Jos 19 | XteSC | STEP | Yosuadi tu bongna tep pel butene ngeda, ‘Simeondi deiamupa, deipdanen yakaramidi kurami nesala, sun tara nyapsilip yuma tep, bokra karepu. Simeon yala nesala, sun nyapsilip mutu tu sirik bongdonaida, Yehuda yala nesala sun mutu tu neitamai di, bena wilipropu. Atep, Yehuda tara nesala, sun mutu tu dana tara ton bokrapudi, Simeon yala nesala tep karepu.

Joshua 19

Simeon yala nesaladi talepra kunkami mutu tu tep, pepu upu

1 Yosuadi tu bongna tep pel butene ngeda, ‘Simeondi deiamupa, deipdanen yakaramidi kurami nesala, sun tara nyapsilip yuma tep, bokra karepu. Simeon yala nesala, sun nyapsilip mutu tu sirik bongdonaida, Yehuda yala nesala sun mutu tu neitamai di, bena wilipropu. Atep, Yehuda tara nesala, sun mutu tu dana tara ton bokrapudi, Simeon yala nesala tep karepu. 2 Sun Simeon yala nesala tep, bokra karepu ngeda, amutu sida ake. Bersyeba mutu cap, (tonda amutupu dinin, Syeba mutu ton perami), Molada mutu cap, 3 Hasar-Sual mutu cap, Bala mutu cap, Esem mutu cap, 4 Eltolad mutu cap, Betul mutu cap, Horma mutu cap, 5 Ziklak mutu cap, Bet-Hamarkabot mutu cap, Hazar-Susa mutu cap, 6 Bet-Leboat mutu cap, tonda Saruhen mutu cap karepu. Amutu-amutu yumada, bokra karepu. Aila ati arum cap, amutu neitamai yambul ati arum ton yuma peda, bokra karepupa, sundi dorami. Ange yumada, topnebari (13) tiga belas ila ati arum dopropi.

7 Tonda, Yosuadi sun Simeon yala nesala tepapu, ati arum weneri ton bokra karepupa, sun Simeon yala nesaladi dorami mutu ton ake. Akarepu ati arum damaida, metek ati arum peda, adopra kurami. Amutu sida ake. Ain mutu cap, Rimon mutu cap, Eter mutu cap, tonda Asan mutu cap karepu. Adumbari ila ati arum cap, dana-dana tara mutu tu cap yumada, bokra karepu. 8 Angetopu, akati-akati si yuk-yuk sekmapnge cap, aila-ila ati arum dopra kuramyai mutu damai yuma cap, amutu damai dinin, yambul-yambul ati arum dorami ngeda, weika di dopra kurami.

Akati arum dopra kurami mutu tuda, amutu di, dipdongopra benamnganen, ara selatan tara Bahalat-Beer mutu tara benamu. Bahalat-Beer mutu tepapu ton sida, Rama mutu perami. Amutuda, ila katuai mutu, me gumai tara, er sida Negeb mutu neitamai kwamu. Amutu neitamai yuma kwamu mutu tuda, Yosuadi karepupa, sun Simeon yala nesala cap, sun nyapsilip capdi, ange yuma dopra kurami. 9 Ada, Yehuda yala nesala, sundi talepra kurami mutu tuda, go pio weik kuamu dinino, ange yuma tek sisi men putaramu. Atep, Yosuadi Yehuda yala nesaladi dopromi mutu tu neitamaipu, ton wilipra, Simeon yala nesala tep karepu.

Zebulon yala nesaladi talepra kunkami mutu tu tep, pepu upu

10 Yosuadi tu bongna tep, undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} pel weneri dopu ngeda, Zebulondi deiamupa, deipdanen, yakaramidi kurami nesala, sun tara nyapsilip yuma tep, bokra karepu. Zebulon yala nesala, sun nyapsilip mutu tu sirya bongdonaida, Sarid mutu tu di bena bokropu. 11 Wilimdonaida, Sarid mutu di dipra, benamnganen, keteng yakan tara mutuda, Marala mutu damai bena ongopdongopra, adinin keteng yakan tara bukamu mutuda, Dabeset mutu damai benapudi sekromu. Yokneam mutu damai dinin, keteng yakan tarada, yambul me, Yokneam mekin damai bena dipdongopu.

12 Zebulon yala nesala, sun mutu tu dopropi ngeda, keteng yakan tara tep pangeda, Sarid mutu dipra benamnganen, keteng yakan tarada, Kislot-Tabor mutu tu tara, wilimdonai bena keprapidi, adinin Dobrat mutu beidi, welepra, Yafia mutu bena kuamu. 13 Yafia mutu ortara bena dipdongoprapidi, ongopra yanamnganen, keteng yakan tarapu yana dipdongopu. Ada, Gat-Hefer mutu cap, tonda Et-Kasin mutu cap bukamngai yai dingeda, adinin, Nea mutu tara kepra beudi, Rimon mutu tarapu benamu.

14 Utara mutu dapu tara tu wilimdonai tep nengeda, Hananot tara di ongopdongopra benamu. Amutu di dipra, benamnganen, tu bongdona siryaida, Yifta-El mutu neitam bonai di, yambul me embenamngai bena dipdongopu. 15 Tonda, Yosuadi karepupa, Zebulon yala nesala, sun mutu tu dopropi ngeda, ton ake. Ketat mutu cap, Mahalal mutu cap, Simron mutu cap, Yidala mutu cap, tonda Betlehem mutu cap dopropi. Amutu yumada, Zebulon yala nesala cap, sun nyapsilip capdi, sun kunkami mutu tep bokra karepupa dopropi. Zebulon yala nesala, sun mutu yumada, dua belas mutu kwamu. Amutu neitamai, ila ati arum cap, tonda yambul-yambul ati arum cap peda, sundi adopra kurami. 16 Adeiki tara sekmap mutu, sun akurami mutu yumada, Yosuadi Zebulon yala nesala sun tep, bokra karepu. Ila ati arum dopra kurami mutu neitamai yuma cap, yambul-yambul ati arumda, weika di ton dopra kurami. Ada, Zebulon yala nesala, sun nyapsilip yuk-yuk talepra kunkami mutu tu bokra karepu.

Izakar yala nesaladi talepra kunkami mutu tu tep, pepu upu

17 Mutu tu wilimdona tep, Yosuadi undi pel dumbari dopu ngeda, Izakar yala nesala sun cap, sun nyapsilip capdi, talepra kunkami mutu tu neitamai tep, bokra karepu. 18 Izakar yala nesala tep karepu mutu tuda ake. Yisreel mutu cap, Kesulot mutu cap, Sunem mutu cap, 19 Tonda, Hafaraim mutu cap, Shion mutu cap, Anabarat mutu cap, 20 Rabit mutu cap, Kisyon mutu cap, Ebes mutu cap, 21 Tonda, Remet mutu cap, En-Ganim mutu cap, En-Hada mutu cap, Bet-Pazes mutu cap, bokra karepu.

22 Izakar yala nesala, sun mutu tu wilimdonaida, Tabor mutu bukamngai di dipdongopra, benamnganen, Sahasima mutu cap, Bet-Semes mutu cap, bena dipdongopu. Adinin, ortara benamnga siryada, Yordan mekin benamu. Izakar yala nesaladi talepra kunkami mutu tep pangeda, enambelas (16) ila ati arum dopra kurami mutu yuma bokra karepu. Ila-ila ati arum dopra kurami mutu neitamai peda, dopra sun deiki deiputopu, yambul-yambul ati arum doramidi kurami mutu yuma peda, Yosuadi karepupa, dopra kurami. 23 Ange deiki tara sekmap ila-ila ati arum dopra kurami mutu cap, tonda yambul-yambul ati arum dopra kurami mutu yuma capda, Yosuadi Izakar yala nesala, sun nyapsilippu yuma, ange talepra kunkamya tep, amutu tu neitamai yumada bokra, sun tep karepu. Akarepu mutuda, sun Izakar yala nesaladi, pio tep talepra kunkami mutu tu dopra karepu.

Asyer yala nesaladi talepra kunkami mutu tu tep, pepu upu

24 Mutu tu wilimdona tep, Yosuadi undi pel pamubari dopu ngeda, Asyer yala nesala, sun cap, sun nyapsilip yumadi talepra kunkami mutu tu tep bokra karepu. 25 Sun ayala nesala, sun nyapsilip talepra kunkami mutu tu wilimdonai sida, ake. Helkat mutu cap, Hali mutu cap, Beten mutu cap, Hakhsaf mutu cap, 26 Alamelek mutu cap, Amad mutu cap, Misal mutu cap, kwamu. Tonda keteng dangban tara ordipdongopra, benamnganen, Karmel mutu cap, adinin dipdongopra yambul me Lipna mekin bena dipdongopu.

27 Acadi bena dipdongopra, kange di tamupra keteng yakan tara orbenamnganen, Bet-Dagon mutu benapudi, ortara kepra benamnganen, Zebulon yala nesala, sun kurami mutu tu damai tara bena dipdongopu. Tonda, Yitfah mutu neitama bongboi beu, adinin utara dapu tara benamnganen, Bet-Emek mutu cap, Nehiel mutu cap, tara di kepra benamnganen, utarapu dinin, mutu si Kabul mutu tara dipdongopu.

28 Adininda, ortara ton Ebron mutu cap, Rehob mutu cap, Hamon mutu cap, tonda Kana mutu adinin dipra benamnganen, ila mutu neitamai Sidon mutu benamu. 29 Asyer yala nesala, sun mutu tu wilimdonaida, acei di deipra benamnganen, Rama mutu tara benapudi, tamupra Tirus mutu benamu. Tirus mutuda, ila lyom gel beilya wipra ongopdongopi mutu, akati arum bena dipdongopu. Ukupudi amutu di tamupra, Hosa mutu beredi, tu sirik wilimdonaida, ila laut mokon deipka damai di bena sekropu. Tonda, amutu tu neitamai wilimdonaida, Mahalap mutu cap, Akhsip mutu cap, wilipropudi dipdongopu.

30 Tonda, Uma mutu cap, Afek mutu cap, Rehob mutu cap, amutu damai tara di wilipropudi dipdongopu. Yosuadi Asyer yala nesala tep, bokra karepu mutu dengeda pio weik ake. Ada, dua puluh dua (22) ila ati arum karepu. Aila ati arum damaida, yambul-yambul ati arum akwamunge peda, dopra kurami mutu tu karepu. 31 Ange deiki tara sekmap ila-ila ati arum doraminge cap, akati-akati damai dinin, yambul-yambul ati arum doraminge cap yumada, amutu neitamai kwamu. Akwamu mutu tu yumada, Yosuadi bokra, Asyer yala nesala cap, sun nyapsilip yuma cap, amutu tu talepra kunkamya tep karepu. Ukupupa, sun ayala nesaladi amutu tu yuma, sun mutu sisa kepra taleami.

Naftali yala nesaladi talepra kunkami mutu tu neitamai tep, pepu upu

32 Mutu tu wilimdonai tep, Yosuadi undi pel ngangtan bari dopu ngeda, Naftali yala nesala cap, sun nyapsilip cap, talepra kunkami mutu tu tep, bokra karepu. 33 Sun ayala nesala, sun nyapsilip yuma talepra kunkami mutu tu wilimdonaida, ake. Helef mutu di dipdongopra benamnganen, Zananim mutu tekamu ila co, Tarbantin co, tonda aco peraminge kwamngaida, amutu bena dipra benamnganen, Adami-Nekeb keprapredi, Laknum mutu beredi, siryada Yordan mekin di bena sekropu. 34 Yordan mekin adinin bena sekropudi, tamupra keteng dangban tara benamnganen, Aznot-Tabor mutu benamu. Amutu dinin, beuopda, ormutu tara di Hukok mutu yana dipdongopu. Selatan tara kapu mutu tu yumada, Zebulon yala nesala, sun mutu tu wilimdonai kapu. Tonda, Keteng dangban tara mutu tu wilimdonaida, Asyer yala nesala sun mutu tu kapu. Tonda, keteng yakan tara mutu tu tep nengeda, Yordan me di wilipropu.

35 Ila gel beilya wiprapidi doromi ati arumda ake. Zidim mutu cap, Zer mutu cap, Hamat mutu cap, Rakat mutu cap, Kineret mutu cap, 36 Adama mutu cap, Rama mutu cap, Hazor mutu cap, 37 Tonda, Kedes mutu cap, Edrei mutu cap, En-Hazor mutu cap, 38 Yiron mutu cap, Mikdal-El mutu cap, Horem mutu cap, Bet-Anat mutu cap, Bet-Semes mutu cap, bokra karepupa dopropi. Amutu ila ati arum yuma cap, akati-akati doramya damai yumada, yambul-yambul ati arum kwamunge peda dorami. Akati yumada, sembilan belas ati arum di dorami.

39 Adeiki tara sekmap mutu si yumada, sun Naftali yala nesala sun mutu cadi, sun ayala nesalapu talepra kurami. Ila-ila ati arum cap, yambul-yambul ati arum dopra kuraminge cap yumada, amutu neitamai kwamu. Akwamu mutu tu yumada, Yosuadi bokra Naftali yala nesala cap, sun nyapsilip yuma capdi, amutu tuda talepra kunkamya tep karepupa, sun ayala nesaladi, amutu tu yuma sundi taleami.

Dan yala nesaladi talepra kunkami mutu tu tep, pepu upu

40 Mutu tu wilimdona tep, Yosuadi esu pen keca er sida, undi pel yoneitam bari dopu ngeda, ‘Dan yala nesala sun nyapsilip yumadi, amutu tu talepra kunkami’ tenen, amutu tu tep, bokra karepu. 41 Sun Dan yala nesala cap, sun nyapsilip capdi talepra kunkami mutu tu wilimdonaida, ake. Zora mutu cap, Esytaol mutu cap, Ir-Zemes mutu cap, 42 Shalabin mutu cap, Ayalon mutu cap, Yitla mutu cap, tonda 43 Elon mutu cap, Timna mutu cap, Ekron mutu cap, 44 Elteke mutu cap, Gibeton mutu cap, Bahalat mutu cap, 45 Tonda, Yehut mutu cap, Beneberak mutu cap, Gat-Rimon mutu cap, 46 Me-Yarkon mutu cap, Rakon mutu cap, tonda Yope mutu neitamai kamo mutu tu yumada, Yosuadi bokra karepupa, sun Dan yala nesaladi dopropi.

47 Dan yala nesala sun mutu tuda, yuk nengdi sun tu ton konum dopra kuramya cadi, ton tara mutu tuda, wangamupa men kurami. Ukuamupa, sun Dan yala nesaladi, Lesem mutu beidi, Lesem mutu ati arum dopra kurami nesala tep, sun damai bena popbisipidi, Dan yala nesaladi Lesem mutu kurami nesala tep, parang ya di popbisipidi, atu ton tamupra dalupra dopropidi, kange di ton cap talepra kurami. Dan yala nesaladi Lesem mutu dalupra dopropya tep, amutu sida yuknge karepi. Ada Dan mutu pepra, si sipepi. Ada, sun Dan yala nesaladi deiamupa, dadeipdanen yakarami nesala cadi, amutu si peda, sun co puna ngebo si Atem, er si sipepidi, ati doprapidi amutu neitamai kurami. 48 Adeiki sekmap ila-ila ati arum cap, yambul-yambul ati arum cap yumada, amutu neitamai kwamu. Akwamu mutu tu yumada, Yosuadi bokra, Dan yala nesala sun nyapsilip yuma tep, amutu tuda talepra kunkamya tep karepu. Ukupupa, sun Dan yala nesaladi amutu tu yuma sundi taleami.

Mutu tu bongmauanen, sirya gawal dakra bokeipunge tep, pepu upu

49 Amutu-amutu neitamai kwamu mutu tu yumada, sun Israel nesala konum bokra dopropi dingeda, ton tupa akapu mutu tuda, sun dopromi tu neitamaida, sundi bokra, nimi si Nun, erdi deiamu mi Yosua tep karepi. Karepipa, erda amutu tu talepra kuramu. 50 Allah Yahwehdi, “Angeda, ukupra kupkamrume,” pepra deiputopu, sundi Yosua tep, karepi. Ada, Allah men di, “Sun Israel nesalada, Yosuadi, ‘Amutu tuda, ne karepkunerume,’ pepra, moropre pangeda, atupu sundi er tepapu karepkamrume,” pepra deiamu. Tonda, ataru peda, Yosuadi, “Neda Efraim mutu tara kapu mutu si, Timnat-Serahpu mutupu karepkunerume,” pepra moropu. Moropupa, sun Israel nesaladi, amutu tupu dopra karepi. Karepipa, Yosuadi amutu neitamai yumada, talepra kuramu.

51 Adeiki tara sekmap mutu si yumada, Allah cap, nimi cap, antamna tep, opkal bol di dodina tenda ati, Allah er si eremna ati pumbon pel doramu ngebo Imam Elieser cap, nimi si Nun, erdi deiamu ngebo Yosua cap, tonda, Israel nesala yuma, sun yala yuk-yuk kuramitopu, sun nyapsilip yuk-yuk tep, deiyo kepra taleami nengdi, wepra deiamipa, aneng yumadi, ‘Ware yala nesaladi amutu tu dopropmengedi, kunkameng do?’ tenen, esu pen keca, er si undi pel dorami. Undi pel doramya deiki di, Allah Yahweh erdi, ‘Ukupkung’ tenen, petenkemna deiki di peipupa, apepra deiputopu kupra, amutu tu yumada, konum bokra deiami. Abongna pel donmai mutuda, Silo mutu kwamu. Silo mutuda, Allah er si eremna tep, keana dodin tenda ati domyai ake. Akati buplan bisi damai di apel donmai. Ange yuma ukupra pel donmaiyanen, undi epidi, amutu tu yuma bokra karenmaiyanen, konum kupi dingeda, konuma, amutu tu bongdana pel yumada dopra gawal daki.