Joshua 12

Musadi popbisipu nimi deiyo neng tep, pepu upu

1Asekeipkun ngeda, amutu deiyo neng talepra kuramipa, Israel nesaladi popbisipidi, talepra kunkami mutuda ake. Yordan me goupra ortara keteng yakan tara, ban mutu Arnon me damai di dipdongopra, adinin welepra Yordan me banai dipra, yuk karen mutu utara, ila mutu dupai er si Hermon ton, tonda, ortara beidi, keteng yakan tara ton amutu yumada, sun Israel nesalapu dopropi. Ada, nimi deiyo neng Raja butene di talepra kuramrei mutuda, popidi dopropi. 2Apopi nimi deiyo neng, sun Raja-Raja neng sun sida ake. Tenpu ngeda, Amori neng sun deiyo ngebo Sihon, erdi talepra kuramu mutuda, Hesybon mutu kuramu dinin, er ila nimi deiyo ngebo talepra kuna tep nengeda, Aroer mutu taleamudi upu peramu. Erda, Gilead tara dana tara ton bokra talepra kuramu. Adi dipra Aroer mutu taleamu, (ada Arnon me pirman tara yuma), amutu banai yumadi dipra, pera karen mutu neitamai Yabok me tara aban mutu ton taleamu. Tonda, sun Amon yala neng kurami tara wilimdonai damai yumada, erpu taleamu.

3Tonda Yordan me banai dipra, ortara keteng yakan tara di dipra, Galilea mokon pirman tara di kepra, itara Bet-Yesimot mutu ton dopropi. Bet-Yesimot mutuda, acei di dipra keteng yakan tara mutuda, ila laut mokon, er sida Laut Mati deiamgai yuma, adinin dipra, ila mutu er si Pisga mutu iriamu tara yumada doprami. 4Tonda, acei di dipdongopra, yuk nimi deiyo ngebo ton, er sida Raja Og, erdi Basan mutu yumada taleamu. Erdi deiyo kepra kuramu mutuda, Asytarot mutu cap, Edrei mutu cap taleamu. Anesala yambulanunpu kurami ngeda, Refaim yala nesala kurami. Refaim nesalada, yuk mutu neitamai ton men kurami.

5Amutu yuma taleamudi, upu peramu mutuda, Hermon mutu cap, Sikha mutu cap, Basan mutu yuma cap dipra, karen mutu tara Gesur mutu kurami nesala cap, Maakha mutu neitamai kurami nesala cap taleamu. Tonda, Gilead mutu dinin, dana tara tenpupu aton taleamu. Acei adinin, ila Karen mutu nimi deiyo ngebo Raja Sihon, erdi taleamudi upu peramu mutu deiyoida, Hesybon mutu di taleamu. 6Allah Yahweh er pel don ngebo Musa cap, erdi taleamu nesala, sun Israel yala nesala capdi, sun abutene nimi deiyo neng Raja Sihon cap, Raja Og cap popi. Popi dingeda, animi deiyo nengdi taleamrei mutu yumada, Allah Yahwehdi er pel don ngebo tep karepupa, Musadi amutu yuma bokra, ‘Amutuda pio talepmengedi, pio akunkameng’ tenen, sun Ruben yala neng cap, Gad yala neng cap tep karepu. Ange utopu, dan tara ton bokra, Manasye tara neng ton bokra karepu. Ukupupa amutuda, sun pe mutu sisa kepra kurami.

Yosuadi popbisipu neng tep, pepu upu

7Yosua cap, er jen talena neng cap, sun Israel neng cap yumadi, popra gawal daki nimi deiyo nengda, ake. Ada, Yordan me goupra ortara keteng dangban tara talepra kurami nimi deiyo nengda, Bahal-Gad mutudi dipra, Libanon mutu banai di dipra, itara katuai bum tamne mutu di kepra, Edom tara dinin, ila mutu Seir mutu yuma taleamu. Amutuda, Yosuadi bobokrapudi, Israel nesala yala-yala yuk-yuk akuramitopu karepupa, sun pe mutu kepra kurami. 8Amutu damai di bukamu mutu cap, Yordan me damai ortara keteng dangban tara cap, amutu-amutu tara bukamu mutu yuma cap, tonda amutu pikil tara yuma dinin, keteng yakan tara yumada dopropi. Tonda, itara katuai mutu tara yuma cap dopropi. Autopu, Negeb mutu ton cap dopropi. Amutuda, Het yala neng cap, Amon yala neng cap, Kanaan yala neng cap, Feris yala neng cap, Hewi yala neng cap, Yebus yala neng cappu talepra kurami.

9Amutu mutu yumada, moupra taleamipanen, popra gawal daki nimi deiyo Raja nengda, denge pio weik tiga puluh satu (31) ila nimi deiyo nengdi taleami. Animi deiyo Raja nengdi taleami mutu cap, sun si capda, ake. Ada, Yerikho mutu deiyo ngeboda, tenpu taleamu. Ai mutu damai di dipdongopra, Betel mutu ortara yuma peda, tenpu ngebopu taleamu. 10Yerusalem mutu taleamu ila nimi deiyo ngebo Rajada, er tenpudi taleamu. Tonda, Hebron mutu ila nimi deiyo ngebo Raja peda, tenpu ngebopu taleamupa, ton popbisipi. 11Yarmut mutu taleamu ila nimi deiyo ngebo Raja cap, tonda, Lakis mutu peda, tenpu ila nimi deiyo ngebo Raja dipapu taleamu. Sun aneng yuma peda popbisipi.

12Eglon mutu taleamu ila nimi deiyo ngebo Raja peda, tenpu ngebopu taleamu. Er cap, Geser mutu capda, tenpu ila nimi deiyo ngebo Rajapuda, taleamu. Aila nimi deiyo neng yuma peda, popbisipnapu kupi. 13Debir mutu ila nimi deiyo ngebo Raja peda, tenpu ngebo dipapu taleamu. Er angebopu, Geder mutu peda, ila nimi deiyo ngebo Rajada, tenpu ngebopu taleamu. Sundi amutu-amutu taleami neng peda, popbisipna kupi. 14Horma mutu taleamu ila nimi deiyo ngebo Rajada, tenpu ngebo erdi taleamu. Arad mutu peda, tenpu ngebo dipapu, ila nimi deiyo ngebo Raja kepra taleamu. Sun peda ton popnapu kupi. 15Libna mutu ila nimi deiyo ngebo Rajada, tenpu ngebo dipapu talepra kuramu. Adulam mutu peda utopu, tenpu ila nimi deiyo ngebo Raja dipapu taleamu. Aneng peda, popbisipi.

16Makeda mutu peda, tenpu ngebo erdi ila nimi deiyo ngebo Raja kepra, kuramu. Nimi deiyo ngebo kuramu mutu, utopu Betel mutu peda, ila nimi deiyo ngebo Rajada, tenpu ngebopu talepra kuramu. Aila nimi deiyo neng yuma peda, popbisipi. 17Tapua mutu deiyo ngeboda, tenpu ila nimi deiyo ngebo Raja kuramu. Heper mutu peda, ila nimi deiyo ngebo Rajada, tenpu ngebo er dipapu talepra kuramu. Sundi amutu-amutu taleami neng peda, popbisipi. 18Afek mutu neitamai Raja nengda, tenpu-tenpu ngebopu talepra kurami. Lazaron mutu peda, ila nimi deiyo ngebo Rajada, tenpu ngebo dipapu taleamu. Amutu-amutu taleami neng peda, popbisipnapu kupi. 19Madon mutu peda, ila nimi deiyo ngebo Raja, tenpu ngebo dipapu taleamu. Hasor mutu yumada, tenpu ila nimi deiyo ngebo Raja, er dipapu taleamu. Amutu-amutu taleami neng peda, popbisipnapu kupi.

20Simron-Meron mutu cap, tenpu ila nimi deiyo ngebo Rajadi taleamu. Akhsap mutu peda, ila nimi deiyo ngebo Rajada, tenpu ngebo dipapu taleamu. Amutu-amutu taleami neng peda, popbisipnapu kupi. 21Taanakh mutu ton, ila nimi deiyo ngebo Rajada, tenpu ngebo er dipapu taleamu. Tonda, Megido mutu peda, ila nimi deiyo ngebo Rajada, tenpu ngebo er dipapu taleamu. Amutu-amutu taleami neng peda, popbisipnapu kupi. 22Kades mutu ton, ila nimi deiyo ngebo Raja peda tenpu ngebodi taleamu. Tonda, Yokneam mutuda, Karmel mutu damai ngeda, ila nimi deiyo ngebo Rajada, tenpu er dipapu taleamu. Sun peda ton, popbisipi.

23Dor mutu deikida, ila nimi deiyo ngebo Raja kepra taleamu ngeboda, er tenpu dipapu Napat-Dor mutu kuramudi taleamu. Tonda, Goyim mutu cap, ila nimi deiyo ngebo Raja kepra, Galilea mutu taleamu. Amutu-amutu taleami neng peda, popbisipnapu kupi. 24Tonda, siryada, Tizra mutu ila nimi deiyo ngebo Rajada, tenpu ngebo dipapu taleamu. Er angebo peda popbisipi. Ukupra nimi deiyo neng taleamya cadi, ayumada tiga puluh satu (31) Raja nengdi taleami. Sun yuma peda adipapu popnapu kupi.