Joh 2 | XteSC | STEP | Yesusdi Galilea tara neitamai dinin, mutu si Kana mutu beudi, dakunmaipane, weneri tumi konum kupupa, amutu nesaladi ner dona tep kalemai. Sun kalemai atida, Yesus er nin cap kikiman kunmai.

John 2

Yesusdi tali me sisa dopra, anggur me ketekeipu upu

1 Yesusdi Galilea tara neitamai dinin, mutu si Kana mutu beudi, dakunmaipane, weneri tumi konum kupupa, amutu nesaladi ner dona tep kalemai. Sun kalemai atida, Yesus er nin cap kikiman kunmai. 2 Akalemna deiyo nengdi, Yesus cap, erdi wepra deiamu neng cap tep, “Sun ton jeryaso,” pepra konum peipya tep, sun cap akatipu, ner dona tep kalepmai ati kunmai.

3 Ner dona tep kalenmai nesala yumadi, kange deipra jen cap, kange yawaramne me, anggur me cap jenmaipane, akati ketenepmai anggur me yuma gawal dakra jepropipa, gum kupu. Gum kupupa, Yesus er nindi Yesus tep pepu. “Anesala sun kange yawaramre anggur meda konum jepropmangpa, gum kupre. Ton cap men keteneipmange,” pepu. 4 Upepupa, Yesusdi tamupra pepu. “Ka nero, warya tep aupu pepmanerem do? Allahdi teneamneu taru ^{▼▼Allahdi teneamu taru – Yesusdi aupu pepunge deiyoda ake. Ada ‘Nimi men kupmanto pel dopnepa, nimi epmengedi, uo erda Allah er Mi Sisa kurure’ tenen, kael kepmengedi, ‘Katuai di penkamnenge,’ tenepudi pepu.} kapul men kupnere,” pepu. 5 Upepupa, er nindi, akati pel melimna neng tep, “Yesusdi pepser upupu, adipapu gekepra kupkurume,” pepu.

6 Sun upu talepmanguaida, nong weik gat me mau ngantan bari ketenepra deipmaipa akupmau. Ame mauda, me ton kapul men gwepra deipmai. Ame mauda, sun Yahudi yala nesaladi, ‘Allah derepserur’ tenena tep, ‘Musa peipseutopu nun buru me kunkamepe’ tenen, derirami utopunge kwamu. Tenpu me mau pumbonda, ukupmanto me pio weike, 100 liter me gwepra dingdongorami. 7 Aila me mau damai kupmaua cadi, Yesusdi akati pel melimna nesala tep upepu. “Tali me sisa gwepra, ame mau yuma dingdongopkurume,” pepu. Upeputopu, anengdi me weika di gwepra, nangantan bari ila me mau yuma dikdongopi. 8 Konum dikdongopipa, Yesusdi aneng tep upepu. “Ukuda ame mau pumbon di ukutaru akupmau me gwepra, ner dona tep kalemna deiyo ngebo tep karerberume,” pepupa, aupu peiputopu kupi.

9 Kalemna deiyo ngebodi amokon dopra jepetepu. Amokonda, arup taru tali me kupmau dinin, ukuda Yesusdi ame dopra, anggur me kange yawaramrenge konum ketekeipupa, anggur me kupu. Kalemna deiyo ngebodi, ‘Ame, anggur meda, ame mau di duyanmanenge’ tenen, men kael kepu dinin, akati pel melipra dorami nengpuda, sundi gwepmaiya tep, sun kael kepi. Akati deiyo ngebodi, tali mankau kange doupra, jepetepupa, ameda pio telep kupka tep, lukdau. Lukdaudi, ner dopkou ngebo upupupa, yau. 10 Yaupa, kalemna deiyo ngebodi pepu. “Kao, amutu kunup keca kan kaele. Kalemna kalemnup taru yumada, menmena taru pio telep anggur me karepmepepa, nun kayapu weika di konum jepmengepa, konum boupyopda, amenda taru yambul telepnge karenupe. Ukunup dinino, kanda pio telepnge mawapu deipmamum dinin, ukutarupuda pio telepnge karepmasereme. Ukutaru jepkup ngeda pio telepe,” pepu.

11 Yesusdi tali me sisa dopra, pio telep anggur me, kange yawaramrenge ketekeipu ngeda, ada menmena nimi men kupmanto pel dopu. Apel dopunge deiyoda, ‘Angebo Allah er puto deiki di pel dorure, tenepkamnenge,’ tenepudi, apel nimi men kupmantonge dopu. Atep, Galilea tara neitamai Kana mutu di apel dopka deiki di, er ila mambul kupunge cap, pio telep kupunge cap, katuai kupra deipseue. Tonda, ukupupa, erdi wepra deipu neng epidi, er Yesus tep, ila di teka tenepidi, sun kange dipru er deikipu deipi.

Yesusdi, mali neng tep, Allah karena ati pumbon di dokotepu upu

12 Yesusdi Kana mutu neitamai nimi men kupmanto pel menmenange dopudi, amutu tapra, Kapernaum mutu kwererbeu. Yesus cap, er nin cap, er weit yapu cap, erdi wepra deiamu neng cap kikiman beidi, Kapernaum mutu neitamai, ue tumi wenerito, dumbarito mapmai. 13 Mapmaipane, sun Yahudi yala nesaladi ila kalemna taru, Kaplemna Kailya Kalemna ^{▼▼Kaplemna Kailya Kalemna gonga keami taruda, ada Mesir mutu tapra benkui tumi, Allahdi peiputopu, sun Israel nesaladi, domba bisam mi popidi, yapi dopra sun buplan dana-dana tara cap, deiki tara cap likra deipi. Ukupipa, Allah er nimi pon malaikatdi, ‘Wein nyapu yuma popkun’ tenen, yau taruda, ayapi epu dingeda, Israel nesala sun ati yuma kaplepra banmau dinin, Mesir mutu kurami nesala, sun weni nyapu yuma popra gawal daku.} ataru konum damai kupupa, Yesus cap, er wepra deiamu neng cap, Yerusalem mutu bei. 14 Yahudi yala nesaladi, Allah karena tep, ila domi ati damda, ^{▼▼Allah karena atida, Allah er si eremna ati kuramu dinin, Allah er gispal dona cap, tonda, ‘Nimi mali kun keca gum kupra derinkamser’ tenen, gam keca yala weik poramidi, Allah tep akati damai kareryakarami. Tonda lap pena upu nomor 15 dinkurume.} nimi weik bulupra kunmai. Akati damda, gam kure keca kunumna neng weik bukmai.

Ada, Yahudi nesaladi, ‘Allahdi nun mali kun keca tep poptapsetu dinin, nun yo pununa tep, gam keca popmepedi, er tep karepmepepa, nun malinge gum kupra deipkuser’ tenen, akeca popra karerami. Tonda, ‘Allah er gispal dona tep, gam keca popra, Allah karepkamenga cadi, akeca kunupkung’ tenen, gam keca kunumna deiyo neng weike akati damai kunmai. Anengdi, sapi bisam cap, domba cap, yal ma cap, kunumai. Tonda, anesala dana-dana tara mutu yumadi kareryakanmaiya tep, co bo kunupra dengdarami neng cap, Allah er si eremna ati dampu sun meja deipra pel donmai.

15 Sun yuma ukunmaiya tep, Yesusda yu kupupa, tapu doprapudi, nimi bongona keca wipra, aneng sun nong deiki bongopra, bura tara enepra dokotenmau. Ada, ‘Allah karena ati damda, apel men dopkung’ tenen, aneng cap, sun sapi cap, domba cap yuma, bura tara dokotenmaue. Sun co bo kunupra dengdarami neng tep nengeda, sun meja tamupra yamuptapudi, sun gel uang yuma yamupra donokropu. Akeca kunumna neng peda, akati dam di bura tara enepra dokotenmau. 16 Yal ma kunumai neng tep, “Ama dopra, bendopso. Ne nai Allah, er mambul atida, tali akeca-keca yuma kunumnai, pasar utopu ati gum tep, sun warya tep, akati damai akeca-keca yuma kunumarum do?” pepra wenepu. 17 Anesala yuma tep wenepra bura dokotepupa, Yesus erdi wepra deiamu nengdi, Allah upu neitamai sekami upu kange di ton cap tenepi. Sun tenepi upuda ake.
‘Naie, nesala yumadi kan ila mambul ati tep, “Gisal donkameng” tenen, pio pe deipra pel dopnyopda, kange mun keca weik kupkamnere.’ (Mazmur 69:9)

18 Yesusdi, aneng yuma enepra bura dokotepupa, sun Yahudi yala deiyo nengdi, er tep pepi. “Uda, ‘Allahdi angebo dokotepupa, pel dorure’ tenen, ‘Teka tenepketepe’ tenen, nimi men kupmanto keca, ware pel dopkuserem do? Anesala bura dokotepmarumada, ware ngebodi deiyo keca karepkeua deiki di, kunmarem do?” pepra wenepi. 19 Upepipa, Yesusdi upepu. “Akatida, uruptaprumyopda, ue weneri tumi deiki di, ne kange di ton cap dopnedi, telep kupra deipkamne,” pepu. 20 Upepupa, sun Yahudi yala deiyo nengdi tamupra pepi. “Gume. Akati Allah er gispal dona cap, er si eremna cap tep doami atida, ue denge weike, keteng tamun 46 tahun deiki di doamya tep, kanda ware kupra deiki di ue weneri tumi deiki dipu kange di ton cap erepra doptum do? Angeda men kupmanto,” pepi.

21 Upepi dinin, Yesusdi, “Akati,” pepu ngeda, tali ati sisa tep men pepu. Tonda Allah er si eremna ati tep men pepu. Domopudi, ati pepu. Dinino, ati upu pepunge deiyoda, er pe nong tep pepdau. 22 Adeiyo tep pepka cadi, amenda taru mali nengdi Yesus popipa, depu dinin, Allahdi kange di tamupra Yesus gam bukra deipu pangeda, er nyapuda, ‘Uo, ange deiyo tep pepseu’ tenen, moupra tenepidi, kael kepi. Ukupu dingeda, menop taru Allah upu sekaminge cap, Yesusdi pepunge cap tep, teka tenepi.

23 Uda, Yesusda, Kaplemna Kailya Kalemna taru neitamai, Yerusalem mutu neitamai kunmaudi, anesalada, ‘Allahdi angebo dokotepupa, pel donmare, tenepmengedi, kael kepkamneng’ tenen, nimi men kupmanto keca, pel weik donmaupa, nesala weik dinmai. Dinmaiya cadi, Yesus tep teka tenepi.

24 Sundi Yesus tep kange deipra teka tenepi dinino, Yesusdi nesala yuma sun kange dipru neitamai kwamu keca konum kael keamnga tep, Yesusdi amutu nesala yuma tep nengeda, kange men deriramudi, er kuramu keca yuma sun tep katuai men lap peramu. 25 Yesusdi, ‘Uo, anengdi, “Yesusda tek ngebo kurure,” pepnetenge’ tenen, men putaramu. Nimi dipru neitamai kure kecada, er konum kael keamnga tep, anesala yuma tep, ‘Sun tek neng, telep kununge’ tenen, sun tep er kange men deriramu.