Joh 4 | XteSC | STEP | Uda, yuk taruda, nimidi, “Gume, Yohanesdi peteremrepa, nesala yambula di er upu teka tenepra, er tep domyakangepa, me dongorur dinino, Yesuspuda, er upu peteremrepa, nesala denge weika di er tep teka tenepra, er upu tep domyakangepa, nesala weika di me dongorure,” penmai. Sun upenmaipa, Farisi nengdi gekepi.

John 4

Yesusdi Samaria tara ner tep, pepu upu

1 Uda, yuk taruda, nimidi, “Gume, Yohanesdi peteremrepa, nesala yambula di er upu teka tenepra, er tep domyakangepa, me dongorur dinino, Yesuspuda, er upu peteremrepa, nesala denge weika di er tep teka tenepra, er upu tep domyakangepa, nesala weika di me dongorure,” penmai. Sun upenmaipa, Farisi nengdi gekepi. 2 Tek sisi ngeda, Yesus er dipu nesala dopra me men dongoramu dinin, erdi, ‘Ne upu dopra peterembenkameng’ tenen, wepra deiamu nyapudi, teka tenemi nesala dopra me dongorami. 3 Ukuramipa, yuk nengdi Farisi neng tep, “Yesus tep teka tenepra domyakange nesala weike,” pepra aupu lap penmaipa gekenmai. Sun Farisi nengdi gekenmaiyada, Yesus kael kepu dingeda, Yudea tara taprapudi, ka tamupra Galilea mutu beu.

4 Galilea mutu bana tep nengeda, bisi neitamaida, Samaria mutu kirikra baramya cadi, Yesusdi, ‘Galilea tara benkuna cadi, bisida Samaria mutu neitamai di bisi benkamne,’ tenepudi, Samaria mutu bisi banmau. 5 Bisi banmauanen, Samaria tara neitamai di tenpu ati arum, er sida Sikar mutu beu. Amutuda, pumun taru Israel yala neng, sun apu bo Yakubdi tu kunupra, er mi Yusup tep kareamu. Yesusda amutu damai beu.

6 Tonda, Yakubdi, ‘Me mokon deipkamner’ tenen, paliamudi taleamu bunkun mokon ton amutu damai kwamu. Abunkon mokon akwamupa, Yesusdi bisi pio banmaupane, beipye tapka tep, ‘Bepe peikun’ tenen, Yakubdi paliamu bunkun mokon damai bena buku. Yesus aca buku ketengda, keteng dukduk di, jam dua belas (12) peramenge keteng buku.

7 Bukmaupane, tenpu Samaria tara nerdi, ‘Me gwepkun’ tenen, Yesus bukmauai yau. Yanmaupa, Yesusdi aner tep pepu. “Neda me jepkuna tep, kandi me gwepra karepneo,” pepra moropu. 8 Yesus, er wepra deiamu neng yumada arup taru, ‘Jen keca kunupkup’ tenen, Sikar mutu ati arum damai konum kunumbeia tep, Yesus tenpu bukmaudi aupu penmau.

9 Yesusdi aner tep jen me moropmaupa, anerdi tamupra pepu. “Gume, kanda Yahudi yala ngebo kurum dinin, neda Samaria tara ner kununa cadi, ware kupra ‘Me gweipnetu’ tenen, me moropnerem do?” pepra asipetepu.

Aupu pepmarada, deiyo ake. Sun Yahudi yala nesaladi, Samaria tara nesala tep, ‘Nun songe, anesalada pio mali kununge’ tenen, mepropdanamidi, kikiman pio men kuramya tep, aner yambul lukdanap kware kupka tep, aupu pepu.

10 Anerdi upepupa, Yesusdi tamupra pepu. “Gume, ka nero, Allahdi telep keca tali kareserenge cap, me jena tep, moropmaken ngebo si cap, moupra tenepra kael kepmanetumtoda, kandi ne tep moropmanetumpa, nedi gam kuna deiyo me karepketene,” pepu.

11 Upepupa, anerda moupra men tenepudi, aupu tamupra pepu. “Kao, kanda me gwen mau cap, tapu cap men kwapmakere. Tonda, abunkon pumbonda, kaurye weik cadi, gam kuna deiyo me pepnerem ngeda, dan cei di gwepra karepnetum do? 12 ‘Nun apu bo Yakubda, yambul mambul dinin, neda ila mambul ngebo,’ tenepdaremdi aupu penmanerem do? Nun apu bo Yakubdi abunkon mokon kareamseu. Tonda, pumun taru er peda, acapu ame gwepra jeramu. Tonda erdi deiamu nyapudi sun cap ame gwepra jerami. Tonda, sun peirami keca jena tep, amokonpu gwepra karerami,” anerdi Yesus tep pepu.

13 Upepupa, Yesusdi aner tep tamupra pepu. “Ware nesala do yuma, abunkon mokon di me gwepra jeptenge dinin, amendada kange di ton cap me putanapu kunkamre. 14 Dinino, ware nesala do yuma, nedi karepsene me dopra jepmengopda, kange di ton cap me men putankamre. Sun me putana gum dinino, ne karepsene me dopropmumyopda, sun kange dipru neitamai di, me bungna utopu kupseryopda, me bungna bungamredi, pukra sangamretopu kupkamsere. Ukupra kupbaramreyanen, amenda taruda, pio gam kunkamrume,” Yesusdi pepu. 15 Upepupa, aner mankau di, ‘Me sisa tep pepmanere’ tenen, tamupra pepu. “Atep naie, kandi pepmanerem me karepneo. Karepnemempa, me pio men putapneryopda, tumi-tumi yuma abunkon me men gweryakankamne,” pepu.

16 Aner upepupa, Yesusdi pepu. “Kan ati bememdi, kan apu bo kongpepmempa, sun butene tamupra yarerume,” pepu. 17 Upepupa, aner mawa di, “Gume, ne apu bo men kunerure,” pepra, mok upu peptapu. Upepupa, Yesusdi, “Kandi, ‘Ne apu bo men kunerure,’ pepmanerem ngeda tek pepmareme. 18 Tek sisi ngeda, nimi pamu bari di doamkei dinin, sun yumadi tamkei. Ukutaru kan cap, tali kikiman kuramrerum ngeboda, tek sisi men dopkeua cadi, er peda kan apu bo men kurure. Kanda tali nerpu kuruma tep, ‘Ne apu bo gume,’ pepmaumada tek pepmaume,” Yesusdi pepu.

19 Upepupa, anerdi tamupra Yesus tep pepu. “Uda, aupu pepmanerema cadi, adeiki di kanda, amenda kupkamre keca lap pena ngebo, nabi ngebo kurumada, ukuda konum kael kepkene. 20 Pumun taru, nun Samaria tara nesala, nun nai yapudi, akunmap mutu deiki Allah si eremami dinin, sun Yahudi yala nengdi, ‘Gume, Allah er si eremna tep telepaida, Yerusalem mutu pua,’ peserume,” pepu. 21 Upepupa, Yesusdi aner tep pepu.

Ne ka nero, ne pepkuken upuda, tek tenepkamreme. Amenda yankamre taruda, akunmarum mutu deiki pe, uda, Yerusalem mutu neitamai peda, ‘Telepai acapu’ tenen, Allah er si men eremkamrume. 22 Sun Samaria tara kurum nesalada, moupra men kael keamum kecapu si eremrume. Dinino, nun Yahudi yala nengdi, tek sisi kael keamupu ngebo er sipu eremnupe. Ada mesum tep men pepkene. Nimi Lyemna Deiyo Ngeboda, Yahudi yala nesala kan-kan di yankamra tep, pepkene.

23 Ange pepmaken dinino, amenda yankamre taruda, tonda tek sisi konum yanmare taru peda, nun nai bo Allah er si tek sisi kupra erepkameng nesala yumada, tali nong bol deiki kuna gum dinin, Allah er Lek Sambala puto deiki melimserepa, tek sisi tenepra kungedi, er si telep kupra eremkamenge. Angeda, Allahdi, ‘Ukunkamenge,’ teneseretopu, kunkamenge. Tali men pepkene.

Allahdi, ‘Ne Lek Sambala puto deiki di, tek sisi tenepra kungedi, ne si eremkamnenge,’ teneamseutopu kupmengopda, Allahdi sun tep, kange derirure. Ato nesala tep er kange derirure. 24 Allahda tali tuai ngebo gume. Erda im deiki Sambala utopu ngebo cadi, er si eremna nengda, adipapu Allah er Lek Sambala puto deiki cap, Allah teneamseutopu, tek sisi kuna cap deiki di, er si eremkamenge. Yesusdi aSamaria ner tep pepu.

25 Upepupa, anerdi tamupra pepu. “Ne kaele. Allahdi, ‘Nimi tuai neng lyepkamre’ tenen, wepra deiamu ngebo, amenda taru nimi Lyemna Deiyo Ngebo, Kristus perameng ngebo yankamre. Erdi yaryopda, akeca-keca yuma jenek kupra lape penkamsere,” pepu. 26 Upepu pangeda, Yesusdi upepu. “Kandi, ‘Amenda angebo yankamre,’ pepmarem ngeboda, ne akonum pepmakene. Angeboda ne pua,” Yesusdi pepu.

27 Yesusdi upepupa, er wepra deiamu neng, er nyapu sun benmaiyane, tamupra yai. Tamupra yanmaidi, Yesus cap, aner cap upu talenmareiya, epidi lukdanmai dinin, sun kan-kan di tenpu ngebo pe aner tep, “Kanda ware putanmakerpa do?” men pepi. Tonda, Yesus tep, “Kanda warya tep, mali mutu ner, Samaria mutu ner cap upu sisingmarum do?” men pepi.

28 Yesus er nyapu tamupra yanmaipa, anerdi er me mau acapu tapra, er cap kurami nesala, sun ati tamupra beudi, akati nesala tep lap pepu. 29 “Gume, ne kayapu. Ne kuramsi keca yuma lap pepmaneu ngeboda, sun ton diryaso. Angeboda, Allahdi, ‘Nimi lyepkamre’ tenen, wepra dokotepkamser ngebo, er si Kristus perameng ngeboda, angebo konum yanmaser do? Erda yuk ngebo do?” pepu. 30 Upepupa, akati nesala yuma sun ati tapra, Yesus bukmauai dirbanmai.

31 Akati nesala tupa bisi neitamai yakai taruda, Yesus er upu geken nengdi er tep pepi. “Naio, nun peteremna deiyo ngebo, kanda jen keca jeprume,” pepi. 32 Upepipa, Yesusdi tamupra pepu. “Ne jen utopu kupmanere ngeda, sunda men kael keamneruma cadi, men tenepmarume,” pepu. 33 Upepupa, er nyapudi sun kange wang-wang pepupa upepdai. “Yuk nengdi er jen keca karepmangua tep, aupu penmaser do?” pepra walwal di pepdai.

34 Walwal di pedanmaipane, Yesusdi aupu ukupmanto upu deiki, er nyapu tep pepu.

Ne jen keca utopunge pepmasenada pepkusene. Ada, ne dokotepneu ngebo, erdi, ‘Ukunkamre,’ teneamneu pelpu, ‘Dopbanmanyane, gawal dangkamne,’ tenenune. 35 Sunda, ataru tep uperume. “Gume, ware dumbari ton cap konum kupyopda, kwaneng wisipkamra cadi, kirbenkamepe,” perume. Dinino, nedi pepsene. Sun asuru lapmumdi, wai dam yuma dipetepso. Kwaneng yuma konum wisipmara tep, kwaneng yongopra kin taruda konum kupsere.

36 Tek sisi kwaneng yongopra kin taru utopu taruda konuma. Ukutaruda kwaneng kina deiyo ngebodi, er menenga keca kunumna dororure. Ukuda, li taru konum kurura cadi, ‘Kwaneng yal kouamnga deiyo ngebo cap, kwaneng nong kina deiyo ngebo cap, kikiman kange deipkamreng’ tenen, kwaneng kina deiyo ngebodi konum kipra banmare. Er kwaneng kinmar keca pepmasenada, domon upu pepmasen dinin, aupu nongda, ada gam pio kunkameng nesala tep, pepsene.

37 Ange konum kunmara cadi, nimidi, “Ton ngebo wa pepra kouamrepane, ton ngeboda kirure,” perameng ngeda, tek sisi konum kuserure. 38 Ne Yesusdi sun tep, ‘Kwaneng nong kipkameng’ tenen, dokotepsisi dinin, sun kinkamrum ngeda, ‘Nong kupkamre’ tenen, men di awa pepra pel men doramrume. Yuk nengdi pumun taru ikin deiki di, pel weik dorami dinin, sun amenda taru kumum nengda, yuk neng men di kouami keca, nong kipra banmarume. Yesusdi er nyapu tep, domon upu deiki di pepu.

Samaria tara nesala weika di, Yesus tep, teka tenepi upu

39 Uda, aSamaria mutu nerdi er ati neng tep, “Gume, angebodi ne kuramsi keca yuma lape pepmaneu,” peipka tep, amutu ati arum Sikar mutu kurami nesala gung weika di, Yesus tep teka tenepi. 40 Teka tenepmaia cadi, amutu dinin, sun Samaria tara nengdi Yesus damai yaidi, “Uo, naie, nun cap kikiman kunkamepe,” pepra moropi. Moropipa, Yesus cap, atara nesala cap, tumi ue butene deiki di kikiman kunmai. 41 Kunmai taruda, Yesusdi sun tep peterepka deiki di, nimi ton cap weika di teka tenepi. 42 Atara nesala teka tenepidi, aner tep upepi. “Gume, nun ka nero. Arupda, kandi pepsemum upu deiki dipu teka tenepmapu dinin, ukutaruda, erdi peterepmaserpa, nun peda gekepmapa tep, ukuda nun kaele. Angeboda tali ngebo gume. Erda tek sisi nesala ban-ban yuma Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Akayat neitamaida, Yohanesdi Yesus tep apu pepu.} kurure. ‘Yuk ngebo gume, er konuma,’ tenepmape,” pepi.

Tenpu nimi deiyo ngebo, er mi pu jepupa, Yesusdi kwetepu upu

43 Yesus cap, Samaria tara nesala cap, tumi ue butene deiki kikiman kunmaipane, Yesusdi amutu tapra, Galilea mutu beu. 44 (Uda, yuk taruda, Yesus peda aupu pepu. “Allah er upu lap perameng neng, sun nabi nengda, sun pe mutu sisa bengopda, sun pe mutu nesaladi, gispal men dongedi, sun upu men gekenunge. ‘Sunda tali neng pua,’ tenenunge,” pepu.) 45 Yesusda Galilea mutu beuopda, sun Galilea tara nesaladi, kange deipra buru karepidi, er tep gispal donmai. Ukunmaiya deiyoda ake. Yesusdi Kaplemna Kailya Kalemna taru, Yerusalem mutu neitamai mambul pel weik doramunge yumada, sun ton dirami. Sun peda, Yerusalem mutu ataru kunmaidi dinmaiya tep, Yesusda sun mutu yauopda, er tep kange deipra ‘Telepe,’ pepi.

46 Galilea mutu neitam dinin, mutu sida Kana mutu, Yesusdi tali me dopra nimi men kupmanto keca, kunupsek pen pel dopupa, ameda anggur me ketekepra deipu. Tali me dinin, anggur me dau mutuda, ue tenpu taru ton beu. Kana mutu beu taruda, tenpu ngebo amutu tara talepra nimi deiyo ngebo kuramu ngeboda, er mi pu jeramu. Amida, Kana mutu gum, karen mutu, Kapernaum mutu kunmaua di pu jenmau. 47 Yuk nengdi, “Yesusda, Yudea tara tapra, nun tara Galilea tara konum yanmasere,” pepipa, animi deiyo ngebodi gekepu. Gekepudi, karen mutu tenena gum dinin, Yesus damai mororyau. Angebo yaudi, Yesus tep pepu. “Uo, naie, ne mi pu jenmarpa, depmanto kunmara cadi, ‘Ne me depnerur’ tenen, kandi kweteipnetume,” pepra moropu.

48 Moropupa, Yesusdi angebo tep pepu. “Sunda, nimi men kupmanto keca cap, kunupsek pen pel cap dorepa, epmumya deiki di, ‘E, angebo tek sisi Allah tep pel dorure’ tenen, teka tenerume. Akeca men epmumyopda teka men tenerume,” Yesusdi pepu. 49 Upepupa, animi deiyo ngebodi, Yesus tep pepu. “Gume, naie, ne mi kapul men depmare taru ne mutu kwereptumdi, ne mi kweteipnetume,” pepra moropu. 50 Moropupa, Yesusdi pepu. “Kanda, tali kange doupra benkureme. Kan mi men depkure. Gam kunkamre,” pepu. Upepupa, angebodi, ‘Yesusdi pepmanertopu tek sisi kupkamnere’ tenen, tenimtona gum di, adipapu teka tenepra beu.

51 Beudi bisi neitamai banmaupane, er pel melimna nengdi ormutu di atara yakanmaipa, bisi neitamai antapi. Antapidi sundi pepi. “Naio, kan mida konum telep kupmaupa, kip kunmare,” pepi. 52 Upepipa, angebodi asipetepu. “Wareto keteng deiki di ne mi telep kupmau do?” pepra asipetepu. Sundi, “Keteng dukduk dinin, jam satu kupmaupa, kan mida telep kupmau,” pepi.

53 Sundi upepipa, animi deiyo ngebodi moupra tenepu. ‘Uo, Yesusdi, “Kan mi gam kunkamre,” pepmaneu ketengda, tek sisi jam satu deiki di pepmaneutopu, ne mi kweteipneupa, telep kupmaue,’ tenepudi, moupra kael kepu. Angebodi ange tenepka tep, er cap, er ati kikiman kunmai nesala yuma cap, Yesus tep teka tenepi. 54 Uda, Yesusdi ami kwetepu ngeda, ada Yudea tara di Galilea tara yau taru neitamai, nimi men kupmanto pel butenenge kupu.