Jos 21 | XteSC | STEP | Tenpu tumi ton sun Lewi yala nesala nyapsilip yuk-yuk tep, deiyo kepra kurami neng yumada, Kanaan mutu tara dinin, Silo mutu bei. Ada Imam Elieser cap, nimi sida Nun, erdi deiamu mi Yosua cap, tonda yuk Israel yala nesala sun nyapsilip yuma tep, yuk-yuk deiyo kepra kurami neng cap, sun damai bei.

Joshua 21

Lewi yala nesala sun kunkamya tep mutu tu bokra karepi upu

1 Tenpu tumi ton sun Lewi yala nesala nyapsilip yuk-yuk tep, deiyo kepra kurami neng yumada, Kanaan mutu tara dinin, Silo mutu bei. Ada Imam Elieser cap, nimi sida Nun, erdi deiamu mi Yosua cap, tonda yuk Israel yala nesala sun nyapsilip yuma tep, yuk-yuk deiyo kepra kurami neng cap, sun damai bei. 2 Bei dingeda upepi. “Nun Lewi yala neng tep, Allah Yahwehdi Musa damai konum bena peipu. Peipupa, Musadi aupu pepra deiamseue. Ada, ‘Sun kunkamrum ati arum ton, sun kayapu neng yuk Israel yala nesaladi bokra karepsenge taruda, ataru dipapu, sun amutu neitamai tu talepra kumumdi, amutuda sun domba bisam peinkamrume,’ pepra, deiamseue. Atep nengeda, amutu tu cap, akati arum cap karepkuserume,” pepra, Lewi yala nengdi, adeiyo neng damai bena lap pepidi moropi.

3 Upepra bena moropipa, sun kayapu yuk Israel yala nesala yuma cap, gekepi dingeda, “Jo, telepe, nun nai Bo Allah Yahweh, er pedi, ‘Ukupkamrume,’ konum pepra deiamnga cadi, apepra deiamutopu kupkupe,” pepi. Ada, sun Israel yala nesala tep, Allahdi kareamupa, sun talepra kurami mutu tu ton wilipra, sun kayapu neng, Lewi yala nesala sun bung talepra kunkaminge tep karepi. Amutuda, ila-ila ati arum dopra kurami mutu tu cap, tonda amutu tu neitamaida, domba bisam cap, tonda sapi bisam peinai cap tep, amut tu bokra karepi. Karepipa, amutu talepra peipra kurami.

4 Atep, Yosuadi, ‘Dan yala nengdi menmena mutu tu dopropkameng’ tenen, esu pen keca er sida undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.}, akeca dopra pel dopu pangeda, menmena yala si katuai kupu ngeda, Kehat yala neng sun yala si katuai kepu. Ada, Lewi yala nesala dinin, Imam Harundi deiamu ngebo, er si Kehat, er tara nyapsilidi menmena gonga kepra, sun talepra kunkami mutu tu neitamaida, doropi. Ada, topnebari tiga belas (13) ati arum dopra kurami mutu. Amutuda, sun Yehuda yala nesala cap, Simeon yala nesala cap, tonda Benjamin yala nesala cap, sundi talepra kurami mutu tu, bokra karepipa doropi. Amutu sun talepra deiyo nesala kurami.

5 Ange utopu, Kehatdi deiamupa, deipdanen yakarami nesala dinin, mutu tu kapul men dopropi nesala yumada, ati arum morokyo di dutara, sepuluh (10) dorami mutu ton dopropi. Adoropi mutuda, Efraim yala nesala cap, tonda, Dan yala nesala cap, tonda Manasye yala nesala dinin, neitamai bokra dana tara ngepu, sun aweneri yala nesaladi talepra kurami. Amutu neitamaida, tu wilipra karepipa, Lewi yala neng dinin, Kehat yala nengdi doropi. Ada, keteng dangban tara, Yordan me goupra, ortara mutu tu doropidi, kurami.

6 Ange utopu, Lewi yala neng dinin, Gersondi deiamupa, deipdanen yakarami nesala, er tamna neng sun nyapsilip, akati arum topnebari, tiga belas (13) dopra kunkami mutu doropi. Adoropi mutu tuda, Izakar yala nesala cap, Asyer yala nesala cap, Naftali yala nesala cap, tonda Manasye yala nesala dinin, ortara nesala cap, sun yumadi talepra kurami mutu tu neitamai di, wiliprapidi, bokra karepipa, sun Lewi yala nesala dinin, Gersondi deiamu nyapsilip yuma di doropi. Sun kurami mutuda, Yordan me goupra, ortara keteng yakan tara mutu karepipa dopropi. 7 Ange utopu, Lewi yala neng dinin, Meraridi deiamupa, deipdanen yakarami nesala, er tara neng sun nyapsilipda, amul di dutara yuma, dua belas (12) ati arum dopra kurami mutu neitamai tu dopropi. Adopropi mutu tuda, Ruben yala nesala cap, Gad yala nesala cap, tonda Zebulon yala nesala cap, sundi talepra kurami. Amutu tu neitamai di wiliprapidi, bokra karepipa Kurami. Merari er tara nesala, sun nyapsilippu, atu dopropi.

8 Uda, adeiki tara sekmap mutu tu cap, ati arum capda, sun Israel yala nesaladi, sun ati arum dopra kurami mutu cap, tonda sapi bisam cap, domba bisam cap tep, peiarami mutu tu cap yumada, wilipropidi bokra karepipa, sun Lewi yala nesaladi dopropi. Amutu tu dorona tep nengeda, Yosuadi esu pen keca er si undi pel dopka deiki di, sun Lewi yala neng, sun nyapsilipdi, amutu tu cap, akati arum cap dopra kurami. Ange yumada, menop taru Allah Yahwehdi, “Angeda ukupra pel dopmumdi, amutu neitamaida dopropkamrume,” pepra, deiamutopu, bokra karepipa, sun Lewi yala nesaladi dopropi.

Harundi deiamu ngebo Kehat, er yala nesala sun talepra kunkami mutu tu tep, bokra karepi upu

9 Uda, Lewi yala neng, sun nyapsilip ati arum dorona tep nengeda, sun Yehuda yala nesala cap, Simeon yala nesala cap, sundi ati arum dopra kurami mutu neitamaida, topnebari, tiga belas (13) mutu ati arum wiliprapidi, dopra sun Lewi yala nesala kunkamengai tep karepi. Amutu ati arum sida sekamape. 10 Amutu ati arumda, imam Harunda, erdi deipupa, dadeipdanen yakarami nesala tep karepi. Sun peda, Lewi yala neng dinin, nimi si Kehatdi deipupa, deipdana yakaramidi kurami nesala, sun nyapsilip yuma tep karepi. Ada, Yosuadi, undi pel dopupa, menmena adipapu gonga kepra, sun si katuai kepka cadi, sun kunkami mutu, amutu tupu yumada dopropi.

11 Kehat er tara nesala, sun nyapsilip tep karepi mutu ati arumda ake. Ada, Kiryat-Arba ati arum dopra karepi. Uda, akati sida Hebron ton perami. Amutu tuda, Yehuda tara dinin, iknapi tara neitamai kwamu. Nimi si Arba perami ngeda, angebo erdi deiamu mi, er sida Enak kuramu. Enak, er nai boda, Arba kuramu. Tonda, amutu si Kiryat-Arba, dana-dana tara kwamu pala mutu tuda, sun Yehuda yala neng cap, Simeon yala neng capdi, sun sapi bisam cap, domba bisam cap, peina mutu tu neitamaida, go weik kwamu mutu ton bokra, sun Lewi yala nesala neitamai dinin, Kehat yala neng tep karepi. 12 Dinino, akati Kiryat-Arba ngeda, meneng damai kwamu go weik tu cap, tonda, akati arum dana-dana tara yambul ati arum dominge capda, menop taru, Kalep tep konum kareami. Amutu tuda, Kalep er mawange kuramnga tep nengeda, Kehat er tara nesaladi, amutu tu neitamai ton men dopropi.

13 – 14 – 15 – 16 Tonda, imam Harundi deiamu ngebo Kehat, erdi deipupa, dadeipdanen yakarami nesala, er tara neng tep, ton cap tapakra karepi mutu sida ake. Ada, Libna mutu cap, Yatir mutu cap, Estemoa mutu cap, Holon mutu cap, Debir mutu cap, Ain mutu cap, Yuta mutu cap, Bet-Semes mutu cap, tonda Arba mutu cap karepi. Tonda, ukutaru peda amutu er si tep, Hebron mutu penunge. Tonda, amutu-amutu dana-dana taru kwamu sapi bisam cap, domba bisam cap peina tep pala mutu tu ton karepi. Uda, Hebron mutuda, ‘Nimi mangkau di yuk ngebo popmange nesala bengedi, telep kupra kunkameng’ tenen, amutu neitamai tenpu ati arum ketenepra deiaminge ton kwamu. Amutu neitamaida, popmare ngebo, er tara nengdi, nimi mangkau di popre ngebo, kwangdangna tep men popmanto mutu kuramu. Amutu tara yumada, Yehuda yala nesala cap, Simeon yala nesala cap, sundi amutu tu talepra kurami dinin, ton tarange wilipra bokra karepipa, Lewi yala nesala kan-kan dinin, Kehat er tara nesaladi dopropi.

17 – 18 Ange utopu, Benyamin yala nesaladi talepra kurami mutu tu neitamai di, dum bari mutu tu taleaminge dopra, sun Lewi yala nesala dinin, Kehat er tara neng tep wilipra karepi. Atalepra kurami mutu sida ake. Ada, Gibeon mutu cap, Geba mutu cap, tonda Almon mutu cap, Ananot amutu tu cap yumada, bokra sun kayapu neng tep karepi. Aneitamai domba bisam cap, sapi bisam cap peirami mutu tu ton karepi. 19 Amutu cap, akati-akati arum cap, wilipra karepipa, imam Harun, erdi deipupa, dadeipdanen yakarami nesaladi dopropi ngeda, denge weik topnebari tiga belas (13) ati arum dopropi. Tonda, akati arum dana-dana tara kwamu pala mutu tu ton dopropi. Ada sun peirami keca, domba cap, sapi cap, sun jen karena tep, amutu tu ton wilipra karepipa, dopropi.

20 Uda, Kehatdi deiamupa, sun yuk deipdanen yakarami nesala dinin, sun yumada Lewi yala nesala, sun nyapsilip kurami. Anesalada, mutu tu men dopropmai nesala sun nyapsilip tep, Efraim yala nesaladi dopropi mutu tu neitamai di bokra, Lewi yala nesala tep karepi. 21 Anesala sun nyapsilip tep karepi mutu neitamaida, Sekem ati arum ton bokra karepi. Uda, Sekem mutuda, nimi mangkau di yuk ngebo popmange nesala bengedi, telep kupra kunkameng mutu ketenepra deipinge ton kwamu. Amutu neitamaida, popmare ngebo, er tara nengdi kwangdangna tep, nimi mangkau di popre ngebo, er men popmanto mutu ton akwamu. Tonda, amutu damaida, sun sapi bisam cap, domba bisam cap, peina tep nengeda, tu go weik akwamu mutu bokra karepi. Amutu tu yumada, Gezer mutu damai kwamu. Tonda ange yumada, Efraim yala nesala kurami tara, iknapi mutu damai kwamu.

22 Ange utopu, Efraim yala nesala sundi talepra kurami mutu neitamai di, amutu tuda, butene mutu ton karepi. Akarepi mutu sida ake. Bet-Horon mutu cap, Kibzaim mutu cap, tonda amutu damai kwamu pala tu, sun peirami keca betei jena tep, karepipa dopra talerami. Akati-akati arum neitamai karepinge yumada, dumbari di (4) karepi. 23 – 24 Tonda ange utopu, Dan yala nengdi talepra kurami mutu tu dopra karepi. Dan yala nesalada, sun dipapu tu talepra kuramidi ati arum dorami mutu karepinge sida ake. Ada, Elteke mutu cap, Gibeton mutu cap, Ayalon mutu cap, tonda Gat-Rimon mutu cap, adum bari (4) ati arum doramyada, Gad yala nesalapu talepra kurami mutu tu dopra karepipa, sun Lewi yala nesaladi dopropi.

25 Tonda ati arum butene ton, keteng dangban tara dopra kurami mutu, ati arum sida ake. Taanakh cap, tonda Gad-Rimon mutu cap, akati arum dopra kurami mutu tu talepra kurami ngeda, karepipa dopropi. Ada, Manasye yala nesala dinin, dana tara gungda, sundi talepra kurami mutu tu bokra, sun kayapu neng Lewi yala nesala tep karepi. 26 Atep nengeda, sun Lewi yala nesala dinin, Kehatdi deipupa, dadeipdanen yakarami neng dopropi ati arumda, morokyo di dutara yuma, (10) sepuluh ati arum cap, amutu dana-dana tara kwamu pala tu cap, sun domba bisam cap, sapi bisam cap peinkami tu tep, ange ton bokra karepipa, dopropi.

Gerson yala nesala cap, Isakar yala nesala cap yumadi, talepra kunkami mutu tu tep, bokra karepi upu

27 Lewi yala nesala dinin, ton nesalada, Gersondi deipupa, deipdanen yakarami nesala, sun nyapsilip tep nengeda, ati arum dopra kurami mutu tuda, butene mutu bokra karepi. Ada, Manasye yala nesala dinin, neitamai di dana tara gung, anengda sundi talepra kurami mutu ati arumda, butene mutu ton kuramidi taleami dinin, amutu tuda dopra, Gerson yala nesala sun nyapsilip kunkamya tep karepi. Amutu ati arum dopra kurami mutu damaida, sun domba peina cap, sapi bisam peina capda, go weik kwamu mutu tu ton karepi. Amutu sida, Bashan tara neitamai kwamu dinin, ati arum sida, Golan mutu cap, tonda Beestera cap karepi. Uda, Golan mutu damaida, ‘Nimi mangkau di yuk ngebo popmange nesala bengedi, telep kupra kunkameng’ tenen, ketenepra deiami mutu ton kwamu. Amutu neitamaida, popmare ngebo, er tara nengdi kwangdangna tep, nimi mangkau di popre ngebo, er men popmanto mutu akwamunge peda, sun Gerson yala nesaladi dopropi.

28 – 29 Tonda, Izakar yala nesaladi talepra kurami mutu ton bokra, Gerson yala nesala tep karepi. Akarepi mutu sida ake. Kisyon mutu cap, Dobrat mutu cap, tonda Yarmut mutu cap, En-Ganim mutu tu cap, bokra karepi. Amutu ati arum dopra kurami mutu neitamaida, sun domba peina cap, sapi bisam peina capda, go weik kwamu mutu tu ton karepipa dopropi.

30 – 31 Tonda, Asyer yala nesaladi talepra kurami mutu ati arumda, dumbari mutu ton bokra, sun kayapu neng, Gerson yala nesala tep karepi. Adumbari mutu sida ake. Misal mutu cap, Abdon mutu cap, tonda Helkat mutu cap, Rehob mutu tu cap, ange yuma karepi. Amutu ati arum dopra kurami mutu neitamaida, sun domba peina cap, sapi bisam peina capda, go weik kwamu mutu tu ton karepipa dopropi. 32 Tonda, Naftali yala nesala, sundi talepra kurami mutu ati arumda, weneri mutu talepra kurami dinin, sun kayapu neng, Gerson yala nesala tep bokra karepi. Akarepi mutu sida, ake. Ada, Hamat-Dor mutu cap, Kartan mutu cap, tonda, Galilea tara neitamai dinin, ati arum sida, Kedes mutu cap dopra karepi. Amutu tu Galilea tara neitamai ada, Israel nesala mangkau di kundenkap sun kayapu popne neng doupra, ‘Popmare ngebo er tara nengdi menmena kwangdangna tep men popmanto kuna tep, angebo er derirbana tepai ketenepra deiami mutu dam tara kwamu tu dopra karepi.

33 Atep nengeda, sun Lewi yala nesala dinin, Gerson deipupa, dadeipdanen yakarami neng cap, sundi deiami nyapsilip cap dopropi ati arumda, topnebari (13) tiga belas ati arum cap, amutu dana-dana tara kwamu pala tu cap, sun domba bisam cap, sapi bisam cap peina tu tep, ange ton bokra karepipa, dopropi. 34 – 35 Lewi yala nesala tupa tapmai neng ada, Meraridi deiamupa, deipdanen yakaramidi kurami nesala, sun nyapsilip tep nengeda, Israel yala nesala dinin, Zebulon yala nengdi, sun ati arumda, amul di dutara yuma, dua belas (12) kurami mutu tu neitamaipu dinin, bokra karepipa, Merari yala nesaladi dopropi. Adumbari ila ati arum mutu sida ake. Yokneam mutu cap, Karta mutu cap, tonda Dimna mutu cap, Nahalal mutu cap bokra karepi. Ada Zebulon yala nesala sunda ati arum dumbari mutu dopra kurami mutuda, bokra sun kayapu Merari yala nesala, sun nyapsilip tep karepi.

36 – 37 Ange utopu, Israel yala nesala dinin, Ruben erdi deipupa, dadeipdanen, yakarami nesaladi, sundi deiami nyapsilipdi kurami mutu ati arum neitamaida, dumbari (4) mutu tu dopropidi, sun Gerson yala neng tep, sun mutu tu bokra karepipa, dopropi. Amutu ati arum dopra kurami mutu neitamaida, sun domba peina cap, sapi bisam peina cap mutuda, go pio weik kwamu mutu tu ton karepipa dopropi.

38 – 39 Angetopu, sun Israel nesala dinin, Gad yala nesaladi talepra kurami mutu, ati arum peda, dumbari (4) mutu tu talepra kuramyanen, bokra sun kayapu neng, sun Merari nesala tep karepi mutu sida ake. Mahanaim mutu cap, Hesybon mutu cap, tonda Yaezer mutu cap, Ramot mutu cap karepi. Ramot mutu tuda, Gileat tara neitamai kwamu. Tonda, Mahanaim mutuda, ada Israel nesala mankau di kunmankap, sun kayapu popne neng doupra, ‘Popmare ngebo, er tara nengdi yu kuprepa, angebo tep kwangdaknedi, er men popmanto kunkamre’ tenen, angebo dopra derirbana tep, ketenepra deiami mutu tara, aca kwamu ati arum kupka cadi, akati ton bokra, sun kayapu neng tep karepi. Atep nengeda, Gad yala nesala sunda, sun ati arum dumbari (4) mutu dopra kurami mutuda, bokra sun kayapu neng, Merari yala nesala sun nyapsilip tep karepi.

40 Atep nengeda, sun Merari yala nesaladi dopropi ati arumda, denge weik amul dam di dutara yuma (12) dua belas mutu dopropi. Sun Merari yala nesalada, Lewi yala neng, sun gerekdanen yakan neng kuramya cadi, sun peda Lewi yala nesala kuramidi, sun kayapu nesaladi karepi mutu ton dopropi.

41 – 42 Atep, sun Israel yala nesala yumadi talepra dorami ati arum cap, mutu tu cap, denge pio weik empat puluh delapan (48) mutu dopra kurami dinin, akati-akati arum yumada, dopra karepipa, sun Lewi yala nesala adipapu dopropidi, talepra kurami. Adopra kurami mutu tuda, bokra sun kayapu Lewidi deiamupa, deipdanen yakarami nesala, sun nyapsilipdi talepra kunkamya tep, bokra karepi. Amutu tu neitamai yumada, domba bisam cap, sapi bisam cap, peina tep mutu tuda, go weik mutu tu kwamupa, sun kayapu neng di bokra karepi.

Allah Yahwehdi, “Kanaan mutuda, ne mawa neng, Israel nesala, sun mutu sisa acapu kunkamre,” pepu upu

43 Ange utopu, Allah Yahwehdi er mawa nesala, sun Israel neng, yanipra benami mutu tu yumada, dopra sun pe Israel nesalapu karepu. Ada, Allah er pedi pedina upu deiki di, “Kanaan mutuda, tek sisi karepkamsene,” pepra, sun co puna neng tep pepra deiamutopu karepu. Amutu neitamai yuma karepu pangeda, er mawa nesala, Israel nengda amutu konum wekyopda, bouna di dim pepra talepidi amutu neitamaipu kurami. 44 Ukurami pangeda, Allah Yahwehdi Israel nesala, sun co puna neng tep, “Ukupkamsene. Ada, sun amutu bemumdi kumum pangeda, ne ila puto deiki di erepra talepsenepa, sunda amutara kumumdi, dim pepra teleppu kunkamrume,” pepra deiamutopu, sun yumada, teleppu kurami. “Sun pona tep podana neng ton, yangedi men popkamsenge,” peiamutopu, teleppu kurami. Ada, Allahdi sun Israel nesala deiki puto karepupa, sundi aKanaan mutu kurami nesala yuma tep, popbisiramya deiki di, teleppu kurami. 45 Atep nengeda, Allah Yahwehdi sun Israel nesala, er nyapu sisa tep, “Angeda ukupkamsene,” pepra deiamu upuda, tenpunge peda, ton men banarure. Apedina upu pepra deiamutopu, kupyakaramu. Tenpu upu peda, men gum kurure. “Apeiamutopu kurure,” pepu.