Joh 18 | XteSC | STEP | Yesusdi Allah konum moropu dingeda, erdi weamu nyapu, sun 12 neng cap, sun kunmai ati tapra, bura bei. Ati bura tara beidi, mutu si Kidron ban banmaidi, ortara nimidi ara co kouamyai, aco palpal wengbei.

John 18

Yahudi yala deiyo nengdi, Yesus ateng koupra dubei upu

1 Yesusdi Allah konum moropu dingeda, erdi weamu nyapu, sun 12 neng cap, sun kunmai ati tapra, bura bei. Ati bura tara beidi, mutu si Kidron ban banmaidi, ortara nimidi ara co kouamyai, aco palpal wengbei. 2 Sun ara co palpal bei mutuda, Yesus cap, er upu gekerami nesala cap, amutupu bulumamipa, Yesusdi acapu peteremamu mutu cadi, Yudas Iskariot peda amutu konum kael keamu. 3 Yudasda, ‘Mali nengdi Yesus poipkung’ tenen, nimi upu konum kai perbenmaupa, gekepmaiya cadi, Yudasdi, “Bisi ake,” pepra mepra beupa, sun anengdi, Yudas er amnyo tara yakanmai. ‘Yesus ateng koupkup’ tenen, yakanmai nesalada, jen talen neng cap, Allah karena tep, ila deiyo neng sun amutara neng cap, Farisi neng cap yakanmai taruda, weica cap, lampu pelita cap, jen cap, parang ya cap talepra doupmaidi, gung weik yanmai.

4 Yanmaipane, Yesusdi amenda kupkamemei keca yuma konum kael keamu dinin, sun aneng yakanmai bisi neitamaipu bena epudi pepu. “Ware ngebo tep, eryarum do?” pepra asipetepu. 5 Asipetepupa, sundi, “Nasaret ngebo, er sida Yesus tep, diryanmape,” pepipnen, Yesusdi, “Ne akunune,” pepu. (Aupu pepu taruda, Yudas, nimi upu kai perbeu ngebo peda, aneng cap acapu tekmau.) 6 Yesusdi, “Ne akunune,” pepu pangeda, aneng yumadi, kware kupupa, yambul ortara mepropidi, tuai saki. 7 Ukupipa, Yesusdi kange di ton cap asipetepu. “Ware ngebo tep, eryanmarum do?” pepra asipetepu. Upepupa, sundi, “Gume, Nasaret ngebo er sida Yesus tep diryanmape,” pepi.

8 Upepipa, Yesusdi tamupra pepu. “Neda akunune konum pepmasene. Sundi ne tep, eryanmaruma cadi, ne cap akunmang nesalada tomona gume. Sunpuda tali dakunkamenge,” pepu. 9 Yesusdi aupu pepunge deiyoda ake. Ada arup taru, “Ne nyapu tenpunge peda, men gum kupkamenge,” pepmau upu, ‘Yesusdi pepmautopu, nong tek sisi kupkamre’ tenen, “Anesalada tomona gume. Sun dakunkamenge,” pepu.

10 Upepupa, Simon Peterus acapu tekmaua cadi, er parang ya kin keca pumbon dadi ya guprapudi, Allah karena deiyo neng sun ila deiyo ngebo, er pel melimna ngebo tep, er dumsisi tara amul takotepu. Amul takotepu ngebo, er sida Malkus. 11 Peterusdi ukupupa, Yesusdi Peterus tep upepu. “Ukuna yapo. Kan parang ya kange di tamupra kipo. Ne nai bo Allahdi teneamneunge karepnerepa, tapra men dopropkamne do? Gume, sundi dakupkamneng ja,” Yesusdi pepu.

Yesus ateng koupra Hanas damai dubei upu

12 Yesusdi upepupa, sun jen talena neng cap, sun deiyo ngebo cap, sun Yahudi yala deiyo neng cap, sun yumadi Yesus tomopidi, ateng koupra dubei. 13 Aketeng tamunda, Yahudi yala nesala, sun Allah karena tep, ila deiyo ngebo er sida Kayapas kuramu. ^{▼▼Kayapasda, imam ngebo kuramnga cadi, Yahudi yala nesala, sun mali keca yo pununa tep, gam keca kareryakaramipa, Kayapasdi, akeca dopra poprapudi, yapi dopra, Allah er si eremna ati pumbon bena Allah tep kareramu. Erda imam ngebo kuramu.} Kayapas er yamal bo sida, Hanas. Yesus tomopi nengdi Yesus talepra ateng koupidi, angebo Hanas er ati menmena dubei. 14 Kayapasda, ada tali ngebo gume. Erda, ‘Roma deiyo nengdi, nun Israel nesala yuma tep yu kuprepa, popsengedi gawal daksenung’ tenen, “Nun yo pununa tep, telep ngeda, tenpu ngebopu poptenge,” pepupa, Yahudi yala deiyo neng yumadi gekepi. ^{▼▼tenpu ngebo deptue – Kayapasdi aupu pepu ngeda, tali mankau di pepu dinin, Allahdi teneamutopu, Yesus er tenpu popmengopda, nimi lyemna deiyo keca keteneipkamua tep, Allahdi Kayapas er dipru neitamai pel dopupa, aupu pepu.}

Simon Peterusdi, “Yesusda, ne walwale,” pepu upu

15 Aneng yumadi, Yesus ateng koupra dubanmaipa, Simon Peterus cap, Yesusdi wepra deamu ngebo, tenpu ngebo ton cap ^{▼▼tenpu ngebo – Yohanesdi aupu sengrur ngeda, erdi er pe tep sengrure. Ada ‘Ne pe si men penkun’ tenen, ‘tenpu ngebo’ pu sengrure.} amenda dombanmarei. Yahudi yala neng sun Allah karena tep, ila deiyo ngebo Kayapasdi, Yesus men di wepra deiamu ngebo konum kael keamnga tep, ‘Akati wengna meme,’ pepra upu men sekupa, Yesus er upu gekeramu ngebo, angebo tenpu, imam Kayapas er ati dam wengbeu. 16 Angebo wengbeu dinin, Peterus puda, Kayapasdi men kael keamu ngebo cadi, erda bura tara beilya buplan damaipu kunmau. Dakunmaupane, Yesus er mi yuk ngebo ton kange di tamupra buplan dam yaudi, abuplan kalengna ner tep upu pepudi, Peterus dopra, ati dam tara duyau.

17 Ati dam duyaupa, buplan dam kunmau ner Peterus epudi, upepu. “Uo, kan peda, ateng koupmangu ngebo, Yesus, er upu gekepra dombarum ngebo kurum do?” pepu. Upepupa, Peterusdi aner tep upepu. “Ne gume,” pepu. 18 Alukundada, bul kupka cadi, akati melimna neng cap, sun deiyo neng cap, uku sekmaiyai dana-dana tara uku peingmai. Peterus peda, anesala sun uku sekra peingmaiyaipu, acapu tekra, er peda uku peingmau.

Allah karena tep ila deiyo ngebodi Yesus tep, asipetepu upu

19 Aneng yuma bura tarapu uku peingmaipane, Yahudi yala neng sun Allah karena tep, ila deiyo ngebodi, Yesus tep upu weika di asipetepu. Angebodi asipetepu upuda, Yesus er upu gekepra dombarami neng cap, Yesusdi peteremamu upu cap tep, asipetepu. Asimaupa, Yesusdi upepu. 20 “Gume, amutu neitamai yumada, nesala ban-ban yuma tep, upu katuai dipu peteremamsi. Nedi upu inipra men peteremamsi. Sun Yahudi yala nesala bulupra wengamrum ati pumbonpu peteremamsisi. Ada, sun Allah upu geken ati cap, Allah upu peteremna ati cap, Allah karena tep, ila ati dominge, akati dam cap, katuai dipu peteremamsi. 21 Nedi upu men inipra peteremamsa tep, sun ware keca deiyo tep, ‘Mali kupunge ake’ tenen, asipetepmanerum do? Nedi peteremamsipa, ne upu gekeramnei nesala weika di, dakununga cadi, ne pemsi upuda, sun kaele. Ne upu gekeramnei nesala tep asipeteprume.” Yesusdi pepu.

22 Upepupa, agekenmai neng kan-kan di, tenpu Yahudi yala deiyo ngebo, er buru di, Yesus er urasin bongopudi, aupu pepu. “Kandi peprempa, gekenmaker ngeboda, Allah karena tep, ila deiyo ngebo kurura cadi, kandi er tep aupu balila di pepmarem ngeda telep do?” pepra wenepu. 23 Angebodi Yesus tep bongopra wenepupa, Yesusdi tamupra pepu. “Ne pepmanu upu neitamaida, mali upu do, mok upu do, akapyopda, kandi ‘Er mali pepmaser upu ake,’ pepra lap pepsetume. Dinino, ne pepmanu upu neitamaida, mali upu men kapyopda, kanda ware keca deiyo tep buru bongopmanerem do?” pepu. 24 Yesusdi upepupa, Hanasdi peipupa, Yesus ateng koupmaiya utopu kupra, imam Kayapas er damai dubei. Kayapasda, aketeng tamun, Yahudi yala neng, sun Allah karena tep ila deiyo ngebo kuramu.

Peterusdi, ue taru weneri deiki di, “Yesus ne walwale,” pepu upu

25 Sun anengdi ukunmai taruda, Peterusda akati dam uku tupa peingmau. Acapu tekra, uku peingmau taruda, akunmai nesala kankan ton ngebodi pepu. “Uo, kanda, angebo Yesus, er upu gekepra dombana ngebo kurum darape,” pepu. Upepupa, Peterusdi, “Neda gume,” pepra, mok upu pepu. 26 Upepupa, tenpu ngebo ton gekepu. Angeboda, Allah karena deiyo ngebo tep, pel melimna ngebo gekepu. Agekepu ngeboda, Peterusdi arup taru amul takotepu ngebo, er yala ngebo kuramu. Angebodi, Peterus tep tamupra pepu. “Kandi, ‘Ne gume,’ pepmaserem dinino, arupda, Yesus cap, kan cap, sun ara co palpal kunmarumpa, epmakenue tenepkene,” pepu. 27 Upepupa, Peterusdi kange di ton cap, “Ne gume, angebo Yesusda ne walwale,” pepra iniptapu. Upepupnen, adipapu jem ayamdi upu gapupu.

Yesus dopra, ila nimi deiyo ngebo Pilatus damai dubei upu

28 Ayuma konum kupupa, sun Yahudi yala deiyo nengdi, Yesus doprapidi, imam Kayapas er ati tapra, amutu taleamu ngebo, Roma mutu ila deiyo ngebo Gubernur Pilatus damai dubei. Dubei dinin, Pilatus er ila ati men wengbei deiyoda ake. Ada sun Yahudi yala nesaladi tenerami. ‘Ila Kaplemna Kailya Kalemna jepkupe taruda, sun Yahudi yala gum nesala cap, sun keca cap talepmepyopda, mali kupserepa, kalemna men jeptepepa, Allah derepserur’ tenen, Pilatus er ati men weki. 29 Ukunmaiya tep, Pilatus er ati pum di bura tara yaudi, er ati dam bulupa yanmai nesala tep aupu pepu.

Bura tara yau taruda, Pilatusdi aneng tep asipetepu. “Angebo Yesus tep, ware keca mali kupka deiyo tep, ne damai duyanmarum do?” pepra asipetepu. 30 Upepupa, sundi, “Gume, erda pio mali kuna ngebo men kuptu teptoda, ateng koupra, kan damai men kareryaketepe. Tali tep men yanmape,” pepi.

31 Upepipa, Pilatusdi, “Atep, sun pedipapu angebo dopra, sun Yahudi yala nesala mem perumu upu deiki di, er tep upu bokeipkurume,” pepu. Upepupnen, sun Yahudi yala deiyo nengdi pepi. “Ange pepserem dinin, nun pedipapu, mali kun nesala men poptaptepe. Sun Roma nesala amutu taleserumdi, nimi pona deiyo men karepseruma tepa,” pepi. 32 Aupu pepi ngeda deiyo ake. Ada, Yesusdi, “Ukupra, ukupra poptapkamnenge,” pepu ngeda, nong kupkamua tep, aupu mankau di pepi.

33 Anesaladi aupu pepipa, Pilatus er ila ati pum tamupra wengbeudi, “Yesus dopra deneso,” pepka deiki di, Yesus dopra er damai duyai. Dopra deipi pangeda, Pilatusdi Yesus tep asipetepu. “Sun anesaladi, kan tep, ‘Erda Yahudi yala nesala, sun ila nimi deiyo ngebo, Raja kurure,’ pekenung upuda tek do? Telel do?” pepra asipetepu. 34 Upepupa, Yesusdi Pilatus tep tamupra pepu. “Kan kange tenepmuma deiki dipu aupu pepnerem do? Yuk nengdi, aupu pepkeipa, gekepmumdi, ukuda pepnerem do?” pepu.

35 Yesusdi upepupa, Pilatusdi pepu. “Kandi, ‘Angeboda Yahudi yala ngebo kurure,’ tenepmaneremdi, aupu pepnerem do? Kan yala nesala cap, sun Yahudi nesala Allah karena tep, deiyo nengdi, ateng koupmakengedi, kan dopra, ne tep karepmanenge. Atep nengeda, kandi ware mali keca kupmuma deiki di, duyanmakeng do?” pepra asipetepu. 36 Asipetepupa, Yesusdi Pilatus tep, tamupra pepu.

“Neda ila deiyo ngebo kunedi, ne talenun mutu cap, talenun nesala capda, atuai mutupu men kurure. Ne talenun keca yumada, tali tuai mutu kecapu kuptu teptoda, ne talenun nesaladi, ‘Yu nengdi, nun deiyo ngebo ateng koupnung’ tenen, Yahudi yala deiyo nesala tep poryatenge. Dinino, ne talenun mutu cap, nesala cap ayumada, atuai mutu neitamaipu men kurure. Ne talenun keca yumada yukai di yakarure.” Yesusdi pepu.

37 Upepupa, Pilatusdi, “Aupu pepmarema tep, kanda ila nimi deiyo ngebo, Raja ngebo kurume,” pepu. Upepupnen, Yesusdi, “Pilatus kandi, ‘Kanda Raja ngebo, ila nimi deiyo ngebo kurume,’ pepmanerem upuda, tek pepreme. ‘Ila nimi deiyo ngebo, Raja kunkamne’ tenen, tuai mutu yasi. Adeiyo tep deipnei. ‘Tek sisi upu penkamne’ tenen, tuai mutu yasi. Tek sisi upu gekepra talenung nesalada, ne upu gekepra teka tenenenunge.” Yesusdi pepu.

38 Upepupa, Pilatusdi tamupra, “Tek sisi upu pepmaremada, ware upu tep peprem do? Tek upuda wareto upu do?” pepra peptapudi, akati tapra, kange di ton cap, akati pum di bura tara beu dingeda, sun abulupmai Yahudi yala deiyo neng tep upepu. “Angebo asipetepmanu dinin, ‘Erda amali kupu kecada ake-ake’ tenen, men kael kepmane. 39 Dinino, aketeng tamun, aketeng tamun yumada, sun ila Kaplemne Kalemna taruda, wenemna ati dongopmepu ngebo tenpu, sun namna tep, loptamnupe. Ukunupa, cadi, ‘Erda Yahudi nesala sun ila nimi deiyo ngebo, Raja kurure,’ penung ngebo Yesusda, er loptapra karepkusen do, gum do?” pepra asipetepu.

40 Upepupa, sun Yahudi yala deiyo neng yumadi tamupra, ila upu deiki di pepi. “Gume, angebo Yesus loptapra men karepkuserume. Barabas si siperameng ngebopu loptapseo,” pepi.

Uda, Barabas perami ngeboda, Israel nesaladi, ‘Roma mutu deiyo nengdi talesenungada, nun song’ tenen, popbisipterepi taruda, Barabas er capdi Roma deiyo neng tep popbisipterepipa, men kupmanto kupka tep, Barabas tomopra wenemna ati dongomya cadi, Barabas pepi ngeboda, angebo tep pepi.