Joh 5 | XteSC | STEP | Sun yuma dakuramipane, amenda taruda Yesusda, ‘Yahudi yala nesaladi Yerusalem mutu kalepkamengaida, ne ton benkune’ tenen, Galilea tara tapra Yerusalem mutu welerbeu.

John 5

Betesda mokon dam, Yesusdi ai bung ngebo tep, kwetepu upu

1 Sun yuma dakuramipane, amenda taruda Yesusda, ‘Yahudi yala nesaladi Yerusalem mutu kalepkamengaida, ne ton benkune’ tenen, Galilea tara tapra Yerusalem mutu welerbeu. 2 Uda, Yerusalem ati arum domyai dana-dana yumada, ila gel beilya wiramidi tenpu buplan potokra deiamyada, er si Domba Buplan potokra deiami. Abuplan dam mokon ton deiamu. Amokon sida, Betesda mokon perami. Amokon sirik dana-dana tara ongopgenepra nimi bungnai tep, ati arum utopunge ^{▼▼ati arum utopunge – Ati arum domnga deiyo ngeboda, pumun taru kuramu ila nimi deiyo ngebo Raja Salomodi peipupa, doami.} pamu bari doami. 3 Amokon dana-dana ati arum domyaida, pu jeramu nesala weik deriryakaramipa, marami. Anesalada, asuru pun nesala cap, yo kwaneamu nesala cap, yan cap buru cap meiyal seramu nesala cap, bisi men benmanto nesala cap, dopra deriryakaramipa, acapu marami.

4 Amokon damai apu nesala mapra deriryakaramya deiyoda akapu. Ada, ton taru ton, ton taru ton, Allah er im deiki pel don neng, malaikatdi amokon me deiki doupnepa, amokon pumbon kwar-kwar peramu pangeda, menmena wekne ngeboda adipapu kweteipnepa, telep kuramu. Ware yala pu do yuma, amokon menmena wengamu ngeboda, er pu jeramunge adipapu gum kuramu. 5 ‘Ukupsetue’ tenen, apu jeramu nesala, Betesda mokon dam mapra deriryakarami.

Yesusdi, amokon dam beudi, tenpu ngebo keteng tamun denge weik 38 tahun deiki di bisi men benmanto kuramua tep, amokon dam bukmaupa, Yesusdi angebo epu. 6 Yesus angebo epudi, asipetepupa, akunmai nengdi angebo er pu jeramunge lap pepipa, Yesusdi angebo tep asipetepu. “Kao, kanda, ‘Allahdi kweteipnetue’ tenen, tek sisi putanmaker do?” pepra asipetepu.

7 Asipetepupa, bisi men benmanto ngebodi tamupra pepu. “Gume, naie, malaikatdi amokon deiki doumenge taruda, ne nong erepra mokon pumbon dongorbana tep, ne melimna neng gum cadi, ne ikin di, ‘Mokon wengbankun’ tenen, nema di piripetene taru yumada, yuk nengdi bisipra menmena mokon pum wengbanunge. Atep, ne menmena men wektene,” pepu. 8 Upepupa, Yesusdi angebo tep pepu. “Kan tekroyo. Tekmemdi kan ason dopra, yan yanipra bisi bankurume,” pepu.

9 Yesusdi aupu pepu pangeda, angeboda adipapu kweteipupa, telep kupu. Telep kupupa, tekmaudi er ason dopra, yan yanipra bisi banmau. Yesusdi ai bung ngebo kweteipu tumida, sun Yahudi yala nesaladi, Allah er gispal dona tep, tali pel dona gum, beipye peingami tumi, Sabat tumi perami. 10 Atumida, sun pel dona gum tumi cadi, Yahudi yala nengdi, Yesus kwetepu ngebo tep upepi. “Atumida, Sabat tumi cadi, Musadi sekeiamu upu peseretopu, pel men doptume. Atep kan ason dopra banmaremada, pel dona utopu kupmarema tep, kanda mali kunmareme,” pepi.

11 Sundi upepipa, angebodi tamupra pepu. “Dinino, ne kweteipmaner ngebodi, ‘Kan ason dopra benkurume,’ pepmanera tep ukunmane,” pepu. 12 Upepmaua tep sundi asipetepi. “Kao, arup ngebodi, ‘Kan ason dopra benkurume,’ pepmaker ngeboda, ware ngebodi aupu pepmaker do? Erda ware ngebo kurur do?” pepra asipetepi. 13 Upepra asipetepi dinin, Yesusdi kweteipmau ngebodi, ‘Angebo er si ake’ tenen, moupra men kael kepka tep, tali dimpepnapu kupu. Angebo men kael kepmauada, Yesusdi er tep kwetepmaudi, awekmai nesala denge weik kunmaiya neitamai di benmaua cadi, kwetepmau ngebodi Yesus er si men kael kepmau.

14 Amendada, Yesusdi Yahudi nesala, Allah si eremami ati, ila ati dam beudi, arup kwetepmau ngebo antapdarei. Antapdareidi, Yesusdi angebo tep pepu. “Uda, ukutaru konum kwetepmakenpa, telep kunmarema cadi, mali kuna cap, mali tenena cap yumada yapkurume. Gum dingeda, men di ai pu bungamum ngeda, yambul ikin dinin, amenda kange mun kupkamkere ngeda, ila mambul weik kupkamkere.” Yesusdi pepu. 15 Upepupa, angebodi amutu Yahudi yala neng, sun deiyo neng damai beudi, “Kwetepmaner ngeboda, er sida Yesus,” pepra lap perbeu. 16 Lap perbeupa, sun Yahudi deiyo nengdi, ‘Uo, Yesusdi nun pel dona gum tumi, Sabat tumi deiki di, nimi kwetena cap, akeca utopu keca cap kurura tep, ange yumada pel dona utopu cadi, erda mali,’ teneramidi, Yesus er nong deiki ikin keca weik derirami.

17 Sun utenerami dinino, Yesusdi sun tep upepu. “Ne nai Allahda, tamna gum di, tupa-tupa pel dorura cadi, ne peda utopu tupa pel donapu kunkamne,” pepu. 18 Upepka tep nengeda, amutu Yahudi yala deiyo nengdi yu kupupa, ‘Yesus poptaptepe’ tenen, putaramu. Deiyoda, Yesusdi sun pel dona gum tumi, Sabat tumi deiki pel utopu keca kuramnga tep tenerami. Angeda mambul dinin, ila mambul tenerami ngeda, ada Yesusdi, “Ne nai bo Allah,” pepka deiki di, sundi, ‘Uo, angeboda, “Neda Allah kuretopu kunune. Nun amsepu kunume,” perure. Aperur upu tep nengeda, pio mali kupra, Allah yanina utopu kurure,’ tenepi. Utenepya tep, ‘Yesusda, wenepra poptepe,’ tenerami.

“Allah er Mi Sisadi, er tenerur nesala tep, gam bungna deiyo keca karerure,” pepu upu

19 Tonda, Yesusdi er tep yu kunmai neng, sun Yahudi yala nesala sun deiyo neng tep, aupu pepu.

Pio tek sisi upu pepsene. Nun nai bo Allahdi kure keca yumada, er Mi Sisa peda akecapu kurure. Atep, Allah er Mi Sisa, er pedipapu, pel tenpunge peda, er yuk men doptue. Er nai bo Allah pel dorengepu epredi, apelpu dorura tep pepsene. 20 Ada mesum tep men pepsene. Deiyoda, Allahdi er Mi Sisa tep dipru karerura cadi, erdi pel dore keca yumada, ‘Ne mi kael kepkuner’ tenen, benbenemrepa, er midi dirura cadi, er nai bo pel doretopu, er peda utopu pel dorure. Ne pel donmanpa, dinmanerum ngeda, yambul mambul dinin, Allahdi ila mambulnge karepnerepa, nimi men kupmanto keca ton pel dopnepa, eprumyopda lukdankamrume. 21 Aupuda tali tep men pepsene. Ada, Allahdi konum deamenge nesala, gam bukra deriramretopu, er Mi Sisadi er kange derirur nesala tep nengeda, er dipu teneretopu, gam kuna deiyo keca karerepa, pio gam kunkamenge.

22 Angepu gum dinin, nun nai bo Allahdi nesala ban-ban yuma tep, ‘Anengda telep dinin, anengpuda mali kununge’ tenen, upu men bongdiserure. Erdi upu bongdina deiyo pelda, er Mi Sisa deiki konum deipka tep, er mi dipapu, nimi upu bongdiseredi, mali neng tep wenemrure. Telep neng tep menenga kareserure. 23 Allahdi amambul pel dopra, er Mi Sisa tep karepka deiyoda, ‘Nesala ban-ban yumadi, ne tep gispal dopra, ne si eremnengetopu, ne Mi Sisa tep utopu, gispal dopra er si eremkamenge’ tenen, upu bongdina deiyo pelda, er Mi Sisa tep karepu. Atep, ware nesala do yuma, Allah er Mi Sisa tep gispal dopra, er si men eremenge nesalada, ukunga deiki di, Allah er pe tep gispal dopra, er si men eremnunge. Yesusdi sun Yahudi yala deiyo neng tep pepu. 24 Yesusdi aupu pepudi, aupu dukdongopra pepu.

Ne tek sisi upu pepsene. Ware nesala do yuma, ne upu gekepmengedi, ne dokotepneu ngebo Allah tep, teka tenepmengopda konuma, adipapu gam pio kuna deiyo keca dopropmengedi, gam pio kunkamenge. Sirya taruda, Allahdi anesala wenepra men popkamre. Ada, teka tenena nesalada, sundi deamenge nesala tara tapra, gam pio kunkameng nesala tara konum kemdongopnunga tep pepsene. 25 Tek upu pepsene. Amenda taru mambul taru yankamre. Tonda ukutaru konum gonga kepmasere. Ataruda, sun konum deami nesala dinin, Allah er Mi Sisadi er upu peprepa, gekepmengopda, gam bukra pio gam kunkamenge.

26 Angeda tali men pepsene. Deiyoda, ne nai bo Allah gam kuna deiyo keca talepra kuretopu, erdi karepupa, er Mi Sisa peda utopu gam kuna deiyo keca talepra kurure. 27 Tonda, er Mi Sisada, Nimi Mi Sisa Utopu Ngebo kurura tep, Allahdi nimi tep upu bongdina deiyo keca dopra, er mi deiki konum deipupa, er midi akeca talepra pel doredi, nimi tep upu bongdiserure. 28 Aupu pepmasena tep nengeda, lungdana gume. Amenda sirya taruda, neda Nimi Mi Sisa Utopu Ngebodi ne upu pepnyopda, konum deamipa, peiami nesala yuma ne upu gekepkamenge. Yesusdi pepu.

29 Upepu dingeda, aupu ton dukdongopra pepu. “Ataruda ne upu gekepmengopda, tu paliamyai di gam bukmengedi, pakra yankamenge. Sun dumsisi kupra kurami nesalada, gam pio kunkamenge. Dinino, sun mali-malipu kurami nesalada, pakra tekameng dinin, nedi Nimi Mi Sisa Utopu Ngebo, sun tep upu bokeipnedi, wenepra poptapkamne.

30 Ne Yesusda, ne kange dipapu tenpu pel peda, ne yuk men donune. Ne nai bodi peneretopu, gekepnedi upu bongdisenune. Ne pedipapu kange derin kecapu tenepra, pel men donune. Ange gum dinin, ne dokotepneu ngebo, er kange derirur kecapu, er teneneretopu kunune. Angepu kununa cadi, upu bongdisenuna yumada, tek sisi telep kupra dumsisipu upu bongdisenune.” Yesusdi pepu.

Yesusdi, “Ne nai bo Allah dokotepneupa, er pelpu donune,” pepu upu

31 Yesusdi aupu pepu. Ne pedi ne pe tep, “Angeboda tek dumsisi ngebo,” pepra, tali peptapnyopda, sundi tek men tenenkamnerume. ‘Erda tali penmasere,’ tenepkamrume. 32 Dinino, yuk ngebo, ila mambul ngebodi ne tep, “Angeboda tek ngebo,” penerure. Ne kaele, erdi ne tep penerur upuda, tek sisipu penerure. Tali gume.

33 Ange utopu, sundi Yohanes damai nimi dokoteprumpa, ne tep asipetepi pangeda, Yohanesdi tek sisi upu konum peipseupa, gekeprume. 34 Ange pepmasenada, ‘Tali tuai nesaladi ne tep penenung upuda mambul weik,’ tenena tep men pepsene. Dinino, ‘Yohanesdi ne tep peipseu upu gekepra teka teneptumtoda, Allahdi lyepsetue’ tenen, pepsene. 35 Yohanesda, ukupmanto ngebo kuramseue. Erda, weica upra, deipmengepa, dirine kuprepa, adeiki di nimi diramengtopu kuramu. Ukuramudi, er peramu upu, dirine utopu kupupa, sundi kange deipra, er upuda ke tarupu gekeramrume, pepsene. Yesusdi pepu. 36 Upepu dingeda, Yesusdi aupu ton pepu.

Yohanesdi ne tep pepneu upuda, yambul mambul kurur dinino, ila mambulnge ton akapmare. Ada, ne nai bo Allahdi, ‘Apel donmareanen gawal dakamre’ tenen, karepneu pelda tupa donune. Apel dopnepa, mambul keca weik eprumyopda, adeiki di, ‘Gume, tek sisi Allahdi angebo dokotepupa, yanmasere. Tali ngebo gume,’ tenenkamnerume. 37 Angepu gum dinin, sun nai bo Allah dokotepneu ngeboda, erdi ne tep, “Angebo tek sisi ngebo kurure,” penerure. Dinino, sun Farisi nengda, er pere upu men gekerume. Tonda, er nong pio men diramrume.

38 Tonda, sun Farisi nengda, Allahdi dokotepu ngebo tep, teka men teneruma cadi, Allah er upuda, gekeprumpa, sun kange dipru neitam tupa men kurure. 39 Allahdi peiamupa, sengami upu buku-buku yumada, sundi, ‘Gume, aupu kael kepmepedi, moupra talepmepya deiki di, pio gam kuna deiyo keca dopropkamepe’ tenen, aupu yuma weika di, moupra kael kemrume. Dinino, aupu sengaminge yumada, tek sisi ne tep lap penerur ngeda, moupra men tenerume.

40 Aupu yumada, ne tep perur dinino, sundi, ‘Gam kuna deiyo keca dorona tep nengeda, angebo Yesus tep, teka men tenepkamepe. Erda nun song’ tenen, tamnerume. Ne tep teka tenepnetumopda, gam kuna deiyo keca karepsetene dinin, teka men tenenerume. Yesusdi sun Yahudi yala deiyo neng tep pepu. 41 Upepudi aupu dukdongopra pepu.

Tali nengdi, ‘Kange deipkamser’ tenen, “Kanda telepe,” penenung upuda, men gekenune. 42 Sun Yahudi yala deiyo nengda, sun kurum kecada konum kael keamsisi. Ne kaele. Sun kange dipru neitamaida, Allah tep, tek sisi kange men derirume. Er tep nengeda, tek sisi teka men tenerume. 43 Neda, ne nai bo Allah, er si deiki di yasi dinin, sundi, ‘Yesusda tek ngebo kurure,’ men tenenerume. Dinino, yuk tali ngeboda, er pe si deiki dipu yatuopda, sundi, ‘Erda tek ngebo’ tenen, teka tenepkamrume.

44 Sun pedi, sun pe tep, “Nunda telep nesalapu kunupe,” pepra si eremdamumdi, kange deridarume. Ukurum dinin, ‘Allahda er tenpu kure ngebodi kange deipsetu’ tenen, er tenesere kecapu dumsisipu kupmepepa, Allahdi, ‘Telepe tenenkamsere,’ tenepra men kurume. Ukumumdi, mali-malipu kuprumyopda, ware kuprap teka tenepnetum do? Gume, men kuptume.

45 Dinino, ‘Sirya taruda, Allah er damai welepmepyopda, Yesusdi upu bokeipseredi wenepkamsere,’ tenena gume. Nedi gume. Sundi, ‘Musa sekamseu upu talepmepya deiki di, Allah lyepkamsere’ tenen, Musa er upu teppu sun kange derirume. Atep er Musadi sekeiamu upu deiki di, Allahdi sun tep upu bokeipseredi wenepkamsere. 46 Tek sisi pepsene. Musadi ne tep sekamua tep, sundi Musa sekeiamu upu tep, tek sisi teka teneptumopda, ne tep teka tenepnetume. Ada Musa sekeiamu upu neitamai di, ne tep sekamua tep pepsene.

47 Dinino, sun kumumnyada, ne kaele. Musadi sekeiamu upuda, sundi teka men teneruma cadi, ware kuprap ne pesene upu tep, teka teneptum do? Gume, teka men tenenkamnerume. Yesusdi er nong deiki ikin keca derirami neng, Yahudi yala deiyo neng tep aupu pepu.