Jos 17 | XteSC | STEP | Yosuadi Yordan me goupra, keteng dangban tara, ortara bukamu mutu tu bokra karepkoua tep nengeda, erdi Manasye yala nesala sun nyapsilippu dinin, neitamai di bokropi neng, sun tep karepu. Manasyeda, Yusuf erdi menmena deiamu ngebo kuramu. Atep nengeda, Manasyedi menmena deiamu ngeboda, er si Makhir tep, tu ton bokra karepu. Makhirda, er nai bo Gilead kuramu cadi, er cap, ton ngebo jen talena deiyo ngebo er sida, Basan cap, sun aneng butene tep, Yosuadi sun tara nesala, sun nyapsilip yuma tep nengeda, mutu tu bokra karepu. Ada, abutene neng cap, sun nyapsilip cap tep, Yordan me goupra, ortara keteng yakan tara mutu tuda, Gilead tara cap, Basan tara cap, sun tep bokra karepu.

Joshua 17

Manasye yala nesala, sun mutu tu dorona tep, keteng dangban tara Yordan me duman kwamu mutu tu tep, bokra karepi upu

1 Yosuadi Yordan me goupra, keteng dangban tara, ortara bukamu mutu tu bokra karepkoua tep nengeda, erdi Manasye yala nesala sun nyapsilippu dinin, neitamai di bokropi neng, sun tep karepu. Manasyeda, Yusuf erdi menmena deiamu ngebo kuramu. Atep nengeda, Manasyedi menmena deiamu ngeboda, er si Makhir tep, tu ton bokra karepu. Makhirda, er nai bo Gilead kuramu cadi, er cap, ton ngebo jen talena deiyo ngebo er sida, Basan cap, sun aneng butene tep, Yosuadi sun tara nesala, sun nyapsilip yuma tep nengeda, mutu tu bokra karepu. Ada, abutene neng cap, sun nyapsilip cap tep, Yordan me goupra, ortara keteng yakan tara mutu tuda, Gilead tara cap, Basan tara cap, sun tep bokra karepu. 2 Tonda, Keteng dangban tara, Yordan me dumanda, Manasye yala nesalapu dinin, wiliprapidi, ton tara neng, sun nyapsilip tep, bokra karepu. Amutu tu tep, bokra karepu yala nesala, sun yala nengda, ake. Ada Abiezer, Helek, Asriel, Sekem, Hefer, tonda Semida, sun ayala neng yumada, Yusufdi deiamu ngebo, Manasyedi deiamu neng cap, sun nyapsilip cap, amutu neitamai kurami. Sun anengda, Yusupdi deipu ngebo, er si Manasye, erdi deiamu neng kurami. Sun cap, sun nyapsilip yuk-yuk cap tep, deiyo kepra taleami neng kuramidi amutu tu dopropi.

3 Hefer er mi sida Zelafehad, er apu boda Gilead kuramu. Makhir er mida Gilead, er apu boda Manasye kuramu. Zelafehad erda, sal nyapu ton men deiamu. Erda ner nyapu pu deiamu. Anerapu sun sida ake. Makhla cap, Noa cap, Hogla cap, Milka cap, Tirza cap, sun ukuprap nerapu deiamu. 4 Sun anerapuda, Allah si eremna ati pumbon neitamai pel doramu ngebo, imam Elieser cap, nimi si Nun, erdi deiamu mi Yosua cap, tonda amutu deiyo kepra kurami neng cap, sun damai bei. Anerapu beidi, sun aneng tepapu pepi. “Allah Yahwehdi, nun tep kupseudi, er pel don ngebo Musa damai pepra deiamseuada, ‘Sun yala nesala nimi-nimi yuma tep, amutu tu bokra karenge taruda, sun peda mutu tu ton bokra karepkamsenunge,’ pepra, deiamseue,” pepra bena lap pepi. Upepipa, sun aneng gekepidi, ‘Teka, Allah Yahwehdi Zelafehad, er ner nyapu tep pepra deiamutopu, pepmenga cadi, apepmengtopu kupkup’ tenen, sun anerapu tep, mutu tu ton bokra karepi. Tonda, sun kayapu sal nyapu neng yuma peda, ton bokra karepi. Ada, Allah erdi pepra deiamutopu kupra karepi.

5 Ange karepya deiki di, Manasye yala nesalada, Yosuadi, sun nimi dempu, mutu tuda bokra men karepi dinin, nimi ton sal nyapu men deiami neng, sun ner nyapu peda, mutu tu ton bokra karepu. Atep nengeda, Manasye yala nesala, sun mutu tu tep nengeda, morokyo dam di utamna (10) mutu tu ton yuk-yuk bokra karepu. Akarepu mutu tuda, morokyo dam di utamna 10 ton bokra karepu. Angepu gum dinin, keteng yakan tarada, Yordan me goupra, ortara bukamu mutuda, Gilead mutu cap, Basan mutu cap ton, bokra karepu. 6 Uda, Manasye erdi deiamu sal nyapu yumada, mutu tu ton dopropi. Tonda, Manasyedi deiamu ner nyapu peda, Yosuadi mutu tu ton bokra karepka cadi, Gilead tara mutu tu yumada, bokra karepu pangeda, sun Manasye yala nesaladi dopra, gawal daki.

7 Manasye yala nesala, sun mutu tu dopropi ngeda, amutu wilimna tep, peten kamna keca deiamyada, Asyer yala neng kurami mutu di, gonga kepra banmanganen, Mikmetat mutu kwamngada, ada Sikem mutu tara dinin, keteng yakan tara dipdongomu. Sikem mutu bukamngai tara adinin bena, dipdongopra kweremnganen, selatan tara bena dipdongopudi, benamnganen, En-Tapuah yala nesaladi talepra kurami mutu tara, bena dipdongomu. 8 Uda, Tapuah mutuda, Manasye yala nesala sun tara nengdi amutu taleami dinin, Efraim yala nesalada, sun mutu tu wilimdonai cadi, sun Efraim yala nengdi Tapuah mutu ila ati arum domi ngeda, akati dopra taleamidi akurami.

9 Manasye yala nesala sun nyapsilip kurami mutu tu wilimnada, Tapuah mutu di dukdongopra, kwererbenamnganen, Kana mekin bena dipdongomu. Ame goupra, ortara me duman selatan tarada, yambul me pirman dinin, ila ati arum doramya yumada, Efraim yala nesala, sun ati arum dorami. Efraim yala nesaladi ila-ila ati arum doramyaida, sun mutu tu gum dinin, Manasye yala nesala sun mutu tu wilimdanaipu dorami. Manasye yala nesala sun mutu tu wilimdonaida, amekin adinin utarada, dapu tamna barami bisipu dipdongopra benamnganen, siryada, ila laut mokon deiamnga, er si Laut Tengah, alaut pirman dinin, amutu neitamai di bena wilipramu.

10 Ukuamidi, Efraim yala nesala sun nyapu yumada, dutara (arah selatan) mutu tara bukamu dapu mutu tu talepra kurami. Tonda, Manasye yala nesala, sun tara neng yumada, deiki tara (arah utara) bukamu mutu tu yumada, talepra kurami. Tonda, ila laut mokon deiamnga piriman, amutu neitamaida, keteng dangban tara di bena sekramu. Tonda, Manasye yala nesala, sun mutu tu wilimdonai utara ngeda, Asyer yala nesala sun mutu tuda, utara di dipra bena wilipramu. Tonda, Izakar yala nesala, sun mutu tu damai wilimdona tep nengeda, keteng yakan tara deiamngai di bena sekramu. 11 Izakar yala neng cap, Asyer yala neng cap, sun kurami mutu neitamaida, Manasye yala neng sun mutu tu ton talepra kurami. Amutu tu ton tapakra doramidi, ati arum dopra kurami mutu sida ake. Ada, ila ati arum doramyaida, Bet-Sean mutu cap, tonda Yibleam cap, amutu neitamai ila ati arum ton dopra kurami. Amutu neitamai peda, yambul ati arum yuma peda, dopra akurami. Tonda, ila laut mokon pirimanaida, yambul ati arum dorami mutu sida, Napot-Dor cap, En-Dor cap, Taanakh cap, Megido cap, amutu yuma ton doramidi taleami. Ila ati arum adoramya neitamai yumada, yambul metetek ati arum peda adonapu kurami.

12 Dinino, amutu neitamai, pumun taru kurami nesalada, sun Kanaan tara neng kurami. Sun Kanaan yala nesalada, Manasye yala nengdi men enepra donokami. Sun Kanaan tara nesalada, balila weik kuramya cadi, ‘Amutupu tupa kunkamepe,’ teneramidi, aceipu kurami. Tonda, Allah Yahweh tep, teka men tenerami. Ange tep nengeda, Kanaan mutu tara kurami nesalada, pio tupa amutupu talepra kurami. 13 Israel nesala sun amutu bena kuramyanen, keteng tamun pio weik konum kupbaramupa, sunda puto weik ton cap kepbarami taruda, puto weik nesala kuramya tep, sundi sun Kanaan tara dakurami nesala tep nengeda, men enepra donokami dinin, Israel nesaladi Kanaan nesala tep, “Nun ikin pel tali donkamserume,” pepra, ikin pel dimamipa, sun Kanaan tara nesala dipapu apel dorami.

Efraim yala neng cap, Manasye yala neng cap, sundi, “Keteng yakan tara tuda, ton cap tapakra karepkamserume,” pepra, moropi upu

14 Yusufdi deiamupa, deipdanen yakarami nesala yumadi, Yosua er damai yanmaidi, Yosua tep upepra moropi. “Ware deiyo keca tep, nun mutu tuda yambulanunpu bokra karepsemum do? “Nunda, nun nai Allah Yahwehdi melimserepa, nesala denge pio weik kunupa cadi, mutu tuda yambulanunpu bokra karepmaserem ngeda gume. Tu ton cap tapakra karepkuserume,” pepra bena moropi. 15 Upepra moropipa, Yosuadi tamupra, sun Yusuf yala nesala tep pepu. “Sunda nesala pio weik kuruma cadi, Efraim mutu neitamaida, mutupu weik bukupa, sunda nesala weik kuruma tep, sundi, ‘Nun kunaida yambul kepseue,’ tenepmum dingeda, ataru di sun adipapu, Feris yala neng cap, Refahim yala neng cap, sun kunge mutu bena dinkurume. Bemum dingeda, sun mutu neitamai ila co palpal mutu bena, ati donai tep, orbokokmumdi ati dopkurume.

16 Yusuf erdi deipupa, deipdanen barami nengdi, tamupra Yosua tep pepi. “Gume, nunda nesala denge pio weik kunupa cadi, aceida ila mutu bukbeua neitamaida, nun kuna tep go weik ton men kwapu. Tonda, Kanaan tara neitamai kunge nesala, sun pala mutu dapu tara, telep mutu banai kunge nesalada, sundi nimi porban taruda, kuda bisamdi gerekmengepa, gipra tu deiki embarameng keca, kereta perang deiki tekmengedi, tu deiki doupra banunge. Akeca kereta perang talepra kunungada, besi keca di donunga cadi, puto weik kurure. Ada, sun Bet-Sean mutu yambul ati arum dopra kunung neng cap, tonda Yizreel mutu ban kunung neng cap yumada, Kereta perang besinge talepra kununge. Atep nunda, ‘Uo, ware kuptepya deiki di, sun mutu doproptepe do?’ tenen, tupa tenenupe,” pepi.

17 Upepipa, Yosuadi tamupra, Efraim yala neng cap, Manasye yala neng cap tep upepu. “Teka dinino, sunda nesala pio weik kumumdi, puto weik neng kurume. Atep nengeda, ne kangeda, tenpu mutupu men dopropkamrume. Tek sisi sun tep mutu tu ton cap tapakra karepsenepa, doropkamrume. 18 Sunda abukbeu mutu deikipu dinin, iknapi dam tarapu dopropmumdi, ila di nepra, tekamu co kwepra, cakraprumudi, ati dopmumnyopda, amutu tu dana-dana tara yumada dopropkurume. Ada, amutu neitamaida, nimi kuna gum mutu tuda, tupa akurure. Amutu neitamaida, sundi bena orbokokmumdi, amutu neitamai yumada, sun pe mutu sisapu kepropkamrume. Tonda, Kanaan mutu kunung nesala yumada, sundi poprapmumdi enepronkamrume. Ada, sun Kanaan mutu tara nesalada, puto pio weik kunung neng cadi, nimi mar porbana tep kecada, kereta perang pio gat keca er si besingedi deipra, donung keca talepra kunung nesala kununga peda, sun Yusuf yala nesaladi aneng yumada, enepra, dopronkamrume.” Yosuadi Yusuf yala nesala tep pepu.