Jon 2 | XteSC | STEP | Yunus mekina, ada ila ikan mumun pumbon kunmaudi, er nai bo Allah er si Yahweh tep, “Melipneo,” pepra, Allah moropu. Yunusdi moropu upu ake.

Jonah 2

Yunusdi Allah tep moropu upu

1 Yunus mekina, ada ila ikan mumun pumbon kunmaudi, er nai bo Allah er si Yahweh tep, “Melipneo,” pepra, Allah moropu. Yunusdi moropu upu ake.

2 Ne nai Allah kan si Yahweh, ne kange mun kupmanera tep, kan tep moropmakenpa, kandi konum gekepmanereme. Derami neng kunungai utopu kunmandi, “Ne nai Allah kan melipneo,” pepra moropmakenpa, gekepra melipmanereme. 3 Ne nai Allah kan pedi, laut mokon neitamai dongopnemumpa, mokon amu sisi dapu kunmanue. Ukupnemumpa, me puto di yana, ‘Doupra betene’ tenen, pirinurure. Tonda, kandi peipmumpa, me kait longteng-longteng pepra singipmanue.

4 Ukupmanupa, ne dipru neitamai di upepsi. Ne nai Allahdi, “Ne damai di berume, kan ton men dinkamkene,” pepneua deiki di, amekina manjuk pepmanerpa akunmane, tenepra pepsi. Utenepra pepsi dinin, ‘Kan si eremna tep, wepra deipmum ati, pio telep atida, ka di ton cap, akati tara dinkamne,’ tenepsi.

5 Ataruda, mokon dana-dana lelipronupa, ‘Mokon jepkuner do?’ tenen, kware kupneu. Ukupneudi amokonda karu weik cadi, me dana-dana yuma lelipronu. Lelipronupa, mokon amutara kure keca me bilbila, ne giso gwatepneupa, kware weik kupneu. 6 Neda pio mokon karu neitamai kwerepsipa, mokon pumbon dinin, ila mutu amutara dam, kauru weik kwerepsi. Mokon karuyai dokotepnemumdi, buplan wepra dekdongopnemumtopu kupsa tep, men yanmanto kupsi. ‘Pio akunkamne,’ tenepsi.

Utenepsipane, ne nai Allah, kan si Yahwehdi, mokon karuyai di dopropnemume. Ada, ne depmanto kupsai di, gam bukeipnemumpa, mekinadi mokon porai duktapneue. Allah kan si Yahweh tep, kan si eremkenune.

7 Ne nonge boun kupneupa, depmanto kupsi taruda, ne nai Allah kan si Yahweh tep tenepkesidi, “Melipneo,” pepra moropkesi. Moropkesi pangeda, gekepnemume. Ne moropkesi upuda, kan si eremna tep wepra deipmum ati, kan si eremna telep ati damai yau.

8 Allahdi nimi tep er kange dipu, ‘Bicau tenepra melimkamsene’ tenen, ketenemserur keca yumada, ton nengda tamnunge. Ada, gat keca dopra, petupra deipmengedi, atali keca tep, “Nun nai bo Allah,” pepra, si eremnung nengda, Allahdi aneng tep ketenepra kareptu kecada, anengdi tamnunge.

9 Ukunung dinino, ne Yunusda mut pena deiki di, “Ne nai Allah kandi melipnemumnge tep, telepe pepkene,” pepra, mut pena deiki si eremkamkene. Tonda, kan gispal dona tep, gam keca popra karenkamkene. Nedi kan tep, “Ukunkamkene,” pepsinge yumada, tek sisi kunkamne. Nimi lyemna keca yumada, Allah kan si Yahweh deiki dipu lyemserume. Yunusdi pepu. Aupu yumada, Yunus mekina mumun pumbon dipapu, moropudi pepu.

10 Upepra moropu pangeda, Allah er si Yahwehdi peipupa, aila mekina mokon porai bena, er mundu pumbon di Yunus duktapupa tuai kupu.