Jos 10 | XteSC | STEP | Yosua cap, er nyapu Israel neng capdi, Yeriko mutu nesala cap, sun deiyo ngebo cap popmaitopu, Ai mutu nesala cap, sun deiyo ngebo cap, yana popra gawal daki. Ukupipa, yuk nengdi ange yuma lap pepipa, Yerusalem mutu talepra kuramu ila nimi deiyo ngebo, er sida Adoni-Sedekdi gekepu. Tonda, Gibeon mutu nesaladi, ‘Israel nesaladi poryasenung’ tenen, ‘Sun cap nun cap podana gum dipapu, telep kupra kikiman kunkamepe’ tenen, Israel neng cap, Gibeon neng cap, upu talepdaidi, upu pepra deipdai. Ukupi dingeda, Gibeon nesaladi Israel nesala kunmaiyai damaipu yana kunmai. Ange ukupinge yumada, yuk neng gekepidi, Adoni-Sedekdi tep lap pepipa, gekepu.

Joshua 10

Israel nesaladi Amori nesala popi taru kupu keca tep upu

1 Yosua cap, er nyapu Israel neng capdi, Yeriko mutu nesala cap, sun deiyo ngebo cap popmaitopu, Ai mutu nesala cap, sun deiyo ngebo cap, yana popra gawal daki. Ukupipa, yuk nengdi ange yuma lap pepipa, Yerusalem mutu talepra kuramu ila nimi deiyo ngebo, er sida Adoni-Sedekdi gekepu. Tonda, Gibeon mutu nesaladi, ‘Israel nesaladi poryasenung’ tenen, ‘Sun cap nun cap podana gum dipapu, telep kupra kikiman kunkamepe’ tenen, Israel neng cap, Gibeon neng cap, upu talepdaidi, upu pepra deipdai. Ukupi dingeda, Gibeon nesaladi Israel nesala kunmaiyai damaipu yana kunmai. Ange ukupinge yumada, yuk neng gekepidi, Adoni-Sedekdi tep lap pepipa, gekepu.

2 Yerusalem mutu ila nimi deiyo ngebo cap, er amutara kurami nesala cap, ange yuma gekepi dingeda, ila kware kupu. Kware kupunge deiyoda, Gibeon mutuda ila ati arum domi mutu tepa. Tonda Gibeon mutuda, metek mutu guma. Yerusalem mutu ila nimi deiyo ngebodi taleamu mutu utopu kupu. Ai mutuda, yambul weik mutu dinin, Gibeon mutuda, pio ila weik mutu. Gibeon mutu neitamai kurami nengda, ila kael deiki di, nimi podana neng kurami. Ukutaruda, sun Gibeon mutu nesaladi, Israel nesala cap kikiman kunmaiya tep, Adoni-Sedek cap, er nyapsilip cap, kware weik kupu.

3 Yerusalem mutu taleamu ngebo Adoni-Sedekda, Gibeon mutu nesala tep kware weik kupka cadi, yuk nimi deiyo neng damai upu dokotepudi upepu. “Sun yumadi yana melipkamnerume,” pepu. Sun yuk mutu ila nimi deiyo neng sida ake. Hebron mutu taleamu deiyo ngebo Raja Hoham cap, Yarmut mutu taleamu deiyo ngebo Raja Piream cap, Lakis mutu taleamu deiyo ngebo Raja Yapia cap, Eglon mutu taleamu deiyo ngebo Raja Debir cap, sun yuma tep, aupu pepra dokotepu.

4 Yerusalem taleamu ngebodi, aRaja neng yuma tep upepu. “Gibeon mutu nesaladi, Yosua cap, Israel nesala cap, podana gum di, wisipra kikiman kunkamenge. Ange tep nengeda, ukutaru sunda ne damai yana makupnumumpa, Gibeon nesala porbenkamepe. Ada Gibeon nesala cap, Israel nesala cap peipdangedi, ‘Wisipra poryasenung,’ tenepmanga tep pepne,” pepu.

5 Upepu pangeda, sun Amori tara taleami nimi deiyo neng, pamu bari Raja neng yumadi gerepdongopi. Ada, Yerusalem mutu taleamu Raja cap, Hebron mutu taleamu Raja cap, Yarmut mutu taleamu Raja cap, Lakis mutu taleamu Raja cap, Eglon mutu taleamu Raja cap, gerepdongopi. Adeiyo neng yuma cap, sun jen talen neng yuma cap, ‘Gibeon nesala yuma popra gawal dakamepe’ tenen, Gibeon mutu damai ketenepmaiya di, bulupra bei dingeda, Gibeon mutu nesala tep popterepi.

6 Ukupi pangeda, Gibeon nesaladi Yosua cap, er nyapsilip cap, Gilgal mutu kunmaiyai perbei. Sundi upepi, “Nunda, sun amutarato nesala kunupa tep, men tapkamserume. Sundi nun tep menmena melimyaserumdi, lyepkamserume. Sun Amori tara deiyo neng yuma cap, sun jen talen neng yuma capdi, tapakropmengedi, sun mutu di kwerepra yangedi, nun poryankamsenga tep, ketenepmange,” pepi. 7 Upepya tep nengeda, Yosua cap, er nyapsilip cap, Gilgal mutu kunmaiya gekepidi, er cap, er pio telep jen talen neng yuma cap, balila di puto kupupa, Gilgal mutu tapra, sun Amori tara nesala porbana tep, ketenepra bisi banmai.

8 Ukupi pangeda, Allah er si Yahwehdi Yosua tep pepu. “Sundi Amori tara nesala tep, kwar dangna gume. Nedi anesala doupra, sun buru neitamai konum deipsene. Ada, ne puto sun nong deiki deipsenepa, anesala yuma popbisipkamrume. Nedi melipsenepa, sun anesaladi tenpu ngebo pe kan nyapsilip tep men popkamsenge,” pepu.

9 Allahdi upepu pangeda, Yosua er nyapsilip cap, Gilgal mutu di puto deiprapidi, alukunda neitamai di bisi banmaiyane, alukundapu Gibeon mutu dam bei. Sun bei taruda, Amori tara nesalada, tali mangkau kange doupra kunmaipa, men tenepipa, Yosua er tara neng capdi, sun yuma dato-dato di, Amori tara nesala damai porbei.

10 Porbei taruda, Allah er si Yahwehdi Amori tara nesala tep, kange wang-wang pena cap, kange tenimtona cap, weika di karepupa, betapra men tenipmanto kupi. Ukupipa, Israel neng yaidi, Amori neng yuma tep popbisipi. Gibeon mutu neitamai di Israel nesaladi, Amori neng tep weik popi. Ukupipa, Amori nesala ton sepdaro beidi, genembanmai pangeda, Israel nengdi, sun amnyo tara sepdara yakamaidi, anesala weika di ton Bet-Horon mutu bisi di popi. Tonda, tupa popyakanmaiyane, amutu neitamai dinin, ortara mutu popbanmaiyanen, mutu si Aseka mutu cap, Makeda mutu cap, anesala poptapra bei.

11 Israel nesaladi anesala dombanmaipa, ‘Aseka mutu benkup’ tenen, Amori nengdi, Bet-Horon mutu di sepdara kwerepra genembanmaipane, Allah er si Yahwehdi ila mo duduya, im deiki di gel bum utopu dokotepupa, sun banmaiya damaipu sakudi, Amori tara nimi weika di pio ila di popupa depi. Tonda, Israel nesaladi, sun ya douprapidi, Amori nesala yambultonun popi dinin, Allahdi ila mo duduya dokotepupa popu ngeda, pio weika di popupa depi.

12 Allah er si Yahwehdi, er puto Israel neng deiki deipudi, Amori nesala tep doupra karepupa, Israel nesaladi aneng popbisipi. Sun porbei tumida, Yosuadi Israel nesala gekenmaiyai di, Allah er si Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep pepu. “Uo, Gibeon mutu neitamai akunmanga deiki tara di, keteng dimpepra deiptumpa, dortara men wengbenkamare. Ange utopu, Ayalon mutu neitamaida, ware peda dimpepra deiptumpa, tenpaipu kupkamare,” pepra, Allah tep moropu.

13 “Upepra moropsa tep, Allah er si Yahwehdi karepupa, keteng dimpepra tekamudi, pio men wengbenmau. Tonda, alukundada, ware peda acapu tekamudi, men kwerepu. Acapu kupmaupane, Israel nesaladi, sun Amori nesala tep podanmaiyane, bisbisa kapra popra seng pepi. Ukupi pangeda, keteng cap, ware cap, kange di ton cap boun kupmauanen, wengberei.” Yosuadi pepu.

‘Tonda akapu keca yuma tenipkamep’ tenen, tenpu ngebo, er sida Yasar, er buku neitamai sekeipseu. Erdi sekeipu upuda, ake.

Atumida, keteng welepbanmauanen, keteng dukdukto konum tekra deipmauanen, acapu dimpepmaudi men kwerepmau. Ka di ton cap bana gum, acapu kunmauanen, tenpu tumito tupa akunmauanen, ka di ton cap banmauanen, ortara wengbaramretopu, wengbeupa ipropudi kunuku.

14 Atumi deiki kupu kecada, pumun taru di dipra, ataru neitamai yuma, pio men kuramu. Akecada, Israel nesala cap, Amori nesala cap, podanmai tarupu kupu. Ada Yosuadi, ‘Naio ange adipapu kupsetume,’ pepra moroputopu, adipapu Allah er si Yahwehdi, tali tuai ngebo dinin, Yosua moroputopu gekepudi kupu. Ataru tenpu dipapu kupu. Ukupu tep nengeda, nun kaele, ataruda, tek sisi Allah er si Yahwehdi, Israel nesala tep weika di melipupa, sundi Amori nesala popbisipi. 15 Yosua cap, er nyapu jen talen neng cap yumadi, Amori tara nesala popra gawal daki dingeda, tamuprapidi sun dodin opkal ati, sun pe ati Gilgal mutu kuramyai tamupra bei.

Yosuadi Amori nesala sun ila nimi deiyo neng pamubari poptapu upu

16 Dinino, Amori yala nesala, sun ila nimi deiyo neng pamubari Raja neng bura saka beidi, Makeda mutu gel imir pumbon bena inipmai. 17 Bena inipmaidi mapmaipa, nimidi konum epmaiya cadi, “Makeda mutu gel imir pumbon aceipu inipmange,” pepra, Yosua damai tep, lap perbei. 18 Bena lap pepipa, Yosuadi pepu, “Agel imir pumbon wekronmangaida, ila gel di gamupra, agel imir buplan dekdongopkurume. Ukupmum dingeda, yuk nimi ton wepra deipmumpa, agel imir damai kalengkamenge,” pepu. 19 Dinino, sun akupmarum neng, agel imir damai kuna gume. Nun podan neng tep, ponada tamna pio gume. Sun podan neng cadi, domembanapu kunkamrume. Ukunmamumnyanen, adipapu sepdara bemumdi, sun podan nengda, sun amnyo tara di popkamarume. Tonda, sun podan nengda, ‘Sun pe mutu tamupra bengedi, sun ati arum doamyai tamupra weknung’ tenen, moupra dinkamrume. Tamna gum dipapu, aneng yuma poptapra gawal dakamrume. Tenpunge peda men tapkamrume. Angeda, tali tep men pepsene. Deiyoda, Allah Yahweh er puto sun deiki konum deipmaserpa, sun pe buru di sun podan neng yuma poptapkamarume,” pepu.

20 Apeiputopu, Yosua cap, sun Israel nesala capdi, Amori yala neng ponmai taruda, sun aponmaiya kan-kan neitamai di, tenpu-tenpu neng ton lyeptapra sepdaro beidi, daepra embanmaiyanen, ila puto di amutu nesala yuma poptapmaidi, gawal daki. Dinino, anesala yambula dipu, sun menop taru ila ati arum doamyaida, ila pala gel taplakra deiamidi, lyom beilya ton ongopgenepra deiamya cadi, anengda akati arum konum bena wekyopda, men popmanto kupi. Anengda, men popi. 21 Ukupya tep, Yosua er jen talen neng yuma cap, sun Israel nesala yuma capda, ka di tamupra, Yosua er kunmauai, Makeda mutu damaipu, sun keana dodin ati deiamyaipu yandopi. Israel nengdi, atara nesala pio weika di poptapmaiya tep nengeda, amutu neitamai yumada, tenpu ngebodi ton, sun Israel nesala tep, balila kupra upu puto di ton pio men pepi. Dim pepnapu kupi.

22 Israel nesala, sun ke tep tenda, bol di doipmai ati tamupra bei pangeda, Yosuadi pepu. “Ukutaruda, agel imir pumbon, ila gel di gamupra buplan dekdongopmangada, paktapso. Paktapmumpa, sun pamubari nimi deiyo neng Raja neng akupmangada, dopra ne damai duyaso,” pepu. 23 Upepu pangeda, erdi peipmautopu, agel pumbon dekdongopmaiya gamupra paktapidi, animi deiyo neng pamubarida, dopropi. Dopropi ila nimi deiyo neng Rajada, ake. Yerusalem mutu deiyo ngebo Raja cap, Hebron mutu deiyo ngebo Raja cap, Yamut mutu taleamu Raja cap, Lakis mutu taleamu Raja cap, Eglon mutu nimi deiyo ngebo Raja cap, sun yumada agel pumbon wekrapidi, gipra yai.

24 Animi deiyo neng yumada, agel pumbon di dopra yaiopda, Yosua er damaipu dopra deipi. Ukupi pangeda, Yosuadi Israel nesala yuma tep, “Bulupra yarume,” pepupa bulupi. Konum bulupi pangeda, Yosuadi, “Ukupso. Sun aneng konum popbisipmaruma cadi, petenkemna keca tep nengeda, sun kum yapla deiki yanipkurume,” pepupa, er cap melipra mar podarbenmai jen talen neng yuma yaidi, apamu bari nimi deiyo neng, sun Raja-Raja yumada, sun kum yapla yana yaninmai. Israel nesala cap, jen talen neng yuma capdi, ‘Aneng konum bisipmape’ tenen, aRaja neng pamubari yuma, sun kum yapla deiki yaninapu kunmai. 25 Ange yuma konum kupyopda, Yosuadi sun jen talen neng yuma cap, sun Israel yala nesala yuma cap tep pepu. “Sun kwar kuna cap, dipruai di, ‘Men kuptepe’ tenen, tenimtonada pio men kupkamrume. Tek sisi apepmasentopu, ‘Nun puto dipapu kuptepe. Puto di ukupkupe,’ tenepra, dipru puto di, balila kupkurume. Deiyoda ake. Sundi aRaja-Raja neng tep, sun kum yapla deiki yanipmarumtopu, Allah Yahweh, er ila puto deiki di melipserepa, sun mar podan neng yumada, popbisipkamrume,” pepu.

26 Upepra seng pepu dingeda, Yosuadi animi deiyo neng, sun Raja-Raja neng pamubari yuma poptapu. Apamu bari Raja neng yuma poprapudi, sun nong dopra tapu di getepra, amutu kwamu co pamubari deiki getepra deipudi, tapmaupanen, keteng orwengbanmau taruda, kange di aneng sun nong yuma co deiki ateng kopmaua kange di loptapu. 27 Keteng konum wekrou pangeda, ataruda Yosuadi, “Ukupkurume,” peipupa, sun Israel nengdi, sun Raja-Raja pamubari neng, sun nong dopra, agel imir pumbon iniamungai dipapu, dokotepra dongopu. Tonda, agel imir buplan damaida, ila gel weika di dopra deipmaianen, agel imir buplan dekdongopi. Agelda, ataru di dipra daneitam taru yuma akwamnganen, abuku seki taru peda, tupa akapu.

28 Atep nengeda, atumi neitamai di, Yosuadi Makadea mutu yuma warekra ponmaiyanen, popbisipudi, atara tu yuma cap, amutu kwamu keca yuma cap dopropu. Amutu kurami nesala yuma cap, sun amutu nesala taleamudi, ila nimi deiyo kepra, Raja ngebo kuramu ngebo capda, popra gawal daki. Yosuadi peipupa, er tara nengdi, amutu neng yuma tep, yu parang ya si di, popi. Makeda mutu taleamu nimi deiyo ngebo Raja peda, Yosuadi Yeriko mutu taleamu nimi deiyo ngebo tep men di poptaputopu, Makeda Raja peda, akuputopu kupu.

Yosuadi Amori mutu nesala ton weika di popbaramu upu

29 Ange yuma konum kupi dingeda, Yosua cap, er jen talen neng cap yumada, puto weik kupidi, Makeda mutu damai dinin, Libna mutu bei. Beidi, Libna mutupu bena wareki. 30 ‘Amutu neitamai kurami neng yumada popkung’ tenen, Allah Yahweh er puto dopra, Israel nesala sun deiki deipu. Ada, amutu nimi deiyo neng cap, amutu kurami nesala cap, popbisipmengedi, gawal dakamenga tepa. Allah er puto karepupa, Yosua cap, er jen talen neng yuma capdi, amutu kurami nesala yumada, parang ya di popi. Tenpu ngebo peda, ton tapipa, gam men kupi. Amutu neitamai kurami nesala yuma, popra gawal daki. Amutu taleamu nimi deiyo ngebo Raja Libna peda, Yosua men di Yerikho mutu Raja tep kupmautopu kupu.

31 Ukupi dingeda, Yosua cap, Israel jen talen neng cap yumada, Libna mutu di tapra, bisi banmaiyanen, Lakis mutu bei. Sun amutu beidi, ‘Lakis mutu nesala bura saka benung’ tenen, amutu ati arum dana-dana yuma ongopgenepra kalengmaidi, amutu yuma warekra popidi, bisbisa kapi. 32 Ada, Allah Yahwehdi, ‘Israel nesaladi, Lakis mutu nesala popkung’ tenen, er puto dopra, sun Israel nesala nong deiki deipu. Yosuadi amutu perbeu taru kupu ngeda, ue butene tumi deiki di kupu. Ada, amutu neitamai kurami nesala cap, Libna mutu kamo keca yuma capda, parang ya di popudi, gum kupra deipu. Tonda, Libna mutu kupmautopu, Lakis mutu peda utopu kupu.

33 Uda, Lakis mutu tupa ponmai taruda, yuk mutu neng, akunmainge tep, Gezer mutu taleamu nimi deiyo ngebo Raja Harmondi, er cap, er jen talen neng capdi, ‘Lakis mutu neng melipkup’ tenen, yanmai. Dinino, Yosua cap, er jen talen neng cap yumadi, adeiyo ngebo cap, er jen talen neng cap yumada, poptapi. Tenpu ngebo peda, akan-kan di tapipa, gam ton men kupi. Ayumada, depnapu kupi. 34 Amutu yuma popi dingeda, Yosua cap, er jen talen neng cap, adipapu dukdongopra, Lakis mutu damai dinin, Eglon mutu warengbei. Tonda, ‘Sun amutu nesala bura saka benung’ tenen, amutu ati arum dana-dana yuma, ongopgenepra kalengmaidi, amutu kurami nesala yumada, parang ya di popnapu kupi. 35 Amutu wareng benmai tumi deiki dipapu, Eglon mutu warekrapidi, amutu neitamai kurami nesala yumada, parang ya di poptapidi, gum kupra deipinge cap, popinge capda, Lakis mutu kupmaitopu, kupi. Nimi tenpu ton men tapi. Yuma poptapra gawal daki.

36 Eglon mutu neitamai konum popi dingeda, Yosua cap, er jen talen neng cap, sun Israel nesala yuma cap, amutu dam tara di, welerbeidi, Hebron mutu bei. Bei dingeda, ‘Amutu yumada popra gawal dakup’ tenen, warekra bei. 37 Amutu bena warekra popi dingeda, amutu talepra, nimi deiyo neng Raja cap, amutu kurami nesala cap, amutu kuramu keca yala-yala yuma cap, tonda amutu di taleamipa, kurami deiyo neng Raja-Raja cap, tonda yuk mutu yambul ati arum doramyai yuma pe, yuk mutu yuma, amutu neitamai kurami nesala yuma peda, ayumada popra gawal dakra deipi. Yosuadi, amutu nesala yuma parang ya di popudi, gum kupra deipu dingeda, men di Eglon mutu popmaudi kupmautopu kupu. Tenpu ngebo peda, ton tapupa gam men kurami. Ayuma depnapu kupi.

38 Akonum kupi dingeda, Yosua cap, Israel jen talen neng cap, Israel nesala yuma capdi, tamupra yaidi, Debir mutu warekra porbei. Amutu yuma peda, popra gawal daknapu kupi. 39 Amutu nesala cap, sun nimi deiyo neng cap, amutu kamo keca yuma cap, amutu di taleamipa, kurami mutu nesala yumada, parang ya di popra, gawal daki. Yosuadi Debir mutu kurami nesala yuma cap, amutu neng yuma cap popkada, Hebron mutu cap, Libna mutu cap, Libna mutu ila nimi deiyo ngebo cap, sun yuma popra gawal dakmaitopu, Debir mutu kurami nesala cap, sun nimi deiyo ngebo cap tep, utopu kupi.

40 Uda, ukuramnga deiki di, Yosuadi amutu neitamai kurami nesala yumada, konum popra sengpepra gawal daku. Ada, nimi deiyo neng Raja-Raja peda, poptapnapu kupu. Ada, Negeb mutu, me gumai tep, ila katuai mutu cap, mutu buma deiki cap, amutu pirman genemne kuramu mutu cap, tonda amutu neitamai kurami neng yuma cap, ortara kurami neng cap, tonda amutu-amutu neitamai keteng dangban tara, itara kurami neng cap yumada, popi. Tenpu ngebo peda, ton pio tapipa, gam men kurami. Yuma poptapi. Ada, Israel nesala talepra kurur Allah, sun nai bo Yahwehdi, “Ukupkamrume,” peiputopu kupi. 41 Yosuadi amutu-mutu yuma konum popkada, ada Kades-Barnea mutu itara di dipdongopra, Gaza mutu dapu tara cap, Gosyen mutu yuma cap, amutu yuma dipra, utara Gibeon mutu yumada, popra gawal daku.

42 Yosuadi, tenpu taru dipapu, amutu neitamai yumada, embendaudi popkada, nimi deiyo Raja-Raja neng cap, sundi taleami nesala cap yumada, embendaudi popu. Israel nesala yumadi, amutu neitamai kurami nesala popi. Ada, sun puto deiki dipapu gume. Sun nai bo Allah Yahwehdi melipudi, er puto sun Israel nesala deiki deipupa, popra gawal daki. 43 Ayuma konum kupi dingeda, Yosua cap, er jen talen neng yuma capda, sun Israel nesala yuma cap, adipapu tamupra, sun pe mutu, Gilgal mutupu tamupra yai. Ada, sun keteneiami keana dodin tenda ati deiamyaipu, tamupra yai.