Joshua 2

Yosuadi nimi butene neng wepra deipupa, Yeriko mutu dirberei upu

1Nimi si Nun, er mi Yosuadi nimi butene neng wepra deipu. Ada Kanaan mutu neitamai dinin, mutu si Yeriko mutu dirbenkamrenga tep, aneng wepra deipu. Yuk neng ton lap men pepu dinin, er dipapu abutene neng wepudi, Sitim mutu di dokotepu. Dokotepudi upepu. “Sun butene nengda, Kanaan mutu yuma dirbenkamrerume. Tonda, ila mambul ngeda, nimi ati weik doramyaida, Yeriko mutu dipetepkamrerume,” pepu. Upepupa, abutene nengda Yeriko mutu berei dingeda, nimidi co bo karepra tali-tali nyangdarami ner, er sida Rahab, er ati wekreidi ke taru tep akunmarei. Akati wekreiya deiyoda, ‘Yu nengdi popsenung’ tenen, inipra berei. 2Atumi lukunda dipapu, amutu nengdi, Yeriko mutu taleamnga deiyo ngebo tep pepi. “Uo, alukundada, Israel neng butene di, ‘Yeriko neng popkamepe’ tenen, nun kalengna tep ayan maprenge,” pepipa gekepu.

3Aupu gekepudi, er nyapu ton wepra deipupa, Rahab damai beidi, pepi. “Kan ati yanmareng neng ada, ‘Amutu nesala popbisipkamep,’ tenen, kael kemna cap, kalenga cap tep, nun mutu diryanmarenga cadi, adipapu aneng doupra duyankurume,” pepi. 4Upepi dinin, aner Rahabda abutene neng konum inipmaua cadi, Rahabdi tamupra pepu. “Teka nimi butene ton ne ati yanmareng dinino, anengda dan mutu neng do, ne walwale.

5Tonda sintara mapkopu taruda benmarengue. Ada, nun ati arum sirikai beilya domupkai buplanda, lukunda kapul men dekapmepu taru dipapu benmarengue. Sun benmarengu bisi ton men epmanua cadi, men kael kepmane. Atep, sun konum bendopmarungue. Dinino, sun adipapu menmena dombenkurume. Ukuprumudi, bisi neitamai di abutene neng antapmumdi, tomopkamrum do, gum do? Atep sepdara dombeso,” pepu.

6Rahabdi upepu dinin, menmena taru di, anerdi abutene sun Israel neng tep, “Nati deiki tara gat keca di dopmepu banai deikida, lyom manmaneng utopu keca kalapra deipmanuai di, akeca iriamu tara bena inipreso,” pepupa bena inipmarei. 7Anerdi sun Yeriko mutu neng tep, “Sun Israel neng butene benmarenguaida, ne walwale,” pepmaua tep, amutu jen talen neng gekepidi, sun Israel neng butene benmanto bisi sepdara benmai. Sun benmai bisida, nimidi, ‘Yordan me goupra ortara benkup’ tenen, barami bisi pua. ‘Sun Israel neng Yordan me ortara benkurenga cadi, adipapu bensekupe’ tenen, bei taruda, akati arum beilya paktapmai buplanda, Yeriko mutu nengdi dekdongopi.

8Abutene neng men maprei taruda, Rahabdi aneng damai alau ati beu. 9Beudi aneng tep pepu. “Ne kaele, amutuda Allah er si Yahwehdi sun Israel nesala tep, ‘Karepkamsene,’ konum teneramseu cadi, amutu neng yumada, sun tep kwar pio weik kurure. Ware neng do yuma, nun mutu neitamai kunge nesala yumada, sun Israel neng tep, kwar pio weik kuserepa, nun dipru sakseua tep, nun puto gum kupsere,” pepu. 10“Tonda, Mesir mutu di tapra bisi yakaramrum taruda, sun nai Allah er si Yahwehdi, ila mokon er si Teberau cepra deipupa, amokon neitamai dinin, kel-kel bisi yanamrum ngeda, nun konum gekepmepu. Tonda, Yordan me keteng yakana, ortara Amori mutu ila deiyo neng kepra taleamrei neng butene, sun si Sihon cap, Og cap, sun tara neng cap, sun Israel neng poamrumdi gawal dakrum ngeda, nun konum gekeramepu,” pepu.

11“Aupu konum gekepmepu taruda, nun duka di kuramepu ngeda, kware pio weike kupseupa nun dipru sakseu. Angeda tali tep gum dinin, tek sisi sun nai bo Allah er si Yahwehda, ime cap, tuai cap yuma talena ngebo kurure,” pepu. 12Upepu dingeda, aupu ton pepu. “Ange tep nengeda, nedi sun tep bicau tenen, melipra ne ati inipmasen cadi, ne moropkusene. Sun nai bo Allah Yahweh, er si deiki di pepkunerume, ‘Kan cap, kan ati nesala cap, kan nyapsilip yuma capda, bicau tenepra melipkamepe,’ pepra deipkunerume. Sundi ne tara nesala tep kaukepsemumdi, men popkamserume. Nedi, ‘Uda, sun tek sisi kaukepkamsengedi men popkamsenge, teneptenedi kael kepkamne’ tenen, peten kecapu keteneipkamnerume,” pepu.

13“Ukupmumya deiki di, ne nai cap, nanin cap, tonda ne weitapsilip cap, tonda, nun tamna nesala yuma capda, sun Israel nengdi men popkamsenge teneptene. Tonda, sun melipsemumpa, yuk nengdi men poptapkamsenge. Utenena tep moropsene. Ange tep nengeda, ne kael kepnedi, teka tenepkamna tep, peten keca tenpu karepkamnerume,” pepu. 14Rahabdi, upepupa, abutene nengdi tamupra peprei. “Kandi melipmaumumdi lyepmaseremtopu, nunda kandi moropmaseremtopu, kan tara neng yuma lyepkamepe. Amutu neitamai kunmanem kecada, kandi Yeriko mutu deiyo neng deiki men lap pepmasereme. Ukupmamumnya tep nengeda, amenda taru nun nai bo Allah er si Yahwehdi, amutu yuma nun karepsere taruda, nundi kan cap, kan nyapsilip yuma cap tep, men popkamsepe.

Nundi bicau tenepra telep kupra deipkamsepe. Men popkamepe. Nundi pepmanemtopu tek sisi kupkamneme. Kandi melipra lyepmaseremtopu, nun peda amenda taru kan cap, kan tara neng cap melipra lyepkamsepe. Nundi moropsemumtopu, apepra deipmakenem upu deiki di, peten kemna utopu keca karepkeneme. Tek sisi kan cap, kan tara neng cap men popkamsepe,” peprei.

15Rahabdi amutu bura tara beilya domyaida, er ati abeilya deiki ati kuramnga cadi, aupu peprei pangeda, adipapu abutene neng jendela bon bisi di tapu gerekra dokotepupa, bura saka berei. 16Ukupu taruda, Rahabdi aneng tep pepu. “Amutu deiyo nengdi, ‘Sun men epkamsenga’ tenen, sepdaro mutu dampu beremumdi, komuni weneri deiki di bena inipkamarerume. Ukupmaremumpane, amutu talepu ngebodi, er nyapu bokeiprepa enmasenga, tamupra amutu yangopda, sun adipapu benkamarerume,” pepu.

17Upepupa anengdi tamupra Rahab tep peprei. “Telepe kan pepmaserem utopu kupkamkeneme. Ukupkamnem dinin, nun pepkukenem upuda tek sisi kupkamreme. 18Dinino, apepkunem ngepuda, kael kepmemdi tek sisi kupkamrume. Gum dingeda, nun arup taru ‘Ukupkamneme,’ pepmanem upuda, tapnemdi, men kupneme pangeda, talipu kupkamreme. Ada, amutu nimi poryankupe taruda, peten kemna tep, yapi bi tapu jendela bisi bon, nun dokotepmaseremai apu gerekamrume. Tonda, ataru peda, kan nai, kan nin, kan tamna nesala yuma bupra kan atipu deipkamarume. Ataruda, sun yukai kupmengopda, men lyepsetepe,” peprei.

19“Tonda ukupmanto, akati wekmange nesala ton bura tara wekra bengepa, Israel nengdi popmengopda, angebo er pe mali kupra deiki di, sundi er tep popkamenge ngeda deiyoda, ernge pua. Er popkamenge ngeda, nun deiyo guma tep nun deiki ikin men kuptue. Sundi ton, ‘Apopmengenge dano?’ men peptume. Dinino, kan ati neitamai kunge nesala yumada, yuk nengdi popmenge pangeda, nun butene ikin kupkamsere,” peprei. 20“Tonda, nun butene di amutu diryanmanemnge tep, kandi nimi yuk neng damai nun kunmanem keca lap pepmem pangeda, kan moropremnge cap, nundi kan lyemna tep, ‘Ukupra lyepkamseneme,’ pepra, pedina upu pepmanemnge capda, tapkamneme. Angeda dukdongopra, sun tep men lyepkamsepe,” peprei.

21Sun abutene neng cap, Rahab cap, upu konum talepi dingeda, Rahabdi, “Yo, sundi pepmanererum ngeda kupkamane. Sun dabereso,” pepupa aneng tapupa berei taruda, anerdi yapi bi tapu dopra, aneng jendela bon bisi bereiyai apu gerekdongopu. 22Yeriko mutu kael kemna tep diryanamrei neng butene, adipapu mutu dam komuni weneri bena inipreipa, Yeriko mutu deiyo ngebodi er nyapu doproipupa, amutu bisi yuma enmaianen, sun Israel neng butene men epiya tep, sundi tamupra Yeriko mutupu bei.

23Yeriko mutu neng konum tamupra bei pangeda, abutene neng amutu dam di kwerepra yarei dingeda, Yordan me goupra, ortara berei. Nimi si Nun, er mi Yosua kuramngai bereidi, sun kuramreinge yuma bena jenek kupra peprei. 24Sun anengdi upeprei. “Tek sisi amutu yumada, nun nai bo Allah er si Yahwehdi nun tep karepkamsere. Amutu kunge neng yumada, nun tep kwar pio kurure. Atep, sun nong cap, puto capda, konum boun kupmare,” peprei.