Judg 11 | XteSC | STEP | Nimi tenpu er sida Yefta, angeboda Gilead yala ngebodi deiamu. Er Yeftada, nimi mar porbana tep nengeda, ila puto weik ngebo kuramu. Yefta er ninda, tali-tali nyangami ner kuramnganen, Yetfa deiamu. Yefta er nai boda, Gilead kuramu.

Judges 11

Yefta yala nesala cap, Gilead yala nesala cap tep, seki upu

1 Nimi tenpu er sida Yefta, angeboda Gilead yala ngebodi deiamu. Er Yeftada, nimi mar porbana tep nengeda, ila puto weik ngebo kuramu. Yefta er ninda, tali-tali nyangami ner kuramnganen, Yetfa deiamu. Yefta er nai boda, Gilead kuramu. 2 Tonda, Gilead er nerdi nyapu ton pio weik deriramu. Anerdi deiamu nyapu konum nepi dingeda, Yefta tep upepi. “Kanda, nun naidi talepu keca yumada, men doproptume. Ada, kan deipkeu nerda, nun nin sisadi gume, yuk mutu nerdi deipkeua tepa. Tonda, tek sisi pio men domu nerdi kanda deipkeue. Tali ner utopu nerdi deipkeua tep, nun cap tonpa kuna gume,” pepra, er Yefta tep sun damai di enepra dokotepi. 3 Anengdi Yefta tep, upepya tep nengeda, ataru dipapu Yeftada, er kapu neng damai di taprapudi, sepdaro Tob mutu bena kuramu. Amutu kuramu taruda, tali bura tara kurami yu weik neng, deiyo neng upu gekena gum neng, denge weik, ‘Angebo cap kikiman kunkamepe,’ teneramidi, er damai buluprapidi, er kuramngaipu yaipa, sun tonpa kepra kuramidi, yuk neng sun keca tep, pe deipra upula dororami.

4 Uda ange utopu, pio dakuramipanen, ware kuprap taru ton mapidi, amenda taruda, Amon yala nengdi, sun Israel nesala tep mar poryai. 5 Tonda, Amon yala nengdi, ‘Israel nesala yana popkup’ tenen, yai taruda, sun Gilead tara neitamai kuramidi, nimi deiyo keami neng yumadi, Tob mutu kuramu ngebo Yefta, er damai beidi, ‘Angebo dopra tamupra duyapepa, erdi melipsetu’ tenen, er tep mororbei. 6 Sundi Yefta tep upepra moropi. “Ukutaruda kanda, nun jen talena neng, deiyo ngebo kepkusereme. Ukupsemempa, nun cap tonpa kepmepedi, sun Amon yala neng tep, mar porbenkupe,” pepra moropi. 7 Upepra moropipanen, Yeftadi tamupra, Gilead mutu talepra kurami nimi deiyo neng tep pepu. “Gume, sunda ne tep, ‘Erda nun song’ tenen, yaniramnerumdi, ne nai bo er ati kuramsa neitamai di enemnerum nengda, sun akurum adano. Tonda, ware keca deiyo tep, kange mun kupser tarupu, ne damai yana mororyanerum do?” pepra asipetepu.

8 Upepupa, sun Gilead mutu taleamya deiyo nengdi tamupra, Yefta tep pepi. “Teka, tek sisi upupu pepmasereme. Dinino, nun kabo, ukutaruda nun kan tep putapmaserpa yanmape. Atep kanda, nun pepkep ngepu, gekepra melipkuserume. Tonda, ataru peda kandi Amon yala neng tep, mar porbenkamareme. Ukupmemnyopda, kanda nun deiyo ngebo kepkamsereme. Tonda, Gilead tara neitamai kunup nesala yala-yala yuma tep, deiyo kepra talepsememdi kunkamsereme. Kandi pepmem upupu gekenkamkepe,” pepra moropi. 9 Upepi pangeda, Yeftadi tamupra sun Gilead mutu deiyo-deiyo kepra kurami neng tep upepu. “Jo, ukutaruda sundi ne tep, napropnerumpa, tamupra Gilead mutupu bepedi, Amon yala neng tep, Allah Yahwehdi er puto ne deiki deipnerepa, bena popmepyopda, sundi ne wepra deipnemumpa, nedi sun deiyo ngebo kepnedi, talenkamsene,” pepu. 10 Upepra moropupa, sundi tamupra pepi, “Jo, nun nai bo Allah Yahweh gekenmardi, dinmaserai di, ‘Tek sisi ukunkamnupe,’ pepmapa cadi, ange men kupmepyopda, erdi wenepra popkamsere. Atep, kandi pepmaserema utopu kupkamepe,” pepi.

11 Upepi pangeda, ataru dipapu, Yefta cap, Gilead mutu talepra kuramya deiyo neng cap, tamupra bei. Sun pe mutu tamupra bei pangeda, Gilead mutu kurami nesaladi, Yefta tep sun deiyo ngebo kuna cap, tonda mar porbana deiyo kemna cap tep, weprapidi, er tep erepra deipi. Ukupi dingeda, amutu nesala sundi, Mizpa mutu damai di, Yefta tep, “Ukupkamserume,” pepra, deipinge yuma cap, tonda Yeftadi, “Ukupkamsene,” peipunge yuma capda, Allah gekenai di lap pepi.

Yefta cap, Amon yala neng cap tep, seki upu

12 Ange yuma konum kupi dingeda, Yeftada, sun deiyo ngebo keprapudi, nimi ton dopra deipupa, Amon yala nesala, sun deiyo ngebo Raja tep perbei. “Sun damaida, nundi ware malinge ton kupmupupa, sundi wareng yakaserum do? Ware keca deiyo tep, nun mutu neitamai di yana mar poryakanmarum do?” pepra, yuk nengdi aupu doupra perbei. 13 Upepipa, Amon yala neng, sun deiyo ngebo Rajadi, sun aupu dubenmai neng tep, tamupra pepu. “Ange deiyoda, ake. Sun Israel nesala, Mesir mutu di tapra, bisi yakai taruda, sundi nun taleamupu tu yuma dopramsei. Ada, metekai guma. Ada, Yordan me goupra, keteng yakan tara dinin, gonga kemnada, iknapi dam tara (ara selatan), Arnon me embeuai di dipdongopra, dapu tara (arah utara) Yabok me duman cap, tonda Yordan me embeuai keteng yakan tara yuma cap, amutu yuma dopramserume. Atep nengeda, ukutaruda, nun cap podana gum dipapu, sun kange telep deiki dipapu, tamupra karepkamserume,” pepra lap pepu.

14 Yefta upu dubenmai neng, aupu yuma konum gekepidi, tamupra Yefta damai lap perbeipa, gekepu dingeda, Yeftadi tamupra nimi dopra deipupa, Amon yala nesala, sun deiyo ngebo Raja damai bana tep peipu. 15 Yeftadi peipupa, sundi perbei upuda ake. “Ne Yeftadi pepsene. Tek sisi Israel nesaladi Amon yala nesala sun taleamrum tu cap, Moab yala neng sun taleami tu cap yumada, tenpu peda pio ton men dopramsei. 16 Tek sisi kurami ngeda, lap pepkusene. Menop taru Israel nesala Mesir mutu tapra bisi yanami ada, ila laut mokon bena sekdongomupa deiamu mokon, er sida Teberau ^{▼▼Teberau – Aupu Teberauda, ton Alkitab neitamaida, Teluk Akaba seki. Ton Alkitab neitamaida, Bi Laut Mokon seki, ton Alkitab neitamaida, ila laut mokon Teberau seki, dinino, si weneri akapupapu, alaut mokonda tenpua.} amokon dam tara di kepra, ormutu katawai ada, me gum mutu tara keprapidi, Kades mutu yana wekami.

17 Kades mutu yana weki taruda, Israel nesaladi nimi ton wepra deipipa, Edom mutu bisi bana tep, amutu talepra kuramu Raja ngebo, er damai beidi, ‘Naie, kan talepra kumem mutuda, nun bisi yopu embepedi, ormutu kirikra betepe do?’ pepra moropkurume,’ peipipa, Raja Edom damai beidi moropi dinin, Edom mutu taleamnga deiyo ngebodi, ‘Telepe daembenkurume,’ men peiamu. ‘Telepe,’ men pemnga tep, sundi ‘Moab mutu neitam bisi benkup’ tenen, Moab mutu talepra kuramu deiyo ngebo tep, ‘Naie, kan talepra kumem mutu bisi neitamaida, embepedi, ormutu kirikra betepe do?’ pepra, bena moropipanen, er angebo peda, utopu, ‘Telepe,’ men pemu. Ukuamnga tep, sun Israel nesalada, Kades mutupu tupa kurami.

18 Kades mutu aneitamai apu dakuramyanen, amenda taru amutu di tapra, bisi bei taruda, Edom mutu tara cap, Moab mutu tara cap, men kepra benami dinin, katawaipu mutu, me pio gum kuamu mutu bisipu benamidi, amutupu pio ongomgenemamyanen, keteng yakan tara beidi, Moab tara neitamai men bei. Arnon me embaramnga damai benmaiyada, Moab mutu orketeng yakan tara sirikaida, tenda opkal bol ati domi. Dinin, ame goupra ortara keteng dangban tara, sun Moab mutu neitamai men benami. Atep nengeda, Moab nesala sun mutu tara neitamai peda, pio men benami. 19 Ange utopu ton, atarupu Israel nesaladi, Amori mutu nimi deiyo kepra Esibon mutu kuramudi, amutu taleamu Raja, er sida Sihon, er taleamu mutu bisi bana tep, nimi ton dopra deipipa, er tep mororbenami. Ada, sun Israel nesaladi, ‘Naio, nun pe mutu sisa wengbana tep, kandi talerum mutu neitamai bisipu kirikra betepe do?’ pepra, bena moropi. 20 Upepra moropi dinin, Raja Sihondi, Israel nesala tep, ‘Tek sisi upu penmanenge,’ men tenepu. Ange gum dinin, ‘Sunda telep dipapu men benkamenge,’ tenepudi, teka men tenepka cadi, erdi, ‘Jo, telepe, daembeso,’ men pepu. Erdi utenepudi, Sihon er jen neng yuma tep, bulupra deipupa, sun adipapu, ‘Israel nesala cap mar popdankamap’ tenen, Yahas mutu ban bisiaida, sun opkal bol di dodin tenda ati yana deipidi, Israel neng tep mar porbei.

21 Ukupi dinino, Israel nesala sun nai Bo Allah Yahwehdi, sun damai puto karepupa, Sihon cap, er jen talena neng yuma cap, Israel nesala buru neitamai deipupa, sundi popbisipidi gawal daki. Ukupidi, Israel nesalada, sun Amori nesala talepra kurami mutu tu yumada, dalupra doprami. 22 Amori nesaladi talepra, kuramipa doprami mutuda ake. Ada, dutara (arah selatan) iknapi dam tara embaramu me Arnon me duman tara di dipdongopra, itara (ara utara) dapu tara embaramu me, Yabok me duman utara dapu mutu tara cap, tonda amutu katawai me gum mutu, keteng yakan tara di dipra, ortara Yordan me goupra, keteng dangbaramre tara, Yordan me duman damai, aneitamai kure mutu tu yuma dalupra doprami. 23 Atep nengeda, ange yuma nun nai bo Allah Yahwehdi ukupyakaramngada, tali gume. Israel nesala nun nai Bo Allah Yahwehdi, sun Amori mutu nesala yuma enepra donokamodi, sun taleami mutu yuma doropudi, ‘Ne nyapu, ne mawa nesala, Israel nesala talepkameng’ tenen, sun deikipu kareamu. Dinino, kanda, ‘Gume, nun Amon yala nesaladi, sun Israel nesala yo punupmepedi, sun talerami mutu dalupra dopropkamepe. Allah er mawa nesalada, nunpu kunkamepe’ tenen, pepmarum do?

24 Atep nengeda, ataruda, kandi, ‘Amutuda tamupra dopropkaman’ tenen, pepmarem do? Ada men kuptume. Ne kangeda, sun si eremrum isok, er si Kamos, erdi kareamseu mutuda, angepu sundi tali kange deipra, amutupu pio talenkamrume. Telep ngeda, ange pua. Ange utopu, nun nai Bo Allah Yahwehdi amutu-amutu neitamai kurami nesala bisbisa kapudi, nun telep kudina tep karepseu mutu tuda, nun tepapu kareamseua tep, amutu pio talepra kunkamep ja. Atep nun taptepepa, sun men doroptume. Amutuda, nun pio talepra kunkamepe,” pepu. 25 “Tonda, kandi tenepmaremada, ‘Zipordi deiamu ngebo, Balak Raja Moabda, erda mali ngebo dinin, neda telep ngebo,’ tenepmaremdi penmarem do? Balak erdi ton, nun Israel nesala tep, mali upu pepra, ikin keca ton pio men deiamseue. Tonda, nun tep ton men yana mar pomseue.

26 Tonda, asipetepkene. Keteng tamunda, denge pio weik, tiga ratus (300) tahun neitamai yumada, Israel nesala sun Amon yala nesala taleramrum tara neitamai kuramepu dinin, ila ati arum dopra, Hesybon mutu kuramrumai cap, Aroer mutu kuramrumai cap, tonda amutu dana-dana tara kwamu yambul ati arum kuramrumai yuma cap, tonda Arnon me duman capda, amutu talepra kuramrum dinin, nun wisipra amutu-amutu kuramepu taruda, ware deiyo tep, ataruda sundi nun bisbisa kapra men enepromserumdi, amutu yuma kange di tamupra men dopromrum do?

27 Atep, kan damai ton nundi mali kupra men deiamkepu. Kan puda, nun damai mali kuamsemume. Ada kan jen talena neng cap yumadi, nun tep ‘Popbisipkamep’ tenen, poryakaramserume. Allah Yahweh erda tuai nesala yuma tep, nun upu bongdina deiyo ngebo kuserura tep, atumi di Israel yala nesala cap, Amon yala nesala cap, nun pe deiki dipapu kudanupnge yumada, Allah dipapu aupu yuma bokeipseredi, telep kweipkamasere.” Yeftadi, Amon yala nesala sun Raja ngebo tep pepu. 28 Yeftadi aupu upepra deipupa, er tara nengdi doupra beidi bena lap pepipapu, Amon yala nesala, sun ila nimi deiyo ngebo Rajadi aupu men gekepudi, yanitapnapu kupu. Ada, Amon mutu deiyo kepra taleamu ngebodi, ‘Tek pepmanera’ tenen, ‘Telepe,’ men pepu.

Yeftadi, “Amon yala neng tep, mar porbenkamne,” pepra, pedina upu peipudi Allah tep, moropu upu

29 Ataruda, Allah er sambala Yefta er nong deiki yana bukudi melipu. Ukupra melipupa, Yefta adipapu Gilead tara cap, Manasye yala neng kurami mutu cap tep, bena dirbeu. Bena dipetepudi, tamupra Gilead tara neitamai dinin, Mizpa mutupu yau. Yauopda, amutu di tamupra, Amon yala nesaladi talepra kurami mutu ton dirbeu. 30 Amutu-amutu yuma konum dirbeu dingeda, ataru dipapu Yeftadi Allah Yahweh tep, pedina upu deiki di pepra deipu upuda ake. “Ne nai Allah Yahweh, kandi, kan puto karepnetumdi, tek sisi, Amon yala nesala dopra, ne buru deiki karepnemempa, popbisipkamne. Ukuptene dingeda, nedi mambul keca ton karepkamken ja,” pepu. 31 Ne tenepmanada, Amon yala nesala tep, mar porbenedi, sun yuma tep popnedi, gawal daktenyopda, telep dipapu tamupra, ne pe mutu yanedi, ware ngebo do, ne tep, ‘Telepe pepkun’ tenen, ne ati sisa pumbon di menmena gupra yare ngeboda, tek sisi nedi angebo poprapnedi, Allah Yahweh kan si eremna cap, gispal dona cap tep, karepkamkene. Ada yapi keca popra kareryakaramkenga utopu, popnedi uku dongorameptopu kupkamakena tepa,” Yeftadi, Allah tep pedina upu deiki di pepu.

32 Upepu dingeda, ataru dipapu, Amon yala neng mar porbana tep, Yordan me goupra ortara beu. Ataru Yeftada, Allah Yahweh er puto melipka deiki di, Amon yala nesala pio weika di popra gawal daku. 33 Yeftadi Amon yala nesala pio weika di popbanmauanen, weika di popra gawal daku. Ada, Aroer mutu di dipra, Minit mutu ila pala mutu damaida, sun ila ati arum dorami ngeda, denge weik dua puluh kota (20) cap, tonda Abel-Keramim mutu neitamai kurami Amon yala nesala peda, sun yuma popra gawal daku. Israel nesaladi, Amon yala nesala yuma popipa weik depya deiki di, Israel nesala konum puto weik kupidi, erepra deiki tarato kurami dinin, sun Amon yala nesalada, nimi pio weik popra, gum kupra deipbaramya tep, sunda pio amutara nesala utopu kurami.

Yefta er ner mi tep, seki upu

34 Yeftadi, ange yuma konum kupu dingeda, erda tamupra, er pe mutu Mizpa mutupu tamupra yau. Er pe ati damai dinin, bisi tupa yakanmau taruda, Yefta er ner midi er nai bo gispal dona tep nengeda, bung-bung pena er si rebana doupudi, mut pepra er nai tep, ‘Telepe,’ peprapudi, akati pumbon di bura yakanmaupa, Yeftadi dinmau. Uda, Yefta er nyapu ton pio men deiamu dinin, aner mi tenpu deiamnga cadi, er aner mi dipapu dinmau. 35 Ataruda, Yefta er ner mi di kupmaunge epudi, pio bicau kupu. Ukupupa, er kepmau opkal kwiripra gweleptapudi, er ner mi tep upepu. “Uo, aner mio kan ukupmarema deiki di, ne dipru yawa popnere. Ware keca deiyo tep, aner mi kandi ne dipru pu jenange kweipnerem do? Ada, nedi ne nai Allah Yahweh damai, ‘Angeda kupkamne, angeda kan gispal dona tep karepkamakene,’ pepra pedina upu deiki di pepsi ngeda, kange di tamupra men doproptenya tepa. Apeipsingepu kupkamna tep, ne dipru pio pu jepnere,” pepu.

36 Upepu pangeda, aner midi tamupra, er nai bo Yefta tep upepu. “Gume ne naio, kandi Allah Yahweh damaida, ‘Ange tek sisi ukupkamkene,’ pepra, pedina upu deiki di konum pepmum ngeda, Allah Yahweh konum gekepudi, erdi melipkeua deiki di, Amon yala neng tep konum popmumdi, sun kwangdana tep, konum popra gawal dakmume. Atep, kandi Allah damai ne tep, ‘Angeda, tek sisi kupkamne,’ pepmuma utopu kupkunerume. Ada, ange pio men tapkurume naio,” pepu. 37 Yefta er ner midi er nai tep, ton cap moropu. “Naio, ne putapmaner ngeda, tenpu ton pepkukene. Ada, war butene neitamai ton, go karepkunerume. Ukupnemempa, ne ka nerapu cap, nun tonpa mutu dam tarapu, tali embadankamepe. Aembankamep taruda, nimi kapul men dopnepa, ne kaber dipapu depkamana tep, kaber nesala sun tenepmengedi kurameng utopu kupembaramnyanen, kange di tamupra amutupu yankamne. ‘Ukuptene’ tenen, moropkene,” pepu.

38 Yefta er ner mi upepupa, er nai bodi, “Telepe, dabenkamrume,” pepupa, akaber nerda, er ka nerapu cap tonpa, iknapi dam tara mutupu bena kuramidi, ‘E, nun ka nerda, kaber taru dipapu depkamre ja’ tenen, dipru karepupa, engeprapidi, tali embandarami. Ada, sun ka nerda, nimi dopra mi derina gum di, tali kaber dipapu depkamnga tep kurami. 39 Awar butene pemutopu konum kupu pangeda, tamupra er nai Yefta koripu yau. Yau pangeda, aner mi er naidi Allah Yahweh er damai tep, ‘Ukupkamne,’ pepra, pedina upu deiki di pemutopu, er ner mi dopra, Allah er gispal dona tep karepu. Er anerda nimi dona gum dipapu, kaberpu kuramnganen, popupa depu. Atep nengeda, sun Israel mutu neitamai kurami nerapu yumada, aner midi ange ukuamnga tep, sundi ange tenepnedi, aketeng tamun, aketeng tamun yuma, ue dumbari tumi deiki di, sun Israel kaber nerapu yuma peda, nimi gumai bengedi, Yefta er ner mi kupu ngeda, kange di ton cap, tenepmengedi, engenapu kununge. 40 Ada, aner midi ukuamnga tep, sun Israel mutu neitamaida, nimi dona gum kaber nerapu yumada, aketeng tamun, aketeng tamun yuma, ue dumbari tumi deiki di, iknapi mutu tupa-tupa bengedi, Yeftada, Gilead mutu kuramu ngebodi deipu ner mi tep kwamunge tenepnedi engepra kuramnanen, tamupra sun pe ati yakarami. Sun anerapuda, kange moupra douamidi, embandarami.