Jos 13 | XteSC | STEP | Amenda taruda, nimi deiyo ngebo Yosuada, konum wisi deipu. Ukupu taruda, Allah Yahwehdi Yosua tep pepu. “Yosua kanda, Konum wisi deipmum dinino, ne nyapu sisi, Israel yala nesala kunkamengai tep, mutu tu ton cap dopropmanto mutuda, weikanun ton tupa akurure.

Joshua 13

Amenda taru di dopropkami mutu tep, pepu upu

1 Amenda taruda, nimi deiyo ngebo Yosuada, konum wisi deipu. Ukupu taruda, Allah Yahwehdi Yosua tep pepu. “Yosua kanda, Konum wisi deipmum dinino, ne nyapu sisi, Israel yala nesala kunkamengai tep, mutu tu ton cap dopropmanto mutuda, weikanun ton tupa akurure. 2 Dopropmanto mutuda, weikanun ton tupa akapmare ngeda, ake. Ada, Filistin yala nesala kurami mutu weikanun ton tupa akurure. Tonda, Gesu yala nesala kurami mutu neitamai yuma cap tupa akurure. 3 Uda, Mesir mutu neng kunungai di dipra, ortara dinin, keteng yakan tara embaramre me, er si Sikor me, atara di dipra, adinin deiki tara (arah utara) baramyanen, atara bongdoramyaida, Ekron mutu ikurure. Atara neitamai yumada, Kanaan yala nesaladi taleramidi kurami. Amutu neitamai kurami nimi deiyo-deiyo neng, sun Filistin deiyo nengda, pamubari kurami. Ada, Gaza mutu taleramu ngebo cap, Asdod mutu taleramu ngebo cap, Askelon mutu taleramu ngebo cap, Gat mutu taleramu ngebo cap, Ekron mutu taleramu ngebo cap, sun ukupra deiyo neng amutu talepra Kurami.

4 Ange utopu dinin, dutara (arah selatan) kure mutuda, ange peda tupa dopropmanto kurure. Ange peda, sun Kanaan yala nesaladi taleramidi kurami. Ton tarada, Meara mutu ton akurur dinin, ange mutu tuda, sun Sidon yala nesaladi talepra kurami. Adinin dipdongopra, benamnganen, Afek mutu ton akurure. Adi dipra ortara neitamaida, sun Amori yala nesaladi talepra kurami mutu, amutu wilimdoramyai akurure. 5 Adinin dukdongopra, Gebal yala nesaladi talepra kurami mutu ton akurure. Amutu di dipra, itara mutu neitamai dinin, keteng yakan tara mutu akurure. Ada, Libanon mutu dinin, ila mutu bukamngai, Hermon mutu damai dininu utara mutuda, Bahal-Gad mutu di dipra, adinin dipdongopra benamnganen, ortara Hamat mutu wengna tep, amutu bisi baramyaipu akurure. Amutu yuma peda dopropkamenge.

6 Ada Libanon mutu di dipdongopra benamnganen, Misrefot-Maim mutu neitamai yuma cap bukuaida, ortara-atara kunung nengda, sun Sidon yala nesala yuma peda, nedi enepkotepkamne ja. Ada, ne Allahdi sun Sidon yala nesala yuma tep, amutu neitamai di enepkotepkamne. Ukupnyopda, ne nyapu Sisa, sun Israel yala nengdi, amutu-amutu yuma dopropkamenge. Ukupkamna tep nengeda, ukutaruda, kan dipapu, amutu neitamai akupu tu yumada, kandi bokra, ne nyapu sisa, sun Israel nesala tep bokra deipmempa, sun pe tu sisa Kepropkamenge. Ada, men taru di, kan tep konum lap pepra deiamkesitopu kunkamrume. 7 Atep nengeda, ukutaruda adipapu atuda menmena bokmemedi, sun Israel yala nesala kankan dinin, sembilan yala neng tep nengeda, sun kunkamengaipu bokra deipkurume. Utopu, ton tarada, bokmem dingeda, sun Manasye yala neng dinin, wilipropidi dana tara neng tep nengeda, sun kunkamengai ton bokra deipkurume. Ukupmem pangeda, amutu tuda sun pe mutu sisa kepropkamenge. Ange yumada, ne Allahdi ne nyapu sisa tep, sun pio talepra dakunkamengai tep, amutu yuma bokra karenkamrume. Allahdi Yosua tep aupu yuma pepu.

Keteng yakan tara Yordan me goupra ortara tu bongna tep, pepu upu

8 Uda, sun Ruben yala neng cap, Gat yala neng cap, tonda Manasye yala nengdi Yordan me goupra, keteng yakan tara kurami neng cap, sun yumada, sun kurami mutu yumada, men taru di, Musadi tu konum bokra deiamupa dopromi. Ada Allah Yahweh, er pel melipra dona ngebo Musadi, Yordan me goupra, ortara keteng yakan tarapu kunkami neng tep, konum bokra kareamu. 9 Sun anesala dopropidi kurami mutuda, Aroer mutu di dipdongopra benamnganen, orsirik tarada, Dibon mutu damai kupu. Uda, Aroer mutuda, ada Arnon me duman dinin pirman tara kwamu. Tonda ame duman mutu neitamai kwamu ati arum cap dopropi. Ton ngeda, mutu dupaida, Medeba mutu di dipdongopra, benamnganen, Dibon mutu damai beu mutu ton yumada, bokra Karepu. 10 Tonda utopu, Amon mutu di dipdongopra, benamnganen, nimi deiyo ngebo Sihon, erda Amori yala nesala taleamudi Raja kuramu ngebo, erdi menop taru doramu ati arum yuma pe, Amori yala nesala kurami mutu neitamai yuma peda, Yosuadi bokrapudi, Yordan me goupra keteng yakan tara kunkami nesala tep karepu. Sihonda, sun Amori yala nesala taleamu taruda, Hesybon mutu kuramu. Erdi taleamu mutu-mutu yumada, Yosuadi bokra karepu.

11 Ange utopu, Gilead mutu cap, Gezur yala nesala kurami mutu neitamai cap, Maakha yala nesala kurami mutu cap, ila bukamu mutu, Hermon mutu cap, amutu dup dana-dana tara kwamu tu cap, tonda Basan mutu neitamai yuma cap, adinin, dipra dipdongopra orsirikda, Salka mutu cap bena kwamu. Amutu yumada, Yosuadi bokra karepu. 12 Tonda, ila nimi deiyo ngebo Raja Og, erdi taleamu mutu yuma peda, Yosuadi bokra karepu. Ogda, amutu taleamu taru neitamaida, Asytarot mutu cap, Edrei mutu cap, kuramudi, amutu taleramudi upu peramu. Uda menop taru kuramu ngebo er si Edrei, erda Refaim yala ngebo kuramu dinin, Musadi, er tara nesala yuma popbisipudi, enepdopkotepu pangeda, sun yuma yukai bena kurami dinin, er tenpupu tupa aca kuramudi, sun yala sirik ngebo kuramu.

13 Uda, Musadi, sun Refaim yala nesala yuma popbisipudi, enepdopkotepu dinino, sun Israel yala nesaladi, yuk yala neng ton men popbisipi. Ada, Gesur yala nesala cap, Maakha yala nesala cap, sun Israel nesaladi, men enepra dokotepi. Atep nengeda, amutu neitamaida, sun cap, Israel nesala cap, wisipra kurami. Tonda, abuku sekmepu taruda, sun ayala butene nesalada, Israel nesala talenung mutu neitamaipu tupa wisipra kununge.

14 Sun Lewi yala nesala tep nengeda, Musadi mutu tu ton bokra men Karepupa, sunda men dopropi. Deiyoda, Allah Yahwehdi Musa tep upepra deiamu. Ada, sun Lewi yala nengdi dopropkamenge ngeda, Israel nesala yumadi, yapi kecapu popra yangedi, Allah Yahweh er karena tep, kareryakankami kecapu dopropkamenge. Akarena kecada, Allah er gispal dona tep, ila pala gel di taplakra deiamidi domi keca, er si mesba deiki uku sekra dongoryakaramkui taruda, sun Lewi yala nengdi yambulanun ton sekra dororami. Tupa akapu ngeda, mesba deiki uku dongoramipa, ukudi jeramupa gum kupu. Lewi yala nesaladi, mutu tu ton adipapu men karenkamrume,’ pepra deiamu deiyo ngeboda, Allah Yahweh kurure. Erdi, Musa tep, “Lewi yala nesala tep, ukupra bokra karenkamrume,” pepra deiamu. Sun Israel neng tep melimamu Allah, erdi Musa tep, aupu peiamu.

Ruben yala neng tep, Yosuadi mutu tu bokra karepu upu

15 Allahdi peiamutopu, Musadi Israel nesala kankan dinin, Rubendi deiamupa, dadeipdanen, yakarami nesala yuma dinin, sun nyapsilip yuk-yuk akuramitopu mutu tu ton bokra karepu. Ukupupa atuda sun pe mutu sisa kepropi. 16 Sun Ruben yala nesaladi dopropi mutuda ake. Ada, Aroer mutuda, Arnon me duman dinin, pirman tara kwamu ngeda bokra karepu. Tonda, ame duman mutu neitamai doami ati arum cap dopropi. Ton ngeda, mutu dupaida, Medeba mutu di dipdongopra, benamnganen, Medeba mutu deiki kwamu mutu yumada, bokrapudi, tapakra Karepupa dopropi.

17 Ange utopu, Hesybon mutu cap, tonda amutu damai mutu bukamnga ban tara yumada, Dibon mutu cap, Bamot mutu cap, Bahal mutu cap, Bet-Bahal-Meon mutu cap, 18 Yaal mutu cap, Kedemot mutu cap, Mefaat mutu cap, 19 Kiryatim mutu cap, Sibma mutu cap, Zeret mutu cap, Hazahar mutu cap, ukuprap mutu yumada bokra karepupa, talepra dakurami.

20 Tonda, Beed-Peor mutu cap, Pisga mutu dinin amutu bukamnga pirman tara cap, Bet-Yesimot mutu cap, yumada Musadi dopra Israel nesala kankan neitamai sun yala-yala yuk-yuk akuramitopu bokra karepu. 21 Adinin dukdongopra, amutu neitamai bukamu mutu, buma dipdongopra deiki tara yumada, sun Ruben yala nengpu kepropi. Ada, pumun taru ila nimi deiyo ngebo, Raja Sihonda, erdi sun Amori yala nesala taleamu taruda, Hesybon mutu kuramudi, upu peramu. Ukuramu dinin, Musadi, er cap er amutara pel dorami nimi deiyo neng cap tep, mar porbaramudi, popbisipudi, gawal daku. Raja Sihon er amutara ila deiyo nengda, ake. Ada, Midian mutu cap, Ewi mutu cap, Rekem mutu cap, Zur mutu cap, Hur mutu cap, tonda Reba mutu cap, amutu ila nimi deiyo neng, sun yumada, Musadi popbisiamudi, sun taleami mutu yuma dalupra dopropu. Amutu-mutu yumada, Musadi bokra Israel nesala tep karepu.

22 Tonda, amutu neitamaipu dinin, Israel yala nesaladi pomi ngeboda, Beor erdi deiamu ngebo, er si Bileam ton poptapu. Bileamda, isok si eremamudi, aisok-isok puto deiki di, amenda kupkamu keca tep, upu lap peramu. Angebo Bileam pe, amutu neitamai kurami Kanaan tara nesala weikanun ton peda, sun Israel nesaladi yu weik parang ya di pomi. 23 Yordan me orneitamai kwamu, adinin keteng dangban tarada, sun Ruben yala neng Wilimdonai kwamu. Amutu neitamai yumada, Musadi bokra karepupa, sun Ruben yala nesala cap, sun nyapsilip cap, sundi deiamipa dadeipdanen yakarami neng capdi, amutu neitamai tu yumada, sun pe tu sisapu kepropi.

‘Gat yala nengda, amutu kunkameng’ tenen, pepu upu

24 Allah Yahwehdi er nyapu sisa Israel nesala yuma tep, “Amutu-amutu bokra karepkamsene,” pepra pedina upu deiki di peiamutopu, tu dana-dana tara peda, Musadi ton bokra, sun nyapsilip kikiman kuramitopu, Gat yala neng tep, tu ton bokra karepu. Sun bokra karepupa, Gat yala nengda, sun pe mutu sisapu kepropi. 25 Amutu neitamai yumada, sun Gat yala nengda, Yaezer mutu dopropidi, sun pe mutu kepropi. Tonda, Gilead mutu neitamai ati arum doraminge yuma cap, Amon yala nesala pumun taru taleami mutu-mutu dinin, neitamai di bokrapidi, dana tarada bokra karepupa, Gat yala nengdi dopropi. Tonda, amutu neitamai di dipdongopra, adinin ortara karen mutu, Aroer mutu damai kwamu. Sun mutu wilimdonaida, keteng yakan tara Raba mutu damainge ton karepupa, dopropi. 26 Ange utopu, Hesybon mutu di dipdongopra, adinin ortara Ramat-Mizpa mutu cap, Betonim mutu cap, utopu Manahanaim mutu tara di dipdongopra adinin, Lodebar mutu wilimdonai cap, amutu neitamai yumada, Musadi bokra karepupa, sun Gat yala nengdi dopropidi, sun pe mutupu kepropi.

27 Tonda, ila nimi deiyo ngebo Raja Sihon, erdi amutu-amutu taleamu taruda, Hesybon mutu neitamai kuramu. Amutuda, Musadi dopropudi, yambulanunpu bokra karepu. Ame duman neitamaida, ati arum si Bet-Haram mutu cap, utopu Bet-Nimra ati arum cap, Sukot ati arum cap, tonda Zafon ati arum peda bokra karepupa, Gat yala nengdi dopropi. Tonda, Gat yala nesaladi dopropi mutu dinin, keteng dangban tarada, Yordan me ton orkwamu dinin, amutu wilimdonai, itara (arah utara) mutuda, Galilea ila mokon ton kuramu. Aca dinin dipdongopra, ortara keteng yakan tarada amutu wilimdonai ton kwamu. 28 Amutu neitamai yumada, Musadi bokra karepupa, sun Gat yala nesala cap, sun nyapsilip cap, sundi deiamipa dadeipdanen yakarami neng capdi, amutu neitamai tu cap, ila ati arum kwamunge yuma cap, akati arum dana-dana tara yambul ati arum yuma cap yumada, Gat yala nengpu, sun pe tu sisapu kepropi.

‘Manasye yala neng amutu kunkameng’ tenen, Yordan me goupra, ortara keteng yakan tara karepudi, pepu upu

29 Allah Yahwehdi er nyapu sisa Israel nesala yuma tep, “Ukupra karepkamsene,” pepra peiamutopu, Musadi bokrapudi, aneng tep karepu. Ada, Manasye yala neng yuma gum dinin, aManasye yala nesala dana tarapu, Yordan me goupra keteng dangban taru kunkami neng tep karepu. Sun dana tara neng cap, sun nyapu cap, sun nyapsilip cap, sundi deiamipa dadeipdanen yakarami nesala kuramitopu, Musadi amutu tu ton bokra, sun tep karepupa, sun pe mutu kepropi. 30 Manasye yala neng dana tara ngeda, sun kikiman kupra sungdonkameng mutu wilimdonaida, Mahanaim mutu di dipdongopra adinin, Basan mutu yuma ton bokra karepupa, dopropi. Bashan mutuda, ada ila nimi deiyo ngebo Raja Og erdi taleamu mutu kwamu. Tonda, ange utopu, Bashan mutu neitamai dinin, Yair mutu kurami nesaladi dorami ati arum yuma cap, karepupa, Manasye yala nengdi dopropi. Akati arum nungna, er dengeda enam puluh (60) mutu bokra karepupa, sun pe mutu kepropi. Amutu-amutu peda, menop taru, Raja Og erdi taleamu.

31 Ayuma dukdongopra kikiman utopu Gilead mutuda, dana tara ton wilipra bokeipudi karepu. Utopu, ila ati arum er si Asytarot cap, tonda ila ati arum er si Edrei cap, abutene mutu neitamaida, ila nimi deiyo ngebo Raja Og, erdi Basan mutu yuma peda taleamudi amutu-amutu yuma tep, upu peramu. Amutu neitamai kurami mutu yumada bokra, Manasyedi deiamu mi, er si Makhirdi deipupa, dadeipdanen yakarami neng, sundi derirami yala neng dinin, dana tara yala tep, amutu yuma bokra karepupa, dopropidi sun pe mutu sisapu kepropi.

32 Ange lap pepra sekmepunge yumada, Musadi, Moab ban tara kuramu taruda, amutu-amutu yumada Musadi bokeipu. Ada, ila ati arum doaminge, Yerikho mutu atara kwamu dinin, ortara keteng yakan tara, ortara yuma bokra deipu. Amutuda, Yordan me goupra ortara kwamu mutuda, Musadi bokra deipupa, sun Israel nesaladi doprapidi, aceipu ati dopra kurami.

33 Dinino, sun Lewi yala nesala tep nengeda, Musadi tu tenpu mutu sisa peda, pio ton men bokra karepu. Sun Lewi yala nengda, sun dopra kunkamengai tep nengeda, tu ton men dopropi. Deiyoda, Israel nesala yuma kalekra melimrur Allah, er si Yahwehdi, sun Lewi yala neng tep, “Ukupkamsenada, tu ton men dopropkamrum dinin, ne dipapu sun putan keca tep, pio karenkamsene. Sundi dopropkamrum ngeda, ne pua,” pepra pediramutopu, Musadi sun Lewi yala neng tep, tu ton bokra karepupa, men dopropi.