Jos 8 | XteSC | STEP | Allah Yahwehdi Yosua tep pepu, “Kan jen talen neng yuma bupra deipkurume. Bupra deipmem dingeda, sun cap Ai mutu benkurume. Ada, ‘Benkun do, men benkun do?’ tenen, kwar kunada, pio gume! Moupra dinkurume. Ne Allah Yahwehdi sun podan neng cap, porbisina keca cap yuma, sun deiki dopra deipsenepa, Ai mutu ila nimi deiyo Raja cap, erdi talerur neng, amutu kunge nesala cap, sundi ila ati arum dominge cap, konum karepkusene. Atep anesalada, sun damai bena, popra sengpepkamrume.

Joshua 8

Ai mutu dalupra doprapidi, sikke buktapya tep, pepu upu

1 Allah Yahwehdi Yosua tep pepu, “Kan jen talen neng yuma bupra deipkurume. Bupra deipmem dingeda, sun cap Ai mutu benkurume. Ada, ‘Benkun do, men benkun do?’ tenen, kwar kunada, pio gume! Moupra dinkurume. Ne Allah Yahwehdi sun podan neng cap, porbisina keca cap yuma, sun deiki dopra deipsenepa, Ai mutu ila nimi deiyo Raja cap, erdi talerur neng, amutu kunge nesala cap, sundi ila ati arum dominge cap, konum karepkusene. Atep anesalada, sun damai bena, popra sengpepkamrume. 2 Ai mutu cap, amutu kunge nesala cap, amutu nimi deiyo kepra talepra kurur Raja ngebo capda, men taru kandi Yerikho mutu kuamumtopu, kunkamarume. Ada, Yeriko mutu nesala popbisipmarumdi, akeca-keca gawal dakmarumtopu, Ai mutu peda bena utopu kupkamrume. Dinino, ataruda, Ai mutu tapkameng bung keca cap, sundi peirami gam keca cap, sundi talerami bung keca cap yumada, konum karepkusena cadi, sun Israel nesaladi tali lupra dopropmumdi, sun pengepu kepropkamrume. Atep ukutaruda, sun adipapu menmena, sun amutu neitamai kunung neng porbana tep, amenda dato-dato dipapu keteneipkurume. Akati arum iriamu tarapu bena, inipra keteneipkurume.

3 Allahdi upepupa Yosua cap, er jen talen neng cap, sun kikiman yuma adipapu ‘Ai mutu porbenkamep’ tenen, ketenepi. Ukupi dingeda, sun deiyo ngebo Yosuadi, er jen talen neng denge pio weik tiga puluh ribu (30.000) neng pio piripra nimi pona telep nengpu ketenepra deipu. Ukupu dingeda, lukunda neitamaipu wepra deipudi, doproipupa, bei. 4 Tonda, sun ajen talen neng tep upu karepu. “Amutu neitamai ortarada bena inipkamarume. Sun ati arum domyai urasin tarada, bana gume. Dinin, akati arum iriamu tarapu, inipraprumudi, keteneipkamarume. Pio pera karenaida, inimna pio gume. Ukupmumdi nimi porbana tep, pio moupra dinapu kumumdi, keteneipkamarume. 5 Ukuprumupa, ne cap, yuk jen taleng neng cap, yuk Israel nesala yuma cap, nun kikiman yuma amutu arum urasin tara damaipu katuai benkamape. Ukunmapepanen, sun Ai mutu neng balila deipra yangedi, nun yana popra, bisbisa kapkamsenge. Ukupsenge pangeda, nundi kange tamupra sun tep, menmena taru puto di sepra benamuputopu, ukutaru peda utopu kupkamepe.

6 Sepra bepepa, sun Ai mutu nengdi pio domyakanmasenganen, amutu neitamai di tapra, ‘Israel neng popkup’ tenen, sepdaro karen mutu yankamsenge. Ukupmepepa epmengopda, sundi, ‘E, ada nun kwar tep, kurapra pumun taru sepra benamseitopu kupmenge,’ tenepkamenge. 7 Utenepmenge taru dipapu, nun sepdaro ortarapu benkamap taru dipapu, sun denge weik tiga puluh ribu (30.000) jen talen neng yuma wepra deipmasenepa, inipmamumnyai di gupra yankurume. Ukupmumdi, Ai mutu nengdi domi ati arum yumada sundi menmena dalupra dopropkurume. Ukupmumnyopda, amutu ati arum yuma cap, sun anesaladi tapkameng bung keca yuma capda, sun nai Allah Yahwehdi ange yuma dopra sun deikipu karepkamsere.

8 Ukupmumdi, Ai mutu konum dalupra dopropmumnyopda, amutu ati-ati yumada, adipapu uku dongopkurume. Angeda, Allah Yahwehdi, ‘Angeda ukupkamrume,’ pepra, deiputopu kupkamrume. Ada, ne Yosuadi sun tep, ‘Ukupkurume, ukupkurume,’ pepra, konum pepra deipsene. Ada, nun nai Allahdi peipseutopu, nedi ton sun tep pepra deipsene. Ange utopu kupkurume. Yuk gume.” Yosuadi er jen talen neng tep pepu.

9 Ange yuma konum pepu dingeda, Yosuadi er jen talen neng denge pio weik, 30.000 neng wepra deipupa, Ai mutu atara, Betel mutu ortara, damaipu inimbei dinin, sun inipmaiyaida, Ai mutu keteng wengban tara bena inimbei. Ukupidi, sun podan neng tep bena kaleki. Bena kaleki dinin, sun deiyo ngebo Yosuada, er mawa neng, Israel nesala sun tenda opkal ati dopra deiamyaipu mapi. 10 Yosua mapmaua berengyan tarupu bukrou. Ukupu dingeda, er cap mapmai jen talen neng tep, upu pepra deipupa, sun cap, sun yuk tali Israel nesala yuma cap bulupra wengyai. Bupra wengyai dingeda, er cap Israel mutu neitamai talepra kurami nimi deiyo neng cap yumadi, sun jen talen neng yuma capda, Ai mutu ati arum domyai urasin tara damaipu doupra bei.

11 Bei dingeda, sun jen talen neng yuma cap, Yosua cap, kikiman Ai mutu ila pala bisi damai tarapu bei. Ukupi dingeda, Ai mutu ortara kupu dinin, sunda Ai mutu utara dapu tara bena, sun tenda ke ati deipi. Tonda, Ai ati arum ortara kupkai, Yosua cap, er jen talen neng cap, atara kupi dinin, aneitamaida, yambul weik ban mutu ton kwamu. 12 Yosua erdi pepu nengda, yambul weik dengeda 5.000 neng wepra deipudi, adipupa amutupu dinin, Ai mutuda keteng yakan tara kupkai dinin, sunda keteng wengban tara inimbei. Yosua cap, er jen talen neng capda, Ai mutu dana Betel mutu dana, daneitamaipu inipi. 13 Atep, Yosuadi er jen talen neng tep, “Mar podarbanai bana tep, ukupra-ukupra nengpu ortara tekurume. Sun yuk nengda, atara tekurume,” pepra, wepra deipu ngeda ake. Yosuadi nimi deiyo talepra, kuna ngebo tenpu ton cap, sun jen talen neng pio weika di wepra deipudi, amutu neitamai dinin, utara ketenepra deipu. Tonda, yuk jen talen neng, yambul gung yumada, keteng wengbaramre tara wepra dokotepu. Ukupu dingeda, Yosua erda amutu neitamai banpu alukunda bena mapu.

14 Ukupipa, Ai mutu nimi deiyo ngebodi, Yosua er melimna tep, jen talen neng ton epu. Epudi peipupa, er cap, er jen talen neng cap, er mutu neng yuma cap adipapu menmena di, ‘Israel nesala porbenkupe’ tenen, sun ati taprapidi, akati arum bura benmai. Er cap, er jen talen neng cap, sun menmena taru di, Israel nesala popdanami mutupu benmaidi keteneipi. Sunda, Yordan me tara bisi bei ngeda, ‘Sun Israel neng yuma popkamep’ tenen, bisi bei. Ai mutu nimi deiyo ngeboda, ‘Nun ati arum iriamu tara ton, sun Israel mutu jen talena neng, denge weik keteneipmangdi, ‘Nun tep poryankamasenge, tenepmaidi, pio men kaele kepmai. 15 Tonda, Yosuadi konum peipmautopu, er cap, er jen talen neng cap, er tara neng yuma capdi, sepdara bei. Ada, ‘Ai mutu nengdi, ‘E, nun tep nengeda, konum kwarapra sepdara bendopmange, tenepkamseng’ tenen, ukupra sepra bei tarada, ila katuai mutu tarapu sepdara bei. 16 Ukupra kunmai taruda, sun Ai mutu neitamai kurami nimi deiyo ngebodi peipupa, er tara nimi yumada, ‘Yosua cap, er jen talen neng cap dombana tep, ‘Porbenkupe’ tenen, dopra karepupa, sun yuma dombei. Dinin, sun Ai mutu nengdi Yosua dombana tep, sun pe mutu neitamai di tapra, dombanmaianen, sun mutuda tapra, yuk pera karen mutu bei.

17 Bei dingeda, Ai mutu cap, Betel mutu cap, daneitamai kurami neng yuma gupra yaidi, sun Israel nesala tep dombei. Ukupya tep, amutu buteneda, pakra tapidi tali ukuptapnapu kupidi, amutu kalengna neng peda, pio ton gume. Sun yumada, Israel nesalapu dombei. 18 Uda, ataru dipapu, Allah Yahwehdi Yosua tep pepu, “Kandi doupmarem parang ya urup ketepneipmamum parang yada, Ai mutu tara aya urupdeipmemdi bupukurume. Ukupmempa, amutuda ukutaru nedi dopra, kanpu karepkene,” Allah Yahwehdi peipu. Upeiputopu, Yosua erdi ange yuma utopu kupu. Er doupmau parang ya dopra, Ai mutu tara aya urupda, bupukmau. 19 Yosuada, er buru di doupmau parang ya bupuku taruda, er jen talen neng yuma inipmaiya damai nengda, menmena adipapu tekidi, Ai mutu ati arum damai sepdara bei. Bei dingeda, akati arum wekidi, amutu yuma sunpu dopropi. Tonda, sun Israel mutu jen talen nengdi, amutu ati-ati yuma uku dongopra gawal daki.

20 Sun Ai mutu nengdi, sun amnyo tara tamupra dinmai. Dinmaipa, ukudi Ai mutu ati yuma, uku jenmaupa, aketda welepudi, impu bena benmaupa, sundi epi. Epi dinin, sundi, ‘Uo, dan tara sepdara betepe do?’ tenena pio gume. ‘Nun ati arum yumada, yuk nengdi konum uku dongopmange. Tonda, nundi porbenmap nengda, ukutaru tamupra nun popkusenga tep, nun damai sepdara yakankusenge,’ tenepidi kange wang-wang pepnapu kupu. 21 Utopu, Yosua cap, er amutara jen talen neng cap, sun peda aket epidi tenepi. ‘Gume ukutaruda, nun kayapu jen talen nengdi, Ai mutu yumada, konum popra tapmangdi dopropmange,’ utenepi. Atep, Yosua cap, er nyapu jen talen neng yuma cap, tamupra, ‘Nun domyakanmaseng nengda, sun Ai mutu neng porbenkup’ tenen, tamupra beidi, sun anesala yuma popi.

22 Atep, Yosua cap, er jen neng cap, tonda, Ai mutu damai inipmai jen neng capda, yaidi sun cap kikiman wisiprapidi, Ai mutu nesala yuma porbei. Ukupi taruda, sun Ai mutu neng yumada, warekra ongopdongopipa, Ai mutu jen talena neng, sun pio men sepra benmanto kupi. Nimi ton sun damai di tenpu ngebo peda ton, bisipra men beu. Anesala yumada, sun Israel nesaladi Ai mutu neng popra gawal dakipa, ayuma depnapu kupi. 23 Dinino, Ai mutu neitamai talepra kuramu nimi deiyo ngebo, erpuda ton men popi. Sunda adipapu tomoprapidi, doupra Yosua er damaipu duyai. 24 Sun Israel nengdi Ai mutu ati tapra, domyakanmai neng yuma popra, gawal daki dingeda, sun amenda tara katuai mutu wala di domyakanmai jen talen neng yuma peda, parang ya di popra gawal daki. Ukupipa, sun adipapu tamupra Ai mutu ati arum damaipu bei. Ukupidi, orkunmai neng, sun Ai mutu neng yuma peda, yuma ton men tapi, parang ya di popra, gawal daknapu kupi.

25 Atumi neitamai dipapu, Ai mutu kurami neng yuma depi neng, sun dengeda 12.000 nesala weik, parang ya di popipa depi. Ada, nimi cap, nerapu cap, dukdongopra nuki nesala tepa. 26 Deiyoda ake. Ada, Yosuadi tupa, erdi doupmau parang ya di, Ai mutu damai tara bupungmauada, pio bupungmauanen, ataru neitamai di Ai mutu nesala ponapu kunmaiyanen, anesala damai tara ton pio men doupra kwerenmau. Kwereptuopda, Ai mutu nesalada men gawal dakmatenge dinin, atumi dipapu Ai mutu nesala yuma konum popra gawal dakye. 27 Dinino, amutu neitamai di, Ai mutu nengdi tapi bung kecada, Israel nesaladi dopropi. Akecada, nimidi peirameng gam keca cap, bung keca yala-yala yuma cap dopropi. Sun Israel nesaladi dopropidi, akeca yumada sun pe keca sisa utopu kepropi. Adopropi ngeda, ada Allah Yahwehdi Yosua tep nengeda, “Ukupkamrume,” peipmautopu kupi.

28 Atep nengeda, Yosuadi peipmaupa, er jen talena nengdi Ai mutu bena uku dongopi. Ukupidi amutuda, adipapu sikke bukra tapudi, pio gum kupra deipupa, ukutaru abuku sengnung taru peda, tupa sikke bukra akurure. Kange di ton men lepsisikra domi. 29 Tonda, Yosuadi Ai mutu neitamai nimi deiyo kepra kuramu Raja ngeboda, ila lyom co akwamngaida, lyom tapu geteprapudi, aRaja ngebo er kum gerekra deripkotepu. Animi deiyo ngebo ukupra deripmaudi, kaukepronmauanen, idona keteng kupu. Ataruda akupmaupanen, keteng konum weku. Ukupupa, Yosuadi anesala tep dipupa, angebo er nong gemna dopra, Ai mutu ila bisi embaramyai, Ai mutu wengban bisi ila buplan damaipu doptapi. Ukupi dingeda, sun Israel nengdi, gel pio weika di dopra, angebo er gemna dopmaiya deiki tara, ila di singipi. Asingiami gel yumada, ukutaru abuku sengnung taru peda tupa akurure.

Yosuadi Ebal mutu deiki di, Allah er gispal dona tep, mesba deipu upu

30 Ange yuma konum kupi dingeda, Yosuadi Ebal mutu deiki bena, sun Israel nengdi Allah Yahweh, Israel nesala tep pio melipra kalengamu Allah, er si eremnai tep, gel pala taplakra yakeipudi, sun Israel nesaladi, sun nai bo Allah Yahweh er damai kuna tep, telep keca kareryakarami. 31 Adopu mesbada, Allah Yahwehdi, er pel melipra doramu ngebo Musa tep, “Ukupkamrume, Ukupkamrume,” pepra peipupa, Musadi sekeiamu upu neitamai pepra, deiamutopu kupra dopu. Tonda, ada Allah Yahwehdi, Musa tep peipupa, Musadi sun Israel nesala tep, “Ukupra dopkamrume,” peiputopu, Yosuadi kupu. Allahdi upeiamu. “Ne si eremna cap, ne karena tep nengeda, amesba tenpu dopkamnerum ngeda, gel pala di taplakra deiprapmengedi, keteneipkamnenge. Tonda, gat keca er si besi ton, agel deiki pio men potokamrume. Gat keca besi di deipra, pel men doramenge gelpu taplakra deipkamnerume,” peiamu. Amesba deikida, sun Israel nesaladi Allah Yahweh er si eremna tep, ketenepra deiami mesba deiki, gam keca popra, yana uku dongopnedi, er si eremami. Tonda, yuk gam keca cap popnedi, yuk telep keca cap doupra, yana uku dongopnedi, ‘Nun nimi cap, Allah Yahweh cap, antamdana tep, telep kupra kikiman kunkamtepe’ tenen, kareryakarami. Akeca duyana di, uku dongopra Allah Yahweh er si eremami.

32 Tonda, akeca keteneiamyai orda, Israel mutu neitamai kunung nesaladi, ‘Akecada, peten kemna tep akecada, aceipu deipkamep’ tenen, Yosuadi gel pala doprapudi, agel deikida, Allah Yahwehdi, “Angeda kunkamrume, angeda pio men kunkamrume,” peipupa, Musadi gekepra sekeiamu upu, aupu kwamutopu, Yosuadi dopra, agel urasin deiki sekeipudi, aceipu deipu. 33 Yosuadi aupu sekra deipu taruda, Israel nesala yuma cap, yuk mutu nimi bo neng dinin, Israel nesala cap, wisipra kikiman kurami neng cap, Israel nesala, sun ila deiyo-deiyo neng cap, sun jen talena neng, sun deiyo neng cap, upu bongdina deiyo neng cap, wenemna ati talepra pel dorami neng, sun deiyo neng cap, buluprapidi meneng damaipu teki. Ada, Allah Yahwehdi peiamu mem upu sekra deiami co bekin, Peti Perjanjian dopra, deipyai dana-dana tara teki. Anesala yuma neitamai di bokra, utopu yuk-yuk kepropidi, aco bekin pirman ortara atarapu bena tekmaidi, urasin tamupra sun Lewi yala neng imam-imam nengda, Yahwehdi peiamu mem upu sekra, doupra beidi dongopi co bekin damai tekmai.

Israel nesala sun bisi embarami tarada, Lewi yala nengdi, Allahdi peiamu upu dopra deiami co bekin doupra bisi embarami neng kurami. Aneng sun urasin tarada, Israel nesala teki. Tonda, ton tara Israel neng cap, sun Lewi neng cap, sun urasinda Gerizim mutu tarapu dinmai. Ton tara neng cap, Lewi yala neng capda, Ebal mutu tarapu sun urasinda, deipmaidi dinmai. Ada tali tep gume. Angeda, Musada, Allah Yahweh er pel melipra doramu ngebodi, konum peiamu topu, sundi kupi. Ukupra atekmaiya deiyoda, sun Lewi yala nengdi, Israel yala neng yuma telep kuna tep nengeda, ‘Telep upu pepra deipkameng’ tenen, aceipu teki. Ada, sun Lewi nengda, ‘Allahdi sun Israel yala nesala yuma tep, telep kun kecapu kweipkamse tenen, moronupe, penkameng’ tenen, peiamu.

34 Lewi yala nengdi, aupu konum pepi pangeda, Yosua er upu puto deiki di, ‘Israel neng yuma kange di ton cap gekepkung’ tenen, Allahdi peiamupa, Musadi sekra deipu upu penmau. Ada, Allahdi, ‘Angeda kunkamrume, angeda pio men kunkamrume,’ pepra, wenemna upu deiki, Musadi sekeiamu sengna keca dopropudi nuku. Ada, widongona upu cap, tonda yuk nengdi melipra karepnepa dopropnedi, talepra kun keca upu cap, dopropudi nuku. Aupu nukunge yumada, tek sisi Allahdi peiamupa, Musadi sekeiamutopu nuku. 35 Atumi neitamaida, Musadi sekra deiamu upu yumada, Yosua erdi dopra er nyapu sisa Israel neng bulupra wekmaiya kan-kan, sun gekena tep nuku. Tenpu upu peda men tapu, ange yuma nuku. Ada, nimi cap, nerapu cap, nyapu cap, yuk mutu nimi bo neng sun cap, sun yuma kikiman bupra wekmai neng kan-kan di, sun gekena tep abukuda, Yosuadi dopra nukupa, gekepi.