Joshua 7

Akhandi mali kupupa er wenemna tep upu

1Allah Yahweh erdi, sun er nyapu sisa Israel nesala tep, konum peiamu ngeda, “Yerikho mutu neitamai kupu keca yumada, adipapu popra gawal dakamrume. Ukupmumdi akeca yumada, tenpunge peda, pio ton men dopropkamrume. Ange yumada, ne mawangepu kunkamrure,” pepra deiamu. Dinino, sun Israel nesaladi apepra deipu ngeda tapidi, moupra men gekepra talepi. Atep, nimi tenpu ngebo, er si Akhandi Allah peipunge moupra men talepudi, aupu yanipu. Ukupupa, Allah Yahwehdi er nyapu sisa, sun Israel nesala tep, pio weika di wenepu. Akhan er nai sida, Karmi kuramu. Tonda, er apubo sida, Zabdi. Zabdi er nai boda, Zerah. Sunda Zerah yala nesala yumada, Yehudadi deiamupa, dadeipdanen yakarami nesala kurami. Ayala ngebo, er si Akhan, Yahwehdi, “Akecada, ne mawange cadi, ange doronada pio meme,” peiamunge dinin, Akhandi tongeda, upula dopropu. Ukupu pangeda, Allah Yahwehdi, sun Israel nesala yala-yala yuma tep nengeda, pio weika di derepudi, mali kange doupu.

2Dakuramyanen, amenda taru dipapu, nimi si Yosuada, Yerikho mutu di Ai mutu dirbana tep, nimi ton nukrapudi wepra deipu. Ai mutu dirbana tep nengeda, tenpu mutu keteng yakan tara Betel mutu damai, ortara mutu si Bet-Awen mutu dirbei. Ada, Yosuadi aneng wepra deipudi, upepu. “‘Ai mutu kunge neng popra gawal dakamep’ tenen, Ai mutu kure keca yumada, adirbemumdi kael kepkurume,” peprapudi, aneng wepra deipudi, apel karepupa, bei. Sun Ai mutu dirbei nengda, amutu neitamai kurami neng cap, kuramu keca yuma cap tep dirbeidi, kael kepi. Sun anengdi pel deiamunge konum dopra gawal dakidi, tamupra Yosua damai bei.

3Sun anesala tamupra bei dingeda, Yosua damai bena lap perbei. Sundi aupu pepi. “Gume naio, ‘Nun yuma bulupmepedi, Ai mutu nesala porbenkamepe,’ tenena gume. Ai mutu kunge nesalada, pio weike gum cadi, nun pio weika di porbanada men putapsere. Ware keca deiyo tep, nun yuma ikin deiki dipapu ormutu benkamepa tepa. Angeda dakwapye. Nun yuma men porbenkupe. Ukupmanto telep ngeda, jen talena neng, nimi denge weik, dua ribu do, tiga ribu do, nukra deipsememdi, dokotepkamserume. Ai mutu nimi porbana tep, jen talena neng pio weika di dokotena meme. Deiyoda, amutu neitamaida pio yambul mutu tepa. Sunda, nimi pio weika di men kununge,” pepi. Upepi pangeda, Yosuadi sun upu gekepka deiki di, teka tenepka tep, aupuda, gekepu.

4Gekepudi, upu peipupa, Ai mutu porbana tep nukra deipi nengda, nimi nukra denge weik, weneri tiga ribu nengpu, Ai mutu porbana tep dopra deipipa bei. Dinino, sun Ai mutu jen talena nengdi, Yosua tara neng tep, popbisipipa, sun Israel neng yumada kware weik kupupa, ‘Popsengedi, gawal daksenung’ tenen, kange mun kange doupra, bura saka, tamupra sepdaro yai. 5Sepdaro yanmai dinin, sun Ai mutu jen talena nengdi, sun Israel neng yuma tep, popra domyaipa, Ai mutu ila bisi buplan damai di gupsaka, gat keca er sida, logam ena tep kurami mutu, Syebarim mutu damai yai. Yai dingeda, amutu pirman tara dadi, ukupmantoda nimi tiga puluh enam nengda sun Israel tara neng, amutu buma mutu taramai di poptapi. Ukupipa, sun Israel neng yuma, ‘Uo’ tenen, ila di kwar pio weik kupupa, ‘Nunda, tek sisi men kuptepe,’ tenenmaiyanen, taproi.

6Kware tep taproipa, Yosua cap, er mawa nesala, sun Israel mutu neitamai talepra kurami nimi deiyo neng cap, sundi pio bicau kupupa, “Uo, ware kuptepe do?’ tenen, sun meneng kenekami opkalpu gwelep-gwelep pepra, tapi. Tonda, atumi keteng komuni di dipra, alukunda yumada, sun nai bo Allah Yahweh tep moronmai. Ada, Yahweh erdi, “Angeda kunkamrume, angeda pio men kunkamrume,” pepra deiamupa, sekra deiami co bekin pumbon, er sida Peti Perjanjian damaipu, sun nong tu deiki mapmaidi, gisoda tu dipmaidi kunmai. Tonda, sun aneng sun giso deiki yuma, kalkal tu bute dopra, sun giso deiki deipra kemami. Ada, Allahdi, ‘Sunda bicauto kunmange, tenepkamser’ tenen, sikke bute dopra, sun giso deiki deipra kemami. 7Ataru dipapu, Yosuadi Allah tep upepu. “Uo, kanda, ne nai bo Allah Yahweh, akeca-keca yuma talememdi, ila puto weik ngebo kurume! Warya deiyo tep kandi nun doupra, ortara di, Yordan me goupra, atara duyanamsemum do? Ware keca deiyo tep, nun duyana, Amori mutu neng sun damai kareyanamsemum do? Ukupsemumpa, Amori nesaladi, nun yuma popsengepa, depra gawal dakamep do? Mesum dipapu duyanamsemum do? Pio telep ngeda, Israel neng nun mutu dorona tep nengeda, Yordan mekin ortara mutupu kuramtepe teptoda, pio telepe. Ada, Yordan me goupra, ortara tepa! 8Uo Allah, kanda, akeca-keca yuma talememdi, ila puto weik ngebo kurume! Ne mar podan neng, sun Israel nesalada, Ai mutu neng tep, konum kware kupupa, tapra tamupra yanmai. Atep, ukutaruda nedi ware upu ton peptene do?

9Tonda, atara nengdi lap perbengepa, sun Kanaan tara neitamai yuma kunge nesala cap, tonda yuk neng amutu neitamai yana kunge nesala yumada, apepmarem upu tep, gekepmengedi, sundi moupra kael kepkamenge. Ukupmengedi, sun Kanaan nesaladi yana wareksengedi, nun yuma popra gawal dakamsenge! Mutu ban-ban yuma neitamaida, nun si gum kupkamre ja. Ange tep nengeda, Allah Yahweh, amutu nesala yumadi, kan ila mambul si tep, ‘Dakwapye, erda tali ngebo, tenepkenung’ tenen, kan ila di gispal dona tep, ware kupkamrum do?” Yosuadi pepu.

10Upepupa, Allah Yahwehdi Yosua tep tamupra pepu. “Kanda tekrume! Kan cap, sun Israel nesala ila deiyo-deiyo talepra kunge neng cap, tu deiki mapmarumada, ware keca deiyo tep kunmarum do? Ukuna meme! Sun yuma tekroso! 11Sun Israel nesala yumada, konum mali kupi. Ne Allah Yahwehdi sun tep, ‘Ne cap, sun cap, antamdana tep, moupra tenenkamrume. Yeriko mutu popmarumdi, aneng sun tapmai bung keca yala-yala yumada, sundi dorona meme!’ pepra, deipsisi. Akecada, ne mawange cadi, angeda pio men doronkamrume!’ pepra, konum pemsisi. Dinino, sundi aupu yuma yanipidi, mali weik kupi! ‘Akeca-keca yuma popra, gawal dakrumudi, gum kupra deipkamrume,’ pemsi kecada, men kupidi, dopropnapu kupi. Sun Israel nesaladi akeca-keca yuma upula dopropidi, dopra inipi keca yuma tep, ‘Gume, nimidi ton men kael kepkamsenge,’ tenepi, sun pe keca neitamaipu inpra deipi.

12Ange tep nengeda, Isarel neng sun podan neng damai tep, kware pio kuna gum dipapu, men tektenge. Ange gume dinin, sun Ai mutu nesala damai bei. Bei pangeda, sun podana tep, Ai mutu nengdi popipa, sun kware weik kupupa, tamupra bei. Ukupmaiya deiki di, sun pedipapu ila ikin keca dopra, sun meneng nong deikipu, konum deipmange. Nedi, ‘Ange yuma popra gawal dakamne,’ tenepsi keca utopu, konum kupdanmanga cadi, sun peda ton poptapkamsene. Atep, nedi ton cap sun Israel nesalada, sun tep, pio men melipkamsene. Ada, ‘Akecada ne mawa mem keca kurura cadi, akeca-keca yuma men doproptume,’ peiamsisi keca dinin, sundi upula dopropmarum ngeda, sundi ange yuma gum kupra gawal men dakra deiamruma tep, ne cap, sun cap, kikiman men kunkamepe. Atep, sun Israel nesaladi, upula dopropmai keca tep, men gawal dakmengedi, gum kupra men deipmengopda, neda sun cap ton, kikiman men embankamepe. Tamnapu kunkamsene,” Allahdi pepu.

13Upepudi, aupu ton dukdongopra pepu. “Ukutaruda, Yosua! Kan adipapu bukmemdi, ne mawa nesala Israel nengda, ne cap telep kupra kikiman kuna tep, mali kupmainge gum kupra deipmemdi, kange di pio telep kweipkurume. Tonda, sun anesala tep pepmempa, adipapu ketenepmengedi, ne damai yangepa antapkamapa tep nengeda, sundi sun pe tep, telep kemdana tep, tenepkamenge. Sun anesala tep pepmempa, telep kupra ketenepmangadi ambutumida antapkamepe. Ange tep nengeda, Israel nesala sun deiyo ngebo ne Allah Yahwehdi sun tep melipra kalengsenun ngebodi pepsene. Uo, nun mawa neng sun Israel mutu neitamai kurum neng yuma tep, nedi, ‘Akeca keca yumada sun ton men dopropkamrume,’ pepra peiamsisinge tep, konum upula dopropmarumdi, sun pe keca neitamai di inipra deipmarume. Atep, ange-ange yumada, sundi popra gawal dakamrume. Amem keca kapul men doproprumudi, men gawal dakmem taru neitamai di, sun podan neng tep, pio poptaprumudi, men talenkamrume. Sun podan nengdi, sun tep pio popra yanidongonapu kunkamsenge.

14Ange tep nengeda, sun Israel nesala yuma alukunda mapmarumanen, ipna ambutumi di, ne damai yankamarume. Ambutumi ipnada, ‘Ayala nesala ace, oryala nesala ace’ tenen, ne damai yamumnyopda, tenpu ngepu wepkamne. Ange wepnyopda, sun yala neitamai di, ‘Amutu ngebo ace, ormutu ngeboda ace’ tenen, wepkamne. Wepnyopda, sun neitamai di, ‘Angebo er cap, er nyaosilip yuma cap ace, orngebo er cap, er nyapsilip yuma cap ace’ tenen, ne damai yamumnyopda, tenpu yala ngepu wepkamne. Ukupkamana cadi, sun Israel nesala yuk-yuk dinin, ne damai yanmarumupa, wepetepkamsene. Angetopu, nedi nimi yuk-yuk kuruma utopu, ‘Angeboda ace, angeboda ace’ tenen, ne damai yamumnyopda, tenengepu wepkamne. Ne Yahwehdi, ‘Angeboda, adano,’ pepkamane. Atep, amutu neitamai kuramrum yala neng yumada, ayala-ayala neng adipapu yuma, yuk-yuk yarumupa, nedi wepetepkamsene. Tonda, nedi tenpu ngebopu lap pepnyopda, ‘Er akonuma,’ tenepkamepe.

15Ada tali tep gume. Ne Yahwehdi wepkamne ngeboda, tek sisi mem keca dopropmau ngebo kurure. Ada, nedi, ‘Akecada mem keca cadi, pio men dopropkamrume,’ pemsisi dinin, erdi upula dopropmaudi, akeca inipra er pe keca neitamai deipmau ngebo wepropkamne ja. Angeboda, dopra uku dongopkamrume. Uku bu di, er nong yuma jepropredi, gawal dakamre. Autopu, angebo er bung keca yuma cap, uku dongopra gawal dangkamrume. Uku di akeca yuma jepropkamre ja. Deiyoda, ne Yahwehdi, ‘Akeca dorona pio meme,’ peipsisi bung keca ton upula dopropudi, moupra deipmaua tepa. Ukupmaua deiki di, ne mambul upu yaniptapmaue. Ne Allah Yahwehdi pepra deipmasi upuda, moupra gekena gum di, yanina ngebo kurure. Ukuredi, ne mawa neng sun Israel nesala kununga neitamai kuredi, ila di mali-mali weik kure ngebo kurure.” Allah Yahwehdi, Yosua tep pepu.

16Upepmaua tep nengeda, sun yuma damapmaipane, konum berekupa ngeda, pio ipna taruda, Yosuadi peipmaupa, sun Israel nesala yuma, Allah er mawa Israel neng sun tep, yuk-yuk mutu yuma, “Tenpu-tenpu mepra benkurume. Sun akuruma utopu, yala yuk-yuk mepra Allah er damai benkurume,” pepu. Upepmautopu, sun Israel nesala yuma, yala yuk-yuk akuramitopu, Allah er damai benmaipa, Allahdi, tenpu yala sun Yehuda yala nesalapu, wepra deipu. 17Allahdi Yehuda yala neng wepka cadi, Yosuadi Yehuda yala neng tep peipupa, sun menmena mepra yakanmai. Ada sun yala-yala yuk-yuk cap mepra yanmai. Tonda ukupipa, Allahdi Zerah yala nengpu wepra deipupa, ikin kecada Zerah yala nesala sun deikipu kupmaue. Ukupi pangeda, Yosuadi sun Zerah yala nesaladi deiami neng sun nyapsilip yuma tep, peipmaupa, anengpu Allah er damai yakanmaipa, Allahdi nimi si Zabdi, er nyapsilip wepra deipupa, ikin kecada, Zabdi yala neng sun deikipu deipu.

18Ukupupa, Zabdi er nyapsilip yuk-yuk dinin, menmena mepra yakanmai pangeda, nimi tenpu-tenpupu menepra yuk-yuk Allah er damai yakanmaipa, Allahdi, nimi si Karmi er mi Akhan wepra deipudi, ikin keca er nong deiki deipu. Ada, Yehuda yala nesala kan-kan di tenpu ngebo wepra deipu. Erdi deipu ngeboda ake. Ada, Zerahdi deipu ngebo Zabdi, tonda Zabdi erdi deipu ngebopu Karmi dinin, Karmidi deipu mi, er si Akhan wepra deipudi, ikin kecada er nong deiki deipu. Sun yalada, Yehuda yala neng kurami.

19Ukupka tep, Yosuadi Akhan tep pepu, “Uo, ne mi kanda, moupra tenipetepmemdi, Allah Yahweh er damai kuredi, gekenmasera cadi, acei adipapu, katuai di lap pepkurume. Ada sun nai Allah er si Yahweh, Israel nesala tep pio moupra kalengserur Allah tep nengeda, er si ereipkurume. Tonda, kandi mali kumum keca yuma katuai di lap pepkurume. Ne tep upeipkunerume. Tonda, kandi akecada pio moupra inimdongona gume. Katuai dipapu lap peipkunerume,” Yosuadi Akhan tep pepu. 20Upepkopda, Akhandi tamupra pepu, “Uo naie, teka. Nun Israel neng tep pio melipra kalengserur ngebo, nun nai Allah Yahweh, nedi er tep konum pio mali kupra deipsi. Ne mali kupsi ngeda ake.

21Nundi nun podan neng konum podanmapu taruda, sundi tapmai bung keca yala-yala yuma neitamaida, nimi deiyo neng bol deiki kenengameng lyom opkalda, sarong lyom nge utopu, urasin pio telepnge tenpu epsi. Angeda, mutu si Babilon, tonda Sinear mutu perameng mutu ngebodi wiamu ngeda, upula dopropsi. Tonda, angeda kunumna weik keca, er si perak ton, ukupmanto er ikinda butene kilo gram epsidi, dopropsi. Tonda, kunumna weik keca, er si emas ton, er ikinda, tenpu kilo gram dinin, neitamaipu wilipra deipinge kupupa, ange ton akupupa, epsidi upula dopropsi. Ange epsi keca yuma tep ne pio putapneupa, ne ton dopropsi. Ange yumada dopropsidi, ne lyom opkal di deipsi ke atida, ne tenda ati pumbon di, tu paliprasidi, atu pumbon dongopsi. Ada, ne tenda ati pumbon tu pum neitamaipu inipra deiamsidi singipdongopsi. Akunumna weik gat keca er si emasda, deiki tara deipsi dinin, perak ngeda, emas amutarapu moupra deiamsipa, atupa kurure,” Akhandi Yosua tep lap pepu.

22Ukupra lap pepu pangeda, Yosua adipapu menmena nimi dokotepupa, Akhan er tenda ati damai bei. Upepupa beidi, dinmaipa akeca yumada, Akhan lap pepmautopu, tupa akapu. Ada, Allahdi, “Akecada ne mawa keca cadi, mem keca kurura cadi, ange yumada pio men dopropkamrume,” pepra deiamu keca dinin, Akhandi upula dopropudi, inipu keca yuma akuamu. Ada, akunumna weik keca emas cap, tonda emas amutara inipra deipu perak capda, tu neitamai deiputopu, tupa akapupa epi. 23Aneng sun yumadi, ainipra deiamu bung keca, perak cap, emas cap, lyom sarong opkal cap, yala-yala yuma doupra Yosua damai duyai. Tonda Israel nesala dinmaiya damaipu deipipa, sun yuma epi. Akeca yuma doupra yai dingeda, Allah Yahweh er damaipu yana dopra deipipa, epu.

24Konum ukupi dingeda, Yosua cap, sun Israel nesala yuma capdi, Zerahdi deipu mi Akhan tomopi. Akhan tomopi dingeda, erdi upula dopramu kunumna weik gat keca emas cap, perak cap, tonda ila nengdi bol deiki kenengna lyom opkal, Sinear mutu ngebodi wiamunge cap, Akhan erdi deiamu nyapu yuma cap, ner nyapu yuma cap, tonda erdi talepra peiramu gam keca, sapi bisam cap, keledai bisam cap, domba bisam cap, tonda sundi domi tenda opkal ke ati cap, tonda akeca-keca yala-yala yuma sundi taleaminge yuma cap, Israel neng douprapidi, tenpu ban mutu si, Akhor mutu derirbei. (Amutu si peramya deiyoda, ‘Kange mun kange doun keca kurur mutu tep, mutu si siperami.) Aceipu, Akhan er keca yuma doupra derirbei.

25Derirbei dingeda, Yosuadi Akhan tep upepu, “Kanda deiyo ware keca tep, kange mun keca nun Israel nesala nun damai doupra yanmaserem do? Ukupmaruma tep nengeda, ataruda Allah Yahwehdi ila kange mun keca doupra kan nong deiki duyankukere!” pepu. Ukupra pepkopda, adipapu Akhan cap, er nyapsilip yuma cap tep, Israel nesaladi gel doprapidi, sun nong deiki puto di dokoteprapidi popipa, sun yuma depmai.

26Ange yuma konum kupmengopda, sun Israel nesala yumadi, ila gel doprapidi, aneng nong deiki aceipu deipra tu deiki singipdongopmai. Ukupmai ngeda, atumi di dipdongopra dorkuamu taru neitamai cap, ataru yumada, pio tep tupa akupmare. Agel yumada tupa katuai akurura cadi, amutu neitamaida, er si tep, ‘Lembaga Akhor,’ pepra tupa penunge. Aupu deiyoda, ‘Kange mun keca kuserur mutu’ tenena tep, asi penunge. Allah Yahweh erdi sun Israel neng tep, “Akhan dopra ukupra wenepra poptapkamrume,” peiputopu konum kupya tep, ataru di dipdongopra, oryankamu taruda, Allah er si Yahwehdi, sun tep ila di derepu ngeda, tapu. Akhandi mali kupunge tep, ton cap men wenepu.