Jos 14 | XteSC | STEP | Asekup lap pena upu neitamaida, Kanaan mutu neitamai dinin, sun Israel nesaladi bena dopropidi, sun pe mutu sisi kepra kuraminge tep sekupe. Amutu-amutu bokra karepi deiyo nengda, imam Elieser cap, nimi si Nun, erdi deiamu mi Yosua cap, tonda Israel nesala yala-yala yuk-yuk talepra kurami deiyo-deiyo neng cap, sun yumadi amutu tu yuma bokra karepipa, sun Israel yala nesala weika di dopropidi, sun pe mutu sisa kupra kurami. Amutu karepinge yumada, Kanaan mutu neitamai dinin, Yordan me ortara kwamupa, keteng dangban tara mutu tep karepi.

Joshua 14

Kanaan mutu neitamai dinin, Yordan me goupra, keteng yakan tara, orkwamupa, atara keteng dangban tara kwamu mutu bokra karepunge tep, seku upu

1 Asekup lap pena upu neitamaida, Kanaan mutu neitamai dinin, sun Israel nesaladi bena dopropidi, sun pe mutu sisi kepra kuraminge tep sekupe. Amutu-amutu bokra karepi deiyo nengda, imam Elieser cap, nimi si Nun, erdi deiamu mi Yosua cap, tonda Israel nesala yala-yala yuk-yuk talepra kurami deiyo-deiyo neng cap, sun yumadi amutu tu yuma bokra karepipa, sun Israel yala nesala weika di dopropidi, sun pe mutu sisa kupra kurami. Amutu karepinge yumada, Kanaan mutu neitamai dinin, Yordan me ortara kwamupa, keteng dangban tara mutu tep karepi. 2 Amutu tu dopropi ngeda, Allah Yahwehdi, Musa tep, “Ukupra kupkamrume,” pepra deiputopu, bokra karepi. Ada, ‘Dan tara nengdi dopropkameng do?’ tenen, esu pen keca er si undi, ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} akeca pel dopka deiki di, “Atamna tuda, ayala nengdi dopropkamenge, ortara tuda, ayala nengdi dopropkamenge,” peiamutopu, bokra karepupa, dopropi. Yordan me goupra, ortara keteng dangban tara mutuda, nimi yala sembilan (9) yala neng cap, tenpu yala ton, Manasye yala neng dinin, dana tara neitamainge cap tep, amutu tu bokra karepipa, dopropi.

3 Uda, Israel nesala neitamai dinin, butene yala neng cap, tenpu yala ton dana tarange cap tep, Yordan me goupra, ortara keteng yakan tara mutu tu yumada, Musadi peipupa, atu neitamai bokra karepi. Dinino, sun Lewi yala neng puda, mutu tu ton bokra men karepu. 4 Uda Yusufdi deipupa, dadeipdanen yakarami yala nengda, sun yala sida, Manasye cap, Efraim cap, sun pu amutu neitamai ngeda karepupa, dopropidi acapu taleami. Dinino, sun Lewi yala neng tep nengeda, mutu tu ton pio men karepupa, men dopropi.

Sun Lewi yala neng tep nengeda, pala mutu tu ton men bokra karepu dinin, sun kunkamengai tep, amutu neitamai kwamu ati arum cap, tonda Lewi yala nengdi periami gam keca domba cap, kambing cap, sapi capda, sun jena tep, betei paramu tu palange ton bokra karepupa dopropi. 5 Angeda, Allah Yahweh erdi, “Ukupkamrume,” pepra konum peiputopu, Musadi peipupa, sun Israel deiyo nengdi, sun Israel nesala yala-yala yuma tep, Kanaan tara mutu-mutu neitamai tu yumada, wiliprapidi bokra, yuk-yuk karepipa, Israel nesala yala-yala yuma dopropidi, sun pe mutu kepra kurami.

Hebron mutuda, Kaleb dopropua tep, pepu upu

6 Tenpu tumida, Yehuda yala neng yuma yaidi, ‘Yosua cap antapkamep’ tenen, tenpu mutu er si Gilgal mutupu bupra yai. Sun Yehuda yala nengpu dinin, tenpu ngeboda, er si Yefune, erdi deiamu mi Kalebda, Kenas mutu ngebodi pepu. “Yosuao, kan kaele. Allah Yahwehdi, er pel doramu ngebo Musa tep Kades-Barnea mutu neitamai di pepra deipu upuda, kan konum kael keamume. Ada, Allahdi ne cap, kan cap tep, pepra deiamseu upu tep, kan kaele pepkene,” pepu.

7 Upepu dingeda, aupu ton pepu. “Ne nena keteng tamunda, denge empat puluh tahun (40) konum kupneu pangeda, Allah Yahweh er pel don ngebo Musa wepra deipu ngebodi, ‘Kades-Barnea mutu di bememdi, ortara Kanaan tara mutu dirbenkamrume. Ada, nun Israel nengdi Kanaan mutu warekra porbenkamepa tep, kanda menmena amutu nesala kuramenge keca kael kemna tep dirbenkurume,’ pepra, wepra deipneu. Wepra deipneupa, Kanaan tara mutu dirbenamsidi, amutu nesala kuraminge tep, Musa er damai besidi, tek sisi upupu doupra, lap perbesi. 8 Ukupsi dinin, Kanaan mutu dirbana tep, ne cap kikiman bepu neng yumada, ‘Gum, Kanaan mutu nesalada, men popbisiptepye,’ pepra, yuk upu ton lap pepipa, ataruda sun Israel neng gekepidi, kwar weik kupupa, ‘Uo, Kanaan tara nesala men porbenkamepe,’ tenepidi, sun dipru buluksaku. Ne cap dirbenmapu nengdi, amali upu lap pepi dinino, nepuda, dipru kange butene men kupneupa, pio ne nai Allah tepapu, tek sisi telep upupu pepsi. Allah Yahwehdi, ‘Ukunkamrume,’ pepra deipseutopu, nedi angepu kupsi. Neda, tek sisi upupu lap pepsi.

9 Ange kupsa tep nengeda, Musadi atumi dipapu pedina upu ton pepra deipneu. Erdi peipneu ngeda, ake. Ada, ‘Kanda tek sisi upupu lap peryanmaserema tep nengeda, Kanaan tara mutu dina tep embaramumdi, atu yanipra diramum mutu tu neitamai yumada, bokra karepkamkene. Karepkene pangeda, kan cap, kandi deipmempa, dadeipdanen kunkamenge nesaladi, amutu tu dopropmengedi, sun pe mutu sisa kepra kunkamenge. Sun tupu pio tep kepropkamrume,’ pepra, deipnedi pedina upu peipneu.” Kalebdi Yosua tep pepu.

10 Upepudi, aupu ton dukdongopra pepu. “Atep nengeda ukutaruda, kandi ne ton epnereme. Allah Yahwehdi, Musa tep peipupa, Musadi aupu peipneu taru di dipra, yakaramupkanen, ukutarada, keteng tamun denge weik empat puluh lima (45) keteng tahun ton konum kuramepu. Allah Yahwehdi er pedipapu ne tep karekra meliamneua deiki di, ne tupa ukutaru peda gam kunune. Aketeng tamun neitamai yumada, nun Israel nesala yuma, me gum tep nimi men kuramyai, ila katuai tara embaramepupanen, ukutaruda akunmape. Atep, ukutaru kandi dipetepneo. Ukutaruda, ne gam kunun keteng tamun dengeda, delapan puluh lima (85) keteng tahun kunune. Wisi konum deipsi.

11 Dinino, ne pel donada, Kanaan tara dirbana tep, Musadi wepra deipneu taru, puto weik kuramsitopu, ukutaru peda, pio puto di tupa pel dopbanune. Ne Kalebda, puto tupa kupneupa, nun podan neng tep mar podana do, tali pel dona do, dana-dana tara mutu embana taru yuma pe do, neda puto tupa kunerure. Ware pel do, pel yala-yala yuma tupa doptenye. 12 Ange tep nengeda, Allah Yahwehdi, ‘Kaleb tep, amutu dopra karepkamrume,’ pepra, pedina upu deiki di pepra deiamneu mutuda, iknapi dam tarada, ne cap, ne melimna neng nun yuma cap, kikiman kupmepudi lap pena upu doupra tamupra lap peryanamepu neng tep, amutu bokra karepkuserume. Ataruda, nundi peipmepupa, kan Yosuadi gekenmamum ngeda, tupa teniprume.

Ada, nundi peipmepuada, ‘Pio telep mutu orkurur dinin, amutu neitamai kunge nesalada, nong lyom weik kununge. Sun yala sida, Enak nesala kununge. Tonda, sun anesala yumada, pala gat gel deiki di taplakra deipra, wiami gel beilyada, sun ati arum ongopgenepra deiamya cadi, sun ati arumda, men popbisipmanto kununge. Tek sisi, puto weik nesala kununge. Ne walwal dinino, ne kangeda, Allah Yahwehdi ne tep melipneryopda, ukupnerepa nedi sun anesala yuma tep nengeda, popbisipnedi enepkotepkamne. Ada, Allah Yahweh erdi peiamu utopua, kupkamepe tenepne.” Kalebdi Yosua tep pepu.

13 Atep nengeda, Yosuadi, Yefune er mi Kaleb tep, ‘Allahdi Kaleb melimkamre’ tenen, Allah tep moropu. Ukupu dingeda, Hebron tara mutu neitamai yumada dopra, Kaleb teppu karepupa, Kaleb dopropudi, er pe mutu sisapu kepropu. 14 Amutu tu neitamai yumada, ataruda Kenas mutu ngebo, er si Yefune, erdi deiamu mi Kaleb, erdi deipupa, dadeipdanen barami nesala yuma dopropidi, sun mutu sisapu kepropi. Yosuadi, Kaleb tep amutu tu yuma karepka deiyoda, Kaleb erda dumsisi kuramunge tep karepu. Tonda, Israel nesala tep pio kalekra meliamu Allah Yahwehdi, ‘Ukupkamrume,’ pepra deipu upu, Kaleb gekepudi, angepu talepra kuramnga tep, Yosuadi Hebron mutu bokra Kaleb cap, er nyapsilip cap tep, karepupa, sundi talepra, sun pe mutu sisi kepropi.

15 Uda, pumun taru nimidi Hebron mutu tep, mutu si Kiriat-Arba mutu perami. Arba peramya deiyoda, menop taru amutu neitamai pio puto weik kuramu ngebo, er si ton Arba perami. Yosuadi, amutu bokra, Kaleb tep karepu pangeda, amutu neitamai kunada, mar podana cap, kange mun kange douna cap gum dipapu, pio telep deiki dipapu kurami.