Joshua 4

‘Israel nesala tup tenenkamenga’ tenen, gel 12 dopra deiami upu

1Israel nesala yuma, Yordan me konum goupra ortara bei taruda, Allah er si Yahwehdi Yosua damai pepu. 2“Israel nesala yala-yala yuma neitamai di, amol dam di utamna (12) nimi wepra deipkurume. Ada, Israel nesala yala 12 akuretopu, ayala nengdi tenpu-tenpu yuk-yuk wepra, 12 deipkurume,” pepu. 3“Konum weprumudi, aneng 12 neng tep upepkamarume. ‘Sunda, Yordan me embaramu bisi neitamai, me cepropmaudi, gelal sepropmaupa, Allah er ati pel don neng tekmanguai adipapu, sun amol di ugel dopra, sun mapkamarumaipu doupra bemumdi, acapu deipkamarume.’ Aneng 12 neng tep upepkurume,” Allahdi Yosua tep pepu.

4Upepka tep nengeda, Yosuadi sun 12 neng, Israel yala neng neitamai dinin, tenpu-tenpu amol di utara wepra deipmau neng tep, upupupa yai pangeda, Yosuadi pepu. 5“Yordan me embaramu bisi neitam, Allah er si eremna ati pumbon pel don nengdi, Allah er si Yahwehdi peramu upu kiami co bekin, Peti Perjanjian doua tekmanga damai bemumdi, Israel yala neng amol di utara (12) kurura tep, angetopu sundi, amol di utara gelpu topra doupmumdi, morokyo deiki deipra bankurume,” pepu. 6“Agelda sun neitamai peten kemna keca tep deipkamrume. Ukuamrumpane, amenda taru sun deipmum nyapudi, ‘Nun nai yape, adeiamrum gelda, warya tep kuramrum do?’ pepra asipsenge pangeda, upenkamrume.

7‘Allah er si Yahwehdi peramu upu kipmepu co bekin, Peti Perjanjian doupra yakarami nengdi, Yordan me num neitamai yan tekipa, Yordan me yuma yatupra di, gelal cepropupa, di tara kemne, dutara kemne kepupa, aneitamai di doproamepu gelda adano,’ pepra lap penkamrume. Agelda, acapu pio kwapkamre. Doryankamre taru neitamai yumada, Israel nesala agel epmengedi, ataru nedi melipsipa kupu keca tep, tupa tenenkamenge,” Allahdi pepu.

8Allah er si Yahwehdi Yosua tep upepupa, Yosua gekepudi, Israel nesala lap pepu pangeda, Israel nesaladi Yosua peiputopu kupi. Ada, Israel yala neng amol di utara akuretopu, sundi Yordan me neitamai bena, amol di ugelpu bena doproprapidi, Yordan me ortara, sun opkal bol di keana dodin tenda ati dam dubeidi, tenpaipu agel 12 deipi. Agel deipyai sida, Gilgal mutu penunge. 9Deipipa, Yosuadi ton agelpu doprapudi taplakra deipu. Ada, Allah er si eremna ati pumbon pel don neng, Allah peramu upu kiami co bekin, Peti Perjanjian doupra, Yordan me num neitamai tekmaiyai apu, Israel nesaladi amol di ugel doprapidi, sun dodin ati dam dubena deipi ngeda, Yosuadi agel yuma dopra tenpaipu taplakra deipu. Agel yumada, ukutaru peda tupa akurure.

10Israel nesala, Yordan me ortara benmai taruda, Allah er si eremna tep, opkal bol di keana dodin tenda ati pumbon pel don nengdi, Allah peramu upu kiami co bekin, Peti Perjanjian doupra, Yordan me num neitamai tupa tekmai. Ataruda, Allah er si Yahwehdi Yosua tep, ‘Ukupkamrum,’ peramu upu yuma, Israel nesaladi angetopu kupmai. Tonda, ada Musadi Yosua tep, ‘Ukupkamrume,’ pepra deiputopu, Yosuadi kunmaupa, Israel neng yumada menmena Yordan me goupra, ortara bendopi. 11Sun Israel nesala yuma, Yordan me ortara konum gawal dakra bendopidi, ortara tekra dinmai pangeda, Allah er si eremna ati pumbon pel don nengdi, Allah er si Yahwehdi peramu upu kiami co bekin, Peti Perjanjian doupra tekmai neng, Yordan me goupra amenda beipa, anesala yuma epi.

12Uda, ataruda, Musadi peramutopu, Ruben yala neng cap, Gad yala neng cap, tonda Manase yala neng dinin, neitamainge cap, aneng yuma wilipra jen doupra, Yordan me gouprapi mepra ortara beipa, yuk Israel nesala yala-yala yuma amenda bei. 13Ukupi taruda, nimi denge empat puluh ribu (40.000) neng keteneipi nengda, Allah melipupa, Yordan me goupra, Yeriko mutu nesala podana tep, Yeriko mutu dam dinin, ila ban mutu beipa, Allah er si Yahwehdi epu.

14Atumida, Allahdi Musa tep melipyakaramnga utopu, Allah er si Yahwehdi Yosua tep melipka deiki di, Israel nesala yumadi, Yosua tep, ‘Uo erda ila mambul ngebo,’ teneramidi, Yosua gam kuramu taru yumada, apu tenerami. Sundi, ‘Musada ila mambul ngebo,’ teneramitopu, ‘Yosua peda, erda ila mambul ngebo,’ teneramidi, Yosua diramidi sun kware kuramu.

15Uda, Israel nesala yuma, Yordan me konum goupra bei pangeda, Allah er si Yahwehdi Yosua tep pepu. 16“Kandi peipmempa, ne si eremna ati pumbon pel don neng, ne peramsi upu kiami co bekin, Peti Perjanjian doupmai nengda, ukutaru Yordan me neitamai di tapra, douai benkununge,” pepu. 17Upepupa, Yosuadi Allah peipmautopu, kupu. Sun Allah er ati pumbon pel don neng tep, “Yordan me num neitamai di tapra atara douai yarume,” pepu.

18Upepupa, sun anengda, Yordan me num neitamai tekemaiya di goupra, Allah er si Yahwehdi peramu upu kiami co bekin, Peti Perjanjian doupmaiyadi, dou tara beidi yanipi pangeda, adipapu Yordan meda, pumun di embaramutopu, ouprapudi, menmena embeu. 19Israel nesala Yordan me goupra bei taruda, sun war nukamitopu, war tenpunge dinin, komuni gon nge deiki kupu pangeda, Gilgal mutu bena sun dodina ati bendopi. Gilgal mutuda, ada Yeriko mutu damai dinin, keteng yakan tara sirikai kupu.

20Gilgal mutu bei taruda, Yosuadi Yordan me neitamai di doroami gel, 12 gel yumada, Gilgal mutu dodina ati deipyai apu, bena taplakra deipu. 21Deipudi, upepu. “Ukupkamrume, amenda taru sun deipkamrum nyapudi, ‘Naio, agel deiamrumada, ware keca deiyo tep deiamrum do?’ pepra asimsenge pangeda, upenkamrume. 22‘Gume, nun wisi nengda, nimi gumai di amutu bisi yakaramepu taruda, Yordan me oupra embaramu dinin, gelal sepropudi douai utopu kupupa, abisi deiki di Yordan goupra, ortara bemepu. Ame embaramngai neitam bisi di, gelal sepropu taruda, agel dopramepudi aca deipmepu,’ penkamrume,” Yosuadi pepu.

23“Ada tali tep gume. Sun nai bo Allah, er si Yahwehdi, Yordan me nun tep cepra deipupa, ortara di ame embaramu bisi goupra atara yamepu. Tonda nun nai bo Yahwehdi peipupa, ila Bi Laut mokon ton cepropupa, abisi neitamaipu benamepua utopu, Yordan me peda, oupra embeu dinin, Allahdi peipupa, gelal cepra deipupa, douai bisi deikipu atara goupra yanamepu. Upenkamrume,” Yosuadi Israel nesala tep pepu.

24Upepu dingeda, Yosuadi aupu ton dukdongopra pepu. “Allahdi ange-ange yuma kupka deiyoda, pepkusene. Ada, nimi tuai mutu ban-ban yuma kunge nesalada, ‘Uo, Allah er si Yahweh, erda pio ila puto ngebo’ tenen, kael kepkamenge. Tonda, Israel nesala yumadi, sun nai bo Yahweh tep, ‘Uo erda ila mambule’ tenen, ‘Er si eremengedi, kware tupa kupkamre’ tenen, amambul pel dopseue,” Yosuadi Israel nesala tep pepu.