Jos 11 | XteSC | STEP | Hazor mutu taleamu nimi deiyo ngebo Yabinda, Yosuadi nimi deiyo neng weik popunge tep nengeda, yuk nengdi, “Uo, sun Israel nengdi Amori mutu talepra kunge nimi deiyo nengda, pamubari di (5) konum popbisipmange,” penmai upu gekepu. Sundi lap pepipa, gekepudi, sundi upenmai upu, er Raja Yabin gekepu dingeda, Yabin erda, ‘Gume, sun Israel nesala porbenkamepe’ tenen, er melimna tep, mutu si Madon mutu neng morona tep, nimi ton wepra deipupa, Madon mutu ila nimi deiyo ngebo Raja Yobab damai mororbei. Awepra deiputopu, Simron mutu ila nimi deiyo ngebo cap, tonda Akhsaf mutu ila nimi deiyo ngebo cap tep, nimi ton wepra deipupa, mororbei.

Joshua 11

Yosuadi nimi deiyo ngebo Raja Yabin cap, er melipra pel don neng cap tep, popbisipidi Kanaan mutu dopropi upu

1 Hazor mutu taleamu nimi deiyo ngebo Yabinda, Yosuadi nimi deiyo neng weik popunge tep nengeda, yuk nengdi, “Uo, sun Israel nengdi Amori mutu talepra kunge nimi deiyo nengda, pamubari di (5) konum popbisipmange,” penmai upu gekepu. Sundi lap pepipa, gekepudi, sundi upenmai upu, er Raja Yabin gekepu dingeda, Yabin erda, ‘Gume, sun Israel nesala porbenkamepe’ tenen, er melimna tep, mutu si Madon mutu neng morona tep, nimi ton wepra deipupa, Madon mutu ila nimi deiyo ngebo Raja Yobab damai mororbei. Awepra deiputopu, Simron mutu ila nimi deiyo ngebo cap, tonda Akhsaf mutu ila nimi deiyo ngebo cap tep, nimi ton wepra deipupa, mororbei. 2 Angepu gum dinin, sunda iknapi dam kurami neng damai ton mororbei. Tonda, utara dapu tara mutu, ada Yordan me utara embaramu mutu, Galilea dipra utara mutu kurami nimi deiyo neng ton mororbei. Tonda, ortarada iknapi tara kurami neng dinin, iknapi mutu pirman tara kurami neng tep mororbei. Tonda, keteng dangban tara, mutu si Dor mutu damai dinin, ila laut mokon pirman tara, dapu mutu ban tara kurami neng tep ton, mororbei.

3 Utopu, er nimi deiyo ngebo Yabindi, Kanaan mutu ortara keteng dangban tara kurami neng cap, Yordan me ortara keteng yakan tara kurami neng cap, sun gekena tep, nimi ton wepra deipudi pepu. “Sun yuma yamumnyopda, melipsemumpa, nun yumadi, Israel nesala porbenkamepe,” pepra mororbei. Ada, sun Amori yala neng cap, Het yala neng cap, Feris yala neng cap, Yebus yala neng iknapi dam tara kurami neng cap tep pepu. Tonda, sun Hewi yala neng dinin, Hermon mutu di dutara kurami neng, ada Mizpa mutu neitamai kurami neng yuma, sun gekena tep, nimi ton wepra deipupa, lap perbei. 4 Erdi wepra deipu nengdi, lap perbeipa, gekepi dingeda, animi deiyo-deiyo neng, sun melimna jen talen neng pio weika di, ukupmanto ila laut mokon pirmanai kuramre gel wenenga utopu kupra yai. Yakanmai taruda, kuda bisamdi gipra, tu deiki embaramre keca, er si ‘kereta kuda’ perami keca ton ketenepra duyai. Tonda, nimi porban nengdi, kuda bisam bali deiki bukmengedi, porbarameng ngeda, weika di ton duyai. 5 Sun animi deiyo-deiyo neng yumada, ‘Israel nesala porbana tep, kikiman wisipra porbenkamepe,’ tenen, bei. Tonda yambul me er sida, Merom me damai yana, keana dodin tenda ati deipi.

6 Ukupidi, bulupra kikiman weki pangeda, Allah Yahwehdi Yosua tep pepu. “Sun tep, kan kwar dangna pio meme,” pepu. Ambutumida, akupmartopu kupkamare. Tek sisi, ne Allahdi, anesala yuma tep nengeda, ne si deiki di aneng yuma poptapne dingeda, sun Israel neng tep karepkamasene. Sundi aneng popra gawal dakamarume. Tonda, sun bukmengedi nimi porbanung kudada, ‘Yuk taru ton pio men embenmanto kupkameng’ tenen, akuda bisam yo gutamai iriamu tara sengtamkamrume. Tonda kereta-kereta nimi porbana tep, nimi bukmengedi banung nge yumada, dopra ukupu dongopmumpa, uku di jepropkamrume,” pepu. 7 Upepupa, adipapu Yosua cap, er jen talen neng cap yuma, sun podan neng tep, dato-dato di yambul me er si Merom me damai bei. Merom me damai bei dingeda, adipapu menmena Yosua cap, er jen talen neng capdi, sun ila nimi deiyo-deiyo neng cap, sun bulupra yakanmai neng cap tep, puto di popbisipi.

8 Ukupipa, sun nai Allah Yahwehdi, er nyapu sisa Israel nesala tep, ila puto melipupa, sun podan neng tep popbisipi. Israel nengdi popra, sundi dombanmaiyanen, pio Karen mutu Misrefet-Maim mutu cap, Sidon mutu dapu tara cap, bena tapi. Tonda, pio karen mutu Mizpa ban mutu dinin, keteng yakan tara bei. Tupa pio popdanen banapu kuramyanen, tenpu ngebo peda, ton men tapi. Ayuma popra gawal dakipa, yuma depnapu kupi. 9 Yosuadi sun anesala yuma tep, Allah Yahwehdi peiamutopu konum kupu. Ukupu dingeda, Yosuadi er podan neng, sun kuda bisam ^{▼▼kuda bisam – Akeca gambar dina tep, Keluaran 9:3 dinkurume.} yan amutara parang ya di melmel sekrapudi, akuda aceipu taprapudi, sun nimi porbana tep keretada, nimi buknedi porbaraminge yumada, uku dongopra gawal dakeipu.

10 Ange yuma konum kupu dingeda, Yosua tamupra yau. Yosua tamupra yau taruda, bisi banmauanen, Hazor mutu yana dopropudi, amutu ila nimi deiyo ngebo ton, parang ya di poptapu. Ataruda, Kanaan mutu neitamai yumada, aceipu kuramidi, ila deiyo neng weikanun ton akuramidi, ila nimi deiyo neng talepra bungne mutu yuma akwamu dinin, Hazorda, ila mambulnge kwamu. 11 Amutu ton popbisipudi, konum dopropu. Ukupra konum dopropu dingeda, Hazor mutu neitamai kurami nimi deiyo Raja neng cap, amutu kurami nimi cap, nesala yuma capda, popidi gawal daki. Tenpu ngebo peda, ton tapipa, gam pio men kupi. Ukupi dingeda, Hazor mutu neitamai ila ati arum doami ngeda, uku dongopupa, uku di jepropu. 12 Tonda, amutu neitamai talepra kurami mutu yumada, Yosuadi dopropu. Ukupu dingeda, amutu talepra ila nimi deiyo-deiyo neng yuma peda, tomopnapu kupu. Ukupra tomopudi, Allah Yahweh er pel dona ngebo, Musadi peiamutopu, anesala yumada, parang ya di popra gawal daku. Tenpu ngebo peda, ton tapipa, gam pio men kupi.

13 Dinino, amutu-amutu yumada, mutu dupai di, yambul akupungepu uku men dongomi. Ada, Israel nesaladi tenpunge peda, uku men dongomi. Dinin, Yosua er pedipapu Hazor mutuda uku donopu. 14 Uda, amutu-amutu yuma akuramya neitamai yumada, akurami nengda parang ya di popra gawal daki. Tenpu ngebo peda, ton tapipa, gam men kupi. Dinino, sundi, ‘Anesala tapmai bung kecada, ne mawa’ tenen, sun bung keca yala-yala yuma cap, Kanaan mutu kurami nengdi peirami gam keca cap yumada, Israel nengdi dopra, sun pengepu kepropi. 15 Allah Yahwehdi Musa tep, “Angeda ton ukupkamrume. Ange ton ukupkamrume,” pepra, deiamunge yumada, Allah Yahweh er pel don ngebo Musadi Yosua tep, lap pepra deipu. Upepupa, Yosuadi apeputopu kupu. Allah Yahwehdi, Musa tep peipunge yumada, tenpunge peda, ton tamna gum di, apeiamutopu ayumada kupnapu kupu.

Yosuadi arapra dopropu mutu tep, pepu upu

16 Yosuadi amutu neitamai yumada, iknapi dam tara yuma, dopropu. Utopu, amutu damai iriamu tara cap, tonda utara dapu tara Negeb mutu cap, adinin iknapi dam tara cap, utopu Gosyen mutu cap, tonda katawai dinin, walai mutu itara, Israel mutu iknapi dam tara cap, tonda Israel mutu dam dapu tara cap, Yordan me duman tara capda, Yosuadi ange yuma popbisipudi dopropu. 17 – 18 Amutu neitamai pala yumada, Gundul mutu damai ortara iknapi dam tara, adinin dutara selatan mutu, Edom mutu damai cap, adinin utara dapu tarada, pio Karen mutu Libanon ban mutu neitamai kwamu mutu, Bahal-Gad mutu cap, adinin dipra, ortara iknapi dam tara mutu, er si Hermon mutu capda, ila di pala weik kwamu mutu yumada, popbisipudi dopropu. Pumun taruda, dordi dipdongopra keteng tamun weika di, Yosuadi apepmap mutu neitamai talepra, kurami nimi deiyo-deiyo neng yumada, er cap podanapu kurami dinin, adipapu ukuramnganen siriyada, sun aneng yuma, Yosuadi animi deiyo-deiyo neng utopu neng, tonda tomopudi adipapu aneng yuma popra gawal dakeipu.

19 Amutu-mutu yuma kuramidi taleami pala mutu neitamai yumada, tenpu tara nesala peda, Israel nesala tep, ‘Anengda, nun kayapu neng sisa’ tenen, ‘Telep kupra kikiman kupkamepe,’ pedana peda, pio men pedarami dinino, Gibeon mutu neitamai kurami nesala, ada Hewi kurami nengda, sunpuda, ‘E, nun kayapu neng sisa’ tenedarami. Dinino, yuk-yuk mutu yumada, Israel nesaladi amutu neng podarami taru di, amutu kurami nesala yumada, popbisipidi, sun mutu tu yuma dopropidi talepra dakurami.

20 Tonda, akupu ngeda, tali tep gume. Deiyoda, Allah Yahwehdi, ‘Israel neng cap, Kanaan mutu neitamai kunung neng cap, popdanapu kupkamenge,’ tenepka tep, sun Kanaan tara kurami nesala tep nengeda, sun dipru puto kepra deipudi karepu. Ukupupa, sundi amutu-amutu neng yumadi, balila kupupa, ‘Israel nesala popra gawal dakamepe,’ tenepidi, piripeterami. Dinino, Allah Yahwehdi Musa tep peipu ngeda, ‘Sun cap, amutu neitamai kunge nesala capda, ‘Ne kayapu neng’ tenen, bicau tenena pio gum dipapu, anesala yuma popra gawal dakamrume,’ peiamutopu, aneng yuma popidi, gum kupra deipi. Ada, Yahwehdi, Musa tep, ‘Ukupkamrume,’ pepra deiputopu, kupka cadi, Allahdi meliamupa Israel nengdi, amutu kurami nesala yuma ponapu kuramyanen, gawal daki.

21 Ataru dipapu, Yosuadi nimi si Ainakin nesala, tonda Enak nesala perami ngeda, amutu neitamai kuramya cadi, amutu beudi, anesala popra gum kupra derirbeu. Ada, ila pala mutu er sida, Raksasa deiyo perami mutuda, iknapi dam tara yuma, Hebron mutu cap, Debir mutu cap, Anab mutu bukamnga neitamai yuma cap, tonda Yudea neitamai iknapi mutu kurami nesala yuma cap, Israel tara iknapi mutu kurami nesala yuma cap, Yosuadi amutu-amutu yuma bena porbeu. Sun amutu neitamai kurami nesala yumada, Yosua dipapu popra gawal daku. Tonda, sun talepra kurami ila ati arum yuma peda, gum kupra deipudi gawal daku. 22 Ukupu taruda, tenpu ngebo peda, Israel nesala kurami mutu neitamaida, Enak mutu nesala ton, poprapidi, gawal dakya tep, tenpu ton men tapi. Dinino, Gat tara neitamai, mutu si Gaza mutu cap, tonda, mutu si Asdod mutu cap, aceipuda gawal ton tapipa, Ainakin (Enak) nesala yambulanun tupa akurami.

23 Yosua cap, er jen talen neng cap, sun Israel nesala cap, amutu-amutu yuma bena popbisipidi, dopropi taruda, yuk-yuk nesala Kanaan tara neitamai dakuramidi, talepra kurami mutu neitamai yumada, dopropi. Ada, Allah Yahwehdi Musa tep, “Ukupkamrume,” pepra, deiamutopu, Yosua cap, er jen talena neng cap, sun dipapu amutu yuma dopropi. Ukupi dingeda, dopra sun Israel nesala yala-yala neng yuma tep karepupa, sun pe mutu sisa kepropi. Adeiyo mutu yumada, ‘Dopropmengedi, aceipu pio dakunkamenge. Sun pe mutu sisapu kunkamre’ tenen, yuk-yuk bokropi. Tonda, amutu-amutu yuk-yuk, Israel yala nesala kuramitopu, yala yuk-yuk dinin, yala tenpu-tenpu kepra bokropi. Israel mutu neitamai yuma, bouna di dim pepra, nimi porbana gum di, amutu neitamaipu dim pepra kurami.