Joh 20 | XteSC | STEP | Sun yuma damapra kunmaiyanen, Sabat tumi konum kupkopda, Minggu tumi ipna bereng tamne di, Maria Magdalenadi, Yesus er nong dongopra deipmai gel imir damai beu. Beudi, gel imir buplan bisi neitamai gamupra deipmai gel, ortara konum gamuptapmaua epu.

John 20

Yesus gam bukudi, gel imir pumbon tapra beu upu

1 Sun yuma damapra kunmaiyanen, Sabat tumi konum kupkopda, Minggu tumi ipna bereng tamne di, Maria Magdalenadi, Yesus er nong dongopra deipmai gel imir damai beu. Beudi, gel imir buplan bisi neitamai gamupra deipmai gel, ortara konum gamuptapmaua epu. 2 Ange epmaua tep, Simon Peterus cap, Yesus er upu gekeramupa, dipru kareamu ngebo ^{▼▼dipru kareamu – Yohanesdi ‘dipru kareamu ngebo’ seku ngeda, ada er pe tep seku.} cap, sun damai sepdaro beu. Beuopda, upepu, “Uo, nun deiyo ngebo Yesus, er nongda yuk nengdi upula dopra dubenmangua cadi, er nong deipmanguaida nun walwale,” pepu.

3 Upepupa, Peterus cap, Yesus er upu gekeramu ngebo, yuk ngebo cap, ‘Yesus er nong peipmanguai dirbenkunem’ tenen, sepdaro benmarei. 4 Sun butene sepra banmareipa, Peterus gum dinin, er cap benmau ngeboda menmena gel imir damai beu. 5 Angebodi nong geipdongopudi, gel imir pumbon moupra dipetepudi, Yesus er nong getepmainge, boun opkalpu akapmaupa, epu. Epu dinin, agel imir pumbon men weku.

6 – 7 Acapu tekra dinmaupa, Simon Peterusdi amenda sepdaro yanmaudi, adipapu Yesus er nong peipmaiyai, gel imir pumbon wekra dirbenmau. Dipetepudi, Yesus er nong getepmai boun opkal cap, er giso getepmai opkal cap, akapmaupa epu. Yesus er urasin singlipdongopmarei opkalda dopra, geteipmainge yambul ortara yuk kupmaupa epu. 8 Ayuma epupa, amendada Peterus cap dinin, menmena gel imir damai yanmau ngebodi, er peda gel imir pumbon weku. Yesus peipmaiyai wekra dipetepudi, teka tenepu.

9 Ataruda, Yesus er wepra deiamu neng cap, er upu gekerami nesala yuma cap, Allah upu neitamai nabi nengdi sekami ngeda, moupra men kael keami. Atep, kael keamya deiki di, ‘E, Yesus depkamre dinin, kange di ton cap gam bukamre’ tenen, moupra men kael kepi. Angeda kapul men tenepi.

Yesusdi Maria Magdalena damai katuai tengyau upu

10 Akeca yuma konum eprei dingeda, sun ati tamupra yuk-yuk berei. 11 Sun berei dinin, Maria Magdalena perami nerpuda, Yesus peipmai gel imir damai bura tara tekra engenapu kunmau. Engenmau tarupu, nong geipdongopudi agel imir pumbon dipetepu. 12 Dipetepupa, Yesus er nong deipmaiyaida, Allah er im deiki pel don neng, malaikat butene bukmareipa epu. Ton malaikatda, Yesus deipmaiyai giso tara bukmaupa, ton malaikatda, yan tara bukmaupa epu.

13 Mariadi epupa, amalaikat butene di er tep asipeteprei. “Ka nero, kanda ware keca deiyo tep engenmarem do?” pepra asipeteprei. Asipetepreipa, Mariadi, “Gume, ne deiyo ngebo Yesus, er nong acapu peipmangu dinin, ukuda yuk nengdi dopra, yukai dubena deipmanguaida, ne walwale,” pepu.

14 Mariadi upepu dingeda, tamupra er bali tara dipetepudi, Yesus epu. Yesus atekmaupa, epu dinin, ‘Yesus tek sisi akunmare’ tenen, moupra men kael kepu. 15 Yesusdi er tep, “Ka nero, ware keca deiyo tep engenmarem do? Ware ngebo tep ertereryanmarem do?” pepra asipetepu. Asipetepupa, Mariadi, ‘Aupu pepmar ngeboda, aco palpal neitam nimi peinai pel dona deiyo ngebo,’ tenepudi, pepu. “Kao, Yesus er nong dopra yukai konum deipmarumyopda, er nong deipmarumai lape pepnetumtoda, nedi er nong dorbenkune,” pepu.

16 Mariadi upepupa, atekmau ngebo Yesusdi aner tep tamupra er sipu, “Maria,” pepu. Mariada, gel imir damaipu dinmaua cadi, Yesusdi er si pepka deiki di, adipapu Maria moupra tenepudi, tamupra Yesus tekmauai epra, amutu upu Aramaik deiki di, “Rabini, ne peteremna deiyo ngebo,” pepu. 17 Upepupa, Yesusdi pepu. “Ne nai Allah er damai tamupra kapul men benmana cadi, ne nong men talepkunereme. Kandi tamupra, ne weit yapu nesala yuma tep, aupu kai perbenkurume. Ada, ‘Ne Yesusda, ne nai kori, Allah er kundam tamupra benedi kunkamne. Ne naida, sun nai pua. Ne si eremnun Allahda, sun si eremrum Allah pua. Er tenpua,’ pepra perbenkurume.” Yesusdi pepu.

18 Yesusdi Maria Magdalena tep upepupa, aner Mariadi adipapu sepdaro beudi, Yesus wepra deiamu nesala, sun damai menmena beudi, “Neda Yesus konum epmanue,” pepra lap pepu. Tonda, Yesusdi er tep pepmau upu yuma lap pepupa, aneng gekepi.

Yesusdi er wepra deiamu neng, sun damai katuai tengyau upu

19 Atumipu dinin, konum ipupa, Yesus er wepra deiamu neng yuma, tenpu ati bulupra kunmai. Sundi, ‘Uo, Yahudi yala deiyo nengdi wenepra popsenung’ tenen, kware weik kupka tep, akati buplan dekdongopidi, selok kepdongopi. Akati pum dakunmaipane, Yesusda sun kan-kan neitamai dato-dato belepra tengyau. Belepra tekudi, aneng tep upepu. “Sun mambul kange douna gume. Kwar-kwar kuna gum di, kange deipra teleppu kunkamrume,” pepu.

20 Upepu dingeda, ‘Ne nyapu kael kepkung’ tenen, er buru tang paku dakra popmainge cap, er kelamai lukra popmainge capda, benbenepupa, sun yumadi epi. Yesus wepra deiamu neng epidi, ‘Nun deiyo ngebo Yesus tek sisi akunmaser’ tenen, kael kepidi, kange deipra pingpinga di kunmai. 21 Yesusdi sun tep, kange di ton cap upepu. “Sun mambul kange douna gume. Kwar-kwar kuna gum di, kange deipra teleppu kunkamrume,” pepu. Tonda, “Ne nai bo Allahdi, ‘Ne upu dopra perterembenkamre’ tenen, dokotepneutopu, nedi sun tep, ‘Ne kai telep upu, nimi lyemna upu dopra peterembenkameng’ tenen, dokotepsene,” Yesusdi er wepra deiamu nyapu tep pepu. 22 Upepu dingeda, Yesusdi er nyapu deiki si puto pung pepudi, aupu pepu.

“Sunda, Allah er Lek Sambala karepsenepa, dopropso. 23 Ware nesala do yuma, sun mali tenenge keca cap, mali kunge keca cap tep nengeda, Allah konum kaukepudi, gum kupra deipka cadi, ne nyapu sundi anesala tep, ‘Sun mali kun kecada gum kupmare,’ pepmumyopda, tek sisi Allahdi amali kun keca tep, kange di ton cap men tenenkamre. Ton nesalada, sun mali tenenge keca cap, mali kunge keca cap tep nengeda, Allah men kaukepudi, gum kupra men deipka cadi, ne nyapu sundi aneng tep, ‘Sun mali kun kecada, sun deiki tupa kapsere,’ pepmumnyopda, tek sisi anesala, sun mali kunge kecada, sun nong deikipu tupa kunkamre. Allahdi gum kupra men deipkamre.” Yesusdi er nyapu tep aupu pepu.

Tomasdi, Yesus er nong epka tep, teka tenepu upu

24 Uda, Yesusdi er wepra deiamu neng kikiman akati pum kunmaipa, Yesusdi belepra tengyaupa, epi taruda, tenpu ngebo er si buteneda Tomas, ton Didimus perami ngebo, er cap men kunmaiya tep, Tomasdi Yesus men epu. 25 Yesus er nyapu sun 11 nengdi, “Yesus gam bukra yanmaserpa, epmape,” pepra lap pepi dinin, Tomasdi upepu. “Upepmanerum dinino, Yesus er buru tang deiki paku dakipa, dila kupmarenge cap, er kelamai co dula di lukra popmainge cap, men epnedi, ne pe buru di er buru tang dila cap, er kelamai lukya dila cap, men talepnyopda, teka men tenepkamne,” pepu.

26 Tomasdi, upepupa, sun yuma tenpu minggu deiki tali dakunmaipane, ue yoneitam bari tumi konum kupupa, sun men di weki ati pumbonpu bulupra wekmai. Wekmaidi, buplan dekdongopra selok kepmai. Tomas cap, sun yuma cap, akati pum kikiman kunmaipane, buplan dekdongopmaiya peda, Yesusdi sun kan-kan neitamai belepra tengyau. Belepra tengyaudi, upepu. “Sun mambul kange douna gume. Kwar-kwar kuna gum di, kange deipra teleppu kunkamrume,” pepu.

27 Yesusdi upepu dingeda, Tomas tep upepu. “Tomaso, ne buru tang dilada, kan buru di talepneo. Ne nong dipetepnememdi, ne kelamai lukneiya dila deiki talepneo. ‘Tek do, telel do?’ tenen, kange tenimtonapu kunmaremada, yapkurume. Teka tenepkurume,” Yesusdi Tomas tep pepu. 28 Upepupa, Tomasdi, “Uo, Naie, kanda ne Deiyo Ngebo, Allah kurume,” pepu.

29 Upepupa, Yesusdi Tomas tep pepu. “Kandi epmanerema deiki di teka tenepmarem dinino, ware nesala do, asuru di men epmenga peda, teka tenepnengopda, Allahdi anesala tep makurepa, teleppu kunkamenge,” pepu.

30 Uda, Yesus cap, er upu gekepra dombarami nesala cap, kikiman kunmai taru neitamaida, Yesusdi nimi men kupmanto keca weikanun ton cap pel donmau dinin, ne Yohanesdi asekmasen buku neitamaida, akeca-keca yuma men sekra deipne.

31 Dinino, abuku neitamai sekra deipsi upu yumada, tali tep men seksi. Aupu yuma gekepmengedi, ‘E, Yesusda, tek sisi nimi Lyemna Deiyo Ngebo, Kristus kurure. Erda, Allah er Mi Sisa tek sisi kurure’ tenen, teka tenepmengopda, ‘Er si deiki di gam pio kunkamrum’ tenen, abuku sekeipsisi. Ne Yohanesdi pepsene.