Jos 18 | XteSC | STEP | Allahdi Israel nesala tep, “Amutu yuma karepkamsene,” peiamu mutu konum bena dopropi taruda, sun Israel yala nesala yuma bulupra, Silo mutupu weki. Ukupidi, amutu neitamaida, Allah cap, nimi cap, antamdana tep, tenda ati, ada Allah er si eremna tep, lyom opkal bol di domi tenda ati ketenepra deipi. Ataruda, Kanaan tara neitamai yumada, akati-akati arum yuma, konum popbisipidi, amutu tu yuma konum dopramya tep, yuk tara nesala ton, tenpunge peda, ton yana men wareki. Yuk nesala cap podana gum di, tali dim peprap, teleppu kurami.

Joshua 18

Allahdi, “Kanaan mutu tu bokra, Israel yala-yala neng yuma tep karepkamrume,” peiamutopu bokidi, tupa akwamu mutu tu bongna tep upu

1 Allahdi Israel nesala tep, “Amutu yuma karepkamsene,” peiamu mutu konum bena dopropi taruda, sun Israel yala nesala yuma bulupra, Silo mutupu weki. Ukupidi, amutu neitamaida, Allah cap, nimi cap, antamdana tep, tenda ati, ada Allah er si eremna tep, lyom opkal bol di domi tenda ati ketenepra deipi. Ataruda, Kanaan tara neitamai yumada, akati-akati arum yuma, konum popbisipidi, amutu tu yuma konum dopramya tep, yuk tara nesala ton, tenpunge peda, ton yana men wareki. Yuk nesala cap podana gum di, tali dim peprap, teleppu kurami. 2 Dinino ataruda, Israel yala nesala neitamai dinin, sun yoneitam bari (7) yala neng ton, sun talepra kunkami mutu tuda, Yosua cap, Musa capdi konum bokra deiprei dinin, sun ayala nengda, abokra kareprei mutuda, kapul men bena dopropidi. Tali aceipu kurami. 3 Ukupipa, Yosuadi sun ayoneitam bari (7) yala neng tep pepu. “Sunda tali dakunmarumudi, amutu-amutu tu pio moupra dinapu kuramrumnyanen, dan taru di bena, amutu tu dopraprumudi, aceipu bena kunkamrum do? Sun co puna nengdi, si eremami Allah er si Yahwehdi, sun tep konum karepseu mutuda, doropmumdi, men bena kunkamrum do?” pepra, sun tep asipu.

4 Upepu dingeda, aupu ton pepu, “Sun Israel yala nesala yoneitam yala kan-kan di, yuk-yuk dinin, weneri neng ton wepra deipkurume. Awepra deipmum nengda, ne Yosuadi sun aneng tep, sundi, ‘Nun Israel nengdi, amutu talepra kutepe’ tenen, mutu cap, amutu tu wilimdonai yuma capda, dipra embemumdi, amutu neitamai dinkamrum keca ton, sekmumdi, nun damai tamupra peryankamserume. Nedi aneng tep peipnepa, dipra embengedi, adipapu tamupra, ne damaipu lap peryankamenge. 5 Aneitamai kwamu mutu tuda, adipapu wilipra yoneitam bari (7) mutu yuk-yuk kepra deipkurume. Ada, Yehuda yala nesalada, sun men di akunung utopu kunkununge. Ada, selatan tamna kapu mutu tuda, sun Yehuda neng talepra kunkamenge. Tonda, utara dapu tara kapu mutu tuda, Yusuf yala nesala men di akununga tep, sunda amutu tupu talepra kunkamenge,” pepu. 6 Sun yoneitam (7) yala Israel nesala talepra kunkameng mutu tu wilimdonai yumada, adipapu sundi sekropmumdi, ne Yosua tep, yana karepkamnerume. Ukupmumpa, nedi, ‘Ware yala nesala amutu tu dopropkameng do? Tonda, dan yala neng ton amutu tu dopropkameng do?’ tenen, undi pel dopnepa, Allahdi, ‘Sun ayala nengdi talepra kunkameng mutu tuda ace,’ pepra, deiprepa epmepedi, ‘Sun kunkamrum mutuda acei,’ tenen, kael kepkamape.

7 Dinino, sun Lewi yala nengda, sun kayapu yuk Israel yala neng mutu tu dopropruma utopu, sun Lewi yala nengda, sun talepra kuna tep, mutu tu ton men dopropkamenge. Deiyoda, sun aneng pel donada, Allah Yahweh er si eremna ati pumbon pel donunga tep, sun dopropkamengada, ange pua. Imam-imam neng kunkameng yalada, sun Lewi yala nengdi, mutu tu ton dorona gume. Tonda, Gad yala neng cap, Ruben yala neng cap, tonda Benyamin yala neng neitamai di bokrapi yala neng capda, sun talepra kuna tep mutu tuda, men di keteng yakan tara, Yordan me goupra, ortara kwamu mutupu konum dopropi. Ada, Allah er pel dona ngebo Musadi amutu tuda, konum bokra kareamupa, dopropi.

8 Aupu pepra, sengpepkopda, Yosuadi sun yoneitam bari (7) yala neng neitamai di, yuk-yuk dinin, nimi weneri wepra deipmai neng tep, “Sunda ange-ange yuma talepra, ormutu tu dina tep, pel dopbenkurume,” pepra, deipu upuda ake. “Sunda amutu urasin yuma dipra embenkurume. Dipra embemumdi, amutu tu wilimnai peda, kael kepmumdi sekropkurume. Sekropmum dingeda, sun adipapu tamupra, ne damaipu yana asengkamrum keca karepkamnerume. Ukupmumpa, Silo mutuda, ‘Ware nengdi amutu tu dopropkameng do?’ tenen, undi pel dopnepa, Allahdi, undi keca katuai kepra deipserepa, ‘Sun ayala neng talepra kunkamum mutu tuda ace,’ pepra deiprepa, epmepedi kael kepkamepe.” Yosuadi aupu pepu pangeda, sun aweneri neng wepra deipi neng dipapu, Yosua pepra deiputopu, sun anengdi amutu neitamai urasin kuna tep dirbei.

9 Sun ayoneitam nengdi, amutu urasin yuma dipra embeidi, amutu tu neitamai kwamunge yumada, yoneitam bari mutu tu wilipra bongdonai peda, yuma si sekropi. Tonda, amutu ila-ila ati arum doramya neitamai yuma peda, konum si sekropi. Sekropi dingeda, yoneitam bari bokrapidi, seki dingeda, sun anengda, adipapu tamupra, Silo mutu Yosua kunmauaipu yai. 10 Sun aneng tamupra yai taruda, Yosuadi, ‘Ware yala nengdi, amutu tu dopropkameng do?’ tenen, Allah Yahweh dinmauai di, esu pen keca er si undi pel dona deiki di, ayala-ayala neng yuma tep nengeda, Allahdi undi keca deipupa, adeiki di, ‘Dan tara nengdi amutu tu karepnepa, dopropkameng do?’ tenen, Yosuadi pel dopka deiki di, yoneitam bari yala neng tep, Allah erdi ketenepra karepu mutuda kael kepi. Konum kael kepi dingeda, Israel yala neng, sun talepra kuna tep, mutu tu ton pio men dopropmai nengda, Yosuadi amutu tu bokra depipu.

Benyamin yala nesala karepu mutu tu tep, pepu upu

11 Menmena sun kunkami mutu tu bokra karepu nengda, Benyamin tara nesalada, sun yala yuk-yuk kurami dinino, sun nyapu yuma tep karepu. Ayala nesala, sun nyapsilip yuma tep, karepu mutuda, “Yehuda yala nesala cap, tonda Yusuf yala nesala cap, sun tep kareamupa, kurami mutu tu dana-dana kuramnga neitamai kwamu mutu tu bokra karepu. 12 Sun Benyamin yala neng, sun mutu tu dopropi ngeda, deiki tarada (arah utara) tu wilimdona tep nengeda, Yordan me goupra ortara di, gonga kepra, weleprapidi, genepra, deiki tara (arah utara) buku ati arum, Yerikho mutu pirmanpu, deiki tara (arah utara) itamna benamyanen, keteng dangban tara kupu mutu, iknapi tara kepra, benamyanen, mutu katuai tarada, Bet-Awen mutu damai tara dipra benamu.

13 Amutu di dipdongopra benamyanen, dutara (arah selatan) tara Lus mutu pikil yuma benkamrure. (Lus mutu tepapu yuk si ton si peramidi, Betel mutu perami.) Alus mutu di kwerepra, Atarot-Adar mutuda, utara (arah selatan) tara buku mutu damai tara benkamrure. Ada, Bet-Horon-Hilir mutu damai tara di kepra, utamna bena wilipropkamrure. 14 Amutupu dinino, sun mutu tu wilimdongaida dutara ton (arah selatan) tara benamyanen, keteng dangban tarada, ila mutu deiki bungamngai atara dinin, ortarada, mutu si Kiryat-Bahal ati arum ton doami. Adinin dipdongopra utamna tup benamyanen, Kiryat-Bahal mutu damaipu dipra benamu. (Uda, Kiryat-Bahal ati arumda, ton sida Kiryat-Yearim mutu ton penunge.) Amutu beudi, tamupra selatan tamna bena dipdongopkamrure. Ada, Yehuda yala nesala, sun pe mutu tu kemna tepa. Ada keteng dangban tara mutu tu wilimdonai tep nengeda, apepra deiputopu kwamu.

15 Benyamin yala nesaladi dopropi mutu tuda, selatan tara mutu tu wilimna tep gonga kemnaida, ati arum er si Kiryat-Yearim mutu, ada keteng dangban tara kupkupkai di, bena dipdongopra benamyanen, Me-Neftoah mutu me bungna tuai yuma bena dopropi. 16 Me-Neftoah mutu deiyo damai di, kwerepra Hinom ban mutu tara cap, dipdongopdanmanto kuprei mutu damai tara benapudi, utara dapu mutu tarada, Refaim ban mutu kupka damai di, bena sekropkurure. Akonum ukupu dingeda, ortara mutu (arah selatan) tara tu wilimdonaida, Hinom mutu ban di dipra, benamyanen, Yebus yala nesala kurami mutu pikil yuma cap, adininda, En-Rogel mutu tara yuma benamu.

17 Aceipu benapudi, tamupra utara dapu tarada, En-Semes mutu bena ongopra banamyanen, adinin Gelilot mutu beu. Amutuda, atara kuramu dinin, ortara urasin dam tarada, Adumim mutu bisi welena ortara beu. Ange konum dingeda, utara mutu dapu tara tu, wilimna tep nengeda, Bahan gel buku bisi neitamai di, bena sekropu. Bahan gel penunga deiyoda, Rubendi deiamu mi, er si Bahan kuramnga tepa.

18 Amutu dinin, utara dapu mutu tara, Yordan me duman ortara bukudi, genembana tep, mutu si Bet-Araba beue. Amutu pikil yumada, tu wilipra benamnganen, kwerepra amutu banai bena dipdongopu. 19 Acei di, deiki tara, utara dapu mutu tara genepdanen, embeu mutu pikil yumadi dipdongopra, benamnganen, Bet-Hogla mutu beu. Tonda, adinin sun tu siryada, utara dapu tarapu dinin, ila laut mokon embana gum di, dim pepra deipu mokon dam tara, Yordan me dumanda, me bena dapdauai di, bena sekropu. Selatan tara tu wilimnai tep nengeda, amutu neitamai di bokropi.

20 Benyamin yala nengdi dopropi mutu tuda, ortara keteng yakan tara mutu tu bongdonai tep nengeda, Yordan mekin di bena sekropu. Amutu yumada, Benyamin yala nesala, sun nyapsilipdi talepra kunkami mutu tu tep, dana-dana tara yuma bokra karepi. 21 Benyamin yala nesala, sun nyapsilip yumadi, ila ati arum dopra kurami mutu dopropi ngeda ake. Dua belas mutu ati arum doropi. Amutu neitamaida, yambul ati arum peda adorami. Adopropi mutu sida ake. Yerikho, Bet-Hogla, Emek-Esis, 22 Tonda, Bet-Araba, Zemaraim, Betel mutu cap, 23 utopu tonda, Haawim mutu cap, Para mutu cap, tonda Ofra mutu cap, 24 Kefar mutu cap, Haamomai mutu cap, Ofni mutu cap, tonda Geba mutu bukamopa, amutu neitamaipu, ati dopra kurami. Amutu-amutu yumada, dua belas mutu (12) kwamu.

25 Tonda, empat belas (14) ati arum doramyai ton dopropi. Aila ati arum doramiya neitamaida, yambul ati arum peda, aton dorami. Amutu sida ake. Gibeon mutu cap, Rama mutu cap, Beerot mutu cap, 26 Mizpa mutu cap, Kefira mutu cap, Mosa mutu cap, 27 Rekem mutu cap, Yirpeel mutu cap, Tarala mutu cap, 28 Zela mutu cap, Elef mutu cap, (ada Yebus yala nesala kuramyai tepa. Amutu si ton Yerusalem perami.) Tonda, Gibea ati arum cap, tonda Kiryat-Yearim ati arum cap dopropi. Amutu tu yumada, Benyamin yala nesala, sun nyapsilip yuma, pio talepra kunkami mutu tep, bokra karepupa dopropi.