Joh 9 | XteSC | STEP | Yesusda, Allah si eremami ati dam tapra yukai banmau taruda, asuru pun ngebo epu. Angeboda, er nindi deipu taru di, er melo kuramu taru di dipra aneitam taru yumada, asuru pun ngebo kuramu.

John 9

Yesusdi asuru pun ngebo tep, kwetepu upu

1 Yesusda, Allah si eremami ati dam tapra yukai banmau taruda, asuru pun ngebo epu. Angeboda, er nindi deipu taru di, er melo kuramu taru di dipra aneitam taru yumada, asuru pun ngebo kuramu. 2 Yesus wepra deiamu neng, 12 neng cap, Yesus cap banmaiya cadi, sundi Yesus tep asipetepi. “Rabi, ^{▼▼Rabi – Yunani upu neitamaida ‘Rabi’ perami. Aupu deiyoda, Allah upu peteremna deiyo ngebo tenena tep peramitopu, tupa penunge.} angebo asuru pun mi deipya deiyoda, warya di do? Deiyoda, er nai cap, er nin cap mali kuramreiya deiki di, asuru pun mi deiprei do? Angebo er dipu mali kuramupa, adeiyo di asuru pun ngebo kurur do?” pepra asipetepi.

3 Asipetepipa, Yesusdi tamupra pepu. “Angebo er nai cap, er nin cap, uda er cap, mali kuramya deiki di, asuru pun ngebo men kurure. Angeda pio gum. Dinino, er melo mi deipi taru asuru pupka deiyoda, ‘Allahdi angebo tep melipra pel doprepa, nesala epmengedi, uo, Allahdi pel dore ngeda, ila mambule, kael kepkameng’ tenen, er asuru pupke. 4 Domon upu di pepkusene. Ada keteng komuni tupa kusere taru yumada, ne doproipneu ngebo, er pelpu adipapu donkamepe. Lukunda yankamre taruda, tenpu ngebo peda pel men dopmanto kunkamenge. 5 Neda tuai mutu neitamai tupa kune taru yumada, nesala ban-ban yuma tep, sun kange dipru Dirine Deiyo Ngebo kunune.” Yesusdi pepu.

6 Yesusdi upepu dingeda, ul tu deiki tuluptapudi, Yesus er ul cap, tu cap tapakudi, bental utopu kupunge dopra, asuru pun ngebo, er asuru deiki likra deipu. 7 Likra deipudi, asuru pun ngebo tep, upepu. “Kanda, mokon sida Siloam mokon bememdi, amokon me gwepra kan asuru me kurberume,” pepu. (Amokon si Siloam deiyoda, Yunani upu deiki di, “Doproipunge,” pepra asi perami.) Yesusdi angebo tep aupu pepmautopu, amokon bena, er asuru me kupu. Ukupka deiki di, er ati tamupra yau taruda, er asuru telep kupupa, akeca yuma epu.

8 Angebo er asuru telep kupupa, ati tamupra yau taruda, er ati dam kurami nesala cap, angebodi, ‘Ne melimna tep, co bo tali karepkamaneng’ tenen, mororamu taru dirami neng capdi epi. Epidi, sunda, “Uo, ‘Co bo tali karepkamaneng’ tenen, bisi pirimanai bukra mororamu ngeboda, angebo konuma be?” pepra lukdana kunmai. 9 Upenmaipa, ton nengdi, “Teka asuru puamu ngeboda, er konuma,” pepi dinin, yuk neng dingeda, “Gume, angeboda, asuru pun ngebo urasin utopu kurur dinin, erda yuk ngebo kurure,” pepi. Sun upenmaipane, asuru puamu dinin, Yesus konum kwetepu ngebodi upepu. “Gume, asuru puamu ngeboda, ne konuma. Yuk ngebo gume,” pepu.

10 Upepupa, anengdi, “Atep ware kuprap kan asuru konum telep kupmaker do?” pepra asipetepi. 11 Asipetepipa, angebodi upepu. “Gume, er sida Yesus penung ngebodi, silong tulupra deipmau bental, ne asuru deiki likra deipneudi, ‘Kanda Siloam mokon dam me kurberume,’ pepneu. Upepneua cadi, Siloam mokon bena me kupmanupa, ne asuru konum telep kupnere,” pepu. 12 Upepupa, sundi, “Apepmarem ngeboda, ukutaru dan mutu kurur do?” pepra asipetepi. Asipetepipa, angebodi, “Ne walwale,” pepu.

Farisi nengdi asuru kweteipu ngebo tep, penmai upu

13 Awekmai nesaladi, asuru puamu dinin, Yesus konum kwetepu ngebo dopra, Farisi neng sun damai duyai. 14 Uda, Yesusdi er ul cap, tu cap tapakra bental keteneipmaudi, asuru puamu ngebo, er asuru kweteipmau tumida, tali tumi gume. Atumida, sun Yahudi yala nesaladi, Allah er gispal dona tep, pel dona gum dipapu, beipye peingami tumi, Sabat tumi deiki di kwetepu. 15 Ange tep nengeda, sun Farisi nengdi angebo tep, upepi. “Ware kupmakerpa, kan asuru telep kupra deipmaker do? Lape pepseo,” pepra asipetepi. Asipetepipa, angebodi sun tep pepu. “Gume, Yesusdi bental dopra, ne asuru deiki likra deipneupa, me kupmanu pangeda, ukutaru telep kupra dinune,” pepu.

16 Upepupa, sun Farisi neng kankan ton nengdi upepi. “Konuma, Allahdi peipupa, Musa sekeiamu upuda, ‘Sabat tumi deikida, pel dona gum dipapu, beipye peingkamrume,’ peserur dinin, Yesusdi angebo er asuru kweteipmaua deiki di, pel dopmaua cadi, Allah er upu yanipmare. Atep, angebo Yesusda, Allahdi wepra nun damai dokotepseu ngebo men kurure,” pepi. Upepi dinin, ton nengdi, “Gume, nimi men kupmanto keca, pio kunupsek pen pel donmarada, mali ngebo kutu teptoda, ware kupra apel doptu do?” pepi.

Ukupra yuk-yuk tenepra penmaiya tep, tenpu kangepu doupra men kunmai. 17 Kange yuk-yuk doupra kunmai dinin, siryada asuru kwetepmau ngebo tep asipetepi. “Kan dano? Kan asuru kweteipmakeupa, konum telep dinmarema cadi, kandi er Yesus tep, ware tenepmarem do? Angeda lap pepseo,” pepi. Upepipa, angebodi tamupra pepu. “Gume, ne kangeda, angeboda, Allah er upu lap pena deiyo ngebo, nabi ngebo kurure, tenepne,” pepu.

18 Sun Yahudi yala deiyo nengdi, asuru pun ngebo tep, ‘Er asuru puamu dinin, ukutaru konum kweteipmaupa, teleppu kurure’ tenen, kapul teka men tenenmai. Sundi, ‘Gume, angebo asuru men puamu. Erdi tali upupu penmasere’ tenenmai. Atep, asuru puamu ngebo, er nai cap, er nin cap tep kongpepipa, yarei. Yareipa, asipetepi. 19 “Sundi lap pepsereso. Angeboda, tek sisi sun mi do? Sundi deiamrerum taru di dipra, aneitam taru yumada, tek sisi asuru puamu ngebo kuramu do, gum do? Asuru puamu ngebo kuramtu teptoda, ukutaru taruda ware kuprap er asuru telep kuptupa, telep kupra eptu do?” pepra asipetepi.

20 Asipetepipa, angebo er nai cap, er nin capdi upeprei. “Nun kaele, angeboda tek sisi nun mi kurure. Tonda, nundi deipnumu taru di er asuru puamu. 21 Dinino, ware kupra deiki di ukutaru er asuru telep kupmaupa, dinmarada, nun walwale. Tonda, ware ngebodi er asuru kweteipmau do, ange peda, nun walwale. Dinino, nun mida, melo guma tep, sun pedi er tep asipetepso. Er dipapu lap pepsetue,” peprei.

22 Uda, asuru puamu ngebo, er nai cap, er nin cap aupu pepreiya deiyoda ake. Ada, sun Yahudi yala deiyo nengdi upepi.

“Ware nesala do yuma, ‘Allahdi wepra deiamu ngebo, Nimi lyepkamre tenen, Kristusda, ^{▼▼Kristus – Ibrani upu deiki di, Mesias seki dinin, Yunani upuda Kristus penunge. Nun peda asi butene peptepe dinin, aupu deiyoda tenpu. Ada nimi Lyemna Deiyo Ngebo tepa. Tonda, lap pena upu nomor 3 dinkurume.} Yesus akurure. Erda Nimi Lyemna Ngebo kurure,’ tenepmengedi, pepmengopda, nundi wenepkamepe. Ada, nun Allah upu gekenup ati kange di ton cap men wektenge. Nundi aneng tapmepepa, sun talipu kunkamenge,” pepi.

Aupu pepi ngeda, angebo er nai cap, er nin cap konum gekepra kael keamrei atep, sun kware tep, arup pepmarungu upu peprei. 23 Angebo er nai cap, er nin capdi, “Nun mida melo mi gum cadi, sun pedi er tep asipetepso,” pepreiyada, ‘Yahudi yala deiyo nengdi, “Allah upu ati men wekretume,” pepsenung’ tenen, kware kupupa, aupu peprei.

24 Sun Farisi neng kange di ton cap, ue butene ngeda, asuru kwetepmau ngebo kongpepipa, yaupa, upepi. “Kanda, ‘Allah dipu kweptepneue,’ pepra, Allah er sipu ereipkamrume. Nun kaele, Yesus pepmaserem ngeboda, mali ngebopu kurure,” pepi. 25 Upepipa, asuru kweteipu ngebodi sun tep tamupra pepu. “Angebo Yesusda, mali ngebo kurur do, gum do? Angeda ne walwal dinino, tenpu keca tek sisi kael kepmanada, asuru puamneu dinin, ukutaruda kweteipmaneupa, telep kupra dinune,” pepu.

26 Upepupa, Farisi nengdi, “Kan asuru tep ware kupmaker do? Ware kuprap di kan asuru kweteipmakeu do?” pepra asipetepi. 27 Asipetepipa, angebodi tamupra upepu. “Angeda, arup konum lape pepra pepmasenu dinin, sunda angebo Yesus tep dabal kuruma tep, ne upu men gekepmanerume. Warya tep, ‘Kange di ton cap pepsetupa, gekeptepe,’ tenepmarum do? Ada sundi, ‘Gume, Yesus er upu gekepra dombange neng kunkamepe,’ tenepmarumdi, pepnerum do?” pepu.

28 Upepupa, aFarisi nengdi asuru puamu dinin kweteipmau ngebo tep, er nong deiki mali upu cap, nimi taingne upu cap, weika di penmai. Tonda upepi. “Kanda, angebo er upu gekepra dombanapu kurume. Dinino, nunpuda Musa er sekeiamu upu teka tenepra dombanupe. 29 Nun kaele. Allahdi Musa tep, upu peamupa, gekepra sekamseu dinin, angebo Yesusda, er deipmemei mutu, er mutu sisada nun walwale,” pepi. 30 Upepmaipa, asuru kwetepu ngebodi pepu. “Uo, ange pepnerum ngeda, gekepnedi, lukdanmane. Ange ware kuprap pepnetum do? Angebodi ne asuru puamneuada, kweteipmaneu dinin, er mutu sisa tupa men tenepmarum do?

31 Nun yuma kaele. Mali tupa kunge nesaladi Allah tep moroptenga peda, sun moropmenge keca Allahdi men gekerure. Allah er kure keca cap, er pesere upu cap kuretopu, angepu talepra dumsisipu kure ngebodi morore upuda, Allahdi gekerure. 32 Sun deamsei taru di dipra, ataru yuma asuru puamu ngebo, tali nimidi kweteramipa, aupu ton gekeramupu do? Gume, ada men kupmanto keca cadi, angeda pio men gekeramupu. 33 Angebo Yesusda, Allahdi men dokoteptu teptoda, nimi men kupmanto keca, ila mambul pel tenpunge peda men doptue,” pepu.

34 Asuru kwetepmau ngebodi pepupa, sun Farisi nengdi pepi. “Kan deipkei taru di dipra ukutaru yumada, kanda pio mali ngebo konum kuramuma cadi, kandi wenepra peterepserem ngeda, warya tep do? Kanda pio mali ngebo tep, bendopo,” pepidi angebo dopra bura tara dokotepi.

Yesusdi Farisi neng tep pepu upu

35 Farisi nengdi yu kupupa, asuru puamu dinin, Yesus kwetepu ngebo dopra, bura dokotepi ngeda, yuk nengdi perbeipa, Yesus gekepu. Amenda taru Yesus cap, asuru puamupa, konum kwetepu ngebo cap antapdareipa, Yesusdi angebo tep pepu. “Kan dano? Nimi Mi Sisa Utopu Ngebo tep, teka tenerum do?” pepra asipetepu. 36 Asipetepupa, angebodi Yesus tep upepu. “Naio, angeboda ware ngebo do? Kandi lape pepnetumpa, teka tenepkamane,” pepu. 37 Upepupa, Yesusdi, “Nimi Mi Sisa Utopu Ngeboda konum epmanereme. Tek sisada, er cap upu talepmaneme. Ne akunune,” pepu. 38 Upepupa, asuru kwetepmau ngebodi, Yesus tep pepu. “Naio, kanda Nimi Deiyo Ngebo tep teka tenekenune,” pepra, Yesus er si tep erepudi, gispal dopu.

39 Ukupupa, Yesus domon upu deiki di pepu. “Neda, nesala yuma sun upu bongdina tep tuai mutu yasi. Ada, asuru pun neng utopu nesala katuai epkameng dinin, ‘Nun konum epra akeca yuma konum kael kemnupe,’ tenedange nesalada, ‘Asuru pun nesala utopu kunkameng’ tenen, upu bongdina tep yasi,” Yesusdi pepu.

40 Yesusdi upepupa, er damai kunmai Farisi neng gekepidi, asipetepi. “Kanda ware upu pepserem do? Nun Farisi neng peda, ‘Asuru pun nesala utopu kunung’ tenen, pepmaserem do?” pepi. 41 Upepipa, Yesusdi tamupra sun Farisi neng tep pepu. “Tek sisi asuru pun nesala kutum teptoda, sun mali kumum kecada, sun nong deikipu tupa men kupsetue. Dinino, ukutaru sunda, ‘Nundi epra kael kemnupe,’ pepra kange ereipdaruma tep, sun mali kumum keca yumada, sun nong deiki tupa kapserepa, Allahdi wenepkamsere,” Yesusdi pepu.