Jos 5 | XteSC | STEP | Uda, Yordan me duman keteng dangban tara kurami nesala, ada Amori yala deiyo neng, Raja neng cap, tonda, Kanaan tara dinin, ila laut mokon pirman pantai damai kurami nimi deiyo neng capdi gekepi. “Allah er si Yahwehdi Israel nesala amutu yakana tep, Yordan me cepra deipmarpa, goupra yakanmange,” pepipa gekepi dingeda, pio kware weik kupu. Ada, sun Israel nesala tep, sun yuk yala nesala pio kware kupudi moropsepu. Sun dipru saupa, ‘Israel nesala popbisipkamep,’ tenerami ngeda tapi. Sun kware weik kupka tepa.

Joshua 5

Gilgal mutu neitamai di, “Nimi den dam bol deiki tarange sengkamrume,” pepu upu

1 Uda, Yordan me duman keteng dangban tara kurami nesala, ada Amori yala deiyo neng, Raja neng cap, tonda, Kanaan tara dinin, ila laut mokon pirman pantai damai kurami nimi deiyo neng capdi gekepi. “Allah er si Yahwehdi Israel nesala amutu yakana tep, Yordan me cepra deipmarpa, goupra yakanmange,” pepipa gekepi dingeda, pio kware weik kupu. Ada, sun Israel nesala tep, sun yuk yala nesala pio kware kupudi moropsepu. Sun dipru saupa, ‘Israel nesala popbisipkamep,’ tenerami ngeda tapi. Sun kware weik kupka tepa.

2 Ataruda Allahdi Yosua tep pepu. “Sun Israel nengda, den bam bol deiki tarange men seksei neng yumada, sengkamrume. Ada, gat gel dopra tema ketekepmemdi, atema dopropmumdi, sun den bam bol deiki tarange sengkamrume,” Allahdi Yosua tep pepu. 3 Upepka tep nengeda, Yosuadi Allah peputopu, gel tema doprapudi, Israel neng sun den bam bol deiki tarange seku. Akupu ngeda, mutu si Gilbeat Haralot mutu di kupu. Sun upu deikida, amutu si deiyoda, den bam bol deiki tara sektapinge weik kwamu mutu perami (Bukit Penyunatan). Ada den bam bol sengna mutu tep perami.

4 Uda, Yosuadi apel dopunge deiyoda ake. Ada, sun Israel nesala, Mesir mutu di tapra benkoi taruda, metek nyapu gum dinin, nimi yuma den bam bol deikinge yuma sekami. Sekami dinin, anengpuda keteng tamun denge dumbari (40) deiki di, me cap, nimi cap gum mutu bisi embaramidi, jen talen neng yumada, katuai mutu embarami taru neitamai derami. Atep, sun den bam bol deikinge sekami neng yuma konum derami.

5 Dinino, sun metek nyapuda, Mesir mutu tapra, akatuai mutu neitamai embaramidi, derirami nyapuda, sun den bam bol deiki tarange kapul men sekami. Ada, Mesir mutu di tapra benkoi taruda, Israel neng sun den bam bol deiki tarange konum sekami dinin, katuai mutu lyom bisi embarami taru di derirami nyapu, moum jen nyapu cap, nepbarami nyapu cap yumada, konum nepbarami dinin, sun den bam bol deiki tarange kapul men sekami.

6 Sun Israel nesala Mesir mutu di tapra benkoi taruda, metek nyapu gum dinin, du neng yumada, den bam bol deikinge sekami. Sekami dinin, Mesir mutu di taprap, keteng tamun denge dumbari deiki (40 tahun), me cap nimi cap gum mutu, katuai mutu neitamai, bisi embarami taruda, anengpuda konum ne mi neng, du nengda, sun jen talepmanto neng yumada derami. Atep, sun den bam bol deiki tarange sekami neng yuma konum derami. Deiyoda, sun du neng, jen talen neng yuma, Allah er si Yahwehdi peramu upu yanipya tepa. Allah teneramutopu, sun yuma embaramidi derami. Depi atep, Allah er si Yahwehdi nun apu yapu tep, ‘Tek sisa pepsene. Sun benkamrum mutuda, akeca-keca, yala-yala yuma weike akapmare. Atelep mutu karepkamsene,’ pediramu mutu, Mesir mutu di yakarami du neng yumada, deramya cadi, amutu men epi. Ton men weki.

7 Sun konum derami atep, sun yo pununa tep, abisi yakarami taru neitamai, sundi ukupu deipipa, dadeipdanen yakarami nyapuda, Yosuadi ataru punupra, sun den dam bol deiki tarange seku. Kapul men bol sekami ngeda, bisi neitamai yakarami taruda, den bam bol deiki tarange men sengamya tepa. 8 Israel nesala sun du neng cap, du nyapu cap, sun den bam bol deiki tarange konum sekra seng pepi dingeda, suse dila kaingna tep, sun kurami dodin opkal ati, acapu yuk-yuk dakurami.

9 Ataruda, Allah er si Yahwehdi Yosua tep pepu. “Mesir mutu neitamai di dipra, mali kupyakaramrumnge yumada, atumi di konum kiliptapsene. Ange tep nengeda, akunmai mutu si tep, Gilgal mutu pepra, si pepidi ukutaru peda tupa penunge.” (Sun upu deiki di, Gilgal upu lelim gekepmengopda, yuk upu ton, kilina penung upu ton tenenunga tep, asi Gilgal karepi).

10 Ke taru tep, Israel nesala Yeriko mutu damai dinin, ila ban mutu sida, Gilgal mutu Kaplemna Kalemna kalemai. Ada awar neitamai dinin, tanggal 14 deiki di, ila tumi kupupa, atumi idona taru di, ila Kaplemne Kailya kalemai. (Ada, Mesir mutu benkoi taruda, malaikatdi Israel nesala sun weni nyapu pona gum dipapu, sun ati deiki tara kaplepra beua tep, akalemna sida, Kaplemna tep Kalemna perami). 11 Ila kailya jepra mapmaiya bereku pangeda, Kanaan mutu neitamai kwamu keca cap, roti kwaneng nena gumnge cap, jagung utopu keca, er sida gandum cap, kalum deiki dapra atarupu jepi.

12 Ada, Kanaan mutu mouramu keca jepipa, atumi dipapu Israel nesala tep, Allahdi mana kwaneng, im deiki di dokotemamu ngeda gum kupu. Ataru di, Kanaan mutu wengbei taru di gonga kepra, menop taru jerami manada, ton cap men jerami. Mana kwaneng gum kupupa, Kanaan mutu mouramu kecapu kipra jerami.

Israel nesaladi, Yeriko mutu kurami nesala tep, bisbisa kapra popi upu

13 Uda Yosua cap, Israel nesala cap, Yeriko mutu damai bena kunmai taruda, tenpu tumi Yosuadi Yeriko mutu tara bena dinmaupa, nimi tenpu er urasin tara tekmaudi, nimi pon keca parang ya doupmaupa, Yosuadi epu. Epudi angebo damai beudi asipetepu. “Kanda nun melimna tep yarem do, nun pona tep nun podana nesala tep melipkamrem ngebo do?” pepra asipu.

14 Upepra asipupa, angebodi tamupra pepu. “Gume kandi pepnerem ngeda, men kunune. Neda kan kabo gume. Tonda, neda kan podan ngebo gum dinin, neda Allah er si Yahweh, er im deiki mar podana nesala, er jen talena neng, sun deiyo ngebo yanmane,” pepu. Upepu pangeda, Yosua gekepudi menmena angebo damai beudi, ‘Angeboda ila mambul ngebo’ tenen, genepdongoprapudi, gispal dopu. Ukupu dingeda, Yosuadi angebo tep asipetepu. “Neda Allah er pel don ngebo kunedi, er upu gekepra dombanune. Atep, ne nai Allahdi, ware upu peipkeupa, yan pepkunerem do?” Yosuadi pepu.

15 Upepupa, Allah er im deiki jen talena neng, sun deiyo ngebodi Yosua tep pepu. “Kan yan kenengna keca, er sida sandal kuriptapmemdi yarume. Kan tekmaremaida, pio lekai, ila mambulai kurura tepa,” pepu. Upepupa, Yosuadi er peputopu kupu.