Jos 16 | XteSC | STEP | Yusuf yala nesala sundi deipnepa, deipdanen barami nesalada, sun kunkami mutu tu bokra dorona tep, Allahdi sun tep, ‘Amutu tu tara talepra kunkameng’ tenen, ketenepra karepu. Akarepu mutu tara tu wilimdona tep nengeda, “Ukupkurume,” pepra deipu. Amutu tu wilimdonaida, Yordan mekin ortara, Yeriko mutu di dipdongopra benamnganen, keteng yakan tara kuamu me gisoi yuma cap, tonda, me wenenga palpal cap, bena dopropkurume. Ada, Yeriko mutu di, itara ila mutu bukbeuanen, Betel mutu damai bena, dipdongopu mutu yumada doropi.

Joshua 16

Manasye yala nesala cap, Efraim yala nesala cap, sun kunkami mutu bokra karepu tara tep, seku upu

1 Yusuf yala nesala sundi deipnepa, deipdanen barami nesalada, sun kunkami mutu tu bokra dorona tep, Allahdi sun tep, ‘Amutu tu tara talepra kunkameng’ tenen, ketenepra karepu. Akarepu mutu tara tu wilimdona tep nengeda, “Ukupkurume,” pepra deipu. Amutu tu wilimdonaida, Yordan mekin ortara, Yeriko mutu di dipdongopra benamnganen, keteng yakan tara kuamu me gisoi yuma cap, tonda, me wenenga palpal cap, bena dopropkurume. Ada, Yeriko mutu di, itara ila mutu bukbeuanen, Betel mutu damai bena, dipdongopu mutu yumada doropi. 2 Amutu tu wilimdonaida, Betel mutu di bena, dipdongopra benamrumyanen, Lus mutu tara bei. Adininda, ortara mutu Atarot mutu bisipra, Arki yala nesala kurami mutu bisi barami tarapu kepra, bena deipi. 3 Tonda, Arki yala nesala kuramyai di, kwererbenamidi, keteng ban tara Yaflet yala nesala sun kurami mutu ada, Bet-Horon-Hilir mutu benamidi, adi dipdongopra, Gezer mutu bena siryada, ila laut mokon damaipu bena dopropi.

4 Tonda, amutu tuda, Yosuadi Manasye yala nesala cap, Efraim yala nesala, sun tep bokra karepu. Sun abutene yala nengda, Yusufdi deiamu neng kuramrei. Atep, ‘Sun ayala neng talepra kunkamrenge’ tenen, amutu tu tep bokra karepupa, sun Manasye yala nesala cap, Efraim yala nesala capdi dopropi.

Efraim yala nesala tep amutu tu bokra karepu upu

5 Efraim yala nesala, sun tara nesala yala yuk-yuk kuramya yumada, sun bung keca talepra kunkami mutu tu wilimnaida, keteng yakan tara, Atarot-Adar mutu di dipdongopra, itara benamnganen, Bet-Horon-Hulu bena dipdongopu. 6 Adinin, dipdongopra benamnganen, utara dapu tamna kapu mutu ila mokon Laut Tengah damai bena deipipa, dopropi. Itara, atu wilimdonaida, Mikmetat mutu bukamo. Tonda, ila laut mokon deipkai cap yumada, bena dopropi. Tonda, keteng yakan tara tep, tu wilimdana ngeda, kange di tamupra, ortara Taanat-Silo mutu tara, bisi kepra benamnganen, acei di dipdongopra, keteng yakan tarapu dinin, Yanoah mutu tamna cap bena dopropi.

7 Amutu di dipra, kwererbenamnganen, Atarot mutu cap, Naharat mutu cap, bena didongoprapmengedi, adinin Yeriko mutu benapidi, siryada Yordan me damaipu bena doropi. 8 Tonda, keteng dangban tara, Efraim yala neng sun mutu tu wilimdonaida, Tapuah mutu di dipdongopra, benamnganen, Kana mekin keprapudi, ila laut mokon neitamai di, bena bokra karepu. Amutu tu yumada, Efraim yala nesala, sun nyapsilip yuma tep, bokra karepupa, sundi talepra kurami mutu tu tep sekeipi.

9 Amutu neitamai yumada, ila-ila ati arum cap, yambul-yambul ati arum doraminge cap yumada, Manasye yala nesala, sun mutu neitamaipu kwamu ngeda, sun Efraim yala nesala cap, sun nyapsilip akuramitopu dopra, karepupa dopropi. 10 Amutu-amutu yuma popbisipidi, dopropi dinino, Efraim yala nesaladi, Kanaan mutu kurami nesala, sun mutu si Gezerda, amutu neitamai kurami nengda, ton men enepra donokami. Men enepra donokami cadi, pumun taru di dipra, aneitamai taru cap, ataru peda, sun Gezer mutu kurami nengda, tupa akungepa, Efraim yala nesala cap, sun kikiman dukdongopra kurami. Dinino, sun Gezer mutu kurami nengdi, Efraim yala nesala, sun ikin pel dimengepa, kange mun kange doupra, sun ikin pel melimna neng utopu kupra kununge.