Jon 4 | XteSC | STEP | Allahdi Niniwe mutu nesala tep, bicau tenepudi men popka tep nengeda, Yunusdi, ‘Angeda ne songe,’ tenepudi Allah tep derepu.

Jonah 4

Allahdi Niniwe mutu nesala tep bicau tenepka cadi, Yunusdi, ‘Anesalada walito dapoptue,’ tenepudi, Allah tep yu kupu upu

1 Allahdi Niniwe mutu nesala tep, bicau tenepudi men popka tep nengeda, Yunusdi, ‘Angeda ne songe,’ tenepudi Allah tep derepu. 2 Derepudi, Allah er si Yahweh tep moropudi upepu. “Kandi Niniwe mutu nesala men popmarumada, warya tep do? Ne nai Allah kan si Yahweh tep pepkene. Angeda ne ati tapra amutu yankusi taruda, ‘Allahdi tek sisi Niniwe mutu nesala men popkamre,’ tenepra men peramsi do? Adeiyo tep nengeda, ne adipapu bura saka, Tarsis mutu menmena benamsi. Neda kan kurum keca konum kael keamkesi.

Ada, Allah kanda nimi mali kupmenga peda, adipapu men portamrume. Kan kange dipapu bicau tenepra lyemserume. Tonda, menmena yu men kukerur dinin, nimi mali kuramenge ngeda, kaukemserumdi, ila di bicau teneserume. Kanda nimi yuma tep, ila di bicau teneserume. Atep nengeda, mali kunge nengdi, sun mali kun keca tapmengopda, kanda, ‘Nimi popkaman,’ tenepmamem ngeda, ange tapra telep kudina ngebo kuserume,” Yunusdi Allah tep pepu.

3 Upepudi aupu ton dukdongopra pepu. “Ne nai Allah, Niniwe mutu nesala men popmarema tep, telep ngeda, ukutaruda nepuda dapopnemempa, depnapu kupkune. Ne kangeda, ila telep ngeda, denapu telepe dinin, gam kunada ne songe. Atep, kan Yahwehdi dapopnetume,” Yunusdi pepu. 4 Upepupane, Allah er si Yahwehdi tamupra pepu. “Kanda deiyo ngebo guma cadi, nedi pepkene. Deiyo men kwapmarepapu, ukupra tali lupra men derepnetume,” pepu.

5 Upepu pangeda, Yunusda Niniwe mutu di tapra, keteng yakan tara beudi, bura ati dopudi, akati pumbonpu, kawai buka amutu pio kuramudi, ‘Niniwe mutuda ware keca ton kupkamre do?’ tenen, kalekra diramu. 6 Ukuramupane, Allah er si Yahwehdi Yunus kuramngaida, ila taleangamre co tenpu, ‘Yunus kunkamraida, keteng bupu weik cadi, aco di Yunus lelipkamre. Leliprepa, er keteng bupu tep, ikin kunmare ngeda gum kupkamre’ tenen, aco deipupane, menmena bongopra nepupa, Yunus lelipdongopu. Acoda nepupa, aco tep Yunusdi ila kange deipu.

7 Kange deipu dinin, mapmaua ambutumi ipna bereng tamne dinmaupa, aco nunupmau. Ada Allahdi, ‘Aco yatenda nunuptue,’ tenepudi, kwali karepupa, akwalyedi amupra aco yaten lulakipa, aco koulupu. 8 Keteng konum tengyauopda, Allahdi kum ila bupunge dokotepupa, keteng yakan tara di, ila kumanya welepudi, pung pepra yau. Akum pung pepudi, keteng bupu weik tengyaua deiki di, Yunus giso biri-biri pepra depmanto kupu. Akunmaua deiki di, er depmanto kupudi, tonda er giso yuma uku jepmanto kupu. Ukupupa, ‘Ne gam kune ngeda gume, dadepkune,’ tenepudi, upepu. “Ila telep ngeda, depkune. Gam kunada, ne songe,” pepu.

9 Upepupane, Allahdi tamupra pepu. “Kanda deiyo ngebo guma cadi, akolupmar co tep tali men derepnetume,” pepu. Upepupa, Yunusdi tamupra pepu, “Ne yu kupnere ngeda, telepe pua. Angeda men tapkamne. Pio deremamnya deikipu depkamne ja,” pepu.

10 Upepu pangeda, Allah er si Yahwehdi Yunus tep pepu. “Akolupmar coda, lukunda tenpu di bongopra tekmaua, ton tumida nunupropke. Tonda acoda, kandi men bolokra deipmumdi, aco tep kandi betapra men kalekmaumume. Dinino, kandi aco nunupra koulupunge tep, mali kange doupra, ‘Uo,’ tenepra, bicau tenerume. Dinino, Niniwe mutu nesala weik dakunung dinin, aneng yuma tep nengeda, bicau men tenerume.

11 Neda Niniwe mutu nesala tep, bicau tenenune. Amutuda, nimi men nukmanto, sun dengeda 120,000 ribu neng akunung dinin, ‘Telepnge ace, malinge ace,’ tenen, kael kepmanto men kununge. Tonda, sun peinung keca, domba bisam cap, kambing cap, ma capda men nukmanto kununge. Amutu nesala cap, sun peinung keca cap, tali lupra poptapkaman do? Gume, anesala tep nengeda, bicau tenenune.” Allah er si Yahwehdi Yunus tep pepu.