Jos 15 | XteSC | STEP | Yehuda yala nengdi deipipa, dadeipdanen barami neng yuma, sun kunkami mutu tep, wilipra dopropi ngeda ake. Ada, iknapi tara di dipdongopra benamnganen, Edom mutu tu wilimdonai adinin, sirik tara bei ada, Zin mutu katuai tara beu.

Joshua 15

Yehuda yala neng tep, “Ukuprap mutu kunkamrume,” pepra, bokra karepi upu

1 Yehuda yala nengdi deipipa, dadeipdanen barami neng yuma, sun kunkami mutu tep, wilipra dopropi ngeda ake. Ada, iknapi tara di dipdongopra benamnganen, Edom mutu tu wilimdonai adinin, sirik tara bei ada, Zin mutu katuai tara beu. 2 Iknapi tara sirikaida, ila laut mokon dinin, er si Mekina Gam Kuna Gum Mokon damai di dipdongopra, iknapi tara bei. Alautda, er si ton, Laut Mati ^{▼▼Laut Mati – Aupu penunga deiyoda, ake. Ada, alaut mokon pumbonda, garam pio weik akuramnga cadi, mekina do, ware keca do, pio men kurure. Amokon pumbon gam men kupmantoai cadi, er sida, ‘Laut Mati’ penunge.} pepra tupa penunge. 3 Laut Mati deiki tara, iknapi tara bana tep nengeda, Akrahim mutu pikil tara di, geneprapidi Zin mutu katuai mutu bei. Ton utopu, Kades-Barnea tara dinin, iknapi tara bei. Tonda, Ezron mutu tara damai keprapidi, adininda Adas mutu welepi. Acei, welepi dinin, kange di gwalipra, Hakrahim tara yai. 4 Tonda, Hakrahim tara di dipdongopra, Azmon tara bei dingeda, Mesir mutu tu wilimdonaida, me alman tarapu kepra bei. Ukupra benamyanen, pio ila laut mokon, er sida, Laut Tengah ^{▼▼Laut Tengah – Aupu deiyoda, ake. Dana-dana tarada, mutu tu kwamu dinin, daneitamaida ila laut mokon ton deiamu. Ada, laut mokon neitamai di dipra, ortara, Israel nesala yala-yala yumada, ila pala tara, keteng dangban tara neitamai di, mutu tu yuk-yuk bokra dopropidi, kurami. Tonda tupa kununge. Atara di dipra, ortara, keteng yakan tarada, ila laut mokon deiamngaida, ada Laut Tengah kurure. Adinin dipra, deiki tarada (arah utarada), mutu si Asia tara cap, Makedonia tara cap, Italia tara cap akurure. Aila laut dinin, daneitamai di dipra, dutarada, (arah selatan) Mesir mutu cap, Afrika tara cap, utamna akurure.} pirman bei. Yehuda yala nesala, sun mutu tu bongna tep nengeda, Allahdi peiamutopu, Yehuda yala nesaladi dopropkami mutu, iknapi tara tu wilimdonaida, aceipu.

5 Angetopu, sun mutu tu wilimdonai ortarada, Keteng yakan tara tep nengeda, ila mokon mekina gam kuna gum mokon cadi, er sida, Laut Mati penunge. Alaut damai di dipdongopra yau. Tonda utara tep nengeda, Yordan me dari tara di bena wilipropu.

6 Utara mutu, tu wilimdonai tep nengeda, Yordan me dari tara di dipdopdongpra, adinin ukupra, mutu si Bet-Hogla mutu welepra, Yordan mutu banda, utara tu wilimdon tara bei. Aca bei dingeda, utara mutu bena, tu wilimdon tara bei ngeda, mutu si Bet-Araba dutara bukamu mutu adinin utara bei. Ukupi dingeda, welepra ila mutu bukamngai kwamu gel, er si Bohan Mutu Gel si damai bei. Bohanda, ada Rubendi deiamu mi, er si tep Bohan pepra si karepi. (Bohan Mutu Gel si damaida, Ruben er mi si tep perami). 7 Ukupi dingeda, pio kange mun mutu ban perami mutuda, Akhor ban mutu ben pepra, Debir mutu damai bei. Beidi, amutu dipdongopra utara mutuda, Gilgal tara dinin, Adunim mutu bukamngai welerami bisi damai beidi, amutu pikil genepra bei. Ukupra aca di, Adunim ban tara keprapidi, iknapi tara welepi. Ukupi dingeda, adinin mutu si En-Semes me puai bena deipi. Ukupidi, adinin benamyanen, En-Rogel peramyai bena dipdongopi.

8 Utopu, Hinom mutu ban tara di keprap welepidi, iknapi tara mutu buma deiki bei. Amutu tu wilimna tep peten kemnada, acei di dipra benamyanen, mutu buma deiki bei. Nimi si Hinom, erdi deiamu mida, er gispal dona tep, amutu buma deiki bei dingeda, dutara ban tara tep, Hinom me, ban tarada, er si sipepra karepi. Ada, Yerusalem mutu dam tara, Yebus yala neng sun kurami mutu dinin, iknapi tara tepa. Aca di baramyanen, ila mutu bukamnga damai di, ortarada Hinom ban tara kurure. Ada keteng dangban tara kurura tepa. Tonda ila mutu banaida, Refaim mutu utarada mutu sirikai bena dipdongopi.

9 Tonda, aila mutu deiki di, baramyanen, Me-Neftoah me puai bena mutu tu wilimdonai ton deipi. Acei di dipdongopra baramyanen, Ebron mutu damai ati arum dopra kurami nesala damai bena deipi. Amutu tu wilimna tep nengeda, aca di dipdongopra, Bala mutu tara ongoprapidi, Kireat-Yearim perami mutu tara bena deipi. 10 Tonda, Bahala mutu dinin dipdongopra, keteng dangban tara bena ongopgenepi dingeda, ila mutu si, Sier mutu damai, ton sida Edom mutu dam tara bei. Adi dipdongopra, Yearim mutu dinin, utara mutuda, Kesalon mutu damai bena mutu tu wilimdonai ton deipi. Tonda aca di dipdongopra, Bet-Semes mutu damai kwerepidi, adininda, Timna mutu perami mutu damai bei.

11 Aca mutu tu wilimdonai tep nengeda, Timna mutu di dipdongopra benamnganen, utara mutu dapu tara Ekron mutu damai bena deipi. Abena deipi dingeda, amutu ongoprapidi, Sikron tara bana tep nengeda, Bahala mutu dam kepra bei. Tonda, aca di dipdongopra, Yaknel tara beidi, sun mutu tu siryada, keteng dangban tarada, ila laut mokon deiamnga pirimanai bena deipi. Ada Laut Tengah tepa. 12 Amutu tu wilimdonai bena deipembaramya neitamaida, Yehuda yala nesala yumada, aca kunkamiya tep, deipi. Yehuda yala ngebodi deipupa, dadeipdanen yakarami nesalapu, amutu neitamai kurami. Ada, Yehuda yala nesala dinin, keteng dangban tara kurami neng tep mutu tu bokra deipi.

Kalepdi Ebron mutu cap, Debir mutu cap, dopropu upu

13 Allah Yahwehdi Yosua tep, “Kandi ukupkamrume, ukupkamrume,” pepra, deiamutopu, Yosuadi, Yehuda yala ngebo er nimi sida Yefune, erdi deiamu mi Kalep tep, mutu tu ton wilipra karepu. Atuda, nimi si Enak, er nai bo Arba taleamu mutu tu cadi, amutu si tep nengeda, Kiryat-Arba perami. Atu ton bokra karepupa, Kalebdi dopropu. Amutu tuda, Yehuda yala nesala, sun taleami tu dana tara ton wilipra, Kalep tep, Ebron mutu karepu. Arba er mida, er si Enak er nai bo kuramu. 14 Enakdi deipupa, dadeipdanen bei nesalada ake. Ada Sesai cap, Ahiman cap, Talmai cap deiamupa, Ebron mutu taleamidi, amutu neitamai kurami. Dinino, Kalebdi, amutu dopropudi, sun Sesai yala neng cap, Ahiman yala neng cap, Talmai yala neng cap, sundi talepra kuramya neitamai Kalepdi, anesala yuma eneproudi, sun taleami tu yuma doprou.

15 Ukupu dingeda, aca di beudi, Debir mutu kurami nesala tep, “Sunda amutu kuna gume,” pepra, ‘Amutu nesala popbisipkamep’ tenen, keteneipu. Amutu tep nengeda, men taruda Kiryat-Seper mutu perami. 16 Kalepdi upepu, “Ware ngebodi do, Kiryat-Seper mutu tep, ‘Nedi talepkune,’ pepra, amutu neitamai kunge nesala eneproredi, sun mutu dopropre ngeboda, ne ner mi Aksada, karepnepa, angebo dipu doptue,” Kalebdi pepu.

17 Upepka tep, Kalep er kabo sisa Kenas, erdi deiamu mi sida, Otnieldi amutu kurami nesala popbisipudi, amutuda deiyo kepra talepu. Ukupu pangeda, Kalep er ner mi Aksada, Otniel karepupa dopu. 18 Konum dopdarei dingeda, Aksadi, er kabo Otniel tep, pepu. “Kandi ne nai bo Kaleb tep moropmempa, mutu tu yambulanun ton bokra karepsetue.” Upepu pangeda, amenda taru Aksada, er keledai bisam bali deiki bukra banmauanen, er nai bo Kaleb damai bena, konum kwerepupa, Kalepdi pepu. “Kanda, ware keca putanmakerpa, yarem do?” pepra asipetepu. 19 Upepra asipupa, er ner mi Aksadi tamupra, er nai bo Kaleb tep pepu. “Gume naio, ne putanmaner kecada, ne kunedi me gwepra jenkamna tep, me bungnaida, ware kupra karepnetum do?” pepra asipu. Ada, ne nai kandi ne tu karepnemumaida, mutu si Negeb mutu dinin, amutuda gelal tupu karepnemuma tep, aupu pepra moropkene,” pepu. Upepu ngeda, Kalepdi tamupra, “Jo, me bungnada, itarange pe, me dari tarange peda, kan tep karepkene,” pepra karepu.

Yehuda yala nesala sun kunkami mutu tu bokra karepu upu

20 Ukutaruda, Yehuda yala nengdi deiamipa, dadeipdanen yakanung nesala, sun nyapsilip yuma tep, sun kunkami mutu tu bokra karepipa, talepra pio kunkami ngeda, ake. 21 – 22 – 23 – 24 – 25 – 26 – 27 – 28 – 29 – 30 – 31 – 32 Iknapi tara, sun Kanaan tara menop taru kurami nesaladi, doamidi kurami mutu sida, ake. Ada Yehuda yala nesaladi popra tapidi, anesala eneproidi, sun mutu dopropinge tep pepmepe. Ada iknapi tarada, Edom mutu tu wilimdona damaida, ati adum 29 mutu ati doraminge yuma dopropi. Aila ati arum doramya damaida, yambul ati adum ton dorami. Akati arum, akati arum dorami nge cap, tonda akati arum damai akwamupa, dorami ati arum mutu sida ake. Kabzeel, Eder, Yagur, Kina, Dimoda, Adada, Kedes, Asor, Yitnan, Zif, Telem, Bealot, Hazor-Hadata, Keriot-Hezron (ange ton Hazor penunge), Amam, Sema, Molada, Hazar-Gada, Hesmon, Bet-Pelet, Azar-Sual, Beryeba, Bahal, Iyim, Esem, Eltolad, Kesil, Horma, Ziklak, Madmana, Sansana, Lebaot, Sihilim, Ain, tonda Rimon mutu yuma bokra karepi.

33 – 34 – 35 – 36 Ange utopu dinin, dapu mutu neitamaida, ila-ila ati arum cap, aneitamai yambul ati arum cap dopra, kurami nesala kurami tuda, sun men taru Kanaan tara kurami nesaladi, 14 ati arum doramidi, kurami. Yehuda yala nesaladi, amutu-amutu yuma peda, dopropi. Amutu tu sida ake. Ada, Esytaol, Zora, Asma, Zamoah, Enlam, Sokho, Aseka, Saaraim, Aditaim, Gedera, Gederotaim mutu ton, amutu yuma dopropidi, sun pe tu kepropi.

37 – 38 – 39 – 40 – 41 Tonda, ange utopu, ila-ila ati arum cap, yambul ati arum cap doramipa, dopropi ngeda, 16 mutu ton dopropi. Ada amutu neitamaida, men taru Kanaan tara kurami nesaladi yambul ati arum dominge peda, adoraminge yuma popra tapidi, amutu yuma dopropi. Ada ake. Zenan mutu cap, Hadasa mutu cap, Migdal-Gad mutu cap, Dilean mutu cap, Mizpa mutu cap, Yokteel mutu cap, Lakis mutu cap, Boskat mutu cap, Eglon mutu cap, Kabon mutu cap, Lahmas mutu cap, Kitlis mutu cap, Gederot mutu cap, Bet-Dagon mutu cap, Naama mutu cap, tonda, Makeda mutu cap, amutu yuma dalupra dopropidi, sun pe tu kepropi.

42 – 43 – 44 Tonda, men taru Kanaan tara kurami nesaladi yambul ati arum doraminge cap, ila ati arum doraminge peda, adoraminge yuma popra tapidi, amutu yuma dopropi. Akati-akati arum doraminge yuma dengeda, ati arum di dopra, kurami mutu sida ake. Libna cap, Ete cap, Asan cap, Yiftah cap, Asna cap, Nesib cap, Kehila cap, Akhsip cap, tonda, Maresa cap, ukuprap mutu dalupra dopropidi, sun pe tu kepropi.

45 Utopu Ekron tara cap, amutu damai dinin, yambul-yambul ati arum cap, tonda akati yuma cap dopropidi, sun pe tu kepropi. 46 Tonda, Ekron mutu di dipra, benamganen, ila laut mokon dam, aneitamai ton benmaidi, popra tappidi, atu yuma dopropi. Ukupra, ila ati arum dopra kurami nesala yuma cap, tonda yambul-yambul ati arum peda doprapidi, Asdod mutu damai bei. Tonda, adi dipdongopra, yuk mutu ton dopropidi, sun pe tupu kepropi. 47 Utopu, Asdod cap, Gasa mutu cap, yambul-yambul ati arum dopinge cap, ila ati arum dopinge cap yuma, poptapidi, benamyanen dopropi ngeda, Mesir mutu me wilipra kwangdana neitamai, ila laut mokon damaida, abena deipi dingeda ange yuma dalupra dopropidi, sun pe tupu kepropi.

48 – 49 – 50 – 51 Utopu, mutu dam tara ton, ila-ila ati arum cap, yambul ati arum cap, dopra kurami ati dengeda, sebelas (11) kwamu. Amutu sida ake. Samir cap, Yatir cap, Sokho cap, Dana cap, Kiryat-Sana cap, (angeda Debir mutu ton perami), Anab cap, Estemoa cap, Anim cap, Gosyen cap, Holon cap, tonda Gilo mutu cap, ukuprap mutu dopropidi, sun pe tupu kepropi. 52 – 53 – 54 Utopu ila ati arum dopra kuraminge cap, tonda yambul ati arum dorami denge yumada, sembilan (9) ati arum dorami mutu sida ake. Arab mutu cap, Duma cap, Esan cap, Yanum cap, Bet-Tapuah cap Afekah cap, Humta cap, Kiryat-Arba cap, (ada Hebron mutu ton perami), tonda, Zior mutu cap, ukuprap mutu dopropidi, sun pe tupu kepropi.

55 – 56 – 57 Utopu, ila ati arum dopra kuraminge cap, tonda yambul ati arum doraminge cap yuma dengeda, sepuluh (10) ati arum dorami mutu sida ake. Maon cap, Karmel cap, Zif cap, Yuta cap, Yizreel cap, Yokdeam cap, Zanoah cap, Kain cap, Gibea mutu cap, tonda Timna mutu cap, ukuprap mutu ati arum doramidi, sun pe tupu kepropi. 58 – 59 – 60 Tonda, ila ati arum dopra, kuraminge cap, tonda yambul ati arum dopra kurami nge cap, yuma dengeda, delapan (8) ati arum dorami mutu sida ake. Halhul mutu cap, Bet-Zur cap, Gedor cap, Maarat cap, Bet-Anot cap, tonda Eltekon mutu ati arum cap, Kiryat-Bahal perami mutu cap, (amutu si tepapu, ton sida, Kiryat-Yearim mutu perami). Butene ngeda, Raba mutu pepra doramidi, sun pe tupu kepropi.

61 – 62 Katawai mutu neitamaida, ila ati arumda, ngangtan bari (6) ton dorami. Akati damaida, yambul ati arum peda adorami. Akati arum sida ake. Bet-Araba cap, Midin cap, Sekaka cap, Nibsan cap, (akatida, si ton Garam mutu ati perami), tonda En-Gedi mutu pepra dorami. 63 Akati-akati weika di poptapidi, sun mutu tu dopropi dinin, sun Yehuda yala nesaladi, Yerusalem mutu ati arum menop taru kurami nesala tep, men popra bisipmanto kurami. Amutu nesala sida, Yebus yala nesala perami. Uda, Yehuda yala nesaladi, Yerusalem mutu talepra kuramidi, sun mutu sisa keami dinin, Yebus yala nengda, enepra men donokami. Ukuamya cadi, ukutaru peda, amutu neitamaida, Yehuda yala neng cap, Yebus yala neng cap, sun tonpa Yerusalem mutu akununge.