Judg 1 | XteSC | STEP | Yosua konum depka tep, Israel nesala yumadi sun nai bo Allah tep, “Nun Israel yala nesala kan-kan di, ware yala nengdi, menmena mepra bengedi, Kanaan mutu kunung nesalada porbenkamep do?” pepra, Allah Yahweh tep asipetepi.

Judges 1

Yehuda yala neng cap, Simeon yala neng cap, sundi Raja Adonia-Bezek tomopi upu

1 Yosua konum depka tep, Israel nesala yumadi sun nai bo Allah tep, “Nun Israel yala nesala kan-kan di, ware yala nengdi, menmena mepra bengedi, Kanaan mutu kunung nesalada porbenkamep do?” pepra, Allah Yahweh tep asipetepi. 2 Asipipa, Allah Yahwehdi upepu, “Yehuda yala nengdi menmena mepra porbenkununge. Ada, “Kanaan mutu tara yumada, nedi Yehuda yala neng tep konum karepkamna tep, amutu neitamai kunge nesala yuma tep poptapkamenge. Tonda, amutu tu yumada, sunpu doropkamenge,” pepu. 3 Upepupa, Yehuda yala nengdi, sun kayapu neng, Simeon yala neng tep, “Nun kayapu, sundi melipsemumpa, tonpa bepidi, Kanaan tara kunung nesala bena poptapmepedi, Allahdi nun tep, ‘Amutu tuda, sun doropkamrume,’ peiamseu mutuda doropkamape. Sundi nun tep melipsemum pangeda, dor taru Allahdi sun tep ketenepra deipseu mutu tu yumada, doropkuruma tep, amutu kuramenge nesala porbenkumum taruda, nundi sun melipkamsepe,” pepi. Upepipa, Simeon yala nengdi sun Yehuda yala neng tep melipi.

4 Melipipa, Yehuda yala neng sun cap kikiman kepra porbenkoi taruda, Allah Yahwehdi sun kikiman porbenkoi neng deiki puto karepupa, Kanaan mutu cap, Feris mutu cap, kurami nesala yuma popbisipi. Ada, sun podana tep, jen talena nengda, denge pio weik, Bezek mutu dam bena podanmaiya deiki di, denge pio weik, sepuluh ribu neng (10.000) bena popi. 5 Bezek mutu damai di, podanmaiyane, amutu ila nimi deiyo kepra taleamu ngebo Adonia-Bezekda, sun Yehuda yala neng cap, Simeon yala neng cap, sundi Bezek mutu damai di angebo epidi, ‘Popkup’ tenen bei. Bena popbanmaiyanen, sun Kanaan tara neng cap, Feris mutu neng cap yumada, popbisipi.

6 Ukupra popbisipi taruda, nimi deiyo ngebo Adonia-Bezekda, ‘Poptapnenung’ tenen, kware kupupa, adipapu bura saka beupane, Yehuda yala neng cap, Simeon yala neng cap, sundi amenda dombeidi, bena tomopi. Tomopi dingeda, angebo er pamu buru du cap, yan du pamunge cap, bena sekropi. 7 Ukupi taruda, angebo Adonia-Bezekdi upepu. “Gume, men taruda, nedi nimi deiyo kepra kurami neng ada, tujuh puluh (70) neng peda, tomopra sun buru du pamunge cap, yan du pamunge cap, sekra tamsipa, kuramidi, ne meja deiki bukra jen jenmanpa, ajen sirik sakne ngeda, sun anengdi bupra jerami. Sun aneng tep, ukuramsi ngeda, Allahdi tupa tenemneua cadi, ange tep, kwang daknere,” pepu. Upepkopda, Adonia-Bezek adipapu douprapidi, Yerusalem mutu derirbei. Bena deiamipa, dakuramnganen, amendada amutu neitamai di depu.

Yehuda yala nengdi Yerusalem mutu kurami nesala cap, Ebron mutu kurami nesala cap, popbisipi upu

8 Yehuda yala nengdi Yerusalem ^{▼▼Yerusalem – Apasal seki taruda, sun Israel nesaladi Kanaan tarada, ukupu wekya cadi, Yerusalem mutu neitamaida, Kanaan yala nesalapu taleamidi acapu kurami. Amenda doryankamu taruda, Raja Dauddi amutu neitamai talepra kuramudi, ‘Nun Israel nesala, nun ila mambul deiyo ati arum, nun ibu kotada, acapu dopmepepa, kunkamsere,” peprapudi, akati arumda, erepra deipu. Dinin, ange yuma kapul men kupu taruda, aupu seki.}mutu kurami nesala yan poprapidi, amutu yuma dalupra doropi. Doropidi, amutu sun ati dopra kuramyai yumada, uku dongopi. 9 Amutu konum ukupyopda, amenda taru sun Yehuda yala neng aca di, utamna ila mutu dup bukamngai banmai. Ada, Kanaan tara neitamai dinin, dutamna mutuda, (arah selatan) me pio gum mutu neitamaida, amutu si, Negeb mutu dam tara, akurami nesala cap, tonda amutu pirman dinin, ortara keteng danbaramre tara, mutu buma deiki ati arum dopra kurami nesala yumada popbisipi. 10 Tonda, Ebron mutupu dinin, menop taruda amutupu dinin, mutu si Kiryat-Arba perami mutu kurami Kanaan tara nesala tep, bena popbisipi. Amutu bena mar popbisipi ila nimi deiyo neng sun sida ake. Ada, Raja Sesai cap, Ahiman cap, Talmai cap, adeiyo-deiyo neng, sun jen talena neng yuma mar porbaramidi, popra sirya daki. ARaja neng cap, sun taleami nesala capda, Yehuda yala nengdi ubena popra, gawal daki.

Yehuda yala ngebo Otnieldi, Debir mutu kurami nesala bena popbisipu upu

11 Ebron mutu konum popbisipidi, sun Yehuda yala nengda beidi, Debir mutu kurami nesala tep, bena popbisipi. Amutu tepapu, men taruda, er si Kiryat-Sefer mutu perami. 12 Yehuda yala ngebo tenpu er sida Kalep, angebodi upepu, “Ware ngebo beredi, Kiryat-Sefer mutu kunung nesala bena popbisipredi, amutu dalupra dopropre ngeboda, ne ner mi Akhsada, er angebo karepnepa, dopkamre,” pepu. 13 Upepupa, tenpu ngebo ton er si Kenas, erdi deipu ngebo Otniel amutu dalupra dopu. Otnielda, Kaleb, er weit bo kuramu. Otnieldi, Kiryat-Sefer mutu nesala bena popbisipudi, amutu yuma dalupra doropu. Ukupka tep Kalepdi, er ner mi Akhsada dopra, Otniel tep karepupa, Otnieldi dopu. 14 Otniel cap, Akhsa cap, dopdarei taruda, Akhsadi Otniel tep, pepu. “Kanda, ne nai bo damai betumdi, ‘Wa pena tep mutu tu ton karepnetume,’ pepra moropsetume,” pepu. Ataru dipu, Akhsa keledai bisam bali deiki bukra banmauanen, er nai bo Kaleb, er damai kwereyau. Yaupa, er nai bo Kalepdi, “Kanda, ware keca putanmakerpa, ne damai tamupra yarem do?” pepra asipetepu. 15 Upepra asipupa, Akhsadi, er nai bo Kaleb tep tamupra pepu. “Naie, kandi ne kunkamnaida, pio katawai mutu cadi, pio tu gelalaipu Negeb mutu neitamai deipnemum dinin, telep tu ton, amutu sida, Gulot-Mayim, ^{▼▼Gulot-Mayim – Amutu si tep, aupu peramya deiyoda, amutuda, me bungna kwamnga cadi, aupuda, ‘Me mokon kwamngai,’ teneramya tep, amutu si tep, asi perami.} ange mutu ton putanmanerepa yanmana cadi, ‘Atu karepnetum’ tenen, moropkene,” pepra, yana moropupa, er nai bo Kalepdi, me pu tara cap, me dari tamna cap, tonda, Gulot mutu itara cap, me dari capda, pio telep me bungna kwamu tara, Gulot mutu dam dipra, dutara yuma capda, er ner mi tep karepu.

Yehuda yala neng cap, Benjamin yala neng cap, sundi Kanaan mutu nesala popbisipya tep, seki upu

16 Musa er ner ngebo Obabda, Keni mutu ngebo kuramu. Erdi deiamupa, dadeipdanen yakarami nesalada, sun cap, Yehuda yala nesala cap, Yerikho mutu tapra, yuk mutu kikiman bei. Yerikho mutuda, kurma co du weik akwamnga tep, akati arum sida, ‘Kurma ati arum,’ pepra, si kareami. Yerikho mutu tapra, utamna bena, bisi banmaiyanen, benamidi, dutamna mutu (arah selatan) Yehuda yala nengdi doprami tara mutu neitamai bei. Amutuda, mo pio men cemamnga tep, tu gelal semngaida, amutu si Negeb tara, dinin, Arad mutu ton perami. Amutu neitamai yanamidi, amutu kurami nesala kan-kan neitamai yana kurami.

17 Ukurami taru neitamaida, Simeon yala neng cap, Yehuda yala neng cap, Kanaan tara dinin, Zefat mutu kurami nesala porbai taruda, sun cap tonpa melipra beidi, Zefat neng bena popbisipi. Ukupidi, amutu kurami nesala cap, akati arum cap tep, mali upu pepra, sun deiki deipidi, bena wipdongopi. ‘Amutu cap, anesala cap, nun nai Allah karena tep, sun yuma popra gawal dakamepe’ tenepidi, popra gawal daki. Amutu nesala yuma gum kweipi. Ukupya tep, amutu sida, Horma ^{▼▼Horma – Sun upu peramya deiki di, aupu deiyoda, ‘Akeca yuma gum kupra derina’ tenena tep, ‘Horma’ perami.} mutu pepi. 18 Tonda, Yehuda yala nengdi ila ati arum weikanun ton dalupra dopropi. Ada, Gaza mutu cap, Askelon mutu cap, Ekron mutu cap, tonda amutu neitamai kurami nesala cap, amutu damai yambul-yambul ati arum domi ati arum yumada, poptapidi, amutu tu ton dalupra dopropi. 19 Ataru neitamai yumada, Allah Yahwehdi Yehuda yala neng tep, meliamupa iknapi mutu, mutu dam tara mutu-mutu yumada, popidi amutu yuma dalupra dopropi. Dinino, adi dutara, ban tara kurami nesalada, men popbisipi. Sun mutu tu dalupra men dopropi. Tonda, aKanaan tara nesalada, amutu neitamai di enepra men donoki. Deiyoda, sun ban tara kurami Kanaan tara nesaladi, nimi porbana tep, gat keca er sida kereta perang, besi di dadominge ton taleamya tep, amutu kurami nesalada, Israel yala nesala, sun Yehuda tara nengdi popterepi dinin, enepra men donoki.

20 Tonda Ebron mutuda, Kalep karepi. Ada, menop taru Musadi, “Amutuda Kalep karepkamrume,” pepra deiamnga tep, apeiamutopu, Kaleb tep karepi. Karepipa, Kalebdi, men taru Enak yala ngebodi deiamu neng, weneri neng amutu talepra kuramipa, Kalepdi aneng popra enepra dokotemnga tepa. 21 Ukuramu dinin, sun Benjamin yala nengdi, Kanaan tara nesala, sun Yebus yala nengda, Yerusalem mutu kuramipa, orbena popbisipterepi dinin, sun Yebus yala nesala peda, enepra men donongami. Atep, Benjamin yala neng cap, Yebus yala neng cap, sun tonpa kikiman wisipra Yerusalempu kurami. Tonda, aupu sekmepu taru peda, tupa akununge.

Yusuf erdi deiamupa, dadeipdanen yakarami nengdi, Betel mutu nesala popbisipi upu

22 Yusufdi deiamupa, dadeipdanen yakarami nengdi, Betel mutu ila ati arum dopra kuramyai, bena popbisipi. Ataru neitamai yumada, Allah Yahwehdi, sun Yusuf yala neng tep melimamnga deiki di, ayala nesala popra bisbisa kapi. 23 Yusufdi deiamupa, dadeipdanen yakarami nesalada, Ebrahim yala neng cap, Manasye yala neng cap ton dakurami. Sun ayala neng yumadi, wisiprapidi, Betel mutu ila ati arum dopra kurami nesala damai, bena popbisipi. Apopbisipi mutu er sida, Lus mutu perami. Amutu kurami nesala cap tonda, amutu kwamu keca mirbana cap tep doproipi nengda, Allah Yahwehdi melipupa, telep dipapu amutu urasin tep, mirbei. 24 Aneng amutu mirbana tep bisi bai taruda, tenpu ngebo ton Betel mutu neitamai di yakaupa, sun cap antapi. Antapdaidi, sun amirbana tep bai nengdi, er angebo tep upepi, “Kandi nun melipsetumdi, ‘Amutu wengbana tep, telep bisida ake,’ pepsetumdi benbenepsetum pangeda, nundi aila ati arum dopra kunge mutu wekmepedi, anesala popmepyoda, nundi kan tep melipkepidi, ‘Kanda nun kabo sisa’ tenen, telep kupra deipkamkepe,” pepi.

25 Upepipa, angebodi pepu. “Jo, aila ati arum dopra kunge mutu neitamai, wengbanada abisi di wekra benkurume,” pepra peterepu. Erdi peterepupa, sun Manasye yala neng cap, Ebrahim yala neng cap, abisi wekra beidi, amutu kurami nesala yuma bena parang ya di popra gawal daki dinin, sun bisi peterepmau ngebo cap, er nyapsilip cap, sun yumada, pio men popidi, tapipa bei. 26 Men popya tep, er angeboda, Betel mutu di gopra, ortamna Het yala neng sun mutu bena kuramu. Ukuramudi, ila ati arum tenpu dopu. Amutu sida, “Lus mut,” pepu. Upepra si pepu mutuda, ukutaru peda, abuku sekmepu taru peda, asi tupa penunge.

Israel yala nesaladi, Kanaan tara kurami nesala tep, enepra men donoki upu

27 Manasye yala nengdi, Kanaan mutu bisbisakapidi, amutu tu dalupra doropi taruda, Kanaan tara menop taru kurami nesalada, enepra men donokami. Amutu neitamai di men enepra donoki nesalada, sun si ake. Bet-Sean mutu kurami nesala cap, Taanakh mutu kurami nesala cap, Dor mutu kurami nesala cap, Yibleam mutu kurami nesala cap, Megido mutu kurami nesala cap, tonda aila ati arum yuma dopra kuramya damaida, yambul-yambul ati arum dopra kurami neng yuma peda, enepra men donoki. Ange tep nengeda, Kanaan mutu neitamai kurami nesalada, kika deipra, ‘Amutupu kunkamep,’ tenen kuramya tep, enepra men dokokya cadi, Manasye yala nengdi dalupra dopromi mutupu tupa wisipra akurami. 28 Israel nesala yuma, dakuramipanen, amenda taru sun puto weik kupbai dingeda, Kanaan tara neitamai kurami nesala tep, “Sunda, nun pelpu donkamserume,” pepra, ikin pel dimamipa, anesalada apelpu dorami. Ukurami dinin, Israel nesaladi, menop taru Kanaan mutu nesala sun kan-kan kurami nengda, enepra men donokamidi, tamamipa tupa amutupu wisipra kurami.

29 Ange utopu ton, Ebrahim yala nengdi, menop taru Kanaan tara kurami nesaladi, Geser mutu ila ati arum dopra kurami nengda, aneng tep bisbisakapi dinin, sundi aneng tep enepra men donokami cadi, amutu neitamai peda, sun Kanaan tara nesala cap, Ebrahim yala neng cap, sun tonpa kurami. 30 Ange utopu ton, Kanaan mutu nesala cap, Kidron mutu ila ati arum dorami nesala cap, Nahalol mutu ila ati arum dorami nesala capda, sun Israel yala neng dinin, Zebulon yala nesaladi, akati-akati dopra kurami nengda, men enepra donokami. Ukuramipa, Kanaan tara neng cap, Zebulon yala nesala cap, sun tonpa kurami. Ukurami dinin, Zebulon yala nengdi, sun Kanaan mutu neng tep, “Nun pel donkamserume,” pepra, ikin pel dimamipa, apel dorami.

31 Ange utopu ton, Asyer yala nengdi Kanaan tara kurami nesala enepra men donokami. Ada, Kanaan mutu nesalada, Ako mutu cap, Sidon mutu cap, Ahlab mutu cap, Akhzib mutu cap, Helba mutu cap, Afek mutu cap, tonda Rehob mutu cap, akati-akati arum yuma, arum dopra kurami nesalada, Asyer yala nengdi enepra men donokami. 32 Enepra men donokamipa, men di Kanaan tara kurami nesalada, amutupu pio tupa kuramipa, Asyer yala nesala cap, sun tonpa kikimanpu kurami. Adeiyoda, Asyer yala nengdi, sun Kanaan yala neng tep enepra men donokamya tep, tupa kurami. 33 Ange utopu ton, Naftali yala nengda, men di Kanaan mutu kurami nesalada, ton enepra men donokami. Ada, Bet-Semes ati arum cap, Bet-Anat ati arum cap, dopra kurami nesala yumada, ton enepra men donokamipa, Naftali yala neng cap, sun tonpa kikiman amutupu kurami. Ukuramipa, sun Naftali yala nengdi, Kanaan tara men di akurami nesala, sun Bet-Semes mutu cap, Bet-Anat mutu cap, kurami nesala tep, “Nun pel donkamserume,” pepra, ikin pel dimamipa, anesalada apelpu dorami. 34 – 35 Kanaan tara men di kurami nesala, sun Amori yala nengda, sun kurami mutu ati arum er sida ake. Ada, Ayalon mutu cap, Saalbim mutu cap, tonda Heres mutu cap, ati arum dopra kurami. Sun Amori yala nengda, amutu neitamaipu kurami nesaladi, sun Israel yala nesala cap, Dan yala neng tep upepi. “Sunda bendopso. Sunda, aca ban tara mutu ton yakana gume,” pepra, upu sengamidi, eneproipa, Dan yala nengda, mutu dam tarapu, bena kurami.

Ukurami dinin, Amori yala nesala tep nengeda, Yusufdi deiamupa dadeipdanen yakarami nengdi, sun Amori nesala nong deiki ikin keca weik derirami. Ada, Efraim yala neng cap, Manasye yala neng cap, sundi, sun Amori yala neng tep upepi. “Uda, nun pelda pio pe deipra donkamserume,” pepra, ikin pel dimamipa, pel dorami. Ukupra, sun abutene yala nengdi, Amori yala neng tep, ikin pel dimamipa dorami. 36 Amori yala neng, sun kurami mutuda, Akrabim mutu welerbanai di, dipdongopra, keteng dangban tara mutu (ara barat) orbenamnganen, Zela ati arum doramyai di kirikra ortara ton benamnganen, ortara mutu dup ton bena bukamu.