Joh 19 | XteSC | STEP | Abulupmai nesaladi, “Yesus lortamna gume,” pepipa, Pilatusdi peipupa, er jen talen nengdi Yesus dopra, er nong deiki balana weika di bongopi.

John 19

Yahudi yala deiyo nengdi, “Yesusda sengdin co deiki di poipseo,” pepi upu

1 Abulupmai nesaladi, “Yesus lortamna gume,” pepipa, Pilatusdi peipupa, er jen talen nengdi Yesus dopra, er nong deiki balana weika di bongopi. 2 Bongopidi, takke weik keca dopra, kwaneprapidi, Yesus er giso deiki dekdongopi. Tonda, ataruda ila nimi deiyo nengdi, kunumna weik mirin opkal kemamenga utopu, Yesus er nong deiki aopkal utopunge dongopra deipmai. 3 Ukunmaidi, abulupra wekmai jen talen nengdi, Yesus dam yana upenmai. “Uo, kanda ila mambul ngebo. Yahudi yala nesala sun ila nimi deiyo ngebo, Raja kurume,” pepra, Yesus er urasin deiki buru di bongonmai.

4 Anengdi Yesus tep nalepra bongonmai taruda, Pilatusda akati pum di bura tara Yahudi yala deiyo neng cap, tali abulupmai nesala cap kunmaiya, sun damai bena pepu. “Sun yuma aca diso. Angebo Yesusda, ‘Er mali kupu kecada, ake-ake’ tenen, men kael kepmana tep, ‘Er mali kuna tep wenepra popkupe,’ men peptene. Nimi porameng deiyo keca ton men kupka tep pepsene,” pepu.

5 Pilatusdi aupu penmau taruda, er jen talen nengdi Yesus duyai. Yesusda, takke keca kwanepra, er giso deiki dekdongopmainge cap, mirin opkal er nong deiki dongopmainge cap, tupa kunmau. Yesus duyanmaipa, Pilatusdi er ati dam wekmai nesala yuma tep, “Angebo akunmare. Sun diso,” pepu.

6 Upepupa, sun Yahudi yala neng, Allah karena tep ila deiyo neng cap, sun amutara pel donmai neng cap, Yesus epidi, upepi. “Yesusda, sengdin co deiki deipra poipseo,” pepra weika di penmai. Upenmai dinin, Pilatusdi, “Neda, ‘Er mali kupka deiki di, nimi poramep deiyo kecada ake’ tenen, men kael kepmana tep, deiyo men kupmara atep, nedi angebo men poipkusene. Sun pedipapu, angebo dopra porbeso,” pepu. 7 Upepu dinin, sun Yahudi yala deiyo neng, weika di penmai. “Gume, nun apu bo Musadi sekeiamseu upu, amem upu neitamai pesere ngeda, angebodi yanipseua tep, adipapu poipsetume. Erdi, ‘Neda Allah er Mi Sisa kunune,’ pepka deiki di nun mem upu yanipseua tep, poipseo,” pepi.

8 Upepipa, Pilatus gekepudi, kware weik dangmau. Kware weik kupupa, er ila ati pumbon tamupra beu. 9 Beudi, Yesus tep asipetepu. “Yesus, kan mutu sisada, dan mutu do? Dan mutu di yanamum do?” pepra, asipetepu dinin, Yesusdi upu ton tamupra men pepu. 10 Yesus dimpeprappu tekupa, Pilatusdi, “Kanda upu men pepkunerem do? Neda ila nimi deiyo ngebo, upu bongdina deiyo ngebo kununa cadi, nedi, ‘Poipso,’ pepnepa, sengdin co deiki di popketenge. ‘Loptapso,’ pepnepa, loptapketenge. Angeda moupra men kael kepmaneremdi, tali dimpepnerem do?” pepu.

11 Upepupa, Yesusdi tamupra pepu. “Kan dipapu upu weik pepnetuma peda, nong men kuptu dinino, Allahdi ne pona tep, go cap, deiyo cap konum karepkera tep, aupu pepmempa, ukupkamnenge. Dinino, ‘Popkunge’ tenen, ne tep nimi upu kai perbanmau ngeboda, erdi pio mali kupmauada, ila mambule. Kan Pilatusdi mali kupnerem ngeda, yambul mali pua,” Yesusdi pepu.

12 Yesusdi aupu pepu taru di dipra, ataru neitamai yumada, Pilatusda kware kupupa, ‘Yesus loptaptene’ tenen, go taru dipetepu dinin, sun Yahudi yala nesala deiyo nengdi weika di upepi. “Gume, kandi angebo Yesus loptapmemnyopda, Roma mutu yuma talerur ila deiyo ngebo Kaisardi, ^{▼▼Kaisar – Roma mutu kurami nesala, sun ila deiyo ngebo. Lap pena nomor 41 dirume.} kan tep, ‘Angeboda ne kabo,’ men tenenkamkere. Angeda tali men pepkepe. Ware ngeboda yuma, ‘Neda nimi deiyo ngebo,’ pepra, si erepdange nesala yumada, Roma mutu ila nimi deiyo talepra, kurur Kaisar tep yanina utopu nesala kununge. Atep, aupu utopu pepu ngebo Yesus men loptaptume,” pepi.

13 Upepipa, Pilatusdi aupu gekepudi, Yesus dopra sun aneng dinmaiyaipu deipu. Deipudi, er Pilatusda, upu bongdina deiyo ngebo bungna keca deiki buku. Ada akati damaida, amutu er sida Gel Bisi, tonda Aramaik upu deiki di, Gabata peramyai buku. 14 Pilatusdi akeca deiki buku tumida, Kaplemna Kailya Kalemna ketenemna tumi perami. Ketengda, keteng dukduk di pepu. Pilatus, upu bongdina deiyo ngebo bungna keca deiki bukudi, upepu. “Sun Yahudi yala nesala, sun ila nimi deiyo ngebo, Raja Yesus akunmar adano,” pepu.

15 Upepupa, sun awekmai neng yumadi upepi. “Gume, angeboda dopra dubeso. Duberumudi, sengdin co deiki deipra poipseso,” pepi. Upepipnen, Pilatusdi, “Angebo, sun ila nimi deiyo ngebo, sun Raja popkun do?” pepupa, sun Allah karena tep ila deiyo nengdi, “Gume, nun ila nimi deiyo ngebo, nun Rajada, Kaisar er tenpu kurure. Yuk ngebo ton men taleserure. Angebo Yesusda nun gume,” pepi.

16 Sun yuma akunmaipane, amendada, Pilatusdi Yesus dopra, ‘Anesaladi sengdin co deiki deipra popkameng’ tenen, anesala karepu.

Yesus dopra, sengdin co deiki di popi upu

17 Pilatusdi, aneng tep, Yesus karepupa, sun jen talena nengdi Yesus dubei.

Dubeidi, Yesus er sengdin co karepipa, Yesus erdi dopra beu. Yesus cap banmaiyanen, mutu si Golgota mutu welerbei. Aramaik upu deiki di Golgota perami ngeda, amutu urasinda nimi giso yo utopu kwamu mutu tep, amutu sida, Golgota perami.

18 Amutu deiki welepidi, Yesus dopra, asengdin co deiki deiprapidi, er yane cap, buru cap paku daki. Ukupidi, atarupu Yesus er dana-dana tara, yuk neng butene cap, yuk sengdin co deiki deipidi, paku dakra erepra iki. 19 Pilatusdi pepupa, co lase deiki aupu sekra, Yesus er giso deiki tara, paku dakra deipi. Aupuda ake. ‘Yesusda Nasaret mutu ngebo. Yahudi yala neng sun ila nimi deiyo ngebo Raja ake,’ pepra, aco lase deiki sekra deipi.

20 Aupu sekra deipi ngeda, yuk-yuk mutu upu cap, amutu upu cap deiki di, tapakra sekra deipi. Ada Aramaik upu cap, Latin upu cap, Yunani upu cap deiki di sekra deipi. Yesus sengdin co deiki deipmai mutuda, Yerusalem ila ati arum domyai damai cadi, amutu kurami Yahudi yala nesala weika di, asekra deipi upu epi.

21 Epidi, sun Yahudi yala nesala, Allah karena tep deiyo nengdi, Pilatus tep mali kange doupra, upu ila di penmai. “Uo, ‘Yahudi yala nesala, sun ila nimi deiyo ngebo ake,’ pepra, sekra deipmarumada, warya tep do? Ukupra sengnada gum dinin, telep ngeda, angebodi, ‘Neda Yahudi yala nesala sun ila nimi deiyo ngebo kunune,’ peramu. Nun penmap upuda ukupra sekmatume,” pepi. 22 Upepi dinin, Pilatusdi anesala tep, “Gume, ne konum sekmanu upuda, konum sekmanua cadi, konuma akapkamre,” pepu.

23 Sun jen talen nengdi, Yesus dopra sengdin co deiki paku daki taruda, er deiki keneku opkal yuma kwiripa dopropidi, ‘Nun dumbari neng yuma kikiman utopu doproptepe’ tenen, dumbari bokra dopropi. Yesus er deiki tara opkal bokrapi dinin, iriamu tara opkalda, pio telep kupu. Ada kum bon bisi di dutara yuma wipra yakaramya tep, win bisi katuai men kupu. 24 Aopkal tenpu ngeda, pio telep kupka cadi, sundi upepi. “Aopkal men gweleptapkupe. Nun esu pen keca, er si undi ^{▼▼Undi perami ngeda, ake. Akeca di esu perami ngeda, metek co deiki sun si sekra ketenepra deipmaiya di, ametek co yuma tu deiki siptapipa, nimi si katuai kupu ngeda, angebodi telep keca dopropu. Undi ngeda, ada ‘Ware kupkup do?’ tenen, petenkemna tep keca kwamu.} deiki dipu, doproptu ngebo katuai kupkamasere,” pepra, esu peprapidi, aopkal tenpu ngebodi dopropu. Ange ukupra kupi ngeda, tali mankau kange doupra kupi dinin, tek sisada, Allah upu neitamai menop taru nabi nengdi sekeiami ngeda, ‘Nong kupkamre’ tenen, kupi. Mazmur deiki sekami upuda ake.
‘Ne opkal yuma bokrapidi, dopropi. Ne opkal dorona tep, esu peprapidi, dopropi.’ (Mazmur 22:18)

Aupu menop taru nabi nengdi sekamitopu, sun jen talen nengdi kupi.

25 Yesus sengdin co deiki popmaiyai damaipu, Yesus er nin sisa teku. Tonda, acapu er nin er weit ner, ada tenpu ngebo er sida Kelopas, er ner Maria ton teku. Tonda, Magdale mutu ner, er si peda Maria Magdalena acapu teku. Sun yuma kikiman tekra dinmai.

26 Sun yuma atekmaiya neitamai di, Yesus er nin Maria cap, Yesus wepra deiamu ngebo, er dipru ila di kareamu ngebo cap kikiman tekreipa, Yesusdi epu. Epudi, er nin tep upepu. “Ne ka nero, kan mi adano,” pepu. 27 Upepu dingeda, er dipru kareamu ngebo, er kabo sisa ^{▼▼kabo sisa – Yohanesdi aupu seku ngeda, ada ‘Ne pe si men sekun’ tenepu dinin, er pe tep, Yohanes pepu.} tenpu tep upepu. “Kao, kan nin atekmar adano,” pepu. Yesusdi upepka tep, er dipru kareamu ngebo gekepudi, ataru di dipra, doryankamu taru neitamai yumada, angebodi Yesus er nin kongpepupa, adipapu aner er atipu kikiman kuramupa, angebodi aner melimamu.

Yesus depka tep, pepu upu

28 Yesus dakunmauanen, uda ‘Akeca-keca yuma konum kupmanenge,’ tenepudi, tonda, ‘Menop taru nabi nengdi, Allah upu sekami ngeda, ataru nong kupkur’ tenen, aupu pepu. Yesusdi, “Ne me putapnere,” pepra moropu. 29 Ataruda, anggur me cap, yu me, er sida cuka me cap, tapakra ketenepmainge damai kupka cadi, akunmai nesaladi, akapu keca me tudon keca dopra, anggur me suminmin nge buruprap, ‘Yesus jepkur’ tenen, lyom co balana di, er sida hisop co lyumoprapidi, erepra Yesus sipyal damai karepterepi. 30 Karepipa, Yesusdi akeca konum meteka di jepu dingeda, aupu pepu. “Ukuda konuma,” pepudi, adipapu er giso dakra dorbeudi depu.

31 Uda, Yesus depu tumida, tali tumi gume. Atumida, sun Yahudi yala nesaladi, ila Kaplemne Kalemna tumi tep, Ketenemna Tumi perami. Ambutumida, ila mambul Sabat tumi kupkamaua cadi, utenepi. ‘Gume, sengdin co deiki deipmangu nesala men depmengopda, sun nongda nun mambul tumi, Sabat tumi neitamaida, sengdin co deiki tupa kunada pio mali,’ tenepi.

Ukupra tenepya tep, sundi Pilatus tep moropi. “Pilatuso, sengdin co deiki deipmarum nesalada, tupa gam kungepa, ambutumi nun mambul tumi, Sabat tumi neitamai sengdin co deiki tupa kupmengopda, nun songe. Atep, ‘Anesala menmena depkung’ tenen, sun kail yo coprepa, menmena depkameng ja. Aneng konum depmengopda, sun nong dopra yukai deiptume,” pepra moropi.

32 Upepra moropipa, Pilatusdi gekepka cadi, erdi peipupa, er jen talen nengdi, ‘Anesala sun kail yo gat keca di bongopmepepa, yo copkur’ tenen, yai. Yaidi, Yesus dana tara deipmai ngebo, menmena er kail yo bongopipa, yo copu pangeda, Yesus ortara deipmai ngebo pe, er yo utopu bongopipa, yo copu. 33 Ukupmaidi, ‘Yesus er yo ton copkup’ tenen, Yesus damai yanmai dinin, Yesus konum depmaua cadi, er yan kail yo men copi. 34 Angepu gum dinin, tenpu jen talen ngebodi, lyom co dula di dopra, Yesus er kelamai lukra popupa, Yesus er yapi cap, me cap weika di embeu.

35 Sundi ukupipa, ange yuma epu ngebodi, konum katuai lape pepseu. Erdi, “Anengdi ukupye,” pepra, lape pepseu upuda, tek sisipu kurure. Angebodi tek upu pepseuada, ‘Sun yuma gekepmengedi, teka tenenkameng’ tenen, pepseu. ^{▼▼angebo – Yohanesdi ‘angebo’ pepkada, er pe tep pepu.}

36 Uda, Yesus er yo men copi ngeda, ada nabi nengdi Allah upu menop taru sekaminge, ‘Nong kupkamre’ tenen, kupu. Anengda, tali mangkau kange doupra kupi dinin, Allahdi Yesus tep teneamutopu kupi. Allah upu Mazmur neitamaida aupu sekami.
‘Er yo tenpunge peda men copkamenge.’ (Mazmur 34:20; Keluaran 12:46)

37 Tonda, yuk buku Zakaria neitamaida, aupu ton sekami.
‘Er kelamai lukra popi ngeboda, epkamenge.’ (Zakaria 12:10)

Atep nengeda, Yesus er yo men copi ngeda, ada nabi nengdi Allah upu menop taru sekami ngeda, nong kupu.

Yesus depupa, er nong dopra gel imir dongopiya tep, pepu upu

38 Uda, tenpu ngebo er sida, Yusup, erda Arimatea mutu ngebo kuramu. Yusupda, Yesus tep teka tenepra, er upu gekeramu dinin, ‘Sun Yahudi yala deiyo nengdi, wenepnenung’ tenen, kware kupupa, er teka tenemu ngeda inimamu. Katuai di men peramu. Angebo Yusupdi, Pilatus tep, “Yesus er nong dopra peipkuna tep, karepneo,” pepra moropupa, Pilatusdi telepe pepka deiki di, Yusupdi Yesus er nong doryau. 39 Yesus nong doryau taruda, tenpu ngebo cap yarei. Angeboda, ada men di lukunda neitamai Yesus damai yau ngebo, er sida Nikodemus cap yarei. Nikodemusdi, ‘Yesus er nong lyuprepa, ton peprur’ tenen, er nong peina ketenemna tep, nintong telep me er sida, minyak mur cap, gaharu cap, 34 kilo kepra duyau.

40 Sun butene, Yusup cap, Nikodemus capdi, Yesus er nong dopra anintong telep keca, er nong deiki likra deipreidi, pio telep boun opkal tekrapreidi, Yesus er nong getepdongoprei. Ukupra, Yesus er nong peina tep, apel ketenepra dopreiada, sun Yahudi yala nesala yumadi nimi peina tep ukurami.

41 Yesus sengdin co deiki popya damaida, nimidi urasin telep co kouamya tep, urasin telep kupu. Aca neitamaida, nimi peina gel imir ukupunge ton kwamu. Agel imir pumbonda, deami nesala nong kapul men dongorami. 42 Sun Yahudi yala nesala ila kalemna tumi tep ketenemna tumi konum kupka cadi, ‘Ambutumida, apel ton men doptepe,’ tenepreidi, agel imir damai kupka cadi, Yesus er nong dopra, acapu dongopra deiprei.