Jos 23 | XteSC | STEP | Keteng tamun pio weik mapyakaramyanen, amenda taruda, Allah Yahwehdi sun Israel nesala tep, er ila puto di pio tep taleamupa, sun Israel nesala dana-dana tara kurami neng yumada, bouna di teleppu kurami. Ukurami taruda, Israel nesala sun podan nengdi, sun tep ton men yana dumami. Ukupyakaramya deiki dipapu, Yosua konum wisi deipu.

Joshua 23

Yosua wisi konum deipka tep, Israelda, Sikhem mutu wekra gekenmaiyai di, upu sirya pepu

1 Keteng tamun pio weik mapyakaramyanen, amenda taruda, Allah Yahwehdi sun Israel nesala tep, er ila puto di pio tep taleamupa, sun Israel nesala dana-dana tara kurami neng yumada, bouna di teleppu kurami. Ukurami taruda, Israel nesala sun podan nengdi, sun tep ton men yana dumami. Ukupyakaramya deiki dipapu, Yosua konum wisi deipu. 2 Ukupka tep nengeda, Yosua erdi Israel yala nesala dana-dana tara akurami neng yuma cap, Israel nesala sun nimi deiyo neng cap, sun upu bongdina deiyo neng cap, jen talena deiyo neng cap, sun yuma tep, “Ukutaruda sun yuma bupra yankurume,” pepra kongpepupa, sun yuma er damai yai pangeda, upepu.

3 “Ne nai yapuo, ukutaruda, ne konum wisi deipne. Sun Israel nesalao, sun nai bo Allah Yahwehdi, sun cap kikiman kuramupudi, Allah erdi nimi men kupmanto pel yala yumada, akunmarum mutu Kanaan tara neitamai, atara kurami nesala yuma tep nengeda, sun damai doramupa diramrume. Ada, er puto kareamseupa, sundi sun dana-dana tara kurami neng tep, popbisipmarumdi, konum gawal dakrume. Ange yumada, sun asuru di konum diramrume. Allah Yahweh er dipapu, pio puto di melipra pel doramseue. Allah er pedipapu sun melimna tep, er ila puto di, sun deiki deriramupa, sundi pio pe deipra, sun podan neng tep, popra gawal dangamrume.

4 Ne Yosuadi, Kanaan mutu neitamai kurami nesala yuma, popra gawal dakeipsidi, sun talepra kurami mutu tu neitamai yumada, sun Israel yala nesala yuma tep, amutu tu yumada, dopropsidi sun tep konum bokra kareamsisi. Sun tep kareamsisi mutu tuda, Yordan me goupra, ortara keteng yakan tara di, dipdongopra benamnganen, keteng dangban tara, ila laut mokon damai di bena sekropu. Tonda, ne Yosua dipapu Kanaan amutu neitamai tupa akunmang neng, sun kunung mutu tu peda, konum dopropsidi bokra, sun Israel nesala tep kareamsisi. Adeiki di, amutu tu neitamai yumada, sun Israel nesaladi talepra kurume.

5 Israel nesala, sun nai bo Allah Yahweh, erdi melimserepa, Kanaan mutu tupa akunung nesala yumada, poprapmumdi enepropmumpa, bendopkamenge. Ada, ukupmanto, sun Israel nesaladi, Kanaan mutu neitamai kunung nesala tep, mar popdanen bamum taruda, sun Kanaan mutu nesala yumada, sun damai di bura sakra bendopkamenge. Bendopmengopda, Allah Yahwehdi, sun tep pedina upu deiki di, “Amutu tu karepkamsene,” pepra, deiamseu mutuda, apepra deiamseutopu, amutu tu yumada karepserepa, Israel nesala sundi talepra kunkamrume.

6 Ange tep nengeda, sun Israel nesala yumada, Allahdi Musa tep, “Israel nesalada, angeda kunkamenge, angeda pio men kunkamenge,” pepra, Musa deiki peipupa, Musadi sekra deipseu upuda, ‘Mangkau di tapnup’ tenen, kalengdamumdi, moupra talepmumnyopda, pio kunkamrume. “Angeda kunkamrume, angeda pio men kunkamrume,” pepra, sekeipseu upuda, sundi tenpunge peda, men yanitamkamrume. Tonda, yuk gwalin bisi men embankamrum dinin, Allah er bisipu embankamrume. 7 Pio dumsisipu kunkamruma deiyoda ake. Ada, sun Israel yala nesalada, aupupu talepra kunkamrume. Kanaan mutu tupa kunge nesala, ataru neitamai pe sun kunkamengaida, sun Israel nesala cap, wisipra kuna meme. Tonda, sundi kunge kecada, sun Israel nesala cap tonpa kuna gume. Amutu nesala sun si eremenge isok-isokda, ‘E, aisok-isok ton melipsetenge’ tenen, sun si erepra pio pena gume. Tonda, sun Israel nesaladi, melipra atali keca tep, ‘Melipsetenge’ tenen, sun si men eremkamrume. Tonda, isok-isok sun si eremna tep, gutam tu dipdongopra, gispal dopra, sun pel men donkamrume.

8 Ange mali kun keca yumada, men kunkamrum dinino, sun Israel nesalada, men di, sun nai bo Allah, er sipu erepyakaramrumdi, er upupu domyakaramrumtopu, ataru pe, doryankamre taru peda, tupa Allah erpu taleprumudi, er sipu eremkamrume. 9 Ange kunkamrumada, tali tep gume. Deiyoda, Kanaan tara kurami nesalada, denge pio weik nesala kurami dinin, tonda sunda puto weik neng akuraminge cap yumada, Allah Yahwehdi Israel nesala sun melimna tep, sun amutu nengda konum enepronamnge. Kanaan mutu kurami nengda, tenpu ngebo peda putoa di yaudi, sun Israel nesala tep, men yana popbisipmanto kwamseu.

10 Sun Israel yala nesalada, tenpu ngebo kunmatupa, sun podan neng denge weik 1000 jen talen neng yatenga peda, sun kankan di tenpu ngebo, er dipapu agung weik yanmatenge neng popbisiptue. Sun nai bo Allah Yahwehdi, sun tep kutudi, anesala yumada popbisiptue. Ada, sun nai bo Allah erdi, “Ukupkamsene,” pepra, pedina upu deiki di konum peiamseu utopu kupserepa kunkamrume. 11 Atep nengeda, sundi pio moupra kunkamrume. Sun nai bo Allah Yahweh tep, tupa-tupa tenenapu kumumdi, sun dipru cap, sun kange tenenange cap yumada, er deikipu derinkamrume.

12 Angeda tali tep men pepsene. Ukupmantoda, sun Israel nesaladi, Allah peiamseu upu yaniptapmumdi, ‘Kanaan mutu tupa kunkameng nesala cap, kikiman men kunkamrume,’ pepu ngeda, sundi teka men tenepmumdi, amutu nesala cap kikiman kumumdi, sun nerapu ton dopropmumnyopda, angeda mali pepsene. Ange utopu, sun Kanaan mutu tupa kunkameng nesala, sun nimidi sun Israel nengdi deipkamrum nerapu dopmengedi, kikiman kungopda, ange peda, pio mali pepsene. Sun cap kikiman yawarapra kumum dingeda, ‘Sundi Kanaan mutu nerapu nimi cap dopdapedi kunkamepe,’ tenena tep pepsene. Angeda meme.

13 Moupra tenepkamrume. Kanaan tara nesala cap kikiman kumumdi, sundi Kanaan nerapu nimi cap dopdana kupmumnyopda, tek sisi, sun nai bo Allah Yahwehdi, ‘Nun Israel nesala tep kuredi, Kanaan mutu nesala enepronkamre,’ tenemum ngeda, men enepronkamre. Dinin, sun anesala yumadi tamupra, ‘Israel nesala damaida ware kuptepedi, ikin keca sun nong deiki deiptepe do?’ tenen, kalengkamsenge. Adeiki di pena pepmangepa, youramre utopu kupra, youpkamsenge. Tonda, sun Israel nesala deikida, amutu nengdi ikin keca deipsengepa, kange mun deikipu kunkamrume. Ada, Kanaan mutu nesala, sundi Israel nesala sun deikida takke keca di, deiyo deiki poramengtopu kunkamsenge.

Tonda, takke keca di, asuru tulupra lungamengtopu kunkamsenge. Ukusengepa, Allah Yahwehdi sun tep, telep mutu tu karepseu mutu neitamaida, tenpu ngebo peda, telep ton men kunkamrume. Ikin kecapu, sun damai tupa-tupa yakaramrepa, kange mun kangepu doupra, kuramrumnyanen, siryada depkamrume. Ada, sun si eremrum Allah Yahwehdi, pio telep mutu tu kareamseua neitamai dipapu kuramumnyanen, kange mun kange doupra dadepkamrume.

14 Ukutara ne Yosuada, tuai nesala yumada dakuramenganen, wisi deipra, sirya taru deramengtopu, ne peda dena damai konum kepnere. Dinino, sun Israel nesala yumada, yuk-yuk dinin, sun yumada, sun dipru cap, sun kange tenenange cap, daneitamai konum kael kemrume. Ada, sun nai bo Allah Yahweh, erdi sun tep, “Pio telep-telep keca yumada, dopra karenkamsene,” pepra, menop taru di peiamseunge yumada, konum karepseupa, kael keprume. Allahdi sun tep, “Telep keca karenkamsene,” pepra, deiamseu ngeda, tenpu upu peda ton, men tapseu. Ange yuma konum kareserepa, sun yuk-yuk konum kael kemrume.

15 Dinino, lumdongona gume. Sun si eremrum Allah Yahweh, erdi pedina upu deiki di sun tep, “Telep-telep keca yuma karenkamsene,” pepra, deiamutopu konum ukupra deipseue. Ange utopu, Allah Yahweh er dipapu sun tep, “Ne upu yaniprumudi, mali weik kumumnyopda, nedi ila kange mun keca, sun deiki deipkamsene,” peipseutopu kupkamsere. Ukupserepa, ikin kecapu, sun damai tupa-tupa yakaramrepa, kange mun kangepu doupra, kuramrumyanen, siryada depkamrume. Ada, sun si eremrum Allah Yahwehdi, pio telep mutu tu kareamseua neitamai dipapu, kange mun kange doupra, depkamrume. Ada, er dipapu popseredi gawal dakamsera tepa.

16 Ukupmantoda, Israel nesala sundi, Allah Yahwehdi pepra deipseu upu moupra men talepmumdi, aupu tapra, yuk tali isok-isok si erepmumdi, yuk yala nesaladi tali si eremenge keca do, yuk puto keca do, sundi, ‘Akecada melipsetenge’ tenen, sun damai bena sun tep gispal dona tep, gutan du dipdongopra kupmumnyopda, nun nai bo Allah Yahwehdi, sun tep yu kuprepa wenepseredi, ikin keca sun nong deiki deipkamsere. Ada, ataru dipapu Allahdi sun tep, ‘Telep mutu kunkamrume,’ pepra, deiamseu mutu konum karepseu dinin, akuramrum mutu neitamaipu, Allah Yahweh er dipapu wenepra popseredi, gum kupra deipkamsere.

Yosuadi sun Israel nesala, yala-yala yuma tep, aupu pepu.