Jos 1 | XteSC | STEP | Allah er si Yahweh, er amutara pel doramu ngebo Musa konum depu pangeda, Allahdi, Musa er pununa ngebo Yosua tep pepu. Musa kapul men depu taruda, Yosua er pel melimna ngebo kuramu. Yosua er nai boda, er si Nun kuramu. Allah er si Yahwehdi Yosua tep upepu.

Joshua 1

Allah er si Yahwehdi Yosua tep, “Kanaan mutu bememdi talepkamrume,” peiamu upu

1 Allah er si Yahweh, er amutara pel doramu ngebo Musa konum depu pangeda, Allahdi, Musa er pununa ngebo Yosua tep pepu. Musa kapul men depu taruda, Yosua er pel melimna ngebo kuramu. Yosua er nai boda, er si Nun kuramu. Allah er si Yahwehdi Yosua tep upepu. 2 “Ne amutara pel doramneu ngebo, Musa konum depmara cadi, ange tep nengeda, kan cap, ne nyapu Israel nesala yuma cap, ataruda ketenepra Yordan me goupra, ortara bana tep dinmamumya di, sun tep peramsi mutu karepkusena tep, wekamrume. 3 Yosua kan cap, Israel neng yuma cap, yanipra bankamrum mutuda, ange yuma karepkusene. Ada, nedi Musa tep konum peiamsitopu kupkusene.

4 Sun mutuda, atara me gum mutu adine, deiki tara Libanon mutu iknapi tara di dipdongopra karepkusene. Tonda sun mutuda, keteng yakan tara, ila me si Efrat me dari tara adine, keteng wengbare tara, sun Het yala neng kunge mutu yuma cap, adine ila laut mokon ortara keteng darban tara yumada, sun mutu tep karepkusene. 5 Tonda Yosua, kan gam kunkamrem taru yumada, tenpu ngebo peda kan tep men bisbisa kapkamkere. Nedi Musa melimamsi utopu, kan tep pio melimkamkene. Nedi kan tep pio men tapkamkene. Kikiman kupedi pio melimkamsene. Tonda, sun tapra yukai men benkamne, kikimanpu kunkamepe,” Allahdi Yosua tep pepu.

6 Upepudi aupu ton dukdongopra pepu.

Ange tep nengeda, kan adipapu teka tenepra, kware pio gum dipapu, puto di Israel nesala, sun deiyo ngebo kepmempa, aneng doupra ne karepkusen mutu dubemempa dopropkamenge. Nedi sun co puna neng tep, ‘Amutu karepkamsene,’ pepra peiamsi mutu benkamruma tep pepkene. 7 Ange tep nengeda, kan adipapu teka tenepra, kware pio gum dipapu puto di kunkamrume. Kan adipapu teka tenepra kalekdamemya deiki, ne upu moupra talenkamrume. Ada ne pel dona ngebo Musadi karepkeu upu, nedi, ‘Ukunkamrume, angeda men kunkamrume,’ pepra, deipsi upu moupra dombankamrume. ‘Yuk bisi benkup’ tenen, aupu tapra tebalal tara bisi pe, dumsisi bisi peda men benkamrume. Tenpu peda ton men tapmemnyopda, kan cap, sun Israel nesala cap benkamrumai yumada, teleppu kunkamrume. Ne upu taprumnyopda, gume, ikinpu kunkamrume.

8 Nedi, ‘Ukunkamrume, angeda men kunkamrume’ pepra, mem upu peipsipa, Musa sekamu upu yumada, Yosua kan cap, ne nyapu Israel neng cap, ‘Deiyonge yuma kael kepkamepe’ tenen, moupra tenimkamrume. Ada keteng komuni pe, lukunda peda ne upu moupra tenimkamrume. Ukupmempa, asekunge utopu kuprumnyopda, sun kunkamrum kecada, teleppu kupbankamsere. Ada sundi akeca-keca yala yuma dopropkamrume. Tonda sundi, ‘Ukuptepe’ tenen, kupetepkamrum keca yumada, telep kupra kunkamre. 9 Nedi konum pepkesitopu pio tenenkamrume. Ada, kan adipapu teka tenepra, kware pio gum dipapu puto di kunkamrume. Kwar dangna gume, pio dimpeprappu kunkamrume. Tonda, ikin kupkerepa, ‘Uo ne tupa men kuptene’ tenen, dipru boun kuprepa, kange dipru dabal kuna gume. Sun benkamrum mutu yumada, neda Yahweh, sun nai bo Allah melimsenedi, pio kalengkamsena tep, sun kwardana cap, dabal kuna cap gume. Allahdi Yosua tep pepu.

10 Upepka tep nengeda, Yosuadi Israel nesala sun upu bongna neng tep pepu. 11 “Israel nesala, sun keana dodin ati dam yuma embamumdi, aupu pepkurume. Sun keca yala-yala yuma ketenepra deipkurume. Ukutaru di dipra, ue weneri tumi konum kupyopda, Yordan me goupra, ortara keteng yakan tara ormutu wengbenkamepe. Allah er si Yahwehdi peiamseu mutu, karepserepa bena wekra dopropkamepa tep, sun keca keteneipkurume. Amutuda pio talenkamepa tepa,” Yosuadi Israel nesala, sun deiyo neng tep pepu.

12 Yosuadi upepu dinin, sun Ruben yala neng cap, Gad yala neng cap, tonda Manase yala neng dinin, neitamai di bokra wiliamu neng cap tep pepu. 13 “Sun tenipkurume. Allah er si Yahweh, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} er pel don ngebo Musadi sun tep konum peramu upuda lumdongona gume. Sun ukutaru akunmarumai cap, Allahdi karenkamserai cap, Kanaan mutu yumada, sun beipye peingna cap, kuna cap tep, sun nai Allah, er si Yahwehdi amutu doupra talipu konum kareramseu.

14 Ange tep nengeda, sun nerapu yuma cap, nyapu yuma cap, sun pein keca yuma cap, Yordan me goupra ortara keteng wengbaramre tara men benkamenge. Acapu, keteng yakan tarapu, Musadi kareramseu mutupu kunkamenge. Dinino, sun yala neng neitamai di, nimi puto-puto neng, podana tep jen doupra bange nengda, Yordan me ortara, keteng wengbaramre tara menmena benkamenge. Sun mepra bangepane, sun kayapu neng yuk yala neng yumada, sun amnyo tara yakankamenge. Deiyoda, sun kayapu neng Yordan me goupra, keteng wengbaramre tara benkununga tep, makupra kalengkamrum tepa.

15 Sun kayapu neng tep, melimamrumpane, Allahdi aneng tep melimrepa, sundi sun dopropkameng mutu konum bisbisa kapra dopropmengopda, sun nai Allah, er si Yahwehdi sun kapu neng tep, beipye pena taru karepyopda, ataru dipapu sun pe mutu tamupra benkamrume. Ada Musadi kareramseu mutu, Yordan me goupra ortamna keteng yakan tara tamupra benkamrume. Sun nai Allah, er si Yahwehdi sun pe tep beipye peingna taru kareramseutopu, sun kayapu neng tep karepkamre. Konum kupyopda, sun pe mutu tamupra bana telepe.” Yosuadi sun ayala weneri neng tep pepu.

16 Yosuadi upepu pangeda, sun Ruben yala neng cap, Gad yala neng cap, tonda Manase yala neng neitamai bokra wiliami neng capdi, Yosua tep tamupra upepi. “Telepe, kandi nun tep ware pel yala karepkamserem ngeda, nundi dukdongopra pel donkamepe. Tonda, ‘Amutu beso,’ pepsemem pangeda, amutupu bankamepe. 17 Nundi Musa pepseu upu gekeramepu utopu, kan upu peda gekenkamkepe. Ukunkamep dinin, nun putapser ngeda, ada Allah er si Yahwehdi Musa melimamu utopu, ‘Yahwehdi kan pe tep melimkamkere’ tenen, putaserure,” pepi.

18 Upepi dingeda, aupu ton pepi. “Ware ngebo do yuma, kandi, ‘Ukupkurume,’ pepra pepmem upu men gekepredi, yanipre ngeboda, nundi wenepra poptapkamepe. Ukunkamep dinin, kan puda, kwardana gum dipapu, puto dipapu Allah er pel dopra kunkamrume,” pepi.