Jon 1 | XteSC | STEP | Tenpu tumi ton Allah er si Yahwehdi nimi si Amitaidi deiamu ngebo Yunus tep pepu.

Jonah 1

Allahdi Yunus tep peipu upu yanipka tep, pepu upu

1 Tenpu tumi ton Allah er si Yahwehdi ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} nimi si Amitaidi deiamu ngebo Yunus tep pepu. 2 “Ila kota mutu Niniwe benkurume. Niniwe mutu kunge nesala yumada, pio mali-malipu kungepa, ne dinedi kael kemnune. Mali kungepa dinuna tep, kanda amutu bememdi, upenkamrume. ‘Sunda mali keca tupa-tupa kurum pangeda, Allahdi wenepra popkamsere,’ pepra lap perbenkurume.” Allahdi Yunus tep pepu.

3 Upepu dinino, Yunusda Allah er si Yahwehdi pepmau upu tapra, ‘Allah dinmaneraida men kunkune. Tarsis mutupu benkune,’ tenepra, yuk bisi banmau. Bisi banmauanen, laut pirman mutu si, Yopa mutu beudi, ‘Laut mokon deiki bana tep keteneiami ila gapung co, er sida kapal laut weknedi, Tarsis mutu benkun’ tenen, er bana tep, co bo konum kunupu dingeda, Yunusda laut mokon deiki bana tep, kapal laut deiki kwamu ati wekra buku. Buku pangeda, akapal laut deiki, er cap yuk neng cap, mokon deiki dinin, kumanya puto deiki di bei. Yunusda Allahdi peipmau upu men gekepudi, ‘Allah damaida men kunkamne,’ tenepudi, ‘Tarsis mutu bena kunkamne’ tenen, beu.

4 Banmaiyane, Yunusda, agapung co, er si kapal laut neitamaipu dinin, amutara ati wekra mapu. Mapmau taruda, Allah er si Yahwehdi, ila puto mungna dokotepupa, me kait welepra longteng-longteng pepudi, agapung co er sida kapal laut, olokmanto kupu.

5 Ukupupa, mokon deiki gapung co dubanmai neng cap, agapung co talepra pel donmai neng yuma cap, kware weike kupupa, ‘Nun nai bo lyepkamser’ tenen, sun yuk-yuk dinin, sun si eremami isok tep moronmaidi, ngolokra mali penmai.

Mali penmaidi, sundi nimi urasin utopu kupra deipnedi, si eremami keca tep, ‘Yana melipseo,’ pepra, yuk-yuk si eremamitopu si pepra moropi. Amungna ila kange munge kunmaunge tep, ‘Nun gapung co, me weik wekyopda, ikin di mokon pumbon wekserur cadi, kanam kuptue’ tenen, sun kipmai keca yuma pukrapidi, laut mokon pumbon dokotepi. Ukupya peda, umpenada mokon tupa wekronmanto kunmau. Sun apel donmai taruda, Yunus puda agapung co, kapal laut pumbon wekmauaipu, tupa mapmau.

6 Sun gapung co, kapal laut konum mokon neitam wekronmanto kunmau pangeda, mokon deiki embaramu keca, kapal laut dubana deiyo ngebodi, Yunus mapmauai beu. Konum beu dingeda upepu. “Mungna di nun pirinmaser ngeda, kael kepmarem dinin, maptapmaserem ngeda ware keca deiyo tep do? Ukutaru dipapu bukroyo. Bukromemdi, kan si eremrum Allah tep moropmempa, epseredi, ‘Ne nyapu poprure’ tenen, bicau tenepsetudi, melipsetupa men depkup do, lyepkamser do? Nun walwal dinin, utenenmapa tep, kandi er tep adipapu moropkurume,” pepu.

7 Upepupa, akapal laut talena deiyo ngebo cap, Yunus cap, akapal deiki tara, alau ati konum weleprei dingeda, kapal laut talepra pel don nengdi, sun pe nengpu upepdai. “Gume, ‘Ila telep ngeda, dan nge do?’ tenen, peten kemne keca, er si undi, ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} akeca deiki di kupetepmepepa, ‘Ware ngebo deiki peten kepkur dingeda, nun kange mun kupmaser ngeda, angebo akonuma. Angebodi mali kupmarpa kunmasera tep, deiyoda er tepa,’ teneptepedi kael kepkupe,” pepdai. Upepi dingeda, undi donmaipa, peten kemna keca Yunus deiki kupu.

8 Ukupupa, sundi Yunus tep asipetepi. “Tek sisi do? Angeda kandi mali kupmarempa, nun pirinmaser do? Kanda, dan mutu di yanmarem do? Kanda dan mutu ngebo do? Tonda kanda ware pel dona ngebo do? Kanda ware yala ngebo do?” pepra asipetepi. 9 Upepra asipi pangeda, Yunusdi upepu. “Neda Ibrani ngebo kunune. Laut mokon cap, im deiki cap, tuai cap, ketekepra deipu ngebo, Allah er si Yahwehda, im deiki kurepa, er sipu eremnune,” pepu.

10 Upepupa, sun kware weik kupupa, sundi, “Uo, ila mali kupmarem ngeda, warya tep do?” pepi. Apepinge deiyoda, ake. Ada, arup taruda, Yunusdi, ‘Allah er si Yahwehdi peipmanu upu tapra, er damai di sepdara ayanmane,’ pepra, konum lap pepmaua tep, aupu pepi.

11 Aupu penmai taruda, mungna cap, me kait longteng-longteng penmaunge cap, ila puto weik ton cap kupupa, sundi Yunus tep asipetepi. “Nundi kan tep, ware kupketepya deiki, ila mungna dimpeptu do?” pepra asipetepi. 12 Upepi pangeda, Yunusdi tamupra pepu. “Gume, ne dopra, laut mokon pumbon dongopneso. Ukupnemum pangeda, ila mungna akunmarenge yumada, dimpepkure. Ukutaruda, ne konum kael kepne. Apirinmaserenge deiyoda, ne deiki di sun tali neng pirinmasere,” pepu.

13 Upepu dinin, sun agapung co kapal laut talepra pel don nengdi, ‘Puto di tuai tara betepe’ tenen, gapung co bukbanmaipane, tuai men benmanto kupi. Me longteng-longteng pepmau ngeda, arup taru yambul weik kupmau dinin, ukutaruda, mungna ila di kupmaupa, me kait ila di ton cap welepka tep, tuai tara men benmanto kupi.

14 Ukupu pangeda, sundi Allah er si Yahweh tep moropidi upepi. “Uo, Allaho, kan si Yahweh tep moropkepe. Angebo popkupa tep nengeda, ‘Tek sisi nun wenepra men popkamserem’ tenen, moropkepe. Allaho, kan tenepmaremdi pirinmaserem ngeda, kan Allah Yahwehdi tenepmaremtopu konum kupmasereme. Ange tep nengeda, angebo mali kurur do, telep kurur do, nun walwal cadi, angebo popkupa tep nengeda, ‘Er yapida, nun buru deiki men kupserepa, kandi men wenepkamserem’ tenen, moropkepe,” pepi.

15 Upepi dingeda, Yunus tomopra ila mokon neitamai donoki. Ukupi pangeda, mungna pirinmaunge cap, me longteng-longteng pepmaunge cap, ange yuma gum kupu. 16 Mungna gum kupu pangeda, amokon deiki embana keca, er sida kapal laut deiki bukra barami neng yuma, Allah er si Yahweh tep kwar daki. Kwar dakidi, er gispal dona tep, gam keca popra er tep karepi. Ukupidi, Allah er si Yahweh tep, “Gume lyepsememnyopda, kan gispal dona tep, tumi-tumi yuma ukupra-ukupra kunkamepe,” pepra deipi.

17 Sun anengda, Yunus dopra laut mokon pumbon donokidi, apu pepi dinino, ware kuprap taruto dakapkanen, Allah er si Yahwehdi, ila mekina Yunus damai karepupa, amekinadi, Yunus amanjuk pepu. Ukupupa, Yunus ikan mumun pumbon wekupa, komuni weneri, lukunda weneri amekina pumbonpu mamu.