Joh 17 | XteSC | STEP | Yesusdi aupu yuma konum pepu dingeda, er urasin erepra im deiki tara dipetepudi, Allah moropka deiki di aupu pepu. Naio, ukuda, ne teneamnemum taru konum kupmare. Kandi kan Mi Sisa ne tep, ‘Nesala yumadi, ne si ereipkamneng’ tenen, mambul pel dopkamnerume. Ukupnememnyopda, nimidi ne si eremkamnenge. Ukupnemem pangeda, ‘Nimi tuai neng yumadi, kan pio telep kuremnya kael kepmengedi, kan tep gispal dopmengedi, kan si pio eremkamkeng’ tenen, nedi mambul pel donkamne. Ne mambul pel dopkamana deiki di, kan si ereipnepa, yuk neng epmengedi, sun pedi kan si eremkamenge. Atep kandi ne tep telep kupra deipkunerume. Ukupnememnyopda, kan Mi Sisa ne pel dopkamana deiki di, ‘Nesala yuma kan si ila di ereipkengedi, gispal donkamkeng’ tenen, moropkene.

John 17

Yesusdi, er nai Allah tep, moropu upu

1 Yesusdi aupu yuma konum pepu dingeda, er urasin erepra im deiki tara dipetepudi, Allah moropka deiki di aupu pepu.

Naio, ukuda, ne teneamnemum taru konum kupmare. Kandi kan Mi Sisa ne tep, ‘Nesala yumadi, ne si ereipkamneng’ tenen, mambul pel dopkamnerume. Ukupnememnyopda, nimidi ne si eremkamnenge. Ukupnemem pangeda, ‘Nimi tuai neng yumadi, kan pio telep kuremnya kael kepmengedi, kan tep gispal dopmengedi, kan si pio eremkamkeng’ tenen, nedi mambul pel donkamne. Ne mambul pel dopkamana deiki di, kan si ereipnepa, yuk neng epmengedi, sun pedi kan si eremkamenge. Atep kandi ne tep telep kupra deipkunerume. Ukupnememnyopda, kan Mi Sisa ne pel dopkamana deiki di, ‘Nesala yuma kan si ila di ereipkengedi, gispal donkamkeng’ tenen, moropkene.

2 Kandi ne tep, Ila Nimi Deiyo Ngebo kuna deiyo keca karepnemuma deiki di, nesala ban-ban yuma tep, sun deiki tara kunepa, sunda ne amutara kununge. Ukupra keipnemumada, tali tep gume. Ada, kandi, ‘Ne konum weamsi nesala, ne mi tep kareamsi nesala yuma tep nengeda, bol koptapra pio gam kuna deiyo keca karenkamre’ tenen, kandi ne tep, nimi deiyo keca kareamnemume.

3 Uda, bol koptapra pio gam kunada, tali kuna gum dinin, ada ne kareamnemum nesala cap, kan cap, kandi dokotepnemum ngebo Yesus Kristus cap, nun yuma dipru dukdongopra kikiman kuna tep pepne. Anesala yumadi, nun tep teka tenepsengedi, nun butene cap, anesala cap, dipru dukdongopra kikiman kunkamnupa deiki di, pio gam kunkamenge. 4 Kandi, ne tep mambul pel kareamnemumpa, apel dopbaramsanen, gawal konum dakbanmana deiki di, kan si ila di ereipkenepa, nesala yuma epmengedi, sun pedi kan si tep, ila di eremengedi, kan tep, ‘Allahda ila mambule,’ pepra gispal donkamkenge.

5 Ukutaru, ne nai Allah, pio telep kupra deipnerempa, kan damai neitamaida, pio dirin weik cap, telep kuna cap, konum kunyopda, ne si erepra gispal donkamnenge. Ada, tuai mutu yuma kapul men ketekepra deiamum taru, pio telep cap, dirin weik cap, kuramsipa, ne si ila di erepra gispal doramneitopu, ukutaru peda, ‘Kandi pio telep kupra deipnerempa, ne si erepra, ila di gispal donkamneng’ tenen, ne nai kan tep moropkene. Yesusdi aupu pepra, er nai Allah tep moropu.

Yesusdi er nyapu, sun melimna tep, Allah moropu upu

6 Yesusdi upepra Allah tep moropu.

Ne naie, tuai mutu neitamai dinin, kandi wepra kareamnemumpa, nedi wepra deiamsi nesala tep, nedi kan si cap, kan kumem keca cap, sun kael kemna tep, katuai lap peramsipa, konum kael keamkei. Kandi anesala yuma taleamume. Taleamumdi, anesala dopra ne tep kareamnemume. Anesalada, kan upu gekepra dombanunge. 7 Ukutaruda, ne nyapu anengda, konum kael kemnunge. Ada kandi kareamnemum keca yumada, kan damai di, kan dipapu kareamnemume. Tonda tupa karenerume. Ne nyapuda, ange konum kael kemnunge.

8 Angeda, mesum tep gume dinin, naie, kandi kareamnemum upu yumada, nedi dopra ne nyapu tep peteremamsipa, sundi aupu gekepra teka tenemidi, konum doronunge. Ne nyapuda, sun kange tenimtona gum di, konuma, ‘Yesusda, Allahdi doproipudi, tuai dokotepseua cadi, Allah er kundam di yaseue’ tenen, konum kael kepra kununge.

9 Naie, nedi tali tuai nesala yuma, teka tenena gum nesala yuma tep nengeda, kan tep men morokenune. Ange gum dinin, kandi kareamnemum nesala tep moropkene. Anesalada, kan mawa nesala, kandi talerum nesala cadi, aneng tep moropkene. 10 Ne talenun keca cap, nesala cap yumada, tek sisi kan ngepu kurure. Ange utopu, ne nai Allah kandi talemum keca cap, talemum nesala cap yumada, nengepu kunerure. Ne nyapu, sun kunge keca deiki di, yuk nesala ne si erepra gispal donenunge.

11 Ne nyapuda, tuai mutu tupa kunkameng dinin, neda tuai mutu tapra, kan damai yankamne. Ne naie, kanda Pio Mengne Ngebo ^{▼▼Pio Mengne Ngebo – Aupu pepunge deiyoda, ‘Erda bol kurun ngebo,’ tenena tep pio gume. Deiyoda, Yesusda mali kun keca tenpunge peda pio men kuramnga tep pepu. Tonda, Allahdi Yesus tep, ‘Pio Telep Ngebo kurure,’ tenerura tep, Yesus wepra deiamudi, tuai mutu dokotepu. Tonda, deiyo butene ngeda, Yesusda pio dumsisipu kuramu ngebo cadi, er tep, ‘Yesusda Pio Mengne Ngebo,’ tonda, ‘Yesusda Pio Lengna Ngebo,’ penupe.} kurume. Kan si ila puto weik kukerya deiki di, ‘Ne nyapu tep kalengkamrum’ tenen, moropkene. Kan sida, kandi kareamnemum si tep pepkene. Kan kareamnemum si puto deiki, pio kalengamempane, ‘Sun amenda taru tenpu kange tenepra, dipru dukdongopra nong tenpu utopu kunkameng’ tenen, moropkene. Tonda, ne nai Allah, kan cap, ne cap, dipru dukdongopra tenpu kunumtopu, ‘Sun peda utopu nong tenpu utopu kunkameng’ tenen, moropkene.

12 Uda, ne cap, ne nyapu cap, tuai mutu neitamai kikiman kuramepu taru neitamai yumada, ila mambul si karepnemuma deiki di, ‘Mali keca di, ne nyapu mali kuprur’ tenen, nedi ne nyapu tep kalengamsipa, tupa telep kununge. Sun aneng yumada, tupa teleppu kununge. Tenpu ngebo peda men gum kupneu. Dinino, pumun kurami nabi nengdi, Allah upu sekamneiya neitamai peretopu, ‘Nong kupkamre’ tenen, tenpu ngeboda, ne cap kikiman embaramnemu ngebo dinin, mali kupka deiki di, er nong gum kupkamre. Dinino, kan kaele, menop taru teneamumtopu, angeboda gum kupkamre. ^{▼▼gum kupkamre ngebo – Yesusdi “Gum kupkamre ngebo,” pepkada, Yudas Iskariot tep pepu.}

13 Ukutaruda, Naie, kan damai yankamne. Dinino, nedi ne nyapu tep karenun keca, kange pingpinga kuna deiyo keca, nenge dopra sun tep karepnepa, kange pingpinga weika di kuptupa, ‘Kange deipra teleppu kunkameng’ tenen, ukutaru tuai mutu tupa kune taru neitamai, aupu yuma pepmane. 14 Naie, nedi ne nyapu tep, kan upu kareamsipa, doronunge. Sun teka tenena gum di, tuai mutu tali kunge nesaladi, ne nyapu tep, ‘Nun songe,’ tenenunge. Ada tali tep gume. Neda, atuai mutu nesala mali-malipu kuramengtopu men kunune. Ne kunetopu, ne nyapu peda, tali kunung nesala utopu men kununga cadi, teka tenena gum nesaladi, ne cap, ne nyapu tep, ‘Anengda nun songe,’ tenesenunge.

15 Atep naio, nedi kan tep, ‘Ne nyapu ikin kupnung’ tenen, ‘Ne nyapu dopra tuai mutu neitamai di yukai dubetume’ tenen, men moropkene. Ange gum dinin, ‘Mali Kuna Deiyo Ngebo, Kain Jen Ngebodi ne nyapu tep, mali kupra deiprepa, sundi mali kupnung’ tenen, “Kandi ne nyapu tep, melipra kalengkamrume,” pepra moropkene, naie. 16 Neda, tuai mutu nesaladi mali keca tenepra, malipu kuramengtopu, pio men kunune. Ange utopu, ne nyapu peda, tali tuai nesala tenengedi, mali-mali kuramengtopu men kununge.

17 Naie, kan upuda pio tek sisi upupu kurure. Atep, ‘Kandi ne nyapu tep, kan tek sisi upu deiki di, sun tep telep kupra deiptumdi, kan pe mawa nesala kungepa, kandi anesala tep pio talemempa, sunda kan mawa nesalapu ^{▼▼Allah er mawa nesala – Indonesia Allah upu buku neitamaida, ‘Khuduskan,’ perameng dinin, aupu deiyo ngeda, konum jenek kupra sekmepu. Ada, Allahdi, ‘Anesalada, tali-talipu men kunkamenge. Ne amutara kungedi, mali kuna pio gum di, ne pelpu dopra, dumsisipu kunkameng,’ tenepudi, wepra derirur nesala tenena tep, aupu pepu.} telep kunkameng’ tenen, moropkene, naie. 18 Kandi ne dopra, tuai mutu neitamai dokotepnemumtopu, nedi ne nyapu tep dopra, ‘Tuai mutu neitamai, ban-ban yuma ne kai telep upu, nimi lyemna upu perbenkameng’ tenen, dokotepne. 19 Ukununa deiyoda, ‘Ne nyapu yumada, pio teleppu kutengedi, ne nai Allah, kan mawa nesalapu kunkameng’ tenen, kunune, ne nai Allah. Naie, ne Yesusdi ne pe tep, ‘Kan mawa ngebo kunkamne’ tenen, ne kange dipru yumada, kan deikipu derikenune. ‘Kan amutara kunedi, kan pelpu pio donkamne’ tenen, pepne. Yesusdi upepra Allah tep moropu.

Yesusdi amenda taru teka tenenkamenge nesala yuma tep, Allah moropu upu

20 Yesusdi er nyapu tep moropu dingeda, aupu ton dukdongopra moropu.

“Ne nai Allah kan tep moropken upuda, ada ne wepra deiamsi nesala, ne nyapu teppu gume. Tonda, ne nyapudi ne upu dopra peterembengepa, yuk mutu nesala gekepmengedi, ne tep teka tenenkamenge nesala cap tep, Allah moropkene, naie. 21 Naie, nedi sun amenda taru teka tenenkameng nesala tep moropken kecada ake. Ada, ‘Ne cap, Allah kan cap, nun dipru dukdongopra tenpu kange doupra kunemetopu, sun teka tenenge nesala cap, amenda teka tenenkameng nesala cap, sun yuma peda utopu, dipru dukdongopra kikiman kunkameng’ tenen, moropkene.

Tonda, naie, sun yuma cap, nun butene cap, ‘Nun yumada dipru dukdongopra, tenpu kange tenepra kikiman kunkamep’ tenen, moropkene. Apepmantopu, sun teka tenenkameng nesala yumadi kuptengopda, yuk tali nesala yuma epmengedi, ‘E, tek sisi, nimi lyemna tep, Allahdi Yesus dokotepseu’ tenen, kael keptenge. Utenena tep moropkene, naie.” Yesusdi pepu.

22 Upepudi aupu ton pepu. “Naio, kan cap, ne cap kunumtopu, ‘Anesala yumadi dipru dukdongopra, tenpu kange tenepra teleppu kikiman kunkameng’ tenen, kandi pio telep kupra deipnemumtopu, nedi anesala tep konum telep kupra deipsi. 23 Kan cap, ne cap, dipru dukdongopra kunume. Ne cap, ne tep teka tenenge nesala cap, teka tenepkamneng nesala cap, dipru dukdongopra kunkamepe. Naie, kandi anesala yuma tep, ‘Telep kupra deiptumpa, dipru dukdongopra, tenpu kange tenepra, pio teleppu kikiman kunkameng’ tenen, moropkene.

Ada, sun dipru wilimdana gum dipapu, kange yuk-yuk tenepra men kunkameng dinin, bouna di telep kuprappu kikiman kunkamenge. Ukupra kutenge pangeda, teka tenena gum, tali tuai nesala yumadi kael kepkamenge. Kael kepkamengada, ake. Ada, ‘E, tek sisi Allahdi Yesus dokotepu,’ tenena cap, tonda, ‘Allahdi Yesus tep dipru karerurtopu, Allahdi ateka tenena nesala peda, sun tep dipru karerure,’ tenena cap, ‘Ange yuma kael kepkameng’ tenen, moropkene, naio.” Yesusdi upepra moropu.

24 Ukupra moropu dingeda, aupu ton pepra moropu. “Naio, kandi akeca-keca yuma cap, tuai mutu yuma cap, kapul men ketekeipmum taruda, kandi ne tep weika di dipru kareamnemume. Ukupra dipru kareamnemuma tep, ila mambul ngebo kupra deipnemumdi ereipnemumpa, ne si ila di erepra gispal doamnei. ‘Ange yuma pio telep kupra deipnemum ngeda, ne nyapudi epmengedi kael kepnetenge’ tenen, moropkene, naie. Ada, ‘Ange yuma epkamneng’ tenen, kandi kareamnemum nesala, ‘Ne nyapu yuma cap, ne cap, ne kunkamne mutu kikiman kunkamep’ tenen, moropkene, naie.

25 Uo, ne nai Allah, kanda pio Dumsisi Kun Ngebo kurume. Mali keca tenpunge peda men kurume. Teka tenena gum di, tuai mutu tali kunge nesaladi, kan tep men kael kemkenunge. Sun cap, kan cap, dipru dukdongopra men kununge. Dinino, ne kael keamkesi. Kan cap, ne cap, dipru dukdongopra kikimanpu kunume. Kandi ne dopra tuai mutu dokotepnemumada, ne nyapudi konum kael keami.

26 Nedi ne nyapu tep, kan kumem keca yuma peteremamsipa, kael kemnunge. Ange konum kuramsitopu, sun tep tupa kunkamne. Deiyoda ake. Ada, kandi ne tep, weika di dipru kareamnerumtopu, kandi sun tep, dipru weika di karenkamrume. Tonda ne cap, sun cap, dipru dukdongopra kikiman kunkamepe. Neda sun dipruai kunkamne. ‘Ange yuma, moropmaken keca yuma ukupkamre’ tenen, konum moropkene, naie.” Yesusdi aupu pepra, er nai Allah tep moropu.