Jos 9 | XteSC | STEP | Uda, Yordan me goupra, ortara keteng dangban tara sun mutu gon deiki kurami neng cap, mutu amu kurami neng cap, uda ila laut mokon dam tara dinin, Libanon mutu damai ortara kurami neng cap, sun dapu tara ban mutu kurami nimi cap, sun deiyo neng yuma capda, yuk nengdi, “Uo, Yosua cap, sun Israel jen talen neng capdi, Ai mutu konum popra tapmangdi, gawal dakmange,” pepra, lap penmaipa, gekenmai.

Joshua 9

Gibeon nengdi Yosua tep, “Nunda karen mutu di yanmape,” pepra, mok upu peptapya deiki di lyepdai upu

1 Uda, Yordan me goupra, ortara keteng dangban tara sun mutu gon deiki kurami neng cap, mutu amu kurami neng cap, uda ila laut mokon dam tara dinin, Libanon mutu damai ortara kurami neng cap, sun dapu tara ban mutu kurami nimi cap, sun deiyo neng yuma capda, yuk nengdi, “Uo, Yosua cap, sun Israel jen talen neng capdi, Ai mutu konum popra tapmangdi, gawal dakmange,” pepra, lap penmaipa, gekenmai. 2 Gekenmai dingeda, ‘Uo, atep, Israel nengdi nun mutu yuma peda, yana poryankusenga cadi, telep ngeda, nun yuma wisiprapmepedi, nun gung tenpu weika di, sun Israel nesala tep warengbenkamepe’ tenen, wisiprapidi keteneipi. Ada, amutu-amutu yumada, sun ila nimi deiyo neng yuma gekepi. Aupu gekepidi, wisipra keteneipi nengda ake. Ada, Het mutu kurami neng cap, Amori mutu kurami neng cap, Kanaan tara kurami neng cap, Feris mutu kurami neng cap, Hewi mutu kurami neng cap, Yebus mutu kurami neng cap, ayala neng yumadi gekepidi, ‘Tenpu gungpu kepmepedi, Israel nesala porbenkamepe’ tenepidi, wisipropi.

3 Sundi amutu-amutu kurami nengdi, wisiprapidi keteneipi dinino, sun aupupu gekepi nesala ton, sun yuk yala neng, Gibeon mutu kurami nengda, sun yuk kupi. Ada, yuk nengdi, “Yerikho mutu cap, Ai mutu cap tep, Yosuadi peipupa, Israel yala jen talen nengdi, abutene mutu damai bena, popra sirya dakidi, amutu kurami nesala cap, sun taleami bung keca cap gawal daki,” pepra, lap pepipa, Gibeon mutu kurami nesala yuma gekepi. 4 Gekepi dingeda, ‘Uo, telep kupra keteneipkupe,’ tenepya tep, sundi “Ukupkupe,” pepra, upu talepidi, ila kael di, ‘Angeda, kupetepkupe,’ tenepi. Utenepidi, Yosua er damai bana tep, ‘Sun anengda, yuk karen mutu di yai. Sunda nun podan neng gume, tali neng pua, tenepkamseng’ tenena tep, karung bol pun deiamu ngeda, sun keledai bisam deiki derina tep keteneipidi, anggur tapu du purupra, anggur mokon kin keca ^{▼▼mokon kin keca – Angeda, kambing bol koptapidi, keteng di konum kolupu pangeda, anggur me do, tali jen me do, dikdongopnedi, mawa derina tep, abol dana-dana tara bon yumada, tapke di wiramidi, dekdongorami. Gambar dirume.} peda, pun deiamudi gwelepra sakamodi, mali-mali kwamupa, tamupra wiaminge cap keteneipi. Ange yumada, sun keledai bisam bali deiki deipra koupdongopra yai.

5 Tonda utopu, ‘Anengda, karen mutu di yanmange, tenepkamsenunga’ tenen, sun roti kwaneng jen kecada, pumun taru di damipa konum gelal semudi, wali mouramunge cap, kwaneng dapra deiamipa, kuka yaemamudi, kam potong deriramu ngepu kipra yai. Tonda, sun aneng yana dongon keca sepatu pe, sandal peda, pun deiamudi bol kopra, terakra sakramungepu dongopra yai. Ange utopu, sun kenekami opkal peda, pun deipra dereng pio weik kwamudi, terakra sakramu ngepu kenekrapidi yai.

6 Ange-ange yuma keteneipi dingeda, ‘Ukupra nun Yosua damai bepedi upepkupe’ tenen, ange yumada konum ketenepidi, Yosua cap, Israel nesala cap, Gilgal mutu keana dodin ati dopra, kuramya damai bei. Bei dingeda, upepi, “Uo, nun nai Yosua, kan cap Israel neng cap, sun tep pepsepe. Nunda pio ila Karen mutu di yakaramepanen, yape. Ada, ‘Nun nai yapu sun cap kikiman antapdapedi, podana gum dipapu, telep kupra tenpu mutu neitamaipu kikiman kunkamtepe’ tenen, moropsepe,” pepra, “Pedina upu peipdankamtepe,” pepra, sun Gibeon mutu di yanmai Hewi yala neng, sundi upepra moropi. 7 Upepra moropi dinino, sun Israel deiyo neng cap, Israel neng yuma capdi tamupra pepi, “Sunda meneng damai nun kunup mutu neitamai apu kurumu nengpu yanmarum do? Atep, nunda ware keca deiyo tep, pedina upu peipdankup do! Tonda, nun akunkamep mutu damai yana kumumnyopda, ware keca deiyo tep, ‘Podana gum dipapu, telep kupra kikiman kunkamepe’ tenen, nundi pedina upu peipdankamtepe do?” pepra, sun Hewi neng tep upepi.

8 Upepipa, sun aHewi nengdi Yosua tep tamupra pepi. “Gume naio, nunda dipru bouna dipu yakanmape. ‘Nunda, sun Israel nesala tali pel melipra don nengpu kunkamepe’ tenen, yanmape,” pepi. Upepipa, Yosuadi tamupra asipetepu. “Sunda ware yala neng do? Sunda, tek sisi dan mutu di yanmarum neng do?” pepra, asipetepu. 9 Upepupa, anengdi tamupra pepi, “Nunda, ila Karen mutu di sun damai ayanmapada, tali tep guma. ‘Sun pel melipra don neng kunkamep’ tenen, nunda yanmape. Tonda, nun Karen mutu di yanmapa deiyoda, sundi talepra si eremrum Allah Yahwehda, yuk nengdi, ‘Sun nai Allahda, tek sisi ila kange mun kecapu kurure,’ pengepa, gekepedi nunda yanmape. Tonda, nun nai yapu, yuk nengdi, ‘Sun Allahda, Mesir mutu di gonga kepra, nimidi men kupmanto keca pio weik pel doramnga deiki di, Israel nesalada Mesir mutu neitamai di, loptapupa, yakanmai,” pepra pengepa, nunda ange gekepmupka cadi, sun damai ayanmape.

10 Tonda ange utopu, ila mambul keca akupyakare ngeda, mutu butene talepra kurami nimi deiyo neng ton utopu popbisipu. Ada, Yordan me goupra, ortara mutu keteng yakan tara kurami neng, sun Amori yala nesala talepra kurami ila nimi deiyo neng, sun Raja neng sida ake. Hesybon mutu ila deiyo ngebo Raja Sihon cap, tonda, Basan mutu ila nimi deiyo ngebo Raja Og, erda Asitarot mutu kuramu ngebo peda, sun Allahdi popra tapudi, gawal daku. Ange yuma yuk mutu nengdi pengepa, nun konum gekenupe,” pepi. 11 Gekenupa tep, nunda nun mutu talepra kusenge nimi deiyo neng cap, tonda nun mutu kunge nesala yumadi keteneipidi, ‘Bisi neitamai jenkamrum keca cap, yuk keca cap, ange yuma cap, doupra berumudi, Yosua cap, er tara Israel neng cap antapkamrume,’ pepseipa, akeca yumada, kipra yakaramupkanen, ayanmape. Tonda, sundi yuk upu ton pepra deipsei ngeda, pepsepe. Ada, nunda sun pel melipra don nengpu kunkamepa tep yanmape.

Atep ukutaruda, ‘Oryankamre taru neitamaida, podana gum dipapu, telep kupra kikiman kunkamep’ tenen, pedina upu peipdankupe. Nun deiyo nengdi, ‘Pedina upu pepdankupe,’ pepra, ‘Moropkurume,’ pepra, deipsei. 12 Atep nun nai yapu, ‘Angeda teka, konuma’ tenena tep, akeca dipetepso. Roti kwaneng dapra kiamupu ngeda adano. Arotida, yakankupu taru di, ‘Bisi bankamep taruda, ajen keca jenkamep’ tenen, aroti kwanengda, nun ati neitamai di, dapra kiamupupa, bupu tupa kunmau. Ukunmau dinin, ukuda konum bul kipra gelal sepudi, wali moupupa, epmarume,” pepi.

13 Tonda, ange utopu, adinmarum anggur me mokon kin keca peda, ukupunge di kiamepu. Dinino, sun dipetepso! Konum gwelepra mali kupu. Ange utopu nun opkal keamupunge cap, yan sepatu sandal kenekamopunge yuma peda, bisi yakaramupu taru di, konum lyupra mali kupseu adano,” pepi.

14 Sun Hewi nengdi aupu yuma upepipa, sun Israel deiyo nengdi, aneng sun kiami jen keca dopropi. Tali lupra dopropi dinin, akeca dopropkoi taruda, sun nai bo Allah Yahweh tep, “Nunda, akeca ton doproptepe do? Angeda, gum do?” pepra, men moropi. 15 Tonda, Yosuadi sun Gibeon mutu di yakanmai neng, sun Hewi neng tep, ‘E, sunda ne kayapu neng,’ tenepudi, “Ukutaru di dipra, dorkunkamep taruda, podana gum dipapu, telep kupra kikiman kunkamepe,” pepra, pedina upu ton pepra deipudi, sun yuma upepdai. Ukupka deiki di, “Sun anengda men popkamepe,” pepu. Utopu, sun Israel nesala tep, ila nimi deiyo talepra, ila neng yumadi, “Jo, angepu tek sisi ukupkamnupe,” pepra, pedina utopu upu ton pepdai. 16 Upepra deipidi, Israel neng cap, sun Hewi yala neng cap, pedina upu pepdaiya deiki di, “Men podankamepe,” pepra, deipi dinin, dakunmaianen, ue weneri tumi konum kupu pangeda, yuk Israel nesaladi dinmai dingeda, kael kepidi, yana upu pepi. “Uo, sun Hewi nengda, Allahdi karepseu mutu neitamaipu dinin, ortara karen mutu kununge. Atep, nun cap, sun cap kikiman kunkamepe. Meneng damai akunmarum mutu nengpu pedanmaruma,” pepra, lap pepi. Upepipa gekepi.

17 Atep nengeda, sun Israel nesaladi, ‘Nun asuru di meneng damai epkamepe,’ tenepidi, sun mutu tapra, ortara mutu dina tep daembenmaiyanen, beidi, ue weneri tumi mapra, Hewi yala neng, sun kurami mutuda epi. Sun dakunmai mutuda ake. Ada, Gibeon mutu cap, Kepira mutu cap, Beerot mutu cap, tonda, Kiryat-Yearim mutu cap dakunmaipa, Israel nengdi epi. 18 Dinino, Israel nesala sun Hewi yala nesala tep, amutu kurami nesala yumada, men poptapi. Deiyoda, sun Israel nesala, sun deiyo-deiyo nengdi, “Gume, kikimanpu telep kupra kupedi, wisipra kunkamepe. Pio men podankamepe,” pepra, sun nai bo Allah Yahweh er si deiki di pedina upu konum peipya tep, kupi. Tonda, Israel nesala tep, pio melipra kalengamu Allah, er si deiki di, pedina upu konum pepya tep, Hewi yala neng tenpu peda men popi. Men popipa, sun tali dakunmai Israel nesala yumada, “Uo, anengda, tek sisi nun podan neng utopu kunung dinino, ware keca deiyo tep, men popdankamep do?” pepra, mali weik penmai.

19 Upepra mali penmai pangeda, Israel nesala, sun ila nimi deiyo talepra kurami nengdi, sun awekmai Israel nesala yuma tep upepi, “Gume, Ware kuptepya guma! Nundi, ‘Anesala cap podana gum dipapu, telep kupra kikimanpu wisipra kunkamepe,’ pepra, pedina upu konum peipmepu. Ada, tali pertamna upu gume. Nun Israel nesala tep, pio melipra kalengserur Allah, nun nai bo Yahweh, er si deiki di konum pepmupka cadi, ukutaruda nundi yu keca sun nong deiki ton men deiptepe. 20 Nundi sun aneng ton men poptepe. Deiyoda, ‘Aneng popmepepa, Allahdi ila yu keca nun nong deiki deipseredi, wenepra poptapserur’ tenena tep, anengda men popkamepe. Anesalada, gampu kunkamenge. Nundi sun cap, pedina upu konum peipdapu. Atep, dakwapye, aupu men yanipmanto cadi, anengda gampu kunkamenge,” pepra deipi. 21 Israel nesala, sun deiyo nengdi upepi. “Gume anesalada tapmepepa dakunkamenge. Dinino nun yumada, tenpu kepmepedi sun aneng tep ngeda co touna cap, me gwepra duyakana cap, tali pel dona nengpu kunkamsenge,” pepi. “Apepmuputopu, sun tep nengeda, ukunkamepe,” pepra, adeiyo nengdi upepitopu, angepu kurami.

22 Uda amenda taruda, Yosuadi sun Gibeon mutu kurami neng, sun Hewi yala nesala tep, “Yarume,” peipupa, Yosua er damaipu yai. Yai pangeda, Yosuadi sun aneng tep pepu. “Sunda wareto deiyo tep nun damai yana, mok upu pepserumdi, ‘Nunda karen mutu di yanmape,’ peptapserum do? Upepmaserumpa, teka tenepmupu dinino, tek sisi ngeda, meneng damai nengpu kurume. Uo, wareto deiyo tep upeptapserum do?” pepra wenepu. 23 “Sunda mawa dipapu, mok upu pepserume! Sunda tali mok upu peptapseruma tep nengeda, ikin keca sun nong deiki deipsene. Ada ake, Allahdi sun tep wenepseredi, wipdongopkamsere. Ukupserepa, sun mutu kunge nesala yumada, nun amutarapu kunkamenge. Ukungedi, co touna cap, me gwepra dekana cap, kungedi nun nai Allah er si eremna ati damaipu duyakankamenge.” Yosuadi sun Hewi yala neng tep pepu.

24 Upepupa, anengdi tamupra pepi. “Nun akupmupunge deiyoda ake. Nun gekeramupupa, nun nai bo kan si eremrum Allah, er si Yahweh, erdi er pel don ngebo Musa tep peiamu ngeda, upeiamu. ‘Amutu neitamai yumada, sun Israel nesala tep karepkamsene. Ukupsenepa, wengbenkumumnyopda, sun amutu menop taru konum akunge nesalada, popra gawal dakmumdi, dalupra dopropkamrume,’ peiamu. Atep, aupu gekepmepudi, ‘Uo, ukungedi nun ton popra yawarapsenung’ tenen, nun kange mun kange doupra, kware kupseupa, nundi mok upu pepsepu. Tek sisi ange deiyo tep nunda kupmupu. 25 Dinino ukutaruda, nundi kan deikipu deipkepepa, nun nai Yosua, kandi tenepmaseremtopu, talepsememdi, kunkamserume. Kan pedipapu tenepmarem ngeda, ‘Angeda telepe, ukupkamepe,’ tenepmemngepu kunkamruma tep, nun kangeda, angeda telepe pua. Nunda sun amutara kunkamnupe,” pepi.

26 Upepipa, Yosuadi peipupa, sun Israel nesala dipapu, aneng talepipa, sun amutarapu kunkamya tep, sun anengda, men popi. 27 Men poptapi dinino, Yosuadi peiputopu, anesalada pio tep pel melimna nesalapu kepra deipupa, co touna cap, me gwepra deriyakana cap, kun nesalapu kepra deipupa, kuramidi, Israel nesala melimna tep pel dorami. Tonda, sun Israel nesala mali kurami keca daemna tep, Allah Yahweh er karena tep, keteneiami mesba damai, uku dongon co cap, me cap deriryakarami. Anesalada ataru di dipdongopra, akuramitopu, ukutaru abuku sengmenge taru peda, apelpu donunge. Allah Yahwehdi apel dona tep, ketenepra derirur mutu yumada, apelpu dopembanunge.