Joh 21 | XteSC | STEP | Yesusdi, er nyapu damai konum katuai kupudi, akati tapra beupa, sun yuma dakunmaipane, amenda taruda, Yesus kange di ton cap, er nyapu damai dato-dato di belepra tengyau. Belepra tengyau mutuda, ada ila mokon sida Tiberias Mokon damai tengyau. Ataru kupmai kecada lape pepkusene.

John 21

Yesusdi peipupa, er nyapu mekina pio weika di tomopra dopropi upu

1 Yesusdi, er nyapu damai konum katuai kupudi, akati tapra beupa, sun yuma dakunmaipane, amenda taruda, Yesus kange di ton cap, er nyapu damai dato-dato di belepra tengyau. Belepra tengyau mutuda, ada ila mokon sida Tiberias Mokon ^{▼▼Tiberias – Amokonda si butene dinin, tenpaipu kurure. Er si ton Galilea Mokon perami.} damai tengyau. Ataru kupmai kecada lape pepkusene. 2 Atumida, sun kikiman kunmai nengda, Simon Peterus cap, Tomas (tonda Didimus perami ngebo) cap, Galilea tara dinin, Kana mutu ngebo Nataniel cap, Zebedeus er nyapu cap, yuk butene neng cap, sun yuma kikiman kunmai.

3 Kunmaipa, Simon Peterusdi, “Neda mekina yakra kirpetepbenkune,” pepupa, sun yumadi, “Atep, nun cap benkupe,” pepi. Upepya tep, sun yumadi gapung co wekra, mokon deiki bena mekina tomopterepmaiyanen, ukunmai dinin, alukunda neitamai yumada, sun mekina yakra doron keca, jaringda, mekina tenpunge peda men wekmau.

4 Talipu dayanmaipane, bereng yan tara kepupa, amokon pirmanaipu Yesus belepra tengyau dinin, sun yumadi, ‘E, atekmar ngeboda, Yesus akurure’ tenen, moupra men kael kepmai. 5 Tali kange doupra kunmaipa, Yesusdi sun tep ila upu di, “Ne kayapu, mekina kapul men tomopmarum do?” pepra asipetepu. Asipetepupa, sundi, “Gume, kapula,” pepi. 6 Upepipnen, Yesusdi, “Atep sun mekina yakra doron keca, jaringda, gapung co dumsisi tara dongopmumyopda, mekina weike wekamare,” pepu. Erdi aupu peputopu, gapung co dumsisi tara, sun jaring mokon pumbon dongopi pangeda, mekina denge pio weika di weku. Atep, ajaringda mokon pumbon di, sun gapung co deiki men erepmanto kupi.

7 Ukupu pangeda, Yesus wepra deiamu ngebo, er dipru kareamu ngebodi Peterus tep upepu. “Kao, ortekmar ngeboda, nun Deiyo Ngebo Yesus akunmar adano,” pepu. Upepupa, Simon Peterus aupu gekepudi, adipapu er arup taru kiliptapmau deiki opkal dopra, er nong getepmaudi, gapung co deiki mokon pumbon menmena busuku. 8 Busukudi, ‘Mokon pirmanai benkun’ tenen, me gekra banmaupa, Yesus er nyapu, sun yuk neng yumadi, gapung co deiki amenda yakanmaidi, mokon pirman bei. Sunda, karenai weik gum, mokon pirman di ortara 90 meterpu kunmaiya tep, yana tuai lukeipi.

9 Mokon pirman gapung co lukra deipidi, Yesus sekmau uku cap, kalum cap, mekina dapmaunge cap, roti jen keca keteneipmaunge cap, akunmaupa epi. 10 Epipa, Yesusdi, “Sun ukupu tomopmarum mekina kan-kan di, ton ngeda dopra derume,” pepu. 11 Upepupa, Simon Peterus kange di ton cap gapung co pumbon welepra beudi, mekina yangna alen, er sida jaring taleprapudi, mokon pumbon di gipra dopropudi, mokon porai derirbeu. Mokon pirman deipmaupa, amekina nong nukterepipa, denge weik ila mekinada 153 kupu. Denge weik kupmaua peda, sun mekina tomona keca, jaring tapuda, men buluktapu.

12 Ange yuma epipa, Yesusdi, “Ne nyapu, sun jeryaso,” pepu. Aupu pepu taruda, er wepra deiamu neng yumadi, kware tep, “Kanda, ware ngebo kunmarem do?” pepra men asipetepi. Tek sisa sun konum kael kepi. ‘Angebo nun deiyo ngebo Yesus adano’ tenen, konum kael kepi. 13 Yesusdi, roti keteneipmaunge cap, mekina kalum deiki dapmaunge cap dopra, er nyapu tep bokra karepu. 14 Ataruda, Yesus gam buku taru di dipra, er nyapu damai belepra tengyaunge, ue weneringe konum kupu.

Yesusdi Peterus tep, dipru kwa dipu upu

15 Sun yuma konum jepipa, Yesusdi Simon Peterus tep aupu pepu. “Wisi ngebo Yohanesdi deipu mi, kanda Simon Peteruso, anengda, dipru karenenung dinino, kan dano? Kandi ne tep ila di dipru karenerum do?” pepra asipetepu. Asipetepupa, Peterusdi, “Teka, naie, kan kaele. Nedi kan tep, ‘Ne kabo’ tenen, kange derikenune,” pepu. Upepupnen, Yesusdi tamupra domon upu deiki di, “Atep ne domba nyapu tep, sun jen karenkamrume,” pepu. 16 Amendada, Yesusdi kange di ton cap Peterus tep upepu. “Yohanes er mi Simon Peteruso, kandi ne tep ila di dipru karenerum do?” pepupa, Peterusdi, “Teka, naie, kan kaele. Nedi kan tep, ‘Ne kabo’ tenen, kange derikenune,” pepu. Upepupa, Yesusdi, “Atep ne domba nyapu tep deiyo ngebo kupra tankamnerume,” pepu.

17 Amendada, Yesus ue weneri deiki di Peterus tep asipetepu. “Wisi ngebo Yohanesdi deipu mi, kanda Simon Peteruso, tek sisi kange derinerum do?” pepra asipetepu. Asipetepupa, Peterusdi, ‘Uo, ue weneri deiki di, kange di ton cap angepu asipetepmanere’ tenen, dipru buluksaku. Mambul kange doupudi, Yesus tep tamupra pepu. “Naio, kanda akeca-keca yuma kael kemna ngebo kuruma cadi, adinmanerema di, moupra kael kepnereme. Nedi kan tep kange derikenune,” pepu. Peterusdi upepupa, Yesusdi tamupra pepu. “Atep, ne bicau tenenun domba tep, sun jen karenkamrume,” pepra domon upu deiki pepu.

18 Yesusdi upepu dingeda, aupu ton cap dukdongopra Peterus tep pepu. “Tek sisi pepkene. Men di kanda kaber ngebo kuramum taruda, kan opkal kenengamumdi, ‘Aca benkune,’ teneamum mutupu embaramume. Dinino, kanda wisi konum deipkeryopda, kan buru bepekra deipmem pangeda, yuk nengdi kan tep, opkal kenekra dongopkengedi, ‘Aca men benkune, ne song,’ tenepkamremaipu dopra dubenkamkenge.” Yesusdi pepu. 19 Yesusdi aupu pepka deiki di, ada amenda taru Peterus depkamunge tep pepu. Peterus depupa, nimi epidi, adeiki di Allah er si ila di ereipkaminge tep, Yesusdi aupu pepu. Yesusdi aupu yuma konum pepudi, Peterus tep, “Kanda ne amnyo pio domyankamnerume,” pepra deipu.

20 Upepupa, Peterus cap, Yesus cap tekra banmareipa, Peterusdi tamupra er amnyo tara dipetepudi, Yesus dipru kareamu ngebo amenda yakanmaupa, epu. Peterus epu ngeboda, ada Yesus popkamai tumi lukundada, jen kikiman jenmai taru, Yesus meneng dam bukudi, “Naio, ware ngebodi nimi upu perbenkamaker do?” pepra asipetepu ngebo ake. 21 Peterusdi ayakanmau ngebo epudi, Yesus tep upepu. “Naio, oryakare ngeboda dano? Angebo tep amenda taru ware kupkameng do?” pepra asipetepu.

22 Asipetepupa, Yesusdi tamupra pepu. “Gume, er tep tenena gume. Ukutaru di dipra, ortaru tamupra yankamne taru daneitamai yumada, nedi angebo tep, ‘Pio gampu kunkamre,’ teneptenya pe, ange men teneptenya peda, ayumada kan deiyo gum tep, ange men tenenkamrume,” pepu.

23 Yesusdi aupu pepka tep nengeda, Yesus erdi wepra deiamu neng kan-kan di tek sisi gum dinin, ‘Ange deiyo tep pepu do?’ tenen, tali upu perami. Ada, “Yesusdi, ‘Angebo tenena gume,’ pepmau ngeboda, men depkamre. Erda pio gam kunkamra tep, Yesusdi aupu pepu do?” pepra tenimtonapu kurami. Dinino, Yesusdi, ‘Angebo tek sisi men depkamre’ men pepu. Angeda, katuai di men pepu. Yesusdi pepu ngeda, “Ukutaru di dipra, ortaru tamupra yankamne taru daneitamai yumada, nedi angebo tep, ‘Pio gam kunkamre,’ tenepnyopda, kan deiyo gum tep utenena gume,” pepu.

24 Uda, aupu neitamai, “Angebo,” pepra deipmasen ngeboda, ada ne Yohanes tep pepsene. Apepmasen keca yumada, ne asuru di diramsi. Nedipu sekra deipsene. Nun yuma kaele. Nedi sekeipmasen upuda, Yesusdi peramu upu cap, kuramu keca yuma capda, tekpu kurure. 25 Yesus kuramu kecada, abuku neitamai weik sekmasen dinino, erdi pel doramunge cap, upu peramunge cap yumada, men sekra deipsene. Yesusdi kuramu keca yuma sekra deiptenge teptoda, buku nong denge weik men nukmanto kuptue. Ne kangeda, tuai mutu neitamai ban-ban yuma buku sekra deiamtenga peda, go men kuptupa, men deipmanto kuptue.

Telepe, ne upu konum sekeipsene.

Ne Yohanesdi pepsene.