Jude

Abuku seku deiyo ngeboda, er sida Yudas kuramu. Yudasda, Yesusdi wepra deiamu neng, sun 12 neng kankan ton men kuramu. Angeboda, Yudas Iskariot pio gume. Asurat seku Yudasda, Yesus er weit bo kuramu (Matius 13:55; Markus 6:3). Yudasdi asurat sekra dokotepupa, dopropi nesalada, nun walwale, dinin, sunda teka tenena nesala kurami.

Yudas kuramu taruda, mok upu peteremna neng weik kuramidi, sundi uperami. “Gume, Allah er kange dipapu bicau teneseredi, tali lyemserure. Nundi telep kuna cap, mambul pel dona cap deiki di, men lyemserure. Ange yuma deiki di, men telep kupra deipdatepi. Teka tenena deiki dipu lyemserura cadi, konum lyepseryopda, nun kange tenepmepetopu, tali lupra mali keca ton tupa kutepe,” pepra peteremami. Angeda, Allahdi men teneramseua tep, Yudasdi, asurat sekua deiki di aupu seku.

Asurat neitamaida, upepu. “Gume. Tali pertamna gum dinin, Yesus tep tek sisi teka tenepmepyopda, amenda taru yuma dumsisipu kunkamepe. Sun malipu tupa kunge nesalada, konum katuai kupsere. Anengda, tek sisi teka men tenepya tep, ukupu dipru cap, kange tenenange cap, men dopropi. Sun tali peptapi. Tek sisi teka tenenge nesaladi, dumsisipu tupa kununge,” pepra asurat deiki di sekeipseue.

Yudasdi, “Telepe,” pena tep, pepu upu

1 Ne si Yudasdi, neda Yakobus er weit bo kunedi aupu sekeipsene. Neda, nun deiyo ngebo Yesus Kristusdi talepneupa, er pelpu donune. Aupu sekeipsen nengda, nun nai Allah wepseudi, bicau teneserepa, nun du bo Yesus Kristusdi, ‘Mali keca di, mali kupra deiprur’ tenen, melipra kalengserure. Sun yuma tep aupu sekeipsene. 2 ‘Allahdi ukunkamser’ tenen, morosenun kecada katuai lap pepkusene. Ada, Allah bicau teneseredi, yu kuprepa wenemna gum di, ‘Er kange dipapu melimserepane, telep kunkamrum’ tenen, Allah morosenune. Tonda, ‘Sun cap, yuk neng cap, telep kangepu doupra, teleppu kikiman kunkamrum’ tenen, Allah morosenune. Tonda, ‘Sun kange Allah er nong deikipu deipmumdi, yuk neng yuma tep bicau tenepra, makudanapu kunkamrum’ tenen, Allah morosenune. Allah wenemna gum di, tali melimserenge cap, kange deipra kunkamrumnge cap, bicau tenepra makudanapu kunkamrumnge cap, Allah deiki sun kange deipkamrumnge cap, ‘Ayumada weik kupbankamser’ tenen, Allah morosenune.

Sun mali kun nengdi mali kuramenge cap, Allahdi anesala wenepra popkamrenge cap tep, pepu upu

3 Ne kayapu sun tep, bicau tenesenune. Dortaru di, ‘Aneng tep surat sekamne,’ tenepsisi. Asurat neitamaida, Allah lyepseudi, er cap dipru dukdongopra kikiman kupe keca tep, ‘Lap pepra sekamne,’ tenemsisi. Ukupra tenepsi dinin, yuk nengdi, “Mok upu peteremna neng sun kan-kan neitamai yanmange,” pepmaipa, gekepmasidi, ‘Angeda ila mambule,’ tenepsa cadi, ukuda yuknge tenepne. Ada, ‘Amenda taru gume, mok upu peteremna tep, ukutaruda, aupu tep, adipapu upu sekune’ tenen, asurat sekeipmasene.

Ukutaru sekmasen upu deiyoda ake. Ada, mok neng upu peterepsengepa, mali keca yuk tenena deiki di, Allah upu konum teka tenepmumnge tapmumpa, mali kupserure. Mali kupserura cadi, ‘Allah karepseu upupu pio moupra talepra kunkamrum’ tenen, aupu sekeipmasene. Allah upu teka tenepmupu ngeda, tenpu taru dipapu, Allahdi nun teka tenenup nesala tep konum karepseua tep, yuk taru di, yuk upu ton cap men tapangdinkamsere. Konum karepseungepu teka tenepra talenkamrume. Yuk upu tapakra teka tenena meme.

4 Apepmasi ngeda, tali tep gume. Deiyo pepkusene. Ada mok upu pepra pio mali kun nengdi, inimna utopu, sun kankan konum yana kunmangdi, pio mali kudisenunge. Allah upu lap perami neng, nabi nengdi, amali kunge neng utopu nengda, “Allahdi wenepra popkamre,” pepra pedirami. Amok upu peteremna nengdi tenenungada, ‘Allah erda tali ngebo. Erda mambule gume,’ tenenunge.

Ukupra tenepmengedi, Allah yaniptapmengedi, pio mali kununge. Sundi peteremenge kecada ake. Ada, ‘Nun mali kuramepepapu, Allahda, tali mesum dipapu kaukemseredi, lyemserur ngebo cadi, nun tali lupra pio malipu kunkamepe. Ada telepe pua. Allahdi men wenepkamsere,’ tenenunge. Tonda, nun du bo Yesus Kristus er dipu taleseredi, nun Ila Deiyo Ngebo kuserur dinin, sun mok neng kunge keca cap, penge upu cap deiki di, “Yesus erda tali ngebo,” penunge.

5 Uda, apepkusen upu yumada, konum gekepmumdi, konum kael keamum dinin, ka di ton cap tenipkamruma tep, lap pepkusene. Allahdi, ‘Ne mawa’ tenen, er nyapu keiamu nesala, Israel nesala Mesir mutu neitamai ikin kange doupra kuramipane, lyepra dopramu dinin, amenda teka tupa men tenemi nesala tep portamamu. 6 Tonda, er im deiki pel don neng, malaikat kurami dinin, Allahdi sun tep pel deiyo keca karepu ngeda, ‘Nun songe’ tenen, sundi yaniptapra yukai bena kuramidi, pio mali-mali kuramipa, Allahdi amalaikat yuma wenepu.

Amalaikatda, Allah doprapudi, pio gat tapu, men bulukmanto tapu di koupra, pio kunungnai pumbon dongopu. Dongopua cadi, amalaikat dakuramenganen, sirya taru nesala ban-ban yuma tep upu bokeipredi wenepkamre taruda, amalaikat peda wenepra poptapkamre. Popredi, uku jen ban donokre pangeda, uku pio jerepa, dapio pu jepra kunkamenge.

7 Im deiki kurami pel don neng, amalaikat mali-mali kupitopu, Sodom mutu nesala cap, Gomora mutu nesala cap, amutu dana-dana kurami mutu neng cap, aneng yumadi pio mali-mali weik kurami. Sun mali kuramyada ake. Sun kange nong yuma angepu tenemidi, Allahdi, ‘Nimidi nerapupu dopra kikiman kunkamenge,’ tenemseunge utopu gum dinin, ange tapra, nimidi nimi dodaramidi nyangdarami. Amali kun keca utopu keca weik ton ukuramya tep, Allah im deiki di uku bu dokotepupa, anesala yuma uku jepropu. Anesala uku jepropka utopu, amendada mali kunge nesala yuma, uku jen ban dokoteprepa, ukudi pio jenkamre. Allahdi Sodom mutu cap, Gomora mutu cap tep, wenepra kupka keca deiki di kael keptepe.

8 Uda, apepmasen neng, sundi sun pe nong tep mali kudarami utopu, amok upu peteremna neng, sun kankan inipra yai nengda, sun mali kunge keca deiki di, sun pe nong tep mali kudidanunge. Anengda, tek sisi men dirami dinin, ‘Yuk nengdi ila neng tenepkamseng’ tenen, “Nun epmepu keca, ila mambul keca ake-ake,” pepra, nong men kupkamre upu, tali upu petamnunge. Ukupmengedi, ‘Allahda, nun deiyo ngebo men kunkamser’ tenen, er tep, yanitamnapu kununge. Tonda, aneng dipu im deiki pel don neng, malaikat yuma tep, mali upu pepra derinunge.

9 Anengdi, ‘Ange mambule,’ tenena gum di, tali lupra mali upu petamnapu kununge dinin, malaikat sun ila deiyo ngebo Mikaeldi ange utopu men kupu. Mikael cap, Kain Jen Ngebo cap, Musa depkai yareidi, Musa er nong tep, dalumdanmareidi, “Kan dopropkurem do, ne dopropkun do?” pepra, yu upu deiki di pedanmareiyanen, sirya taruda Mikael peda, balila men kupudi, mali upu pepra, Kain Jen Ngebo nong deiki men deipu. Ange gum dinin, Mikaeldi, Kain Jen Ngebo tep, “Nun deiyo ngebo Allah, er dipapu wenepkamker ja,” pepu.

10 Mikael peda, balila kupra, mali upu men pepu dinin, amok upu penge nengpuda, sun moupra men tenenge keca, men kael kepi keca yuma tep, mali upu pepra deringedi, nyek-nyek penunge. Nimida, Allahdi kange karepseupa, ‘Angeda mali, angeda telepe,’ tenepra kange doupra kunupe dinin, bisam cap, kam capda, sun nong neitamai putapre keca deiki dipu, tali lupra kununge. Amok penge neng peda, sun nong putapre kecapu tenepra, mali kununge. Sun kange douna gum di, amali kuramenga deiki di sun pe tep, mali kudidanunge. Ukupmenge pangeda, Allahdi anesala tep, wenepra popredi, uku jen ban dokoteprepa, apio kunkamenge.

11 Sun anengda pio bicaue, Allahdi aneng wenepkamra tep, sun aneng ikin kupkamre. Sunda Kaindi Allah peipu upu men gekepudi, mali kuputopu kununge. Tonda, menop taru Bileamdi, ‘Aupuda mok upu,’ konum moupra tenepu dinin, “Co bo weik karepkukepe,” pepipa gekepudi, ‘Co bo weik doproptene’ tenen, putapka tep, mok upu peterepu. Mok upu petereputopu, sun aneng peda, ‘Co bo weik doronkamep’ tenen, mali kununge. Tonda, pumun taru Korahdi, ‘Allahdi peipupa, Musa sekeiamu upu men gekepkup’ tenen, gonga kepupa, er cap, yuk neng cap, weika di aupu yaniptapitopu, sun ataru mali kunge neng peda, Allahdi pesere upu yanitamnunge.

12 Sun mok neng kunge keca tep, mambul upu pepkusene. Sun teka tenena nengdi, ‘Bicau tenepra makudanapu kunkamepe’ tenen, kailya kalepra jerumu taru yumada, sun mok upu penge neng cap wisipra buka jeprumyopda, ada pio mali. Ukupmanto ngeda, ada lek opkal dinin, buta paleprepa sukuramretopu, anengdi sun kailya kalepra jerum taruda mali kudisenunge.

Anengda, ukupmantonge ton pepkusene. Tek sisi domba peina nengda, sun domba jena moupra karenunge. Dinin, sun domba mali kupra peina nengda, sun domba tep men tenenunge. Sun pe jena tepapu tenedangedi jenunge. Ange utopu, sun mok upu penge nengdi sun upu gekenge neng tep, ‘Amenda taru ware kupkameng do?’ tenena gum dipapu, sun pe tepapu tenepra tali upu peteremnunge.

Tonda, kunungna dua kumanya di topdoupra embaramre dinin, mo men cemrure utopu amok upu peteremne nengda, sun penge upuda, nong men kupkamre upu penunge. Ange utopu, co du moun li kemrur dinin, ton coda men du mourure utopu, amok upu penge neng peda tali upu penunge.

Sun anengda, co kwenepkunge taruda, yaten cap yuma kwenepropmengepa, kouluramretopu, mok upu penge nengda, sun penung upuda, telep upu penung dinin, nong men kemrure. Ada, ‘Mali kupkup do?’ tenen, tenimtona gum di, kika deipra, tali lupra kikiman bukra jepmenga deiki di, sun kailya mali kudisenunge.

13 Ton amok nengda, mo cepredi, me deriryare taruda, me puto di longteng-longteng peredi, me ul cap, co lenglenga cap, lyapra erepropredi katuai doramretopu, amali kun neng sun mali kuramenga deiki di, sun pio mali kun keca katuai kurure. Ada sun ali tep katuai men lap pepmanto keca kununge. Tonda, anengda lukunda neitamai im deiki di tali-tali embare kuru utopu kununge. Aneng kunge keca deiki di, ‘Tek sisi telep bisi ake’ tenen, men kael keptepe. Allahdi pumun taru teneamutopu, aneng dopra wenepredi, pio kunungnai ketenepra deipkai pumbon dokotepkamre. Dapio kunkamenge.

14 Henokda, menop taru kuramu. Adamdi deipupa dadeipdanen, baramyanen, yoneitam ngebo Henok deipi. Allahdi amok upu penge neng wenepkamra tep, nabi Henokdi pediramu upu ake.
“Adiso, nun nai Allah cap, er im deiki pel donge neng malaikat cap, men nukmanto denge pio weik beribu-ribu yankamenge.
15 Ada nimi tuai nesala yuma tep, ‘Upu bokeipkamepe’ tenen, yankamenge. Allahdi tuai nesala yuma tep upu bokeipkamsere taruda, ‘Allah erda tali ngebo’ tenen, mali-mali kungedi er tep yanitamameng nesala yumada, wenepra popkamre. Popredi, uku jen ban dokoteprepa, dapio kunkamenge.
Ada sun pio mali-mali kunge neng, Allah tenere keca tep teka pio men tenenge nengdi, mali kuramenge keca yuma cap, mali upu pepra, Allah er nong deiki mali upu derinung upu yuma cap tep, aneng wenepra poptapkamre.” Nabi Henokdi pepu. (Kejadian 5:4-20; 1 Tawarikh 1:1-3)

16 Sun anengda, dabal kange doupmengedi, epra embangedi mali pepra sorongne nesala kununge. Ton anengda yuk neng tep dipmerek-merek pepra luludinapu kununge. Anengda, sun kange dipru mali putaramrengepu tenepra kununge. ‘Yuk nengdi, sunda telep neng, tenepkamseng’ tenen, amali kunge nengdi, sun pe tep sal nong-nong upu pedidanunge. Anengda, tek sisi yuk neng tep bicau tenena gum dinin, ‘Nun putapsere keca karepkamseng’ tenen, “Ne ka, ne ka, kanda pio telep ngebo,” pepra tali upu mawa dipu petamnunge.

“Sundi Allah tep, sun dipru cap, nong cap, karepmumdi, er upu talepra dombankamrume,” pepu upu

17 Ne kayapu, sun mali nengdi ukurameng dinino, nun deiyo ngebo Yesus Kristusdi, ‘Ne upu dopra mutu-mutu yuma peterembenkameng’ tenen, wepra deipu neng, sun Rasul nengdi pedirami upu ka di ton cap pepsenepa, tenipterepso. 18 Sun anengdi peamsei upuda ake. “Amenda sirya taruda, nyek-nyek pepra nalemsenge nengda, sun kange dipru neitamai, mali keca putaprengepu teneprapmengedi, ‘Allah erda tali ngebo’ tenen, yanitamkamenge. Malipu kunkamenge,” pepra, sun Rasul nengdi pediramsei.

19 Uda amali kunge nengda, Allah er Sambala sun dipruai weka men kurura cadi, sun nong putapre kecapu tenepra dombangedi, mali kuramenga deiki di, sun teka tenerum nesala neitamai di bokra, dipru wilimdisenunge. Ukupsengedi, yuk-yuk kepra derisenunge.

20 Dinino, ne kayapu, sundi Allah er pio dumsisi upu teka tenepmumdi, Allah upu gekena cap, peteremna cap deiki di, sun dipru kwa dimdankamrume. Tonda teka teneprumya deiki di melimdankamrume. Tonda, Allah er Lek Sambala puto deiki di, Allah moronapu kunkamrume. 21 Allahdi sun tep, bicau teneserura cadi, sundi, ‘Allah tupa kange derinkamser’ tenen, Allah tep sun dipru cap, nong cap karepmumdi, erpu talepra kunkamrume. Tonda, ‘Dan taru doryankamser do?’ tenen, dipru ketenepra dinapu kunkamrume.

Yesusdi kapul men doryanmasere taruda, Allah tep teka tenepra talepmumdi dombankamrume. Nun mali kunupa tep, nun deiyo ngebo Yesus Kristusdi, ‘Ito’ tenen, tali lupra wenepra poptapsetu dinin, bicau tenepseudi, nun cap, er cap, kikiman pio gam kunkamepa tep, doryankamsere.

22 Sun kange bongtoserepa, tenimtonapu kunge nesala tep, bicau tenepra sun dipru tep kwa dipra bouna di peteremkamrume. Adipapu wenepra tamna gume. 23 Tonda, yuk nengda, mali weik kupmenga deiki di, uku jen ban benmanto kungopda, lyeprap gipropmumdi, ka di ton cap, aneng dopra, Allah er dumsisi bisipu deriryakankamrume. Ukupmanto ngeda, ‘Kot susu nesala kenekamenge opkal, nun kip nesala kenekmepyopda, kot susu sakroserur’ tenen, men kenengnupe. Men kenengmepetopu, ton nesalada, sun mali kun keca pio mali keca cadi, aneng tep bicau tenepra melipkamrum dinin, ‘Anengdi ne pe tep mali kupra deipnenung’ tenen, kwar-kwar adi, kange moupra aneng melipra kunkamrume.

Aupu gawal dangna tep, Allah si eremna tep, pepu upu

24 Allahdi sun yuma tep, ‘Yuk mali bisi benung’ tenen, talepra embaredi, melipra diserur ngebo kurure. Er melimserya deiki di, mali men kunupe. Pio kalekra melimserura tepa. Tonda, Allahdi er puto kareseredi, er melimserya deiki di, pio dakuramepyanen, sirya taruda nun nong doprapseredi, mali keca yuma pio gum kupra deipseryopda, er damai ada, pio telep dirin damai deipsere pangeda, kange deipra pio teleppu kunkamepe.

25 Nun nai Allahdi peipupa, Yesus Kristus pel dopseua deiki di, nun Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Paulusdi Allah tep aupu pepu. Lap pena nomor 17 dirume.}, Allah er tenpupu kurure. Allah yuk ton men kurure. Er tenpupu kurure. Ange tep nengeda, er si ila di eremkamepe. Allah erda puto pio weik kuredi, akeca-keca yuma Talena Deiyo Ngebo kurure. Erda, pio telep, dirine weik ngebo Raja utopu kurure. Akeca-keca yuma kapul ketekeipu taru di, akeca yuma Talena Deiyo Ngebo kuramuanen, ukutaru tupa kuredi, amenda yankamre taru yuma peda, pio ila deiyo ngebo kunkamre. Atep, tek sisi er sipu erepra kunkamepe. Ange yuma pio ukupkamre tenen, “Amin,” pepne.

Telepe, ne Yudasdi acapu sekra deipsene.