Judg 12 | XteSC | STEP | Ataru dipapu, Efraim yala nesala yumadi, ‘Mar podarbenkamep’ tenen, ketenepra sengpepi. Ukupi dingeda, adipapu ketenepra Yordan me goupra, ortara keteng yakan tara, Zafon mutu bei. Beiopda, sun anesaladi Yefta tep pepi. “Ware deiyo tep kanda nun ton men lap pepmaserem dipapu, Amon yala nesala tep porbenmamum do? Nun cap lap pepmasetumpa, nun kikiman kan cap wisipra benmatepye. Atep ukutaruda, nundi kan ati uku dongopkukepe. Uku di kan ati jepkamre taru peda, kan nong cap, kan cap kikiman wisipra kurum neng cap, sun yumada, uku di jepra, gum kupra deipkamsere,” pepi.

Judges 12

Yefta cap, Efraim yala nesala cap, kunkami mutu tep, seki upu

1 Ataru dipapu, Efraim yala nesala yumadi, ‘Mar podarbenkamep’ tenen, ketenepra sengpepi. Ukupi dingeda, adipapu ketenepra Yordan me goupra, ortara keteng yakan tara, Zafon mutu bei. Beiopda, sun anesaladi Yefta tep pepi. “Ware deiyo tep kanda nun ton men lap pepmaserem dipapu, Amon yala nesala tep porbenmamum do? Nun cap lap pepmasetumpa, nun kikiman kan cap wisipra benmatepye. Atep ukutaruda, nundi kan ati uku dongopkukepe. Uku di kan ati jepkamre taru peda, kan nong cap, kan cap kikiman wisipra kurum neng cap, sun yumada, uku di jepra, gum kupra deipkamsere,” pepi. 2 Dinino, Yeftadi tamupra pepu, “Deiyoda ake. Nun Gilead yala neng cap, Amon yala neng cap mar podanada, ila kange mun nge tep popdapu. Nundi, ‘Ukupkupe, Amon tara nesala mar porbenkupe,’ tenepmepu taruda, nedi, ‘Anengo, sundi ne melipnengepa, sun Amon yala nesala yuma popbisipkamep’ tenen, konum kong pepsisi. Dinino, sundi ne tara neng tep men melipnerume. Sundi, sun Amon yala anesala, sun buru deiki di yana men daluproprumdi, sun ikin keca deiamseiya neitamai di men lyepromserume.

3 Ange tep nengeda, nedi sun tep tenepsisi ngeda, ‘Sundi ne tep, yana men melipkamanenge,’ tenepsisi. Atep, sun Amon yala nesaladi ne tep popnengopda, telep pua,’ tenepsidi, ne nong yumada, karepsi. Utenepsidi, sun Amon yala nesalada mar porbesi. Ukupsidi, ‘Ne tenpu deiki dipapu dadepkamne,’ tenepsi. Utenepsi dinino, Allah Yahweh erdi ne tep melipneupa, nedi sun Amon yala nesala yuma popra gawal daksi. Atep nengeda, ukutaru sunda ware deiyo tep, ne damai mali upu pepnerumdi, mar poryanerum do?” Yeftadi sun Efraim yala nesala tep pepu.

4 Ukupra pepdai pangeda, Yeftadi sun Gilead tara kurami nesala yuma tep, kong pepupa bulupra yai. Bulupra yaiopda, mar podanmaianen, Efraim yala nesala yumada popi. (Uda, sun Gilead tara kurami nesaladi, Efraim yala nesala tep mar porbanmaiya deiyoda, ake. Ada, sun Efraim yala nengdi, sun Gilead tara kurami neng tep upepi. “Sunda, pio mali kweipserume. Sun Gilead tara kurum nengda, menop taruda, tek sisi nun Efraim yala nesala kan-kan neitamai kuramrum dinin, nun tep tamsemum taru di, nun Efraim yala nesala kunupai atara cap, ortara capda, sun Manasye yala nesala, sun kunung mutu neitamai kure mutuda, sundi sun ati dopra deiamrume,” pepi. Sun Efraim yala nengdi, sun Gilead tara kurami neng tep, upepi pangeda, yu kupupa, deremdaramidi, mar podarami.

5 Menop taruda, sun Gilead tara neitamai kurami nengdi, Yordan me goupra, ortara keteng dangban tara bisi bana tep, Yordan me neitamai kwamu gelai, ame gouramya gel deiki ortara benmantoi bisi kwamngai tep, agel dalupra dopropidi, ‘Nun podan neng popkup’ tenen, pio kalengami. Kalengami taru neitamaida, ware ngebo do yuma, Efraim yala nesala dinin, Gilead tara keana tep kurami nengdi, ‘Ortara keteng dangban tara, Efraim nesala kunungai tamupra benkun’ tenen, yakanmai nengda, sun Gilead tara nengdi asimpeterami. Ada, sun Gilead mutu nengda, Yordan me gouramya damaipu bena bukmandi, kalekmanpanen, sun Efraim yala nesala ton, “Yordan me goupra ortara benkune,” pepredi, yana moropre pangeda, sun Gilead tara nengdi, “Kanda tek sisi Efraim yala ngebo kurum do?” upepra, asipmengepa, “Tek sisi neda Efraim yala ngebo gume,” pepnopda, sundi tamupra perami.

6 Sundi abisi yakarami neng tep dipeteramidi, asipetepra uperami. “Kanda aupu, ‘Syibolet’ pepo,” peramipa, sun Efraim yala nengdi, ange upu ‘Syibolet’ men pepmanto kuramya cadi, sundi, ‘Sibolet’ angepu perami. Yordan me gouramya damai yakarami nengdi, tali upu deiki dinopadi, ‘Sibolet’ angepu pepyopda, adipapu sun Gilead tara nengdi aneng tep kunupra tomorami. Tomoramidi, ormutu bana tep, Yordan me gouramyaipu portamami. Ukupra porami taru neitamaida, sun Gilead tara kurami nengdi, Efraim yala nesala denge pio weik, men nukmanto empat puluh dua ribu (42,000) neng portamami.

7 Keteng tamun ngangtan bari (6) tahunda, Yefta erdi ila nimi deiyo ngebo keamudi, sun Isarel yala nesala yuma tep taleamudi upu peramu. Ukupra taleamupa, dakuramyanen, er konum depu pangeda, er peina tep nengeda, er pe mutu sisa deiami mutuda, Mizpa mutu dinin, Gilead tara neitamaipu peipi.

Ebzan cap, Elon cap, tonda Abdon cap tep, seki upu

8 Yefta konum depu pangeda, Betlehem mutu nengdi deiami ngebo Ebzandi, nimi deiyo keprapudi, Israel nesala taleamu. Erdi Yefta er yo punupudi, nimi deiyo kepra taleamudi, upu peramu. 9 Ebzan er nimi deiyo ngebo kepra tekamu taru neitamaida, nimida tiga puluh (30) neng deiamu. Ange utopu, nerapu peda, tiga puluh nerapu deiamu. Erdi deiamu ner nyapu yuma tep nengeda, erdi, ‘Yuk mutu yala neng dipapu dopkameng,’ tenepudi, aner nyapu yuma dopra, yuk yala neng tep kareramupa dorami. Ukupra doraminge pununa tep nengeda, yuk yala nerapu ton, tiga puluh kaber nerapu, yuk yala nerapu dopra, er nyapu tiga puluh neng karena tep, dopra yau. Ukupu dingeda, Ebzan erdi nimi deiyo ngebo kepra tekamudi, sun Israel yala nesala taleamu keteng tamun dengeda, yoneitam bari (7) keteng tamun deiki taleamudi, upu peramu. 10 Ukuramnganen, amenda taruda, Ebzan er konum depu pangeda, er tara nengdi, er nong dopra, adipapu er pe mutu Betlehem mutu neitamaipu bena peipi.

11 Ebzan er konum depu pangeda, Zebulon yala ngebo, er si Elondi, sun Israel nesala taleamudi, upu peramu. Sun Israel yala nesala melipra douamudi, upu lepsisikra pena tep, nimi deiyo ngebo tekudi, upu peamu taruda, keteng tamun denge pio weik, sepuluh (10) tahun deiki di taleamudi upu peramu. 12 Ukuramnganen, amenda taruda, Zebulon mutu ngebo, Elon konum depu pangeda, Zebulon mutu neitamai dinin, Ayalon mutupu bena peipi.

13 Utopu ton, Elon konum depu pangeda, nimi si Hilel, erdi deiamu ngebo, er si Abdon, erda Piraton mutu ngebo, erdi sun Israel yala nesala melipra doupudi, upu lepsisingna tep, erda nimi deiyo kepra tekudi upu peramu. 14 Angebo talepra kuramu taruda, er nyapuda empat puluh (40) di deiamu. Tonda, er nyapudi deiami nyapu yumada, tiga puluh (30) neng deiami. Sun adeiami neng yumada, tujuh puluh (70) keledai bisam yuk-yuk bisi bukra embana tep ketenepra deiami. Ataruda, Abdon er pel dona tep nimi deiyo kepra kuramu taruda, er nyapu sisa, sun Israel nesala tep, talepra kuramu keteng tamun neitamaida, delapan (8) tahun deiki di, nimi deiyo ngebo kepra tekamudi upu peramu. 15 Ukuramiyanen, Hilel er mi Abdon, Piratot mutu ngebo konum depkopda, Efraim yala nesala kurami mutu neitamai dinin, ati arum dorami mutu er sida, Piratot mutupu peipi. Ada, Amalek yala neng sun kurami mutu dinin, iknapi dam tara pirmanpu bena peipi.