Joh 11:1-44 | XteSC | STEP | Ataru neitamaida, tenpu ngebo er sida Lazarus, pu weik jeramu. Lazarus er mutu sisada Betania mutu. Lazarus er weit nerapuda, Maria cap, Marta cap kuramrei.

John 11:1-44

Lazarus depupa, Yesusdi gam bukra deipu upu

1 Ataru neitamaida, tenpu ngebo er sida Lazarus, pu weik jeramu. Lazarus er mutu sisada Betania mutu. Lazarus er weit nerapuda, Maria cap, Marta cap kuramrei. 2 Pu jeramu ngebo Lazarus, er weit ner Mariada, yuk ner gume. Ada, men di nintong telep me dopra, Yesus er nong deiki diktapudi, aner er lyom potong talepra, Yesus er yan deiki kiliamu ner ake. 3 Sun du bo Lazarus ila pu jeramupa, depmanto kunmaua tep, anerapu butene di, Yesus tep upu dokweteprei. Ada, “Naio, kandi dipru karerum ngebo Lazarusda, ila pu jenmare,” pepra upu dokweteprei.

4 Upepra dokwetepreipa, yuk nengdi Yesus damai bena lap pepipa, gekepu. Yesusdi aupu gekepudi, upepu. “Apu jenmarepane, Lazarus men depkamre. Gume, apu jenmara deiyoda, ‘Allah er Mi Sisadi mambul pel dorepa, nimi epmengedi, uo angeboda ila mambule’ tenen, ‘Er si ereipkameng’ tenen, apu jerure. Allah er ila mambul kurya cap, ila mambul pel dopkamrenge cap epkamrume. Tonda, ‘Apu jenmare taru neitamai di, Allah er Mi Sisadi pel dopkamrea deiki di, nimidi Allah er si peda ereipkamenga’ tenen, apu jenmare,” Yesusdi pepu.

5 Yesusdi Marta cap, er weit ner Maria cap, sun du bo Lazarus cap, ila di bicau teneramu. 6 Sun yuma tep bicau teneramu dinino, anengdi, “Lazarusda ila pu jenmare,” pepra, upu kai peryai taruda, Yesus gekepu dinin, er kunmauaipu, tumi butene ton cap mapmau. 7 Tumi butene ton cap konum kupupa, Yesusdi er wepra deiamu neng, sun 12 neng tep upepu. “Nun yuma kange di ton cap Yudea tara tamupra benkupe,” pepu. 8 Dinino, Yesus er nyapudi, “Gume, Naie. Ukupu taruda, sun Yahudi deiyo nengdi kan tep, ‘Angebo popkup’ tenen, gel dopra ketenepmai dinin, kanda ‘Tamupra benkune,’ tenepmaremada warya tep do?” pepi.

9 Upepipa, Yesusdi tamupra domon upu deiki di pepu. “Berengne tamne di dipra keteng komuni cap, idona cap, keteng orwengbare taru neitamaida, keteng 12 jam kuserure. Ware ngebo do yuma, keteng komuni neitamai bisi embare ngeboda, keteng dirin deiki di, embarure. Angeboda keteng dirine di, diredi embarya tep, yan giso men dungperure. 10 Dinino, lukunda neitamai embare ngeboda, dirine men kurura tep, bisi embarepa, yan giso dukpeprepa, loka dorbarure.” Yesus domopudi, pepu. 11 Upepu dingeda, aupu ton pepu. “Nun kabo Lazarusda, mapmar dinin, nedi er tep gam bukra derirbenkune,” pepu. (Ara, Lazarus depmau atep, Yesusdi, “Lazarus mapmare,” pepu.

12 Upepupa, er nyapu 12 nengdi moupra tenena gum di, upepi. “Naio, Lazarus pu jenmarpa, mapmaryane, adeiki di amenda taru yambul kip kupkamre,” pepi. 13 Yesusda, er kabo Lazarus konum depmauange tep, “Mapmare,” pepu dinin, er nyapu sun 12 nengda, ‘E, ada tali mapmara tep, pepsere’ tenen, moupra men tenepidi, walwal di pepi. 14 Sun walwal di pepipa, Yesusdi katuai pepu. “Nun kabo Lazarusda, ortumi di tek sisi konum depmaue. 15 Depmau dinin, sun kael kemna tep, er depmau taruda, ne cap er damai men kunmanuada, ne kange deipne. Ada, mesum tep men pepne. Ne mambul pel dopnyopda, ‘Sun teka tenepkamrum’ tenen, pepsene. Ukuda, Lazarus er damai benkupe,” Yesusdi pepu.

16 Upepupa, tenpu ngebo er sida butene, Tomas ton perami, tonda Didimus perami ngebodi, ‘Mali nengdi Yesus popkameng’ tenen, upepu. “Ne kayapu, nun cap, nun nai bo Yesus cap kikiman benkupe. Yu nengdi er popmengopda, nun peda popsetenge. Kikimanpu depkamepe,” pepu.

Yesusdi Marta cap, Maria cap tep, dipru kwa dipu upu

17 Sun yumadi kikiman bisi banmaiyanen, Betania mutu Lazarus damai bei. Amutu bei taruda, sun kabo Lazarusda, konum depmaupa, er nongda gel imir pumbon deipmaipa, ue tumi dumbari konum kupmau. 18 – 19 Betania mutu atara, Yerusalem mutu ortara daneitamai bisi banada, ukupmanto 3 kilometer yambul damai kupka cadi, Yahudi yala nesala weika di Yerusalem mutu di konum yai. Deiyoda, ‘Marta cap, Maria cap, sun du bo Lazarus depka tep, sun kange sukupredi, dipru mali kuprura tep, anerapu sun dipru kwa dipkupe’ tenen, sun damai konum yai.

20 Yesus yaupa, yuk nengdi Marta tep, “Yesusda kan ati dam yakanmare,” pepra lap pepipa, Martadi, ‘Bisaipu antapteneme’ tenen, Yesus yakanmau bisi beu. Marta beu dinin, Mariada, sun ati pum acapu kunmau. 21 Martadi Yesus cap, antaprei taruda, upepu. “Naio, kanda nun mutu kunmatum teptoda, ne du bo Lazarus men depmatue.

22 Ukuda konum depu dinin, ne kaele, kandi Allah tep moropmem keca yumada, adipapu Allahdi karepkamakere,” pepu. 23 Martadi upepupa, Yesusdi tamupra, “Kan du bo gam bukamre,” pepu. 24 Upepupnen, Martadi, “Naio ne kaele, sirya taruda, sun konum deami nesala tep, Allahdi gam bukra deipkamre taruda, Lazarus peda gam bukra deipkamre,” pepu.

25 Upepu pangeda, Yesusdi pepu. “Gam Bungdina Deiyo Ngebo cap, Gam Kuna Deiyo Ngebo cap, ne akunune. Ware ngebo do yuma, ne tep teka tenepnere ngeboda, er nong depmarya peda, gam pio kunkamre. 26 Ware nesala do yuma, ne tep teka tenepmengedi, ne cap dipru dukdongopra kunge nesala yumada, sun nong depmenga peda, pio gampu kunkamenge. Apepmaken upuda, teka tenepmarem do?” Yesusdi Marta tep pepu.

27 Upepupa, Martadi tamupra pepu. “Naio, nedi teka tenepkene. Tonda, kanda nimi Lyemna Deiyo Ngebo, Allahdi wepra deiamseu ngebo Kristus ^{▼▼Kristus – Ibrani upuda Mesias penunge. Yunani upu deiki di Kristus penunge. Dinino, deiyoda tenpu pua. Tonda, lap pena upu nomor 3 dinkurume.} kurume. Sun menop taru di, ‘Allah er Mi Sisada, amenda taru tuai mutu yankamre,’ pepra, nabi nengdi pediramsei ngeboda, kanda konuma. Nedi teka tenekenune,” pepu.

28 Upepu dingeda, Marta er ati tamupra beudi, er weit ner Maria tep kongpepupa, sun yambul yukai tengbereidi, Martadi pepu. “Ka nero, nun peteremna deiyo ngebo konum yanmaserdi, kan tep enmakere,” pepu. 29 Upepupa, Maria adipapu tekra, Yesus bisi yakanmauai menmena beu. 30 Ataruda, Yesusdi Betania mutu ati arum domyai kapul men weku. Erda, Marta cap antapmareiyaipu, bisi neitamai tupa kunmaupa, Maria er damai yau. 31 Sun Yahudi yala nesala, Maria dipru kwa dipmangu nesaladi, Maria menmena tekra ati pum di bura benmaupa, epi dingeda, sundi, ‘Uo, Mariada, Lazarus nong gel imir pumbon deipmanguaipu, engepra banmare,’ tenepidi, Maria banmau bisipu domyakanmai.

32 Mariadi Yesus kunmauai beudi, Yesus epu dingeda, ‘Yesus gispal dopkun’ tenen, er yan damai tuai saku. Ukunmaudi, upepu. “Naio, kanda nun mutu kunmatum teptoda, ne du bo Lazarus men depmatue,” pepra engenmau. 33 Engenmauanen, tonda, Maria cap yakanmai Yahudi nesala engenmaipa, Yesus epu dingeda, Yesusda mali kange doupra, ‘Uo, sun bicaue,’ tenepu. 34 Mali kange doupra, bicau tenepmaudi, asipetepu. “Ne kabo Lazarusda, er nong dan cei deipmarum do?” pepra asipetepu. Sundi, “Naio, kan diryarume,” pepi.

35 Upepipa, Yesusdi engenmau. 36 Engenmaupa, akunmai Yahudi yala nengdi, “Uo, er engenmarada dinmaso. Erda, Lazarus tep, ila di bicau tenepmara dia,” pepi. 37 Ton nengdi upepi dinin, yuk nengda, “Asuru puamu ngebo tep, asuru kwetepka cadi, warya tep, ‘Ne kabo Lazarus deprur’ tenen, kapul men depu taru dipu, upu men sekudi, men kwetepu do?” pepi.

Lazarus konum depu dinin, Yesusdi gam bukra deipu upu

38 Lazarus er nong dopra gel imir dongopidi, ila gel dopra, agel imir buplan dekdongopi. Ortumi di konum peipmaipane, Yesusdi Lazarus nong dongopi gel imir damai yaudi, kange di ton cap ikin kange doupu. 39 Ikin kange doupudi, upepu. “Sunda, agel imir peipra, buplan dekdongopmangu gelda, dopropmumdi, buplan pakeipneso,” pepu. Upepu dinin, depu ngebo er weit ner Martadi upepu. “Naio, upepmaserem dinino, ne du bo depupa, gel imir dongopipane, tumi ue dumbari konum kupka cadi, tong weik pepkurure,” pepu.

40 Upepupa, Yesusdi tamupra pepu. “Gume, ‘Tek teneprumyopda, Allah er ila mambul kurya cap, ila mambul pel dorenge cap epkamrume,’ men pepkesi do?” pepu. 41 Upepka tep nengeda, akunmai nengdi, Lazarus peipra gel imir buplan dam dekdongomi gel dopropi. Dopropipa, Yesusdi giso erepra im deiki tara diudi, er nai Allah tep upepu. “Naio, kandi konum gekepmanerema tep, telepe pepkene. 42 Kandi ne pekenun upu yuma tupa gekenemem ngeda, ne konum kael keamsi dinin, ne cap atekmang nengdi, ‘E, Allahdi tek sisi Yesus dokotepseue, tenepra, kael kepmengedi, teka tenepkung’ tenen, pepkene.” Yesusdi pepu.

43 Yesusdi upepu dingeda, ila upu deiki di upepu, “Lazaruso, gel imir pumbon di, bura tara aca yarume,” pepu. 44 Upepupa, adipapu depu ngebo Lazarus gam bukudi, agel imir pumbon di bura yanmau. Er yan cap, er buru cap, boun opkal di getepmaiyada, tupa kupmau. Tonda, er urasin getepdongomai opkalda tupa kupmau. Ukupka tep, Yesusdi awekmai nesala tep pepu. “Er nong peingna tep, getepmai opkal yuma kwiriprap loptapmumpa, Lazarus benkure,” pepu.