Jon 3 | XteSC | STEP | Ila mekinadi, Yunus mokon porai bena duktapu pangeda, Allah er si Yahwehdi ue butene taru Yunus tep pepu.

Jonah 3

Yunus Niniwe mutu beu upu

1 Ila mekinadi, Yunus mokon porai bena duktapu pangeda, Allah er si Yahwehdi ue butene taru Yunus tep pepu. 2 “Ila mutu Niniwe bememdi, nedi kan kori peipkesi upu doupra, Niniwe nesala sun kori adipapu lap perbenkurume,” pepu.

3 Upepu pangeda, Yunus aupu gekepudi, ila Niniwe mutu bana tep mapbanmaunen, Niniwe mutu beu. Niniwe mutuda, ila pala kota cadi, akota neitamai dinin, atara di ortara bana tep nengeda, ue weneri deiki barami. Akotada ila mambul kota cadi, akota neitamaida, nimi pio weik kurami. Amutuda pala weik mutu. 4 Komuni weneri, lukunda weneri mapnedi barami mutu cadi, Yunusda ue tenpu tumi dipapu, Niniwe mutu atara di, ortara bana tep, tenpu tumi deiki di beu. Niniwe mutu neitamai banmau taruda, aupu penmau. “Allahdi upepsere. Denge dumbari empat puluh (40) tumi konum kupyopda, Allahdi Niniwe mutu wenemna tep, amutu nesala yuma popredi, gum kupra deipkamre ja,” penmau.

5 Upenmaupa amutu nesala yuma gekepidi, ‘Allahdi ukupkamsere, peamseu ngeda, tek sisi kupkamsere,’ tenepidi, teka tenepi. Ukupi dingeda, akurami nesala yumadi, “Nun yuma ukunkamepe,” pepra deipi. Ada, sun yumadi, ‘Allah tep tenepmepedi er si eremna tep, kupkupe’ tenen, ila neng pe, yambul neng pe, nyapu yuma peda, ‘Nun mali kuramupke,’ tenenmaiya tep, mali opkal kepra, jen jepne gum di, tali bulungnapu kunmai.

6 Niniwe mutu nesala, sun ila nimi deiyo ngebo, sun Raja peda, akunmainge gekepra kael kepudi, er pel donai ila bungna keca deiki tapra kwerepudi, nimi deiyo neng kemami opkal kwiripa deipu dingeda, er peda mali opkal kenekra, tu but bapra yana buku. Akupunge deiyoda, ‘Uo, nun mali kuramupke’ tenen, mambul kange doupra kupu. 7 Ukupudi, ‘Nun Niniwe mutu nesala yumada, ukunkamepe, ukunkamepe,’ pepra upu peipu. Erdi peipu upuda ake.

“Neda sun deiyo ngebo cap, ne amutara pel dona deiyo neng capdi upepsepe.”

“Nimi do, nerapu do, nyapu do, ner nyapu do, nimidi peirameng keca yuma, domba bisam do, sapi do, ma do, ange-ange yuma ukunkamepe. Ada, ataru di gonga kepra, dorkunkamre taru neitamaida, jen cap, me cap men jenkamepe.

8 Nesala cap, domba bisam cap, sapi bisam cap, tonda yuk gam keca yumada, ‘Nun mali kuramepu,’ tenepmepedi, mali kange doupmepedi, mali opkalpu kenengkamepe. Tonda, nun peinup keca yala-yala yuma peda, mali opkal dopra, sun nong deiki deipkamepe. Tonda, ‘Allahdi nun mali kuramepu keca kaukepra lyepsetu’ tenen, Allah moronkamepe. Tonda, nun tulum kange doupra pedaramepudi, mali-mali weik kudaramepunge cap yumada, tapkamepe.

9 Ukunkamep ngeda, nun walwal dinin, Allahdi, ‘Popkamne,’ peamseu ngeda, ‘Er kange tamuprepa, er tulum nun deiki men deipkamser do, gum do?’ tenenmape. ‘Bicau tenepsetudi, yu weik tenesere ngeda, taptudi lyepsetue’ tenen, penmape. Kaukepsetudi, lyepseryopda, nun men depkamepe.” Niniwe mutu deiyo ngebodi pepu.

Niniwe ila deiyo ngebodi aupu pepra dokotepupa, er taleamu neng yuma gekepi.

10 Sun Niniwe nesala yuma ukunmai keca yuma, Allah epu. Tonda, sun mali kuraminge yuma tapipa, ange ton epu. Ukupipa epka tep nengeda, ‘Niniwe mutu nesala yuma popkamne,’ tenepra peramu ngeda, konum tapu. Men poptapudi, bicaue tenepka tep, Niniwe mutu nesala yuma pe, tenpu ngebo peda men popra gawal daku.