Judg 10 | XteSC | STEP | Abimelek konum depkopda, tenpu ngebo er si Pua, erdi deiamu ngebo, er si Tola, erdi Israel nesala, sun deiyo ngebo kuna tep tekudi, Israel nesala tep, telep kupra deipu. Tola er apu boda, er si Dodo, erda Izakar yala ngebo kuramu. Erda, Ebrahim yala nesala, sun taleami mutu dinin, mutu dam tara, amutu si Samir mutu bukamo. Tolada, ‘Israel nesala sun podan neng tep, melipra popnedi, Israel nesala kunung mutu talenkamne,’ teneamudi, yana melimamu.

Judges 10

Tola tep seki upu

1 Abimelek konum depkopda, tenpu ngebo er si Pua, erdi deiamu ngebo, er si Tola, erdi Israel nesala, sun deiyo ngebo kuna tep tekudi, Israel nesala tep, telep kupra deipu. Tola er apu boda, er si Dodo, erda Izakar yala ngebo kuramu. Erda, Ebrahim yala nesala, sun taleami mutu dinin, mutu dam tara, amutu si Samir mutu bukamo. Tolada, ‘Israel nesala sun podan neng tep, melipra popnedi, Israel nesala kunung mutu talenkamne,’ teneamudi, yana melimamu. 2 Toladi, sun Israel nesala tep, keteng tamun dua puluh tiga tahun (23) deiki di, nimi deiyo ngebo kepra taleamu. Taleamnganen, Tola konum depkopda, Samir mutupu peipi.

Yair tep seki upu

3 Tola konum depkopda, er yo pununa tep, Gilead mutu ngebo tenpudi, er si Yair, erdi sun Israel nesala tep, deiyo kepra taleamudi, keteng tamun dua puluh dua (22) tahun deiki di, nimi deiyo ngebo kepra kuramudi, sun tep melimamu. 4 Yair erdi deiamu nyapu, anengda tiga puluh (30) neng deiamu. Sun anengda, bali deiki bukra emban keca, er si keledai bisam peda sun kuramitopu, yuk-yuk tiga puluh (30) ekor keledai bisam bali deiki bukra embarai. Tonda, yambul-yambul ati arum Gilead mutu neitamai doramya peda, tiga puluh ati arum talepra kurami. Atalepra kurami yambul-yambul ati arumda, ukutaru peda akati arum, akati arum yuma tep, atara mutu sida, Hawot-Yair mutu tupa penunge. 5 Yair peda, dakuramnganen, amenda taruda, er konum depu. Depkopda, tenpu mutu si, Kamon mutu neitamaipu peipi.

Sun Amon yala nesaladi, Israel yala nesala tep, sun nong deiki ikin keca deriraminge tep seki upu

6 Amenda taruda, sun Israel yala nesalada, tamupra Allah Yahwehdi, ‘Angeda pio mali keca cadi, angeda ne songe,’ tenerur kecapu, talepra kurami. Ada, sun Israel nengdi, Allah Yahweh tep, tupa men tenepidi, er tep ton tamupra, men si eremami. Israel nesalada, isok si Bahal, isok-isok cap, tonda Asytoret isok-isok cap, aisokpu sun sipu eremami. Ada Sidon mutu neitamai kurami nesala cap, tonda, Siria mutu neitamai kurami nesala cap, tonda, Moab mutu neitamai kurami nesala cap, tonda Amon mutu neitamai kurami nesala cap, tonda Filistin mutu neitamai kurami nesala cap, anesala-anesala, sundi si eremami isok-isokpu, Israel nesala peda, aisok sipu eremami. 7 Ukuramya tep, Allah Yahwehdi Israel nesala tep, yu kupupa, ‘Israel nesalada, sun wenemna tep, yuk mutu yu nengdi ikin keca, sun nong deiki deipkamenge,’ teneprapudi, Allahdi Israel nesala dopra, sun Filistin mutu nesala cap, Amon mutu nesala cap, sun buru deiki deipu. Ukupupa, sun amutu-amutu nengdi, Israel nesala kurami mutu yuma yana poprapidi, ikin keca weik, sun nong deiki derirami.

8 Ada, aketeng tamun neitamai di gonga kepidi, sun butene yala nengda, Amon yala neng cap, Filistin yala neng cap, sundi, Israel nesala weik bisbisa kapi. Ada, Yordan me duman goupra, ortara keteng yakan tara neitamai kurami Israel nesala tepa. Amori yala neng sun mutuda, Gilead tara neitamai kurami nesaladi, Israel nesala, sun mutu kankan neitamai kurami neng tep nengeda, keteng tamun delapan belas (18) tahun deiki di, pio ikin keca deriramidi, Israel nesala tep, mali weik kudirami. 9 Tonda, angepu gum dinin, sun Amon yala nengdi, Yordan me goupra, keteng dangban tara beidi, Yehuda yala nesala cap, Benjamin yala nesala cap, Efraim yala neng cap, mar porbei. Ukupidi, sun Israel nesala tep, sundi, ila ikin keca, Israel nesala nong deiki deriramipa, Israel nesalada, ‘Uo ware kuptepe do?’ tenen, pio mali kange doupra kurami.

10 Israel nengda, pio mali kange doupra kuramya tep, sundi Allah Yahweh tep upepi. “Uo, nun nai Allah, kan tep ton pio mali kunmape. Deiyoda, nundi kan tenpu tep, kan si men eremkepedi, kan damai di tapra bepudi, tali keca isok Bahal, ayala isok-isok tep, si eremepya deiki di, nun konum mali kudinanupe,” pepra moropi. 11 – 12 Upepra moropipa, Allah Yahwehdi tamupra pepu. “Men taruda, Mesir mutu neng cap, Amori mutu neng cap, Amon mutu neng cap, Filistin mutu neng cap, Sidon mutu neng cap, Amalek mutu neng cap, tonda Maon yala nesala cap, sun ayala-ayala yu nengdi sun Israel nesala taleamseidi, ikin weik keca sun nong deiki deriramsei taruda, sundi ne tep, ‘Uo, nun nai melipsememdi, lyepsetume,’ pepra, moropnerumpa, lyepsesi do? ‘Dakwapye,’ pepra tamsisi do? Ange tep tenipetepso. Sundi akwamsisingepu tenepkurume. Sun Israel yala nesaladi, ne tep, ‘Uo melipra lyepseo,’ pepra mororamnerumpa, nedi sun tep, lyepromsisi.

13 Nedi sun tep ukupra lyepramsisipapu, ange yuma tupa tenena gum dipapu, ukutaru peda, tupa sundi ne amnyo kepra tapnerumdi, isok-isok sipu eremrume. Atep ukutaruda, nedi sun men lepropkamsetene. 14 Sundi, yuk tali keca isok-isok tep, ‘Nun nai yapuda ake,’ pepra, weprumdi si eremrum isok-isok, sun damai berumudi, sun kange mun kupmaser ngeda, ‘Melipserume,’ pepra, aisok tepapu engepra moroprumupa, sundi melipkamsenunge,” Allahdi Israel neng tep, upepra wenepu. 15 Upepra wenepupa, sun Israel nesaladi tamupra, Allah Yahweh tep pepi. “Tek pepmasereme. Nun nai Allah, kan damai di nunda konum mali kupmepu. Atep, Allah Yahweh kandi nun wenemna tep nengeda, ‘Sun anesala deikida, ange kupkamane,’ tenepsemem ngepu, ikin weik kuptua peda, angepu kupkamserume. Dinino, pio tupa moropkepe ngeda, atumi dipapu, sun ikin keca derisenung neng talesenungai neitamaida, melipra lyepsetume, naio,” pepra moropi.

16 Atep nengeda, Israel nesala sundi tali isok-isok, sun urasin utopu kupra petupra deiamidi, si eremami keca yumada, urupra tapi. Tapidi, Israel nesalada Allah er sipu erepi. Ukupyopda, Israel nesala ikin keca deriramipa, kange mun kange doupra kurami ngeda, Allahdi ange epra kael kepudi, ‘Uo, sun tupa ikin kange doupra kunungada, men kaukeptene, melipkamne,’ tenepudi, dipru pu jepu. 17 Amenda taruda, sun Amon yala nesala, sun jen talena nengda, nimi porbana tep keteneprapidi, Allah er si eremna tep ketenepi opkal bol di dodina ati, tenda ati dopra, Gilead mutu yana dopi. Atarupu Israel yala nesala peda, ‘Sun Amon nesala cap mar podanapu kupkupe’ tenen, Mizpa mutupu opkal bol di dodina ati yana dopra kunmai.

18 Amutupu kunmaiya cadi, Israel nesala cap, sun deiyo neng cap, sundi upedanmai. “Uda, nun kan-kanda ware puto ngebodi jen dopropredi, Amon yala nesala sun jen talena neng tep, gonga keprapredi, mar porbenkamar do?” pepra asimdanmai. “Ukupre ngeboda, erdi Gilead mutu kunung nesala yumada, deiyo kepra talepkamsere. Ukupserepa, er upupu gekepra kunkamepe,” penmai.