Joshua 24

Sikem mutu kunmai taru, Yosuadi Israel nesala tep, pepu upu

1Uda amenda taru, Yosuadi peipupa, sun Israel nesala, yala-yala yuma Sikem mutu bulupra yai. Sikem mutu kunmai taruda, Yosuadi Israel nesala yala-yala yuma bulupra deipu. Tonda, erdi upupupa sun yai nengda, sundi, ‘Ukupkupe,’ pena tep, wisi neng cap, Israel nesala sun nimi deiyo neng cap, sun upu bongdina neng cap, sun ila neng, mambul pel dorami neng cap, yuma upupupa yai. Yai dingeda, sun yuma buluprapidi, ‘Nun nai Allah er si Yahwehdi upu pepkuser’ tenen, er damai yana tengmai.

2Ukupi pangeda, Yosuadi sun Israel nesala yuma tep pepu. “Israel nesala kalekra melimrur Allahda, er si Yahwehdi pepmaser upuda ake.”

Pumun taruda, sun apu yapu yuma, ila me er si, Efrat me ortara mutu neitamai kurami. Ada sun co puna ngebo Abraham cap, er weit bo Nahor cap, sun nai bo Tera cap, ortara kuramidi mem ati dopra, isok si eremami. Angeda sun walwal taru di ukurami.

3Tera akuramu dinin, aneitamai nedi sun apu bo Abraham, Efrat me ortara kuramupane, epra upupsidi dopramsi. Ukupsidi, Efrat me atara di dipdongopra Kanaan mutu neitamai yuma, nedi er tep, ‘Ukupkurume,’ pepra meliamsipane, amutu neitamai embaramu. Kanaan mutu embaramu taruda, nedi kareramsipa, Abrahamdi nyapu deipupane, er nyapudi deipra dadeipdanen, baramipane, Israel nesala weik kupu. Menmena taruda, ne puto deiki di Abraham melipra karepsipa, Isak deipu.

4Nedi Isak melipsipa, erdi Yakub cap, Esau cap deipu. Ukupsipa, nepreipane, nedi Esau tep nengeda, mutu buma kwamu tara, Seir mutu karepsipa, talepra kuramu. Dinino, sun apu bo Yakub cap, er nyapu capda, amutu neitamai jen keca gum kupupa, amutu tapra Mesir mutu kwerepra benamidi kurami.

5Bena kuramipane, sun neitamai di, nedi Musa cap, Harun cap wepra deipsi taruda, nedi Mesir nesala kuramyai, sun nong deiki ila pirin keca deriramsanen, Israel nesala yuma doupra amutu desisi. 6Tonda nedi sun apu yapu, Mesir mutu di dalupra duyakaramsanen, sun ila Laut mokon er si Teberau damai yai taruda, Mesir mutu jen talena nengdi, ‘Israel nesala porbenkup’ tenen, sun kuda bisam gipra, tu deiki embana keca cap, jen talen neng kuda bisam deiki bukra embarami neng cap, akeca-keca deiki bukra dopbuntupdanen, yakaramyanen, ila Teberau laut mokon damai yai.

7Laut mokon dam yai taruda, sun apu yapu yumadi, Allah er si Yahweh tep, ‘Uo, nun nai Allah melipseo,’ pepra, ila di mali pepra ngolongmaidi moropnei. Ukunmaipane, Israel neng atara, Mesir mutu jen talen neng ortara, daneitamaida, nedi kunungna karepsipa, ipu pangeda, Mesir nesaladi, sun Israel nesalada, men epdanmanto kupu. Ataru dipapu nedi karepsipa, laut mokon dana-dana tara goupropupa, Mesir nesala daneitamai bandenkap, mokon di Mesir nesala me antapdongopra, popra gawal daku. Akamu ngeda, sun pe asuru di ange yuma diramruma cadi, konum kali keamrume. Ukupsipane, sunda me cap, nimi cap gum mutu, katuai mutu neitamai bisi, keteng tamun denge weik embaramrume. Allahdi pepu.

8Upepudi, aupu ton pepu. “Katuai mutu daembaramrumpane, nedi Israel nesala yuma dopra, Yordan me goupra atara, keteng yakan tara duyasisi. Sun Amori tara taleami nengda, amutu neitamai kuramidi, ‘Israel nesala popkamepe’ tenen, piripterepi dinin, nedi meliamsisipa, sundi Amori tara nesala popbisipmumdi, sun mutu yuma konum dopramrume. Sun amutu wekamruma tep, ne meliamsisia deiki di, sun Amori tara nesala bisbisa kapra poptaprumdi, gawal dakra sengpeprumdi, ukutaru sun mutu sisa kepra kurume. Ayumada, ne melipsisi deiki di pua.” Allahdi pepu.

9Upepudi aupu ton pepu. “Ange utopu, Moab mutu ila nimi deiyo ngebo Zipor, er mi Balakdi, ‘Israel nesala popkune,’ tenepudi, Beor er mi Bileam tep upupu. Upupka deiyoda, ada ‘Bileamdi, Israel nesala tep, mali kudina upu, widongona upu peiptudi, sun nong deiki deiptupa, ikin kuptuopda, nedi bisbisa kaptene’ tenen, kupu. 10Ukupu dinin, nedi Bileam er upu men gekepsi. Ange gum dinin, nedi karepsipa, Bileamdi, sun tep, telep upupu pepra, sun deiki deriramu. Tonda ataru-ataru di, ka di ton cap, telep upupu peiamseu. Erdi atelep upu peramunge cap, Balakdi men popseunge capda, ada ne deiki di pua. Nedipu loptapsisi.” Allahdi pepu.

11Upepra Allahdi aupu ton pepu. “Ukupsisipane, sunda Yordan me goupra, Yeriko mutu damai wengberume. Ataruda, Yeriko mutu ila ati arum neitamai kurami nesala yumadi, sun tep popterepsei. Tonda utopu, sun Amori tara neng cap, Feris tara neng cap, Kanaan tara neng cap, Het tara neng cap, Girgasi tara neng cap, Hewi tara neng cap, Yebus tara neng cap yumadi, sun tep poryakaramipane, ne puto sun nong deiki deipsisi pangeda, amutu nesala yuma konum popra gawal dakrume. Ayumada, ne melipsisiya deiki dipapu kuprume.

12Tonda, sundi butene nimi deiyo Raja neng porberum taruda, nedi amutu nesala tep, kange wang-wang pena cap, kwar dangna cap karepsipa, sun Amori nesala sun ila deiyo neng butene kware weik kupupa, sun sepdara bendoprei. Bereipa, sundi popra gawal dakrume. Sun Israel nesaladi, sun pe parang ya cap, sun pe mar cap di, men popbisiramrume. Ayumada, mongdi nimi toprepa, sepdaro baramengtopu, ne melipsisiya deiki di, anesala yuma bura saka bendopipa, sun bisbisa kaprume. Ange yumada, ne ja.” Allahdi pepu.

13Upepudi aupu ton pepu. “Ange tep nengeda, nedi ange yuma kupsa deiki di, amutu yuma konum karepsisi. Amutuda, sundi ikin pel deiki di wa men peiamrum dinin, telep wa konum karepsene. Tonda, sun pedi ati ton men doamrum dinin, telep ati arum konum karepsene. Sundi tali dimpepra, kange deipra amutu kunkamrume. Tonda sun kurum atida, men doprume. Tonda, sundi jerum anggur tapu du cap, zaitun co du capda, sundi wa pepra men kouamrum dinin, tali lupra dakra jerume. Akeca-keca yuma, sundi tali dopra jenapu kunkamrume. Ange yumada, ne meliamsisiya deiki di pua.” Allahdi pepu. Allahdi peramu upu yuma, Yosua gekepudi, sun Israel nesala tep, lap pepu.

14Upepu dingeda, Yosuadi aupu pepu. “Ange tep nengeda, nun nai bo Allah, er si Yahweh tep, kware tenepra kunkamrume. Allahdi pesere upu yuma, moupra gekeprumdi, angepu talepra kunkamrume. Tenpunge peda tamna gume. Pumun taru di, sun nai yapu, pio karen mutu Efrat me goupra, ortara kurami taruda, tali keca isok si eremami keca yumada tapkamrume. Tonda, sun nai yapudi, Mesir mutu neitamai kurami taru, isok si eremami keca yumada, tapkamrume. Ware yuk keca do yuma tep, ‘Nun nai bo,’ pepra, yuk tali keca si pio men eremkamrume. Allah er si Yahweh, er tenpu tep, er talepra, er amutara kurumdi, er sipu eremkamrume. Er tenpua.

15Ange konum pepmasen dinino, ware nesala do yuma, ‘Allah Yahweh, er si eremna cap, er amutara kuna capda, nun dabale,’ tenepra, song teneprum nesala tep nengeda, aupu pepsene. Atumi deiki dipapu, ‘Angebopu er si erepra talenkamepe,’ teneprumdi wepkurume. Ton ngeda, pumun taru nun apu yapudi, Efrat me goupra ortara kuramidi, isok si eremamitopu kunkamrum do? Agum dingeda, sun Amori yala nesala taleami mutu ukutaru kuruma tep, Amori nesaladi isok si erepra kuramitopu kunkamrum do? Sun yuma tenipmumdi wepkamrume. Dinino, ne cap, nati kunge nesala cap, nun yumadi dorkunkamep taru yumada, Allah er sida Yahweh, er upu gekepra, er amutara kupedi, er sipu pio eremkamepe,” Yosuadi Israel deiyo neng cap, Israel nesala yuma cap tep pepu.

16Upepupa, anesala yumadi tamupra pepi. “Gume, nundi Allah er si Yahweh tapra bepedi, isok si eremna ati bena pio men kunkamepe. Angeda gume. 17Ware ngebodi do gume. Nun nai bo Allah, er si Yahwehdi nun apu yapu cap, nun cap, Mesir mutu di loptapra duyakaramseu. Mesir mutu kuramepu taruda, Mesir mutu nengdi, ila ikin pel nun nong deiki deriramseipa, kange mun weik kuramepu. Nimi bo neng utopu kuramepu. Ataruda, Allahdi, ‘Nimi yumadi, ‘E tek sisi Allah er dipapu apel dopmasere’ tenepmengedi, kael kepkamneng’ tenen, erdi nimi men kupmanto pel cap, kunupsek pen pel cap, weika di kuramupa diramupu. Tonda Allahdi, yuk-yuk mutu weik, yu neng kurami mutu neitamai di duyaseue. Ada, yuk-yuk mutu nesala damai embaramepu taru yumada, Allahdi, ‘Ne mawa nesala popnung’ tenen, yu neng tep kalekra meliamseudi, lyom bisi doupra yakaramseupa, nun men diramupu mutu neitamai yana kunmape.

18Tonda, nun amutu yapu taruda, nun nai bo Allah er si Yahwehdi, amutu kurami nesala, sun Amori yala nesala yuma popra doproudi, nunda amutu karepseupa, ukutaruda Amori nesala talepra kurami mutuda, nundi talepra kunupe. Ange tep nengeda, nun peda utopu, Allah er si Yahweh, er amutara kupedi, er sipu eremkamepe. Nun nai bo Allahda, Yahweh er pua,” sun Israel deiyo neng cap, tali nesala yuma capdi, Yosua tep pepi.

19Israel nesaladi upepi dinin, Yosuadi tamupra anesala tep pepu. “Gume, sun dipapu, ‘Allah er amutara kupedi, er sipu eremkamepe,’ tenepmarum dinin, angeda menmena di tali lupra men peptume. Deiyoda, Allah er si Yahweh, erda pio dumsisipu kurur ngebo. Erdi er talerur nesala tep, ‘Ne mawa nesala, sundi yuk keca tep, si pio men ereptenge’ tenen, akeca yuma dirur ngebo cadi, yuk keca tep talepmengedi, si erepmengopda, er yu weik kurure. Tonda, sundi Allah er pere upu yaniptaprumdi, mali kun keca kuprumnyopda, amali kupmumnya tep, men kaukepkamsere.

20Ange tep nengeda, moupra tenipetepkamrume. Menop taru di dipra ukutaru peda, Allahdi sun tep, konum telep kupra meliamseu dinin, sundi Allah er si Yahweh tep, tapraprumdi, yuk mutu nengdi isok si eremenge keca, sun peda akeca talepra si ereprum pangeda, erdi sun mali kupmum ngeda, ‘Dakwapye’ tenen, men kaukepkamsere. Erdi tamupra pio ila kange mun keca, sun nong deiki deipseredi, wenepra poptapra, gawal dakamsere,” Yosuadi, anesala tep pepu.

21Upepu dinin, sun Israel nesala yumadi, Yosua tep tamupra pepi. “Gume, nunda yuk keca ton si men eremkamepe. Allah er si Yahweh, er amutara kupedi, er sipu eremkamepe,” pepi. 22Upepipa, Yosuadi tamupra, sun tep upepu. “Sun pedipapu, sun pe tep, konum lap pepmarumdi wepmarume. Tonda, sun yumadi konum gekepmarume. Sundi, ‘Nunda Allah Yahweh, er sipu konum eremkamepe,’ pepmarumpa, erdi gekepra dinmasera tep, sundi Allah er sipu eremkamrume,” pepu. Upepu pangeda, anesaladi, “Teka nun pedi, ‘Ukunkamepe,’ konum pepmapa deiki di wepmapepa, Allahdi gekepmaser,” pepi.

23Upepi pangeda, Yosuadi tamupra pepu. “Uda, atep nengeda, yuk mutu nesala sun isok si eremna tep, sun neitamai akurur keca yumada, tapra dokotepkurume. Ukupmumnyopda, sun nai bo Allah, Yahweh tep, sun kange dipru yumada, adipapu er teppu karenkamrume. Sun kange dipru er deikipu derinkamrume. Sun Israel nesala talepra, melipra kusere Allahda, er Yahweh pua. Ange tep nengeda, er sipu eremkamrume,” Yosuadi pepu. 24Upepupa, anesaladi Yosua tep pepi. “Konuma, Allah er amutara kupedi, er sipu eremkamepe. Nundi Allah er upupu talepra, bouna di kupedi, er upu gekepra dombankamepe. Er sipu eremkamepe,” pepi.

25Atumi neitamaida, Yosuadi Sikem mutu kunmai taru, Allahdi Israel nesala tep, ‘Ukunkamrum, ukunkamrum,’ peiamu upu ton sekra karepu. Aupu deiyoda, ‘Sun cap, Allah cap, pio telep kupra kikiman kunkameng’ tenen, aupu sekra deipu. Ada, ‘Allah er upu yuma bouna di gekepra kunkameng’ tenen, ukupu.

26Yosuada, Allahdi, ‘Ukunkamrume, angeda men kunkamrume,’ peiamu upuda, Mem Upu Buku neitamai sekra deipu. Ada, aupu yuma sekrap, Allah pedina upu buku neitamai dongopu. Ukupu dingeda, Yosua ila gel pala dopropudi, erepra acapu ikra deipu. Ada, ‘Allah er si Yahweh, erda pio dumsisi kupra, pio telep kurur ngebodi, aca upu pepseuai cadi, amutuda ila mambulai,’ tenepra, amutu ila co tekamngai bena, aco kauai ila gel ikra deipu.

27Agel ikra deipu dingeda, Yosuadi anesala yuma tep aupu ton pepu. “Tek sisa pepsene. Agel pala ikipmanada, yuk taru ton eprum dingeda, atumi pedinmarum upu kange di ton cap tenipkamrume. Ada Allahdi, ‘Ukunkamrume, angeda ton men kunkamrume,’ pesere upu cap, sundi Allah er si Yahweh tep, ‘Ukunkamepe,’ pedinmarum upu cap, agel atekamrai di pepmarume. Allah tep pemrum upuda, agel deiki peten kemdina utopu kunkamsere. Akure pangeda, sundi Allah pedisere upu yaniptaprumnyopda, adeipman gel ton eprumnyopda, ‘Uo, nundi Allah tep peiamepu ngeda, men kupmapa cadi, mali kupmepe,’ tenenkamrume,” Yosuadi pepu.

28Yosuadi aupu sirya akonum pepu dingeda, erdi, ‘Daberume,’ pepu pangeda, Israel nesala acapu tapidi, sun pe mutu yuk-yuk tamupra benapidi, talepra kurami. Ada Allahdi kareramupa dopropi mutu bena kurami.

Yosua cap Eleasar cap depreipa peipi upu

29Ange-ange yuma konum kupu dingeda, Allah er si Yahweh, er upu gekepra, er amutara kuramudi, er pel dona tep wepra deiamu ngebo, Yosua dakuramnganen, amenda taru depu. Yosua er nai boda, er si Nun kuramu. Nun er mi Yosuada, er gam kuramu taruda, umur denge weik, 110 keteng tamun kuramudi depu. 30Yosua konum depu pangeda, er nong dopropidi, peipi. Ada, Allah kareramupa, er Yosua pe bena dopropudi kuramu mutu si, Timnat-Serah perami mutu, peipi. Er nong dopra, amutu neitamai bena peipi. Amutuda, Efraim yala neng talepra kuramyai kupu. Tonda amutu itara kupupa, dutara kwamu mutuda, Gaas mutu perami.

31Uda, ataru neitamai yumada, Israel nesaladi Yosua tupa gam kuramu taru, Allah er si Yahweh, er amutara kuramidi, er upu gekepra dombarami. Tonda, Israel nesala, sun upu bongdina deiyo neng, wisi nengda, Yosua cap kikiman kurami taruda, Allah er si Yahwehdi Israel nesala tep, makupra meliamu keca yuma, sun pe asuru di kikiman dirami. Ukuramipane, Yosua depupa, awisi neng sun gam tupa kurami taru peda, Israel nesala Allah er upu gekepra, er sipu eremami.

32Uda yuk upuda ake. Pumun taru kuramu ngebo, sun apu bo Yusup, Mesir mutu neitamai depupa, Israel nesaladi er yo doupra, Mesir mutu neitamai tapra yakaramyanen, Kanaan tara neitamai dekarami dinin, mutu si Sikem mutu, tu yana palipi. Yusup er yo palipyaida, nimi si Hemor, er nyapu taleami dinin, pumun taru Yakubdi kunuamu.

Atu kunumnada, Yakub er kunumna weik keca, perak, denge weik seratus deiki di kunupu. Yakubdi, er mi Yusup deipupa, erdi ton nyapu deipupane, dadeipdanen yakarami nesala, Yusup er yala nengdi, atu dopropidi talepra kurami. Atep, Israel neng sun apu bo, pumun ngebo Yusup er yoda, atu neitamai acapu yana tu palepi.

33Tonda, Harun er mi Eleasar depu pangeda, mutu si Gibea mutu bena peipi. Pumun taru, Kanaan mutu bokra deiami taruda, ‘Efraim yala nengda amutu buma neitamai kunkameng’ tenen, Pinehas tep karepi. Pinehasda, Eleasar er mi kuramu.