Jos 3 | XteSC | STEP | Sun yuma damapmaiya, berekyopda, Yosua gonga keprapudi, Israel neng yuma ipna sisa bereng donon di, Sitim mutu dodin opkal ati dam di tapra, Yordan mekin tamna bena, me goupra ortara kapul bana dinin, acapu keana dodin ati bena dopra, ue weneri mapidi keteneipra deipmai.

Joshua 3

Israel neng Yordan me goupra ortara bei upu

1 Sun yuma damapmaiya, berekyopda, Yosua gonga keprapudi, Israel neng yuma ipna sisa bereng donon di, Sitim mutu dodin opkal ati dam di tapra, Yordan mekin tamna bena, me goupra ortara kapul bana dinin, acapu keana dodin ati bena dopra, ue weneri mapidi keteneipra deipmai. 2 Uwe weneri tumi konum kupu pangeda, Israel neng sun deiyo-deiyo nengdi keana dodin ati dam yuma wekra, ongopgenepidi upu karepi.

3 Sundi Israel nesala yuma tep upepi. “Allah er si Yahwehdi, ‘Nedi ukupkamsene, sundi ton ukunkamrume,’ pepra deipseu upu dopra deipmepu co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deiki yumada, emas dopra palepra deipi. Aco peti pumbon neitamaida, ila mambul keca weneri deipi. Ada, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu cap, Harundi taleamu maca cap, Allahdi Israel nesala tep kareamu im deiki kwaning, er si mana metekanun cap dopra, apeti pumbon dongopi. Sun Israel nesalada, ‘APeti Perjanjian damaida, Allah Yahweh, er Sambala cap, er puto cap, er dirine cap, er pio telep kurenge yuma capda, aPeti Perjanjian deiki tara pio akunkamsere,’ tenerami. Tonda, Keluaran 25:11 dinkurume.} ngeda, ‘Akeca dopra dubanmang do, gum do?’ tenen, moupra dinkamrume. Allah er ati pel don neng, sun Lewi nengdi abekine doupmengedi bengepa, epmum dingeda, sun peda adipapu keana dodin ati dam di tapra, sunpu melipmumpa kikiman benkurume. Lewi yala neng dinin, Allah cap nimi cap antamna deiyo nengdi mepra bengepa, sun amenda bankamrume.

4 Sun yumada, abisi kapul men benamruma cadi, Lewi yala nengdi mepra bangepa, sun amnyo tara bamumnya deiki di, ‘Ukupra bankamape’ tenen, bankamrume. Adeiki di, amenda taru sun bankamrum bisi kael kepkamrume. Dinino, Allahdi er upu peipupa, doupra deipi bekine doupmange neng damai bana gume. Karenaipu 900 meter utopu mepra bangepa, sun amenda tarapu bankurume. Sun dubenkameng co bekinda, damai bana meme,” Israel nesala, sun deiyo-deiyo nengdi, anesala yuma tep upepra upu karepi.

5 Yosuadi Israel neng tep upepu. “Sun mali keca yuma loptapmumdi, sun kange dipru cap, nonge cap yuma, sun nai bo Allah tep karepkurume. Deiyoda, ambutumi, Allah er si Yahwehdi kunupsek pen keca, puto weik keca nun damai kupkamara tepa,” pepu. 6 Upepupa, mapmaiya berekuopda, Yosuadi Allah er si eremna ati pel don neng, Allah cap, nimi cap, antamdina tep, co bekin er sida Peti Perjanjian dopra, sun mepra ortara benkurume. Israel nesalada,” pepra deipupa gekepidi, Allahdi, ‘Ukunkamrume. Ange kupmumnyopda, nedi ukupra melimkamsene,’ pepra, er upu peiamupa kiami co bekin, Peti Perjanjian doupra menmena bei. Sun yuk Israel neng men bei taru di doupra beipa, sun amnyo tara, Israel nesala yuma dombei. Angeda, Yosuadi pepka utopu kupi.

7 Atumida, Allah er si Yahwehdi, Yosua tep upepu. “Pumun taru nedi Musa meliamsipa, pel puto di doramutopu, kan peda tep melimkamkene. Angeda, ‘Israel nesala yuma kael kepkameng’ tenen, atumi di gonga kepra, nedi kan ila ngebo kupra deipkamakene. Ukupkenepa, Israel neng yumadi kan tep, ‘Uo, Yosuada mambule, Yahwehdi melimrure,’ tenepmengedi, kan upu gekenkamkenge,” Allahdi Yosua tep pepu.

8 Upepudi aupu ton pepu. “Ukutaruda, Allah er si eremna ati pel don neng tep, aupu pepra deipkurume. Sundi Allah er peramu pedina upu kiami co bekin, er sida Peti Perjanjian ^{▼▼Peti Perjanjian – Peti Perjanjian kael kemna tep, Yosusa 3:3 dinkurume.} doupra, dubenkunga cadi upepkurume, ‘Akeca dopra banmamumya, Yordan mekin damai berumu dingeda, ame neitamai apu bena tekurume,’ pepra deipkurume,” Allahdi Yosua tep pepu.

9 Upepupa, Yosuadi Israel neng tep pepu. “Sun yuma ne damai bupra yamumdi gekepneso. Sun nai bo Allah, er si Yahwehdi peipseu upu pepkusena tep, gekepkurume.” 10 “Sun yumada, ‘E, nun nai bo Allah, gam kure ngeboda, tek sisi nun kan-kan tekredi, doupra bankamsere’ tenen, kael kepkamarume. Tonda, ‘Nun ormutu bepepane, Allah erdi melipserya deiki dipapu, amutu kunge nesala popbisipkamepe’ tenen, ‘Kael kepkamruma’ tenen, pepne. Ada sun Kanaan tara kunge nesala, Het neng cap, Hewi neng cap, Feris neng cap, Girgasi neng cap, Amori neng cap, Yebus neng cap yumada, Allah melipserya deiki di popbisipkamepe. Tonda, Allah melipserya deiki di, sun kware weik kuprepa, sepdara bendopkamenge. ‘Ange kael kepkamrum’ tenen, peten kemdin keca lape pepkusene,” Yosuadi pepu.

11 “Sun yuma epso, sun nai bo Allah er si Yahwehda, mutu ban-ban yuma talepra ketekemdina deiyo ngebo, erdi peramu upu kiami co bekin, er sida Peti Perjanjian, Lewi yala nengdi doupra, menepra Yordan me neitam bentekamenge. Sun yuma amenda tarapu benkamarume. Sun kaele, nun nai Allah, akeca-keca yuma, tuai keca yumada, er dipapu talerura cadi, erdi kikiman beseredi melimkamsere. 12 Ukutaruda, Israel yala amol di utara yuma akuretopu, sundi 12 ton nengdi ton wepra deipkamarume. Sun yala-yala, yuk-yuk akuretopu, ayala nengdi ton, yuk yala neng ton, sun kan-kan di nimi tenpu-tenpu weipkurume.” Yosuadi pepu. 13 Upepudi aupu ton pepu. “Mutu ban-ban yuma talerur Allah, er si Yahweh, er si eremna ati pumbon pel donge neng, Yahweh er upu kiami co bekin, Peti Perjanjian doupkunge nengdi, sun yane Yordan me yanipmenge pangeda, ataru dipapu, me neitamai yatupra, dikemdon, du kemdon kepkamare,” Yosuadi pepu.

14 Upepka tep, Israel neng sun dodina ati dam di beidi, Yordan me goupkoi taruda, Allah er si eremna ati pumbon pel don nengdi, Allah er peramu upu kiami co bekin, Peti Perjanjian doupra, menepra banmaipa, sun Israel neng yuma, sun amnyo tara dombei. 15 Ataruda, nimi koun keca li taru cadi, Yordan meda, ila di onmaudi embanmau. Ila di ounmaudi embanmau dinino, Allah er ati pumbon pel don neng, er upu kiami co bekin, Peti Perjanjian doupra banmai neng, Yordan mekin beidi, me sirikaipu yanipi taruda, adipapu Yordan me neitam yatuprapudi, dukemne, dikemne kepupa, daneitamaida, kalkal tu bisi katuai kupu.

16 Ukupupa, me embaramnga deiki tara ngeda, dimpepudi itamna di yakaramu meda, deiki tamnapu karen mutu kembeu. Mutu si Adam dinin, ton ngeda Sartan mutu damaida, ila lyoma di tekrapudi, acapu dimpepu. Ukupupa, ton ngeda utamna meda, mokon sida, Laut Ua mokon dam embaramu meda, bokrapudi, du kemdon, dikemdon kepu. Ame yuma cepropupa, Israel neng yuma ame embaramu bisi dinin, kalkal kepmauai deikipu, keteng yakan tara di, Yordan me goupra, ortara keteng wengbaramre tara, Yeriko mutu urasin tara bei.

17 Israel nesala yumadi, Yordan me goupra embanmai taruda, Allah Yahweh, er si eremna ati pumbon pel don neng, er peramu upu kiami co bekin, Peti Perjanjian doupmai nengda, Yordan me yuma gelal sepropmaupa, ame embaramu bisi neitamaipu tupa tekmai. Ukupmai taruda, Israel neng yumada, me gelal cepropmauai deiki di, goupra banmaiyanen, gawal dai. Sun yuma Yeriko tara bei.