Jos 6 | XteSC | STEP | Amutu nesalada, Yeriko mutu neitamai, ila ati domidi, gel beilya wipra ongopdongomidi weleami. Ukuprapidi, abeilya ila buplan damaida, ‘Israel nesala tali wekra popsunung’ tenen, kalengmai. Ukuramya tep, Israel nesala bena Yeriko nesala ati arum domyai men wekmanto kupi. Tonda, Yeriko mutu nesala peda, akati domyai neitamai di, bura tara men bei. Tonda bura tara di, akati men wengami. Israel nesala tep, kwar weik kuramya cadi, sun ati neitamaipu kunmai.

Joshua 6

Allahdi Yeriko mutu bisbisa kapudi, sun ati yuma uruptapu upu

1 Amutu nesalada, Yeriko mutu neitamai, ila ati domidi, gel beilya wipra ongopdongomidi weleami. Ukuprapidi, abeilya ila buplan damaida, ‘Israel nesala tali wekra popsunung’ tenen, kalengmai. Ukuramya tep, Israel nesala bena Yeriko nesala ati arum domyai men wekmanto kupi. Tonda, Yeriko mutu nesala peda, akati domyai neitamai di, bura tara men bei. Tonda bura tara di, akati men wengami. Israel nesala tep, kwar weik kuramya cadi, sun ati neitamaipu kunmai.

2 Ukurami pangeda, Allah er si Yahwehdi Yosua tep pepu. “Ukutaru ne puto kan deiki deipkene. Yeriko mutu wekra bisbisa kamna tep, nedi melipsenepa, sun Israel nesaladi, Yeriko mutu nesala cap, sun ila nimi deiyo ngebo, Raja ngebo cap, amutu sun jen talen neng cap yumada, puto di balila deipra wekrumdi, bisbisa kapra poptapkamrume,” Allahdi pepu.

3 Upepudi, aupu ton dukdongopra pepu. “Amutu bena wekuruma tep, kan cap, kan jen talen neng capdi, bulupra nepra tekmumdi, amutu ati kungai beilya bura tara yuma, tenpu taru dipu ongopgenep pepra bankamrume. Ukupkamrumada, tumi-tumi yuma, ka di ton, ka di ton cap, ngantan bari tumi deiki di, sika di ongomgenemkamrume. Dinin, tenpu tumida, tenpu taru dipu ongopgenep pepra bankamrume.

4 Tonda ukupkamrume. Kandi pepmempa, Allah er pedina upu dongomi co bekin, Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Peti Perjanjian kael kemna tep, Keluaran 25:11 dinkurume.} doupra dubangepane, sun Allah cap antamdina deiyo neng, sun imam-imam nengda, yoneitam bari nukra, abekine urasin tara mepra bankamenge. Ukupmengopda, sun imam yoneitam bari nengdi, jem domba bisam akolyabot dopra, pong pepra bankamenge. Tumi-tumi yuma ka di ton, ka di ton cap yoneitam bari tumi deiki di, tenpu nukra ukupkamenge. Ukupkameng dinin, yoneitam bari tumi konum kupyopda, atumi deiki dipapu, Allah er pedina upu bekine doupnedi, mepra bange pangeda, Yeriko mutu ati arum dana-dana domi gel beilya, kange di ton cap yoneitam bari nukrap ongopgenep bankamrume. Sun bankamrum taru yumada, sun imam nengdi, jem domba alkobot keca dopra pong penkamenge.

5 Sun imam neng jem domba, giso takke talena neng, puto di pong pepmengepa, gekeprumnyopda, kandi pepmempa, sun Israel nesala yuma, adipapu ila upu deiki di upupkamenge. Ukupmenge pangeda, akati arum dana-dana tara wipra welepi gel beilyada, adipapu dakra sakamre. Sakyopda, sun jen talen neng cap, Israel nesala yuma cap, sun atekmengaipu, adipapu amutu domi ati kan-kan wengbenkamrume.” Allahdi Yosua tep pepu.

6 Allahdi upepupa, nimi si, Nun er mi Yosuadi, sun Allah cap antamdina deiyo neng upupupa yai pangeda, aneng tep pepu. “Allah er si Yahwehdi, er pedina upu dongomi co bekin, Peti Perjanjian doupra bankamrume. Akeca dopra berumdi, sun imam neng ton, yoneitam bari nukra, jem domba giso takke pong pena keca dopra, menepra bankamenge. Sun yuk nengda, amnyo tara yakankamrume,” pepu. 7 Tonda, Yosuadi anesala yuma tep pepu. “Uda, sun jen talen nengda, tekmumdi mepra bankamrume. Sun jen doupra bemumpane, yuk neng, Allah er si Yahwehdi, er pedina upu dongomi co bekin, Peti Perjanjian doupmengedi, amenda tara bankamenge. Sun banmarumu pangeda, Israel nesala yumada, sun amnyo tara bankamenge. Sun yuma berum dingeda, Yeriko mutu ati arum dana-dana wiami gel beilya, warekra ongopgenepra bankamrume.” Yosuadi Israel nesala tep pepu.

8 Yosuadi aupu konum pepra sengpepu pangeda, Allah cap antamdina deiyo neng, sun imam neng yoneitam (7) nukra mepra banmaipa, Allah er si Yahwehdi epu. Mepra banmaidi, sun jem domba giso takke yoneitam bari doupra pong penmaidi banmai. Sun mepra baipa, yuk imam nengdi, Allah er si Yahweh, er pedina upu co bekin, Peti Perjanjian doupra amenda melipra bei. 9 Ukupidi sun jen talen nengda mepra baipane, sun imam nengdi jem domba giso takke talepra, upu pena tep pong pen nengda, amenda banmai. Aneng banmaipane, ton imam nengdi, Allah er pedina upu dongomi co bekin, Peti Perjanjian doupra banmai. Sun banmaipane, yuk jen talen neng ton, sun amnyo tara banmai. Sun mepra banmaipane, sun amnyo tarada, Israel nesala yuma banmai. Sun yumada, Yeriko mutu ati arum dana-dana wiami gel beilya, warekra ongopgenepra bei. Sun yuma banmai taruda, sun imam nengdi, pong pena keca penmaidi banmai.

10 Ukupra banmai dinin, Yosuadi anesala yuma tep, pepu. “Ukutaruda nedi sun tep pepsene. Sun kange dipapu, tenpu upu peda pena gume. Sundi upu tali-tali ila di si akrap men penkamarume. Ange gum dinin, amenda taru, tenpu tumi deiki nedi, ‘Ukuda pepso,’ konum pepsenyopda, ada telepe, ila di penkamrume. Nedi pepsene tarupu penkamrume,” Yosuadi Israel nesala sun yuma tep pepu. 11 Ange tep nengeda, ataru dipapu, tumi tenpunge deiki di, Yosuadi pepupa, sun Israel nesaladi Allah er si Yahweh, er pedina upu co bekin, Peti Perjanjian doupidi, amutu tenpu taru dipu, Yeriko ati arum sirikai warekra ongopgenepra bei. Ange tenpu nukra konum kupi dingeda, sun yuma sun dodin opkal ati deipmaiyaipu tamupra yaidi, tenpu lukunda mapi.

12 Ukupra mapmaiya bereku pangeda, Yosua mapmaua, ipna sisa bukroudi peipupa, Allah er si Yahweh, er pedina upu kiami co bekin, Peti Perjanjian demban neng, sun imam nengda, ambutumi kupmaiya utopu benkoiya tep, akeca dopra ketenepi. 13 Ada sun tumi tenpunge kupmaitopu, atumi ue butene taru, sun imam neng yoneitam bari (7) nengdi, domba giso takke yoneitam bari (7) talepra pong penmaidi embanmai. Sun banmaipane, yuk imam nengdi, Allah er si Yahweh er pedina upu kiami co bekin, Peti Perjanjian doupra banmaipane, sun urasin tarada, jen talen neng ton mepra banmai.

Tonda, sun amnyo tara capda, yuk jen talen neng ton yakanmai. Sun yuma banmaipane, adine yuk Israel nesala cap, amenda dukdongopra dombei. Sun benmai taruda, imam nengdi, jem domba alkobot deiki di pio pong penmaidi banmai. 14 Ange tep nengeda, ue butene tumida tenpu tarupu, Yeriko mutu ongopgenepra banmaiyane, tamupra sun pe atipu yana mapi. Ange utopu, tumi ngantan bari deiki di utopu kupbanmai.

15 Ukupra ukunmai dinin, yoneitam tumi mapmaiya bereku pangeda, keteng ukupu tengyau taru di neprapidi, Yeriko mutu men di kuramitopu dinin, atumida yoneitam bari deiki di, warekrapidi ongopgenepi. Yuk tumi yumada, tenpu tarupu bei dinin, atumida yoneitam bari deiki di ongopgenepra banmai. 16 Ange ukupi dingeda, yoneitam bari nukra bei taruda, sun imam nengdi jem domba giso takke yoneitam bari, ila di pung pepi pangeda, Yosuadi pepu. “Ukutaruda ila upu deiki di upupso! Allah er si Yahwehdi nun amutu konum karepmasere,” pepu. Upepu pangeda, sun yumadi ila di kange deipra, ila upu di upupi.

17 Uda, aupu pepu taruda, aupu ton dukdongopra lap pepu. “Sun gekepso. Yeriko mutu nesala yuma poprapmumdi, akati arum domyai neitamai kure keca yumada, nun nai Allah er si Yahweh, er gispal dona tep karepkamape. Atep, akeca yuma urupra, uku dongopsekamrume. Dinino, tenpu ner er sida Rahab, tali-tali nyangna ner kuramu dinin, aner cap, er ati kunge nesala cap, sunpuda tapkamrume, men popkamrume. Deiyoda ake. Nundi amutu neng tep miryapu taruda, anerdi napra, er ati dongomseudi iniamseu atep, er cap er ati kunge nesala cap, sunpuda tapkamrume.

18 Ukupkamrum dinin, amutu telep keca yumada, Allah tep karenkamepe. Atep ‘Allahdi wenepserur’ tenen, amutu nesala taleami kecada, tenpu pe ton pio men dopropkamrume. Tenpunge peda dopra, sun pe ati deriberumnyopda, Allahdi nun Israel nesala yuma tep, wenepra popkamsera tep pepsene. Atep, akeca yumada, uku dongopra gawal dakamrume. 19 Ukupkamrum dinin, sun Yeriko mutu nesala kunumna weik gat keca puda, nun nai bo Allah tep karepkamepe. Ada sun kunumna weik, gat keca yuma, emas cap, perak cap, tembaga cap, besi cap, gat-gat keca yumada, Allah er si Yahweh tep karerbenkamepe. Akeca dopra, Allah er gispal dona tep, er derin ati derinkamrume. Ada Allah ernge pua.” Yosuadi Israel nesala tep pepu.

20 Uda, aupu yuma konum pepu pangeda, sun imam nengdi, jem domba giso takke deiki pong pepi. Pong pepipa, Israel nesala yuma apong pena gekepi dingeda, adipapu sun upu ila di pepi. Ukupra pepi pangeda, ataru dipapu, Yeriko mutu ati arum dana-dana tara, ila gel di deipra wiami beilya dakra saku. Daksaku pangeda, Israel nesala yuma cap, sun jen talen neng yuma cap, abisipu welepidi, amutu wengbeidi, Yeriko mutu neng poptapra bisbisa kapi.

21 Bena weki dingeda, sun parang ya doprapidi, amutu gam kurami keca yumada, wisi nesala pe, metek nyapu pe, nimi pe, nerapu pe, tonda anesaladi peirami keca domba bisam do, sapi bisam do, ayala-yala yuma peda popra sektapi. Ukupinge deiyoda, Yeriko ati arum cap, akati-akati pumbon kure keca yuma cap, amutu neitamai kwamu keca yumada, ‘Nun nai bo Allah er si Yahwehda, ange yumada ernge pua cadi, er tep karepkupe,’ tenena tep kupi.

22 Ataruda, Yosuadi nimi butene amutu mirbenamrei neng tep pepu. “Sundi aner Rahab tep, ‘Kan cap, kan ati nesala cap men popkamepe,’ pepra, pumun taru pererumtopu, atali-tali nyangna ner ati berumumdi, aner cap, er cap kunge nesala cap, sun yuma doupra, Yeriko neitamai di bura tara duyarume. ‘Yuk nengdi mangkau popnung’ tenen, ukupkurume,” Yosuadi abutene neng tep pepu. 23 Upepupa, abutene neng, Yeriko mutu mirbenamrei nengdi, aner ati bereidi, Rahab cap, er nai cap, er nin cap, er weitap duap neng cap, tonda sun kikiman dukdongopra kurami neng cap, er pel melimna neng cap, doupra yareipa, Israel nesala sun keana dodin ati dopra kunmaiya damai dinin, bura tara sun kunkamengai deipipa akunmai.

24 Ukupi dinin, Israel nesala cap, sun jen talen neng capdi, Yeriko mutu wekidi, ayuma popra uku dongopra sengpepi. Amutu kuamu keca tenpu pe ton men tapi. Dinino, Yeriko mutu kuamu gat keca, kunumna weik keca, er si emas cap, perak cap, tembaga cap, besi keca capda, akeca yumada dopropidi, Allah er si Yahweh, er gispal dona tep, er derina ati moupra deipi.

25 Tonda, tali-tali nyangdana ner, er si Rahab cap, er cap kikiman kurami nesala capda, men popi. Yosua peiputopu tapipa, Israel nesala cap kikiman kurami. Ada Yosuadi, ‘Yeriko mutu nimi ware kupra kunung do?’ tenen, mirbana tep nimi butene doproipupa dirberei taruda, anerdi dopra, er ati iniamu. Atep nengeda, aner lyepra tapupa, Israel nesala kan-kan kuramudi, ukutaru tupa er tara nesala cap, Israel nesala cap, kikiman kununge.

26 Ataruda, Yosuadi mambul upu ton pepra deipu. “Sun yuma gekepneso. Yeriko mutu neitamaida, ka di ton cap tamupra, pio men lepsisikra dopkamenge. Allah er si Yahwehdi dinmaserya pepsene. Ware nesala do yuma, Yeriko mutu ati yuma tamupra dopmengopda, Allahdi aneng tep wenepra popkamre. Aneng sun wenemna tep, widongona keca karepkamre.

Tonda ake. Allahdi amutu konum popudi, uku dongopra gawal dakua tep, ware nengdi amutu ati tamupra dona tep, yo di deipra ayumnya co iktengopda, sun wenemna tep, sun du nyapu, sun weni nyapu depkamenge. Ange utopu ton, ware ngebodi, ‘Yeriko beilya buplan ka di ton cap dopkamne,’ tenepredi er yo buplan dam deipra dopterepmengopda, sun wenemna tep, sun sirya deipkamenge nyapu depkamenge.” Yosuadi pepu.

27 Ange-ange yuma kupka deiki di, Allah er si Yahwehdi Yosua tep melimamupa, atara nesala yuma gekeramidi, Yosua er si ila di amutu yuma kael keami.