Jos 20 | XteSC | STEP | Uda, Allah Yahwehdi Yosua tep pepu.

Joshua 20

Israel nesala mangkau di, yuk neng popmengepa, kwangdana tep men popmanto mutu ton ketenepra dominge wengbana tep seku upu

1 Uda, Allah Yahwehdi Yosua tep pepu.

2 “Kandi sun Israel nesala tep, bena pepkurume,” pepu.

Ada, men taru ne Allahdi, kan damai pena tep, Musa damai pepra deipsipa, Musadi kan damai konum lap pemkeu. Ada, ‘Ware ngebo do yuma, sun Israel nesala kankan di, mangkau di sun kayapu yuk neng popmenge nesala, kwangdana tep popmanto neng men wengbana tep, ati arum ton ketenepra deipkamrume,’ peiamsi. ‘Amutuda, mankau di yuk ngebo popredi kurapra, amutu bere pangeda, yuk nengdi kwangdana tep, angebo men ponkamnunge. Deiyoda, kwangdangna tep nimi men popmanto mutu ton ketenepra deipkamrume,’ peiamsi. Atep ukutaruda, kandi ukuna tep, amutu ton wepra deipkurume. 3 Mangkau di yuk ngebo popre ngeboda, apopmare ngebo, ‘Uo, er tamna nengdi kwangdangna tep, tamupra popnenung’ tenen, kwar kuprepa, adipapu sepdara beredi, aketenepra deipkamrum mutupu wengbankamre. Amutu konum wekyopda, men di popmau ngebo, er tara nengdi angebo kwangdangna tep, nengeda, sun anengdi akati arum wekra adipapu angebo men poptenge.

4 Mangkau di nimi popmare ngebo, kwar kuprepa, sepra banmaryanen, awepra deipmum mutu neitamai di, tenpu ati arum ton wekyopda, amutu neitamai bana tep, buplan wengbana bisi, ila besi buplan damai kalengmengedi, upu lepsisiskra derina tep, deiyo talepra kunung neng, sun damai beredi, er kupmare keca yuma bena lap pepra derinkamre. Ukuprepa, amutu talepra kuramenge deiyo neng, sundi er angebo tep, upepi. ‘Telepe, kanda amutu bememdi, bena tali kange doupra kunkurume,’ pepmengaipu beredi, aceipu bena kunkamrure. Yuk nengdi kwangdana tep, ‘Angebo popkupe’ teneptenga peda, nimi popmare ngebo, aketeneipkamrum mutu konum wekyopda, sundi er pio men poptenge.

5 Tonda, nimi popmarepa, depmare ngebo, er tara nengdi, ‘Apopmare ngebo popkamap’ tenen, dombanmanganen, amutu benga peda, amutu neitamai kuramenge nesaladi, ‘Angeboda ayan kwapmare,’ pepra, men doupra yakankamnunge. Ada, ‘Yu di angebo popnung’ tenen, sundi lelipdongopmengepa, men ponkamnunge. Deiyoda, angebo yuk kupmarepa, ‘Ne kaboda popkune,’ pio men tenepmarur dinin, er mangkau di kundenkap popmarepa, depmarura tep, er angebo doupra katuaida, pio men deriryakankamrume.

6 Er angeboda, nimi popmarya deiyo ngebo, tupa amutu neitamaipu kuramrepane, nesala yuma wekra dinmangai di, upu talepmengedi, lepsisikra telep kudinkamnunge. Tonda, imam neng yuma, sun ila deiyo ngebo konum depre pangeda, angebo erda, dan mutu kuramrur dinin, tapra benamrur do? Atapra benamre mutupu adipapu tamupra yakankamrure. ‘Angeda, ukunkamrume,’ pepra, sun damai bena lap pepkurume.

Upepra Allah Yahwehdi, Yosua tep pepu.

7 Aupu pepu pangeda, Israel nesala sundi, sun pe Israel nesala mangkau di popmengedi wengban neng, kwangdana tep men popmanto mutu ton, weneri ketenepra deipidi dorami. Ada, Yordan mekin, keteng dangban tara kwamu mutu ton neitamaida, ketenepra deipi. Amutu sida ake. Ada Naftali yala nesala sun mutu tuda, Kedes mutuda, iknapi dam tarada, Galilea mutu deiki ketenepra deipi. Tonda, Efraim yala nesala, sun mutu tu neitamaida, iknapi dam tara Sikem mutu deiki ketenepra deipi. Tonda, Yehuda yala nesala, sun mutu tu neitamaida, Ebron mutu deiki ketenepra deipi.

8 Ange utopu, Yordan me duman ortara keteng yakan tarada, me wenengapu kwamu mutu deikida, keteng yakan tarapu dinin, Yerikho mutu damai tarada, mutu erepra bukamu mutupu ketenepra deipi. Mangkau di kunmankap, er kabo popmare ngebo wengbana tep mutu sida, ake. Ruben yala nesala sun kurami mutu neitamaida, Bezer mutu ketenepra deipi. Amutuda, nimi weik kuna gumai. Ada me mokon cap, co palpal cap, gum kwamu mutu neitamaida, ketenepi. Ton ngeda, Gad yala nesala, sun kurami mutu neitamaida, mutu si Ramot mutu ati arum dinin, Gilead tara neitamai di ketenepra deipi. Tonda, Manasye yala nesala sun kurami mutu neitamaida, Galon mutu ati arum dopra keteneipi. Amutuda, Basan mutu neitamai, amutupu wepra keteneipi. Amutu yumada, Manasye yala nesala, sundi talerami mutu neitamaipu keteneiami.

9 Amutu ati arum domya yuma deiyoda, ake. Ada, ware ngebo do, Israel yala nesala do, yuk mutu nimi bo nengdi do, sundi mangkau di kunmankap, er kabo popmare ngebo wengbana tep mutu, konum wekyopda, angebodi mangkau di popmare ngebo, er tara nengdi kwangdangna tep, nimi popmare ngebo, adipapu men poptenge. Ada, Israel yala nengdi, nimi ton mangkau di popmengopda, aketeneipi mutu, nimi men popmanto mutu menmena bena wengbarami. Tonda, sun nimi bo neng yanamengepa, Israel nesala cap, tonpa kuramenge neng, sun pe mangkau di nimi ton popmengopda, sun ton, kwangdangna tep, nimi men popmanto mutu menmena bena wengbarami. Ada, nimi men popmanto mutu ketenepra deipi mutupu wengbarami. Amutu yumada, sun pe Israel nesala dipapu ketenepra deipi. Ada, mangkau di kunmankap, er kabo popmare ngebo tep, ‘Popkamap’ tenen, domange ngebo, amutu neitamai beryopda, pio teleppu kunkamrure. Ukupra amutu neitamai bena kuryopda, men ponkamnunge. Tonda, upu bongdeirina deiyo nengdi, er angebo tep, nesala weik wekmangai di, upu lepsisikra telep kudinkamnunge. Adipapu men ponkamnunge.

Allahdi, ‘Ukunkamrume,’ pepra, deipupa, sun Israel nesaladi, nimi men popmantoai, telep ati arum ketenepra deipi.