Joh 3 | XteSC | STEP | Tenpu taruda, Farisi ngebo tenpu, Yahudi yala nesala sun deiyo neng pel doramitopu, er peda apel talepra doramu. Angebo er sida Nikodemus, Yesus er damai yau.

John 3

Yesus cap, tenpu ngebo er si Nikodemus cap, upu talepmareiya tep, pepu upu

1 Tenpu taruda, Farisi ^{▼▼Farisi nengda, Yahudi yala nesala, sun deiyo neng kuramidi, agama pel dona deiyo neng kurami. Tonda Allahdi, “Ange kunkamrume, angeda pio men kunkamrume,” peipu mem upu weik kael keami neng kuramidi, aupu peteremami. Dinio, Yesus tep teka men tenerami. Tonda lap pena upu nomor 10 dirume.} ngebo tenpu, Yahudi yala nesala sun deiyo neng pel doramitopu, er peda apel talepra doramu. Angebo er sida Nikodemus, Yesus er damai yau. 2 Lukunda neitamai di Yesus damai yanmaudi, Yesus tep aupu pepu. “Naio, kandi nimi men kupmanto keca, kunupsek pen pel domemya tep nengeda, ware ngebo do yuma, Allah er puto deiki men meliptupa, ato pel men doptue. Tali ngebodi apel men dopmanto cadi, nun kaele. Allahdi dokotepkeupa, kanda Allah upu peteremna deiyo ngebo kurume.” Nikodemusdi Yesus tep pepu.

3 Upepupa, Yesusdi domona upu utopu upu deiki di tamupra pepu. “Ne tek sisi pepkene. Ware nesala do yuma, nun nai yapudi ukupu deipseipa, ukupu nyapu kurameputopu, nun kange dipru neitamaida, Allahdi kange di ton cap ukupu nesala ^{▼▼ukupu nesala – Yesusdi aupu pepunge deiyoda, ada Yesus tep teka tenepmepyopda, Allahdi er Lek Sambala kareserya deiki di, nun kange dipru telep kupra deipseryopda, men di kuramuputopu tupa men kunupe, ukupu nesala utopu kunupe. Ukupseredi, nun kange dipru yuma neitamai di pel doserepa, er nyapu kunupe. Ukuserya deiki di, er cap kikiman pio gam kunkamepe.} utopu deipkamsere. Kange dipru ukupu nesala utopu men deipseryopda, Allah lyepseredi nun kange dipru talenkamserenge yumada, anesala men epmengedi men dopropkamenge,” pepu. 4 Upepupa, Nikodemusdi Yesus tep tamupra pepu. “Uo, naie, wisi konum deipmepyopda, ware kupra kange di ton cap deipsetenge do? Ware ngebodi, er nin mundu pumbon kange di ton cap wektupa, anerdi deipmemetu do? Angeda men kupmanto keca tepa,” pepu. 5 Upepupane, Yesusdi tamupra pepu.

Tek sisi pepkene, ware ngebo do yuma, me mokon ^{▼▼me mokon – Aupu deiyoda ake. Nun nin yapudi derisenung taruda, me sakrepa derisenunge. Allahdi gam pio kuna tep deiyo keca karesere taruda, Allah er Lek Sambala puto deiki di kareserepa, nun kange dipru cap, nong cap yuma taleserura tep, ukupmantoda, ada me mokon wengna utopu kunupe.} cap, Allah er Lek Sambala puto cap, abutene deiki di men deipseryopda, Allah lyepseredi nun kange dipru talenkamserenge yumada, angebodi men wektue. Tonda gam pio men kutenge. 6 Nimidi deringe ngeda, tali nimi nongpu derinung dinino, Allah er Lek Sambala er puto deiki di, nimi sambala tep, gam kuna deiyo keca kareseredi, ukupu nesala utopu kemdiserure. 7 Atep, nedi, ‘Ware ngebo do yuma, Allahdi kange di ton cap ukupu nesala utopu men deipseryopda, Allah lyepredi, angebo er kange dipru men talenkamemere,’ pepmaken upu tep, lukdana tenimtona gume.

8 Ukupmanto upu pepkukene. Kumanyada, er pedi teneretopu tali purure. Er puto dipu purepa, lelim gekerum dinin, akonuma. Sundi, ‘E, kumanya lelim gekepmapada, atara di yakanmarepa, ortara banmare,’ men peptume. Ange utopu, Allah er Lek Sambaladi gam kuna deiyo keca karepredi, ukupu nesala utopu kemdiserur nesalada, ange deiyo yumada, lap pepra kael men keptume. Ada tali asuru di men epmanto keca tepa. Yesusdi pepu.

9 Upepupa, Nikodemusdi, “Uo, naie, aupu pepnerem ngeda, ware kuprap kupsetu do?” pepra asipetepu. 10 Asipetepupa, Yesusdi tamupra pepu.

“Nikodemus kanda, Israel nesala, sun Allah upu peteremna deiyo ngebo kurum dinin, apepmaken keca moupra kapul men kael kepmaremdi, walwal di penerem do? 11 Tek sisi pepkene. Ne cap, ne nyapu yuma cap, nun yumadi asuru diramupudi konum kael keamupu keca yuma cap, ‘Aneng gekenkameng’ tenen, katuai lap penup dinino, sun Farisi nesalapuda, nun upu teka tenepra men dororume. 12 Nedi tali tuai kure keca tep upu pepmasenpa, kapul teka men tenerume. Atep, im deiki keca, mambul weik upu pepsetenya peda, ware kupra teka tenepnetum do?

13 Pumun taru di dipra ukutaru peda, yuk nesala yuma im deiki ton men welerbanunge. Tenpu ngeboda Nimi Mi Sisa Utopu Ngebo, erda im deiki kuramudi, tuai yau ngebo cadi, er tenpupuda im deiki wengamu. 14 Pumun taru mo cap, nimi cap pio men kwamu mutu neitamaida, nimi pon baldi nesala weik poramupa, Musadi gat keca dopra, bal urasin utopu petuprapudi, lyom co deiki kouprapudi, ikra ereiputopu, ne ton utopu kupkamnenge. Ada, Nimi Mi Sisa Utopu Ngebo dopra, co deiki deipnengedi, ikra ereipkamnenge.

15 Ukupkamneng ngeda, tali tep gume. Ada, ware nesala do yuma, ne tep teka tenepnengopda, Allahdi sun tep gam kuna deiyo keca karepserepa, pio gam kunkamenga tep, neda Yesus co deiki ereipkamnenge, ^{▼▼ereipkamnenge – Aupu pepu ngeda, ada mali nengdi, Yesus dopra sengdin co deiki di popkamiya tep pepu.} pepsene.” Yesusdi pepu. Upepudi, aupu ton cap pepu. 16 Allahdi teka tenena nesala yuma tep, gam pio kupra deipkamsera deiyoda pepkusene. Ada, Allahdi nesala ban-ban yuma tep, bicau teneamseudi, dipru weika di kareamseua tep, er Mi Sisa tenpupu kuramu dinin, tuai nesala lyemna tep karepseue. Ada, ‘Ware nesala do yuma, er Mi Sisa tep, teka tenepmengopda, pio men depkameng dinin, gam kuna deiyo keca karepnepa, pio gam kunkameng’ tenen, er mi tenpu karepseue.

17 Angeda tali tep men pepsene. Allahdi er Mi Sisa dopra, tuai nesala kunupai dokotepseua deiyoda, ‘Erdi tuai nesala yuma tep, wenepra poptapkamre’ tenen, men dokotepseue. Ange gum dinin, Allahdi, ‘Ne Mi dokotepnepa, nimidi er tep teka tenepmenga deiki di, nesala ban-ban yuma neitamai di nesala weik lyepkamne,’ teneamudi er mida, tuai nesala kunupai dokotepupa, nun damai yaue.

18 Atep, ware ngebo do yuma, Allah er Mi Sisa tep teka tenepre ngebo tep nengeda, Allahdi wenepra men poptapkamre. Dinino, teka men tenepre ngeboda, tek sisi wenepra popkamre. Ange peda tali tep gume. Deiyoda, sun teka men tenenge nesaladi, Allah er Mi Sisa tenpu er cap, er si cap tep, teka men tenenunga cadi, Allah er kangeda, ‘Sunda konum wenepra poptapsi nesala utopu kununge,’ tenerure. Atep, anesalada men lyepropkamre.

19 Allahdi tuai nesala tep, upu bokeipkamra deiyoda pepkusene. Ada, dirin deiyo ngebodi tuai nesala damai konum yau dinino, tuai nesalada, sun kuramenge kecada pio mali kurura cadi, sunda, ‘Dirineda nun songe dinin, nunda kunungna keca teppu kange kuserure,’ tenepra kununge. 20 Ware nesala do yuma, sun mali-malipu kunge nesalada, ‘Dirineda nun songe,’ tenengedi dirine kururaida men yakanunge.

Ukununga deiyoda ake. Ada sundi, ‘Gume, dirine kururai yana bukmepyopda, adirin di nun mali kunup keca katuai kupra deipserure’ tenen, adirinda tamnunge. 21 Sunda ukunung dinin, ware nesala do yuma, Allah er tek sisi upu peseretopu gekepmengedi, aupupu talepra dombange nesalada, Allah er dirine kururai yakanunge. Ukununga deiyoda ake. Ada, ‘Dirinai bepyopda, yuk neng kael kepkamsenge. Ada, nun kuramepe keca yumada, Allah er puto deiki dipu kununge’ tenen, kael kepkamsenge. Dirine tep kange derinung nesalada, angetopu tenenunge. Yesusdi pepu.

Teka tenena nesala dopra, me dongoramu ngebo, Yohanesdi Yesus tep, pepu upu

22 Yesus cap, Nikodemus cap upu konum taleprei taru dinin amendada, Yesus cap, er upu gekepra dombarami neng capdi, Yudea tara neitamai dinin, nimi ati men doramyai bura mutu bena kurami. Sun amutupu kurami taruda, Yesusdi peteremamupa, nesala weik teka tenepi. Teka tenepipa, Yohanesdi, anesala yuk-yuk dopra me dongoramu. 23 Ataru neitamaipu, Yohanesdi yuk mutu sida Ainon cap, Salim mutu cap neitamaida, teka tenena nesala dopra me dongoramu. Ada, amutu butene, er kuramu mutu neitamaida, me mokon weik kwamnga tep, nimidi, ‘Me dongopsetue’ tenen, tupa-tupa yakaramipa, Yohanesdi ateka tenepi nesala dopra, me dongoramu. 24 Yohanesdi apel doramu taruda, ada yu nengdi er dopra wenemna ati kapul men dongopi taruda, teka tenena nesala dopra me dongoramu.

25 Ataruda, Yohanes peterepu upu gekerami neng cap, tenpu Yahudi yala ngebo cap, upu deiki di deremdanmai. Upu deiki di deremdanmaiya deiyoda, ada Farisi nengdi, ‘Allah derepserur’ tenen, “Mem pel dona utopu ngeda, buru me kunada, ukupra, ukupra buru me kunkamrume,” pepra, peteremaminge tep, tenpu kange doupra men kuramya tep, aupu deiki di deremdanmaie.

26 Anengda, Yohanes er damai yanmaidi upepi. “Kanda, peteremna deiyo ngebo ^{▼▼peteremna deiyo ngebo – Ibrani upu deiki di ‘Rabi’ penunge. Aupu deiyoda, ada Allah upu peteremna deiyo ngebo tep perami.} kurume. Kandi pepsemum ngebo, Yordan me ortara, kan cap kikiman kunmarerum ngeboda, nesala weik me dongonmare. Tonda, nesala weika di, ‘Er upu gekepkup’ tenen, er damaipu yakanmange. Angeda dano, telep do, mali do. Kanda ware teneprem do?” pepra asimpetenmai. 27 Upepmaipa, Yohanesdi aneng tep pepu.

Ware neng do yuma, mambul pel dona deiyo keca doronungada, Allah im deiki di karepsetuopda, doproptengedi, apel doptenge dinin, Allah im deiki di, apel dona deiyo keca men karepseryopda, apel men doptenge. 28 Sun peda sun kaele. Nedi sun tep upepsisi. “Allahdi wepra deipu ngebo, Nimi Lyemna Deiyo Ngebo, Kristusda, ne Yohanes men kunune. Allahdi, ‘Nimi Lyemna Ngebo amenda yankamra tep, ketenem dina pel donkamre’ tenen, ne dopra menmena dokotepneue. Ila mambul ngebo Kristusda amenda yankamre,” pepsisi.

29 Ukupmanto upu ton pepkusene. Nimi dona tep, karepkameng nerda, aner dopkamre ngebo, er dipu aner talenkamre. Aner dopkamre ngebo, er melimna nengda, talipu kunung dinin, ‘Nun kabo dan taru yankamre do?’ tenen, ketenepra dimengedi, gekenapu kununge. Ukupra dakunmangepane, ner dopkamre ngebo yaredi, upu peprepa gekepmengopda, kange deipra pingpinga di kununge. Aneng kange deipra pingpinga di kuramengtopu, ne peda utopu kunune. Neda kange deipra pingpinga weika di konum kunune. 30 Sundi pepmanerum ngebo Yesusda, konum yanmara tep pepsene. Erda adipapu ila mambul ngebo kupbankamre. Nepuda, er amutara kunedi yambul mambul ngebopu kununa cadi, ne sida metek kupbankamnere. Neda mambul ngebo gum tepa. Yohanesdi pepu.

Upepu dingeda, aupu ton pepu. 31 Im deiki tara di yau ngeboda, ^{▼▼im deiki di yau ngebo – Yohanesdi, “Im deiki di yau ngebo,” pepu ngeda, Yesus tep pepu.} akeca-keca yuma deiki tara kuredi, ila mambul ngebo kurure. Tuai neng dipu deipnei atep, neda tali tuai ngebo kunedi, nimi upupu penune. Im deiki tara di yare ngeboda, akure keca yuma deiki tara kuredi, ila deiyo ngebo kurure.

32 Im deiki di yau ngebodi, er diramunge cap, gekeramunge cap tep, lap peserur dinino, tuai nesala yumadi, er upu teka tenepra men gekenunge. 33 Ton nengda men gekenung dinin, yuk neng er pesere upu teka tenepra gekepmengopda, adeiki di, katuai di pesenunge. Ada, ‘Allah erda pio tek sisi upupu peserure’ tenen, kael kepya tep, sun teka tenenunga deiki di, yuk neng peda epmengedi, ‘Allahda tek upupu peserure’ tenen, kael kemnunge. 34 Allahdi tuai mutu dokotepseu ngebo, erdi tali upu gume. Allah er tek sisi upu peserure. Allahdi angebo tep, er Lek Sambala weika di karerure. Ada yambula di bokra karena gume. Men nukmanto pio weike, Allahdi er puto karerepa, im deiki di tuai mutu yau ngebodi aputo dororure.

35 Nun nai bo Allahdi, er Mi Sisa tep, kange deiprap er dipru karerure. Atep, ware keca do yuma, Allahdi akeca-keca yuma, er Mi Sisa tep karepupa, er buru dipu taleredi, akeca-keca deiki tara deiyo ngebo kurure. 36 Ware nesala do yuma, Allah er Mi Sisa tep, teka tenepmengopda, Allahdi gam kuna deiyo keca karerepa, pio gam kunkamenge. Dinino, Allah er Mi Sisa tep, ‘Nun song’ tenen, tapmenge nesala yumada, Allahdi anesala tep, yu kupredi weika di wenepra ponkamra tep, gam kun keca men dopropkamenge. Sun depmengepa, kange di ton cap, gam pio men kunkamenge. Allahdi anesala wenemna tep, er yu sun deiki tupa derinkamre.

Yohanesdi aupu yuma pepu.