Joh 16 | XteSC | STEP | Yesusdi aupu ton cap dukdongopra er nyapu tep pepu. Arup pepmasen upu yumada, ‘Ne nyapu yuk bisi lerekra bangedi, mali kupnung’ tenen, sun kael kemna cap, upu sengdongona cap tep, pepmasene.

John 16

Yesusdi er nyapu tep, “Mali nengdi, sun nong deiki ikin keca weik derinkamsenge,” pepu upu

1 Yesusdi aupu ton cap dukdongopra er nyapu tep pepu.

Arup pepmasen upu yumada, ‘Ne nyapu yuk bisi lerekra bangedi, mali kupnung’ tenen, sun kael kemna cap, upu sengdongona cap tep, pepmasene. 2 Sun teka tenena gum nesaladi, sunda ne nyapu tep, yu kuprepa, “Nun Allah upu peterenup atida, sun cap men wektume,” pepra tapsengedi, bura dokotepkamsenge. Angepu gum dinin, amenda taruda, amali nesaladi, ‘Gume. Yesus tep teka tenenge nesala popmapya deiki di, Allah er gispal dona tep telep pel donupe. Aneng popmepepa, Allahdi kange deipkamsere’ tenen, kunkamenge. 3 Pio mali kunkamseng dinino, ange utopu kunkamsenga deiyoda, sun anengdi ne nai Allah cap, ne cap tep, tek sisi teka men tenesenunge. Teka tenena gum di, nun men kael keamseya tep, nun cap dipru dukdongopra men kununge.

4 Akeca-keca yuma kapul kupre taruda, “Amenda taru yu nengdi ukupkamsenge,” pepra konum lap pepmasena tep, amenda taru akeca yuma nong konum kupseryopda, ne nyapu sundi, ‘E, akusenge keca yumada Yesusdi, “Ukunkamsenga cadi, kange moupkamrume,” peipseutopu, ukutaru konum kupmaser adano’ tenen, kange di ton cap tenepkamrume. Atep, kapul kupsere taru konum lap pepsene. Menmena taruda, ne cap, sun cap kikiman tupa kuramepua tep, aupu yuma men lap peamsisi. Yesusdi er wepra deiamu neng, er nyapu sun 12 neng, tep pepu.

“Allah er Lek Sambaladi pel donkamsere,” pepu upu

5 Yesusdi er nyapu tep aupu ton pepu.

Ne doproipneudi, tuai mutu dokotepneu ngebo, Allah er damai benkamne dinino, sun kankan tenpu ngebodi, “Naie, dan mutu berem do?” pepra men asipetepnerume. 6 Arup lap pepmasen upu gekepmarumdi, sunda, ‘Uo, nun nai beredi tapkamsera tep, ware kunkamep do?’ tenen, mambul kange doupra kunmarume. 7 Ukurum dinino, ne tek sisi pepsene. Ne yukai benkamnada, sun telep kudina cap, sun melimna cap tep benkamne. Ne men betene teptoda, arup pepmasen ngebo, sun Melimna Ngeboda, sun dipru kwa dimna tep, sun damai men yatue. Dinin, ne konum benyopda, Allah er Lek Sambala, nedi dokotepnepa, sun damai melimyakankamsere.

8 Er yaryopda, teka tenena gum, ban-ban yuma tali tuai kunge nesala yuma tep nengeda, upu bokeipredi, sun dipru neitamai wenepre pangeda, sun mali nengdi, ‘Uo, tek pepmasere, nunda pio malipu kunupe’ tenen, kael kemkamenge. Sun dipru neitamaida, upenkamre. “Sunda mali nesalapu kuruma cadi, Allahdi wenepkamsere. Sun mali kun keca cap, mali tenena cap weik kurume. Dumsisi kunada, sun pio men kurume. Amali kuna yumada, sun nong deiki tupa kapsera tep, Allahdi sun yuma tep, upu bokeipkamsere,” pepra wenemkamsere.

9 Apepkamre upu yuma deiyoda, lape pepkusene. Tuai nesaladi, ne tep teka men tenenunga cadi, malipu kununge. Ukununga cadi, Allah er Lek Sambaladi, anesala tep wenemrepa, moupra kael kepkamenge. 10 Tuai mutu neitamai, dumsisi kuna ngeboda, ne tenpu kununa cadi, ne nai damai bendopnepa, amenda taru men dinkamneruma tep, tuai mutu dumsisi kuna ngebo tenpu peda men kunkamre. Atep, Allah er Lek Sambaladi, tuai mali kunge nesala tep, ‘Sunda dumsisipu pio men kurume,’ pepra wenemkamre.

11 Uda, ne naidi, ila mali kuna deiyo ngebo Kain Jen Ngebo tep, upu bokra wenepkamre. Seramkida, tuai mutu yuma talepra, ila mali deiyo ngebo, kuramre dinin, ne pel dopkamna deiki di, Kain Jen Ngebo bisbisa kapra popnepa, er gum kupkamre. Atep Allah er Lek Sambaladi, Kain Jen Ngebo er amutara kunge nesala tep, wenepkamre. Yesusdi pepu. Upepu dingeda, aupu ton cap pepu.

12 Ne nyapu, sun tep upu weikanun ton cap dukdongopra pepsetene dinino, gekepmumdi, ‘Uo,’ tenen, mambul kange doupra dipru buluksakserur tep, ukutaru sun kapul men gekeptuma cadi, men pepkusene. 13 Dinino, arup pepmasen ngebo, Tek Sisi Upu perur ngebo, Allah er Lek Sambala dokotepsenepa, sun damai yaryopda, erdi tek sisi upu yuma kael kemna tep, ‘Ukupkurum,’ pepra peteremserepa, kael kepbankamrume. Er kange dipapu men penkamser dinin, nedi pepnepa, er gekepmare upupu, peteremkamsere. Erdi amenda taru kupkamre keca tep, lape pepra, peteremkamsere.

14 Ne upu pepnepa, erdi ne upu cap, ne kune keca cap dopra, sun tep katuai peteremrepa, sundi kael kepbankamrume. Ukupra kunkamra deiki di, ne si ila di ereipkamnere. Tonda, ukunkamra deiki di, nesala yumadi ne pio telep kune kecada, kael kepmengedi, ne si ereipkamnenge.

15 Ne nai bo Allahdi talerur keca yumada, tek sisi nengepu kurure. Adeiyo tep nengeda, arup pepmanue. Ada, Allah er Lek Sambaladi, ne upu cap, ne kune keca cap dopra, sun tep katuai peteremkamsere. 16 Ue tenpu taru metekanun ton konum kupyopda, ne tep ton cap men dinkamnerume. Dakuramumpane, amenda taru ton cap dinkamnerume. Yesusdi er nyapu tep pepu.

Yesusdi, “Ne nyapu ukutaru kange mun kunkamrum dinin, amendada kange deipra kunkamrume,” pepu upu

17 Yesusdi wepra deiamu neng, sun kan-kan di, ton nengda upepi. “Gume, Yesusdi, ‘Ue tenpu taru metekanun ton konum kupyopda, ne tep ton cap men dinkamnerum dinin, amenda taru ton cap dinkamnerume.’ Tonda, ‘Ne nai damai benkamna tepa,’ pepmaserada, ware keca deiyo tep pepmaser do? Aupu pepserenge tep, wang-wang pepserepa, nun walwal kupsere,” pepra asipetepi. 18 Tonda sundi, “Yesusdi, ‘Ue tenpu taru metekanun ton cap,’ pepmaserada, ‘Deiyo ake’ tenen, men kael kepmape. Ware deiyo tep pepmaser do? Nun walwale,” penmai.

19 Yesusdi sun walwal kupmainge cap, ‘Uo, deiyo lape pepsetue’ tenen, putapmaunge cap, kael kepu. Kael kepka tep, Yesusdi er nyapu tep pepu.

Arupda nedi, “Ue tenpu taru metekanun ton konum kupyopda, men dinkamnerum dinin, amenda taru ton cap dinkamnerume,” pepmanuada, ‘Deiyo dan do?’ tenen, tupa asimdanmarum do? 20 Tek sisi pepsene. Sun teka tenena gum, tali kunge nesala ban-ban yuma kange deipra pingpinga di kunkameng taru neitamai di, sun ne nyapuda mambul kange doupra engenkamrume. Sunda, kange mun kange doupra engenkamrum dinin, amendada sun engenmarum ngeda, gum kuprepa, kange deipra pingpingapu kunkamrume.

21 Ukupmanto ngeda, pepkusene. Ware nerapu do yuma, sun mi derin taru konum kupre pangeda, mi deiyo pu weika di jeramre dinin, sun nyapu konum deipmenge dingeda, konuma. Arup pu jenmaunge tep, kange di ton cap tenena gum dipapu, ‘Ne mi konum deipne’ tenen, pio kange deipra pingpinga di kununge.

22 Angeda utopu, ukutaruda ne nyapu sun kange mun kupsere taruda, ukutaru konum kupser dinin, amenda tara ne cap, sun cap antapra epdapedi, sun pingpinga di kunkamrume. Ukupmumyopda, yuk nesaladi sun kange pingpinga kunkamrum ngeda, men gum kupra deipsetenge. 23 Ataruda, sundi ne tep, kange di ton cap men moronkamnerume. Ne tek sisi pepsene. Ware keca do yuma, sundi ne nai Allah tep, ne si deiki di moropmum keca yumada, ne nai Allah gekeseredi karenkamsere.

24 Ne tep teka tenepnerum taru di dipra, ukutaru neitamai yumada, akeca-keca ne si deiki di men moronerume. Dinino, ukutaruda moronkamnerume. Moroprumyopda, doronkamrume. Doproprumyopda, kange deipra pingpinga di kunkamrume. Yesusdi er nyapu tep pepu.

25 Yesusdi aupu ton cap dukdongopra pepu.

“Arupda, domon upu deiki di peterepmasen dinin, amenda yankamre taru neitamaida, domon upu ton cap men penkamne. Ataruda, ne nai bo Allah er kure keca tep, katuai dipu penkamsene. 26 Ataruda, sundi ne si deiki di Allah moronkamrume. Nedi, ‘Ne nyapuda, sun pedipapu Allah men moroptenge’ tenen, nedi sun melimna tep, ‘Allah moronkamsene,’ men pepsene. 27 Gume, ne nai Allah er kange dipu dipru kareserure. Ada, sundi ne tep, ‘Allahdi Yesus dokotepupa, yaseue. Er tep nun teka tenemepe’ tenen, teka konum teneamneruma tep, Allahdi sun tep dipru kareserure. 28 Ne nai Allahdi dokotepneupa, er damai im deiki di tuai mutu neitamai yasi. Ukutaruda, tuai mutu tapra, kange di ton cap ne nai damai tamupra im deiki benkamne.” Yesusdi er nyapu tep pepu.

29 Upepupa, er nyapudi, “Naio, ukuda katuai dipu pepsereme. Domon upu deiki di men pepmasereme. 30 Ukuda, nundi moupra kael kepmepe. Kanda, akeca-keca yuma konum kael keamrume. Kandi, ‘Nimidi ne tep asipetepnetengepa, ila kael upu peptene’ tenen, men putakerepa, men kurume. Ange tep nengeda, kanda tek sisi Allah er kundam di yasemumada, nun teka tenepra kael kepmakepe,” pepi.

31 Er nyapudi upepipa, Yesusdi tamupra pepu. “Men di gum dinin ukuda, sun konum teka tenepnerume. 32 Dinino, amenda yankamre taru neitamaida, mali nengdi sun nong deiki ikin keca deipsengepa, sun yuma ne tapra, yuk-yuk bendopkamnerume. Ne tep tapnerumdi, sun pe ati cap, sun pe mutu sisa cap, yuk-yuk benkamrume. Kware tep, sun yumadi ne tapra, yukai bendopmumpa, ne yuk kunkamne. Ne nai Allah cap, ne cap kikiman tupa kunuma cadi, tek sisi ne yuk men kunune.

33 Akeca-keca yuma, arup pepmasena deiyoda, ‘Sundi ne tep teka tenepnengedi, ne cap, ne nyapu cap, dipru dukdongopra kikimanpu kupmepyopda, sun mambul kange douna gum di, kange deipra teleppu kunkameng,’ tenena tep pepmasenu. Tuai mutu neitamai kunkamrum taru yumada, ikin keca cap, kange mun keca cap, kunkamsere. Dinino, dipru pu jena gum di, kange deipra dimpeprappu kunkamrume. Ada, tuai mutu kure keca cap, tuai mutu kunge nesala cap yumada, nedi konum bisbisa kapsidi, sun deiki tara konum kununa tep pepsene.” Yesusdi er wepra deiamu neng, sun 12 neng tep pepu.