmumyopda, sundi ne si deiki di moropmumnyopda, ne nai bo gekeseredi, akeca-keca mororumtopu karenkamsere. 17 Nedi sun tep, “Ukunkamrume,” pepra deipsene upuda, ake. Ada, sun yuma adipapu bicau tenepra makudanapu kunkamrume. Yesusdi pepu.

Yesusdi, “Teka tenena gum nesaladi, sunda ne nyapu tep, ‘Nun songe,’ tenenkamsenge,” pepu upu

18 Yesusdi er nyapu tep upepu. “Sun teka tenena gum, tali kunge nesaladi sunda ne nyapu tep, ‘Anengda nun song,’ tenenkamsenge. Ukusenge pangeda, sunda lumdongona gume. Sundi tupa tenenkamrume. Menmena taruda, sun teka tenena gum nesaladi ne Yesus tep, ‘Angeboda nun song,’ teneramnei. Menmena taru tamami ngeboda, ne tepa.

19 Teka tenena gum, tali kunge nesaladi kunge keca utopu kun keca cap, tenena cap, kupmumyopda, atali nengdi sun tep, ‘E, aneng cap, nun cap amsepu kunupe. Sunda, nun kunuptopu kununge. Atep nundi aneng tep kange derinupe,’ tenepkamsenge. Dinino, tek sisi ngeda, ne nyapu sun kurum keca cap, sun tenerum keca capda, tali kunge nesala utopu pio gum tep, sun amsepu men kurume. Tali tuai nesala kan-kan neitamai, nedi wepra deiamsesa tep, sun ne nyapu kurum neng cap, tali neng cap, amsepu men kurume. Sun kange tenerumnge cap, sun kumumnge capda pio yuk. Sun teka tenena gum, tali kunge nesala pio yuk cadi, anesaladi ne nyapu sun tep, ‘Nun song,’ tenesenunge.” Yesusdi pepu.

20 Upepudi, aupu dukdongopra pepu.

Ne konum pemsisi upuda, tupa tenenkamrume. Ada, tali pel melimna nesalada, yambul mambul dinin, sun deiyo nengda, ila mambul kununge. Yuk nengdi deiyo neng tep kungetopu, adeiyo neng sun amutara kunge nesala tep nengeda, utopu kunkamenge. Atep, ne tali men pepsene. Sun mali nengdi, ne tep, mali upu pepra ne nong deiki, ikin keca weik deriramnei.

Ange utopu, sunda ne amutara kurum nesala tep nengeda, mali nengdi sun tep, ‘Anengda, nun song’ tenen, mali upu pepra, ikin keca sun nong deiki derinkamsenge. Dinino, ne upu gekepra dombarameng nesalada, sun ne nyapu perumu upu peda, gekepra dombankamenge. Ne upu men gekenung nesalada, sun ne nyapu perum upu peda men gekenkamenge.

21 Sun teka tenena gum, tali kunge nesaladi, sunda ne nyapu kurum nesala tep, ‘Anengda, nun song’ tenen, mali upu pepra, “Ikin keca sun nong deiki derinkamsenge,” pepra lap pepmasentopu, kunkamenge. Ukunkamsenga deiyoda, ake. Ne doproipneudi, tuai mutu dokotepneu ngebo, ne nai bo Allah tep nengeda, teka tenepmengedi, er cap dipru dukdongopra men kununga cadi, ne si erepra talenerum nesala tep, ‘Anengda nun songe,’ tenepra kunkamsenge.

22 Ne men yatenedi, anesala tep ne upu men pepmatene teptoda, sun mali kurameng keca sun nong deiki tupa men kuptupa, anesala tep men wenepkamtene. Dinino, ukutaru ne upu konum pemsipa, sun konum gekertamneiya tep, “Naio, nun mankau kange di mali kuramupu,” men pepnetenge. 23 Ware nesala do yuma, ne Yesus tep, ‘Angebo nun song’ tenen, tamnenung nesalada, ukunga deiki di, ne nai bo Allah pe tep, ‘Erda nun songe’ tenen, tamnunge.

24 Ne yasidi, sun kan-kan neitamai, yuk neng pio men kurami keca, nimi men kupmanto keca, pel men domtenepa, men diramtenge teptoda, sun mali kun keca sun nong deikipu tupa men kuptu. Dinino, ukutaru konuma. Nedi nimi men kupmanto keca, kunupsek pen pel weika di doamsipa, sun dirami dipunen, ne cap, ne nai bo Allah cap tep, ‘Nun song,’ tenesenunge.

25 Dinino, anesaladi ne tamnenunga deiki di, menop taru Allah upu lap perami nesala sekra deiami upuda, nong konum katuai kupre. Menop seki upuda ake.
‘Deiyo men kapu dinin, deiyo men kapka peda, ne tep, “Nun song,” teneramnei.’ (Mazmur 35:19)

“Aupu akaputopu, tek sisi deiyo men kapmar dinin, sun anengdi ne Yesus tep, ‘Nun song,’ tenenunga deiki di, menop taru nabi nengdi perami ngeda, nong konum kupmare.” Yesusdi pepu. Upepudi, aupu ton pepu.

26 “Nedi, ne nai bo Allah, er kundam di dokotepkamsen ngeboda, Allah er Lek Sambala kurure. Erda sun dipru kwa dimna tep, melimna ngebo kunkamsere. Dokotepkamsen ngebo, Allah er Lek Sambalada, Allahdi dokotemrepa embarure. Erda, Tek Sisi Upu perur ngebo kurure. Angebo Allah er Lek Sambaladi, ne Yesus tep, upu pepra peteremkamserure. 27 Erdi ne tep lape penkamre dinin, sunda ne nyapu peda, ‘Yuk nesala yuma gekenkameng’ tenen, ne tep adipapu lap perbenkamrume. Ne pel gonga kepsi taru di dipra, daneitam taru yumada, ne cap kikiman kuramruma tep, sundi ton cap ne tep, lap perbenkamrume.” Yesusdi er wepra deiamu nyapu tep pepu.